Matye 21 - Cebaara Bible 2010

Zyezu i jǐn Zyerusalɛmi ni

¹ Lǎli ni be nùuni Zyerusalɛmi na lè níì nan Bɛtifazye na gi lè Olivye tíiri nyanbelege taana, a wi wi pìitamabèle pèle siin tun,

² níì be pye: «Yaa syée kěgi yaa ma, ki lè yele yɛ́ʔɛ ma. Yele ga jée terire yele a jòfani nyaa wobwɔɔɔ ní, ní wi pyà ní. Ye be sánʔa yaa maa.

³ Wàa ga yarigaa joo yele ma, ye wi yari: Kàfɔw wi be caa, koro ga pye wi a be yaʔa yele ma terire yaa maa.»

⁴ Gee naa myɛ n kpéʔele jàngó syɛ́ɛnri í foro dee kanyaajoow da joo lè níì jo:

⁵ «Ye Siyɔn calipili yari, ‹wéle, mɔ fanʔafɔw wi maa wee mɔ ma màámi ni. Ncan wi n lúgu n tɛ́ɛn jòfani na, jòfanipile na, gee bee n jo, jòfanicaa pyà na.› »

⁶ A pìitamabèle kári n sáà gi kpéʔele àmɛɛ Zyezu gi joo be ma lè.

⁷ A be pan ní jòfaninɔɔw, ní wi pìíw ní wi ma, ní baa be búroyi taʔala be na, á wi tɛ́ɛn búroyi na.

⁸ A syɛ́ɛnmi saʔa i pi búroyi cáan kólogi na, á wozanbèle fala ni tíiyi wára cɛnɛ n ba ni cáan kólogi na.

⁹ A yɛʔɛ̀ ma syɛ́ɛnmi ní kàdoʔo ma wómi i yákpogèle wáa níì jo: «Kpɔ̀ʔɔrɔli í pye Davidi Jáaw ma. Wee wi maa lè Kàfɔw mɛ́ʔɛ na, ki n yɛlɛ dùbaw í pye wi ma. Kolocɔlɔɔ n yɛlɛ ní kpɔ̀ʔɔrɔlɔ ní nyɛ̀ʔɛni ǹjoʔo ni.»

¹⁰ A wi ga ni jǐn Zyerusalɛmi ni, a gi kěgi wòolo myɛ fúnyo wɔ́ɔ. A be jo: «Wìí wi wee naa?»

¹¹ A syɛ́ɛnmi jo: «Wee naa wi nyɛ Zyezu, wi lè kanyaajoow, wee wi yìri lè Nazarɛti ma, Galile tári ni.»

Zyezu n jée kpɔ̀ʔɔrɔli kpaʔa kàcoolo ni

¹² A Zyezu sáà jée kpɔ̀ʔɔrɔli kpaʔa kàcoolo ni níì fala ni yapárabèle ní yasyɔɔbèle myɛ nɛnɛ ni yirigi li ni. Níì wálifalibèle tàbalibéle ŋɔrigɔ n cáan cáan n fàra kàtopárabèle kòrigēle na.

¹³ A wi be pye: «Ki maa sɛ́bɛ níì jo: ‹Pe a ra mii kpáagi yiri Kolocɔlɔɔ nyɛ́ɛrigi kpaʔa,› kàjáa yele n baa gi kàriga kàyuubēle tɛɛkòrogo.»

¹⁴ A fúunbèle pèle ní tɔyaayafɔbèle pèle nùuni wi na kpɔ̀ʔɔrɔli kpaʔa ni, a wi be pɔʔɔ.

¹⁵ A sáriga-wòlobèle kàfɔɔlɔ ní làlwaw sɛ́bɛwelebéle ga kakpoloyi nyaa, yee Zyezu kpéʔele lè, ní wɔ́ɔ̀ pìíbèle yákpowáara lóʔo kpɔ̀ʔɔrɔli kpaʔa kàcoolo ni, àmɛɛ pe gi nyuu lè níì jo: «Kpɔ̀ʔɔrɔli í pye Davidi Jáaw ma,» a be fúnyi fala n tanʔa.

¹⁶ A be Zyezu pye: «Mɔ ga bele naa syɛ́ɛnrɛ lóʔo wii ì?» A wi be pye: «Ɛɛn, yele ga kɔ́ɔ̀ gi nyaa sɛ́bɛw ni ì àmɛɛ gi joo lè: ‹Mɔ n kpɔ̀ʔɔrɔli syɛ́ɛnrɛ sámaga n fílige pìíbèle ní sàánnyɛɛngèle nyɔ́ɔyɔ ni?› »

¹⁷ A wi be yaʔa níì yiri kěgi ni n kári Betanii ma n sáà syɔ́ɔn yaà.

Zyezu n děsyaantiige dánga

¹⁸ Koro nyǐndaligi nyɛ̀ʔɛ nyɔ́ɔ na, a wi ga lúru ni maa Zyerusalɛmi ma, a kateegi wi jáa.

¹⁹ A wi ga děsyaantiigaa nyaa kólogi nyɔ́ɔ na, a wi nùuni gi na. Wi si ga yafyɛn nyaa gi ni í kapye wári yagana ban í. A wi gi pye: «Mɔ a ní yasanna san nyáana í.» A děsyaantiigi fala n waʔa terire.

²⁰ A pìitamabèle ga gee bee nyaa, a be i káama gi na níì jo: «Mɛ̀ɛ́ děsyaantiigi pye níì waʔa nya terire?»

²¹ A Zyezu be yari: «Mii a gi joo yele ma kányɛʔɛ ni, yele ga tága kàkabalaga fun, gee mii kpéʔele děsyaantiigi naa na lè, gee bee félege yagana ban yele a kpéʔele í, kàjáa àlí yele ga nyanbelegi naa pye: ‹Yìri nɛɛ naa, mi sa too lòkpɔɔgi ni,› ki a foro.

²² Gee myɛ yele nyɛ́ɛri lè Kolocɔlɔɔ ma, yele a gi taa tágali báriga ni.»

Sán Zyezu fǎngi yìri?

²³ A Zyezu ga sáà jée kpɔ̀ʔɔrɔli kpaʔa ni ni syɛ́ɛnbèle tama, a sáriga-wòlobèle kàfɔɔlɔ ní Zyefubèle wólɛɛbéle pan wi ma n baa wi pye: «Wìí wi jo mɔ í ba ra kérigèle naa kpéʔele? Wìí wi fǎngi bee kaan mɔ ma?»

²⁴ A Zyezu be yari: «Mii a wɔ́ɔ yele yíbe yíbegaa nibin na, yele ga gi syɛɛnlurugori kaan mii ma, mii a wɔ́ɔ gi tɛ̀ɛn yele na fǎngee báriga ni mii kérigèle naa kpéʔele lè,»

²⁵ níì be pye: «Sán Zyan batɛmiw yìri? Nyɛ̀ʔɛni na lé wi yìri láà ba fwɔɔ syɛ́ɛnbèle ma?» A be peyɛɛ gábala gi na níì jo: «Wolo ga jo nyɛ̀ʔɛni na wi yìri, wi a jo: ‹Nyàʔá si na yele da tága wi na í?›

²⁶ Wolo si ga zǐn jo: ‹Syɛ́ɛnbèle má wi yìri,› wolo si n fyáa syɛ́ɛnmi na, níì cán pe myɛ i Zyan córo kanyaajoowaa.»

²⁷ Lǎli bee ni a be Zyezu yari: «Wolo ga cán í.» A Zyezu wɔ́ɔ̀ be pye: «Fǎngee báriga ni mii kérigèle naa kpéʔele lè, mii a wɔ́ɔ gi tɛɛtaagi tɛ̀ɛn yele na í.

Jaafɔbèle siin kaseele

²⁸ «Nyàʔá yele sɔ̀ngí kéeli naa na? Jaafɔɔlɔ siin maa pye nànwaa ma. A wi kári wozeliw ma n sáà wi pye: ‹Abaa, sa fála mii ɛrɛzɛn ségi ni níjanʔa.›

²⁹ A wi wi pye: ‹Mii a fɔ̀lɔ í.› Koro kàdoʔo ma a wi kɔ́ɔ̀ wi fúngi kàriga níì kári.

³⁰ A tofɔw ga nan siin wów na, a wi níì syɛɛnnijanri joo wee bee ma. A wee bee wi yari: ‹Ɛɛn, Abaa, mii a kári.› Wi si ga kári yaà í.

³¹ Pe siinw ni, wìí wi tofɔw nyɛ́nɛ kéele kpéʔele?» A be wi yari: «Wozeliw wii.» A Zyezu be pye: «Mii a gi joo yele ma kányɛʔɛ ni, wálisyɔɔbèle ní nànjaacebèle a wári jée Kolocɔlɔɔ fǎngi ni bi sɔ̀lɔ yele na.

³² Níì cán Zyan maa pan yele ma n baa sínni kólogo tɛ̀ɛn yele na, yele si ga tága wi na í. A wálisyɔɔbèle ní nànjaacebèle tága wi na, àlí yele wírè gee bee nyaa lè, yele ga sèʔê yele fúnyi kàriga si tága wi na í.

Ɛrɛzɛn sefala-syɛɛnpeebéle kaseele

³³ «Ye ní ye kàseelaa nikwɔɔ lóʔo lee. Nànwaa maa pye kàcoolofɔlɔ, a wi ɛrɛzɛn séʔe sámaga níì gi faan n sùlu. Níì ɛrɛzɛnw yasanra tɛɛnùgugo sámaga gi ni, níì kpaatɔnɔgɔ faan yaà, níì ségi bee kàlifáa sefalabèle pèle ma páā woro lɛɛli kaangi woro ma. Níì yiri n kári kùlaa ni.

³⁴ A ɛrɛzɛnw làrilaala ga nan a wi wi falipyebèle tun sefalabèle ma be sa woro lɛɛli syɔɔ paa maa.

³⁵ A sefalabèle sáà be cò n wee kpúmɔn níì wee kpóo, níì wee wábagi ní kàdɛnɛri ní.

³⁶ A wi níì falipyebèle pèle nikwɔɔlɔ tun yaà be ma, bele be nɛʔɛ lè n sɔ̀lɔ wozelibèle na. A be ní sáà kanijanni kpéʔele bele bee na.

³⁷ Koro myɛ kàdoʔo ma a wi náà wi jáaw tun be ma níì jo: ‹Pe a sa fɛ̀ɛrɛ taa mii jáaw na.›

³⁸ A ɛrɛzɛn sefalabèle ga jaafɔw wéle n nyaa wi i maa, a be jo: ‹Wee naa wi nyɛ wi kɔriliiw. Ye tíi wo wi kpóo, kɔ́rigi si kòro wolo wóʔo.›

³⁹ A be wi cò n ŋɔrigɔ n yirige ɛrɛzɛn ségi ni n sáà kpóo.

⁴⁰ Ki ga pye nya, ɛrɛzɛn ségi fɔ́lɔ ga pan lǎli ni lè, nyàʔá wi a ba kpéʔele sefalabèle bee na?»

⁴¹ A be wi yari: «Wi a ba syɛɛnpeebèle bee kálagi péw si wi ɛrɛzɛn ségi kàlifáa sefalabèle pèle nikwɔɔlɔ ma, bele be a ra wi lɛɛli kaangi wi ma lè ɛrɛzɛnw làrilaala ni.»

⁴² A Zyezu be pye: «Yele ga kɔ́ɔ̀ syɛ́ɛnri naa wéle Kolocɔlɔɔ syɛɛnsɛbɛri ni ì? Ti n jo: ‹Kàdɛnɛgee kpaafaanbèle da cée lè, koro ki baa pye kpáagi jɛ̀ɛ́nnɛ kadɛnɛzelige. Gee bee i nyɛ Kàfɔw kapyele, li si i nyɛ wo ma kakpɔɔlɔ.›

⁴³ Gee bee na mii a gi joo yele ma, pe a Kolocɔlɔɔ fǎngi syɔɔ yele ma bi kaan syɛɛnfelegaa nikwɔɔ ma, gee ki a ra wi yasanri lɛɛlɛ kaangi wi ma lè. [

⁴⁴ Wee wi ga too lè kàdɛnɛgi naa na, wee bee a kabagi, wee na si ki ga too lè, ki a wee bee pulɔlɔ mɛnɛ mɛnɛ.]»

⁴⁵ A sáriga-wòlobèle kàfɔɔlɔ ní Farisibèle ga wi kàseegèle lóʔo, a be gi cán poro kéeli wi nyuu.

⁴⁶ A be i kanmaa caa bi wi cò, kàjáa pe maa fyáa syɛ́ɛnmi na, ncan syɛ́ɛnmi maa ni wi córo kanyaajooo.