Matye 22 - Cebaara Bible 2010

Cèpɔrigi lìigbɔɔlɔ kaseele

¹ A Zyezu níì kàseelaa wáa be ma níì jo:

² «Nyɛ̀ʔɛni fànʔa i nyɛ àmɛɛ fànʔafɔwaa nyɛ lè, wee wi da wi jaà cèpɔrigɔ liile sámaga lè,

³ níì wi falipyebèle tun be sa syɛ́ɛnbèle yeri, bele wi da jo pe ba cèpɔrigi lìile lìi ní woro ní lè. Pe si ga sáà fɔ̀lɔ n pan í.

⁴ A wi níì falipyebèle pèle nikwɔɔlɔ tun níì jo: ‹Ye sa mii syɛɛn-yeribèle pye, mii n mii lìíli sámaga n kwɔ́ɔ, níì cán mii n mii nǐyi ní mii sǐnmi yaweere kpóo, yáriri myɛ i nyɛ wozamaga-gwɔ́ɔrɔ ní, yaa maa ye ba cèpɔrigi lìile lìi.›

⁵ Kàjáa a be di fáala níì fala, a wàa kári wi tiimaa ségi ma, a wee kári wi jàgiwáari kurugo.

⁶ A wozanbèle wi púlobèle cò n wɔʔɔ níì be kpóo.

⁷ A fànʔafɔw ga gee bee lóʔo, a wi fúngi fala n tanʔa. A wi wi sùlasiibèle tun a be sáà syɛɛnkpoobèle bee kpóo, níì be kěgi sórigo.

⁸ Lǎli bee ni a wi wi falipyebèle pye: ‹Cèpɔrigi lìile n tɔ̀nɔ n sámaga n kwɔ́ɔ, kàjáa mii syɛɛn-yeribèle ga nyɔɔ n yɛlɛ ní gi lìíli ní í.

⁹ Koro na yaa syée kàlari-kóloyi ni, bele myɛ ye ga sáà nyaa lè, ye be yeri pe ba cèpɔrigi lìile lìi.›

¹⁰ A falipyebèle bee yiri n kári kogboloyi ni n sáà syɛɛnpeebèle ní syɛɛncanbèle myɛ kpóʔoro n pan, bele myɛ be tɛ́nɛ̀ nyaa lè, a cèpɔrigi kpaʔa baa nyìn suliibèle na.

¹¹ A fànʔafɔw ga jée yaà sa suliibèle saanri wéle, a wi sáà nànwaa nyaa yaà be ni, cèpɔrigi búrogo fun.

¹² A wi wi pye: ‹Ní tàannyɛnnɛ, mɛ̀ɛ́ mɔ pye níì jée naa cèpɔrigi búrogo fun?› Wi ga yafyɛn taa bi joo í.

¹³ A fànʔafɔw gi joo wi nìgwɔɔbèle ma níì jo: ‹Ye wi kɔ́yi ní wi tɔ́lɔyi pwɔɔ, ye sa wi wáa kàfugi na yébiliwɔɔli ni, beè syɛ́ɛnbèle a ra sùpiigèle wáa sáā gǎngèle kúru lè.›

¹⁴ Níì cán woyeribèle n nɛʔɛ, kàjáa wonyɛnɛ-wòlobèle ga nɛʔɛ í.»

Nyǔnyi lɔ́rɔ ti a da sàrá Sezari ma lè

¹⁵ Lǎli bee ni a Farisibèle kári n sáà peyɛɛ nyaa n joo àmɛɛ poro a gi pye sɛ́ɛ lè si Zyezu taa bi cò wi nyɔɔsyɛɛnri na.

¹⁶ A be fala n be pìitamabèle tun wi ma ní Herodi taʔafɔbèle ní, a be sáà wi pye: «Tamafɔw, wolo n gi cán mɔ i kányɛɛgi nyuu ní i Kolocɔlɔɔ kólogi tèé syɛ́ɛnbèle na kányɛʔɛ ni, mɔ o fɛ̀ɛgí syɔɔn faala na í. Níì cán mɔ o syɔɔnwaa yirigi wàa ni í.

¹⁷ Koro na gee mɔ sɔ̀ngí lè, mi gi joo wolo ma, a gi yɛlɛ lé waa nyǔnyi lɔ́rɔ kaangi Sezari ma láà, koro ga jáa wo ŋɔ́n?»

¹⁸ Kàjáa àmɛɛ Zyezu be péemi sɔ̀ngurɔ cán lè, a wi be pye: «Nyàʔá na yele mii pingi ni wéle yele syɛɛnjóotɛɛyi siin joofɔɔlɔ?

¹⁹ Wáliwee ní ye nyǔnyi lɔ́rɔ kaangi lè, ye ba wee bee wàa tɛ̀ɛn mii na.» A be sáà deniye láa n baa tɛ̀ɛn wi na.

²⁰ A Zyezu baa be yíbe níì jo: «Wìí syɔ́ɔn yɛ́ʔɛ ní wi mɛ́ɛgi gi gee wáliw na?»

²¹ A be jo: «Sezari wii.» A wi be pye: «Koro na gee gi nyɛ lè Sezari wógi, ye gi kaan Sezari ma. Gee si gi nyɛ lè Kolocɔlɔɔ wógi, ye gi kaan Kolocɔlɔɔ ma.»

²² A pe ga gee bee lóʔo a be i káama gi na, níì núngo wi taana n kári.

Yíbege kúbèle nyán-yirile kéele na

²³ Cángi bee wonijanga na, a Sadusebèle pèle pan wi ma, poro bele be gi nyuu lè níì jo kúbèle a nyán í. A be baa Zyezu yíbe níì jo:

²⁴ «Tamafɔw, Mowizi n jo: Nànwaa ga kùu pyà fun, fwɔɔ wi senyɛnw í wi céw pɔri, wi ga pyà see, pìíw bee a pye wi senyɛnw mɛ́ʔɛ na.

²⁵ Nànbēle kɔrɔsiin si maa pye ní wolo ní, pe maa pye senyɛ̀nnɛ. A wozeliw cɔlɔɔ pɔri ní baa kùu pyà fun níì céw yaʔa wi cɔnɔw ma.

²⁶ Anbée siin wów ní taanri wów wɔ́ɔ̀ pye fwɔɔ n sáà nan kɔrɔsiin wów na.

²⁷ Koro myɛ kàdoʔo ma, a céw náa baa kùu.

²⁸ Koro na kúbèle ga baa nyán, wìí wóo wi a pye céw bee be kɔrɔsiinw ni, níì cán pe myɛ n wi pɔri?»

²⁹ A Zyezu be yari: «Yele n pùuni ncan yele ga Kolocɔlɔɔ syɛɛnsɛbɛri cán í. Yele ga wɔ́ɔ̀ wi séew cán í.

³⁰ Níì cán kúbèle ga baa nyán, nàɔn a ní cɔlɔɔ pɔri í, pe si a ní wɔ́ɔ cɔlɔɔ kaan nàɔn ma í, fwɔɔ pe a pye àmɛɛ nyɛ̀ʔɛni tundunbéle nyɛ lè nyɛ̀ʔɛni ni.

³¹ Gee si gi kúbèle nyán-yirile kéele kwɔ́ɔ lè, gee Kolocɔlɔɔ joo yele ma lè, yele ga kɔ́ɔ̀ gi wéle sɛ́bɛw ni ì? Wi n jo:

³² ‹Mii wi nyɛ Abirahami Kolocɔlɔw, ní Izaaki Kolocɔlɔw, ní Zyakɔbi Kolocɔlɔw.› Kúbèle wóo ban wi nyɛ Kolocɔlɔɔ í, niweebèle wóo wi nyɛ Kolocɔlɔɔ.»

³³ A syɛ́ɛnmi ga gee bee lóʔo, a bi i káama wi tamani na.

Tundunri ti nyɛ ti myɛ yɛ́ʔɛ ma lè

³⁴ A Farisibèle ga gi lóʔo Zyezu n Sadusebèle nyɔ́ɔyɔ tɔ́n, a be peyɛɛ gbóʔoro n pan wi ma.

³⁵ làlwaw sɛ́bɛwelewaa maa pye be níngi ni, a wi Zyezu yíbe jàngó bi wi nyɔ́ɔgi pye wéle níì jo:

³⁶ «Tamafɔw, tundunrìí di nyɛ ti myɛ yɛ́ʔɛ ma Mowizi làlwaw sɛ́bɛ ni?»

³⁷ A wi wi pye: « ‹Mi mɔ Kafɔw Kolocɔlɔɔ kéeli yaʔa li mɔ dɛ́nɛ ní mɔ zɔnw myɛ ní, ní mɔ fúngi myɛ ní, ní mɔ sɔngumi myɛ ní.›

³⁸ Dee bee di kpɔ́ʔɔ ní i nyɛ tundunzelidi.

³⁹ A siin wóri di wíri. Ti n jo: ‹Mɔ syɛɛnnyɛnw kéele yaʔa li mɔ dɛ́nɛ àmɛɛ mɔ miyɛɛ dɛ́nɛ lè.›

⁴⁰ Tundunri naa tɛ́ɛyɛ siin di nyɛ Mowizi làlwaw sɛ́bɛ ní kanyaajoobèle sɛ́bɛ myɛ nyúngo.»

Kirisi ní Davidi

⁴¹ Amɛɛ Farisibèle peyɛɛ gbóʔoro lè, a Zyezu be yíbe

⁴² níì jo: «Nyàʔá yele sɔ̀ngí Kirisi kéeli na? Wìí jáa wi nyɛ?» A be wi yari: «Davidi jáa wii.»

⁴³ A wi be pye: «Mɛ̀ɛ́ si gi pye n sɛ́ɛ, á Davidi kɔ́ɔ̀ wi yeri Pìicǎnni báriga ni Kàfɔw, àmɛɛ wi gi joo lè níì jo:

⁴⁴ ‹Kàfɔw n gi joo mii Kàfɔw ma níì jo: Ba tɛ́ɛn mii kàliige ma fwɔɔ bi taa mii í mɔ nigoobèle cáan, mɔ si mɔ tɔ́lɔyi taʔa be na?›

⁴⁵ Ki si ga pye Davidi n wi yeri Kàfɔw, mɛ̀ɛ́ wi a gbǎn ní pye wi jaà bi sɛ́ɛ?»

⁴⁶ Syɔɔnwaa faala ga gbàn n syɛɛnlurugori kaan wi ma í. Nlaʔa cángi bee na wàa faala ga níì fɔ̀lɔ n wi yíbe keelaa na nyáana í.