Matye 23 - Cebaara Bible 2010

Zyezu n jo paa kɔ̀rɔsíi làlwaw sɛ́bɛwelebéle ní Farisibèle na

¹ Lǎli bee ni a Zyezu gi joo syɛ́ɛnmi ma n fàra wi pìitamabèle na níì jo:

² «làlwaw sɛ́bɛwelebéle ní Farisibèle i nyɛ Mowizi sìndɛɛgi ni.

³ Gee bee na gi yɛlɛ yele í da lúro be ma kérigèle myɛ ni be nyuu lè, yáā ge kpéʔele, kàjáa ki ga yɛlɛ yele í da be kapyegèle kpéʔele í. Níì cán gee be nyuu lè, pe o gi kpéʔele í.

⁴ Pe i tugoliberi pwoo ni taari syɛ́ɛnbèle fókaanya na, kàjáa pe wàa si a fɔ̀lɔ bi kabɛɛlɛ nibin tɛ́ʔɛ bi be dɛ̀ɛmɛ di na í.

⁵ Pe i be kérigèle myɛ kpéʔele, jàngó syɛ́ɛnbèle í da poro nyaagi. Koro na pe be sápabèle sámagi wogbolobèlē ní, ní i nyámari yirigi wodɔnɔrɔ ní pe búroyi na.

⁶ Pe ga ni sériw lìile líi, pe n ni yɛʔɛ̀ ma tɛɛ̀tɛ́nɛyi caa, ní wɔ́ɔ i caa bàā tɛ̀ɛ́n kòrikpoloyi na sérikpaayi ni.

⁷ Pe wɔ́ɔ i caa syɛ́ɛnbèle í da poro syáanri syɛɛnkpoʔolomi tɛ́ɛyɛ ni sáà poro yiri, Tamafɔw.

⁸ Kàjáa ki ga yɛlɛ paa yele wàa yiri Tamafɔw í. Níì cán yele Tamafɔw i nyɛ nibin, yele myɛ si i nyɛ senyɛnnɛgɛ.

⁹ Ki ga yɛlɛ yele í da wàa yiri yele tóo tári na í, níì cán yele Tóow i nyɛ nibin, wi lè nyɛ̀ʔɛni na.

¹⁰ Ki ga wɔ́ɔ̀ yɛlɛ paa yele yiri Kùndigibéle í, níì cán yele Kùndigiw i nyɛ nibin wi lè Kirisi.

¹¹ Wee wi kpɔ́ʔɔ lè yele ni, wee bee n yɛlɛ wi pye yele nìgwɔɔ.

¹² Wee wi ga ni wiyɛɛ gbɔ́ʔɔgi lè, pe a ba wee bee cɛ́rɛ, wee si wi ga ni wiyɛɛ jɛ́rɛgi lè, pe a ba wee bee kpɔ́ʔɔ.

Zyezu n làlwaw sɛ́bɛwelebéle ní Farisibèle syɛɛnjóotɛɛyɛ siin joolo kéele dánga

¹³ «Wɔʔɔli a pye yele na, làlwaw sɛ́bɛwelebéle ní Farisibèle, yele bele ye nyɛ lè syɛɛnjóotɛɛyi siin joofɔɔlɔ! Níì cán yele n nyɛ̀ʔɛni fànʔa tɔ́n syɛ́ɛnbèle na. Yele o jǐn gi ni í, yele si ga wɔ́ɔ̀ fɔ̀lɔ n bele yaʔa pe i jǐn gi ni í. [

¹⁴ Wɔʔɔli a pye yele na, làlwaw sɛ́bɛwelebéle ní Farisibèle, yele bele ye nyɛ lè syɛɛnjóotɛɛyi siin joofɔɔlɔ! Níì cán yele i lɔgucebèle kɔ́lɔ yárira líi ní i nyɛ́ɛri ni mɔngi bi yeyɛɛ dɛ̀ɛn syɛɛnsinbéle. Koro na yele kútiiw a ba kpɔ́ʔɔ sɔ̀lɔ.]

¹⁵ Wɔʔɔli a pye yele na, làlwaw sɛ́bɛwelebéle, ní Farisibèle, yele bele ye nyɛ lè syɛɛnjóotɛɛyi siin joofɔɔlɔ! Níì cán yele i nyaari ni sólomi lòkpɔʔɔ ní tári myɛ forogi bi sa wàa nibin fúngo taa kàriga, yele ga wi fúngi kàriga n kwɔ́ɔ, yele n wi pye tɛɛwɔʔɔgi pyà n sɔ̀lɔ yeyɛɛ na fwɔɔ tɔlɔyɔ siin.

¹⁶ Wɔʔɔli a pye yele na, yele bele ye nyɛ lè yɛɛ̀kinibèle, ní i nyɛ àmɛɛ fúunbéle nyɛ lè! Yele i gi nyuu níì jo: ‹Syɔɔn ga kàli kpɔ̀ʔɔrɔli kpaʔa fúngo na, kàligi bee o nyɛ yafyɛn í. Kàjáa wàa ga kàli tɛ́ɛw na, wee wi nyɛ lè kpɔ̀ʔɔrɔli kpaʔa fúngo ni, kàligi bee a wi cò.›

¹⁷ Yele kanaa-sìnjánbèle, ní fúunbèle! Gìí gi kpɔ́ʔɔ, tɛ́ɛw láà, ba fwɔɔ kpɔ̀ʔɔrɔli kpaʔa fúngo, gee gi tɛ́ɛw kàragí lè Kolocɔlɔɔ wóo?

¹⁸ A yele wɔ́ɔ̀ jo: ‹Syɔɔn ga kàli sáriga-wòlo-yafaangi na, gee bee o nyɛ yafyɛn í. Kàjáa wàa ga kàli sárigaw na wi lè sáriga-wòlo-yafaangi na, kàligi bee a wi cò.›

¹⁹ Yele fúunbèle, gìí gi kpɔ́ʔɔ, sárigaw láà, ba fwɔɔ sáriga-wòlo-yafaangi, gee gi sárigaw kàragí lè Kolocɔlɔɔ wóo?

²⁰ Koro na wee wi ga kàli lè sáriga-wòlo-yafaangi na, wi n kàli yafaangi na, ní yáriri myɛ ní di nyɛ lè gi na.

²¹ Wee wi ga wɔ́ɔ̀ kàli kpɔ̀ʔɔrɔli kpaʔa fúngo na lè, wi n kàli kpɔ̀ʔɔrɔli kpaʔa fúngo na, ní wee na wi kòró lè gi ni.

²² Wee wi ga kàli nyɛ̀ʔɛni na lè, wi n wɔ́ɔ̀ kàli Kolocɔlɔɔ fàngoli na ní wee na wi tɛ́ɛn lè li na.

²³ Wɔʔɔli a pye yele na, làlwaw sɛ́bɛwelebéle, ní Farisibèle, yele bele ye nyɛ lè syɛɛnjóotɛɛyi siin joofɔɔlɔ! Níì cán yele i mantiw, ní anisiw, ní kumɛniw yáʔa wóo ni kaangi Kolocɔlɔɔ ma, níì kasingèle, ní nyínimi, ní tágali kapyegèlē yaʔa gele ge nyɛ lè Mowizi làlwaw kakpologéle. Yele maa yɛlɛ bi dée ra gele bee kpéʔele bi fàra toro na.

²⁴ Yɛɛ̀kinibèle, yele i nyɛ àmɛɛ fúunbéle nyɛ lè, ncan yele i sísyɔɔn-piinyɛɛngèle fyɛɛni ni yirigi yele lògbaagi ni ní si i fàlibaayi jóori.

²⁵ Wɔʔɔli a pye yele na, làlwaw sɛ́bɛwelebéle, ní Farisibèle, yele bele ye nyɛ lè syɛɛnjóotɛɛyi siin joofɔɔlɔ! Níì cán yele i yagbaagèle ní pɛ́ɛgèle kàdoyo jé ni mùú, kàjáa ge fúnyi n nyìn kàyuugi, ní lìidinni, ní gbaadinni na.

²⁶ Farisio, mɔ i nyɛ fúuɔn. Ki maa yɛlɛ mɔ í yagbaali ní pɛ́ɛli fúnyo jée mùnu gbɛnʔɛnɛ, ge kàdoyi si náa gbǎn pye wojanya ní.

²⁷ Wɔʔɔli a pye yele na, làlwaw sɛ́bɛwelebéle, ní Farisibèle, yele bele ye nyɛ lè syɛɛnjóotɛɛyi siin joofɔɔlɔ! Níì cán yele n kɔ̀ɔngēle wíri, gele syɛ́ɛnbèle fílige a ge nyɔɔ kàfugi na lè, á ge fúnyi si nyìn kúbèle kacere na, ní yafɔnʔɔri féleye myɛ na.

²⁸ Anbée si yele wɔ́ɔ̄ nyɛ syɛ́ɛnbèle nyɛ́nɛ na syɛɛnsinbéle kàdoyi na, á yele fúnyi si nyìn syɛɛnjóotɛɛyi siin joolo ní kakolobyeri na.

Zyezu n wɔʔɔli kéele joo n tɛ̀ɛn

²⁹ Wɔʔɔli a pye yele na, làlwaw sɛ́bɛwelebéle, ní Farisibèle, yele bele ye nyɛ lè syɛɛnjóotɛɛyi siin joofɔɔlɔ! Níì cán yele i kanyaajoobèle kɔ̀ɔngēle faanri, ní wɔ́ɔ i syɛɛnsinbèle kɔ̀ɔngēle fèré.

³⁰ Níì jo: ‹Wolo ga maa pye naa wolo tóolɛɛbèle làla ni, wolo mǎà dée pínɛ ní be ní bi kanyaajoobèle sìsyaan wo í.›

³¹ Kánmi bee na yele yele tiimaa séeraw kpéʔele, n gi tɛ̀ɛn yele i nyɛ pe jàala, poro bele be kanyaajoobèle kpóo lè.

³² Ki n yɛlɛ ye yele tóolɛɛbèle kapyegèlē foro!

³³ Yele wàbiyi, màátɔnw jàala, mɛ̀ɛ́ yele a gbǎn syɔɔ tɛɛwɔʔɔgi kútii ma bi sɛ́ɛ?

³⁴ Koro na ye wéle, mii a ra kanyaajoobèle, ní sícilibèle, ní làlwaw sɛ́bɛwelebéle tungu yele ma. Yele si a ba ra be pèle kúu, si wɔ́ɔ ra pèle kóri tiipariyi na, sáā pèle kpúmɔn ní sapiigèlē ní yele sérikpaayi ni, sáā be wɔʔɔ da máari kěyi ni.

³⁵ Koro na Kolocɔlɔɔ a ba yele yíbe syɛɛnsinbèle myɛ sìsyaan kéele na, wee wi wo lè tári na, n séli syɛɛnsinw Abɛli sìsyaanw na n baa nan Zakarii wów na, wi lè Barakii jáaw, wee yele da kpóo lè kpɔ̀ʔɔrɔli kpaʔa fúngo ni sáriga-wòlo-yafaangi taana.

³⁶ Mii a gi joo yele ma kányɛʔɛ ni, kérigèle naa myɛ a ba too lǎli naa syɛ̀ɛnnɛ na.

Zyezu fun-yáagi Zyerusalɛmi kéeli na

³⁷ «Zyerusalɛmi, Zyerusalɛmi, mɔ wee wi kanyaajoobèle kúu lè ní i bele wábagi ní kàdɛnɛri ní, bele be tungu mɔ ma lè, làrigēle saʔa ni mii maa ni caa bi mɔ piibèle kpóʔoro àmɛɛ gònɔɔ gáà wi gòpiigèle kpóʔoro lè wi fókaanyi láara ni, yele si ga fɔ̀lɔ í.

³⁸ Wéle, yele kpáagi n kòro yele ma wowaʔa ní.

³⁹ Níì cán mii a gi joo yele ma, nlaʔa lǎli naa na, yele a tɔ̀nɔ́ ní mii nyaa í, bi taa yele í ba gi joo si jo: ‹Wee wi maa lè Kàfɔw mɛ́ʔɛ na, ki n yɛlɛ dùbaw í pye wi ma.› »