Matye 20 - Cebaara Bible 2010

Falipyebèle be lè ɛrɛzɛn ségi ni

¹ «Nyɛ̀ʔɛni fànʔa i nyɛ àmɛɛ kàcoolofɔlɔ nyɛ lè, wee wi yiri lè nyǐngi nyɔ́ɔ na pɛ́ɛn pɛ́ɛn bi sa falipyebèlē caa tórigo wi ɛrɛzɛn ségi ma.

² Wi si maa bɛ̀ɛ ní falipyebèle ní toko toko na cángi sàra, níì be tórigo wi ɛrɛzɛn ségi ma.

³ A wi ga níì yiri dɔnwolo lǎli ni, a wi pèle nikwɔɔlɔ nyaa woyérebéle ní cédaali na fali fun.

⁴ A wi be pye: ‹Ye wɔ́ɔ yaa syée mii ɛrɛzɛn ségi ma. Kánmee mii yɛlɛ bi kaan yele ma lè, mii a bi kaan yele ma.› A be kári.

⁵ A wi ga níì yiri cânvulɛɛli ní cangàrigi na, a wi gi pye sèjira.

⁶ A wi níì yiri tèfalabèle gbaa ziin làla ni, n níì pèle nikwɔɔlɔ nyaa woyérebéle ní. A wi be pye: ‹Nyàʔá na yele yére nɛɛ naa n cángi kwɔ́ɔ fali fun?›

⁷ A be wi yari: ‹Ncan syɔɔn faala ga wolo láa fali na í.› A wi be pye: ‹Ye wɔ́ɔ yaa syée mii ɛrɛzɛn ségi ma.›

⁸ A cángi ga jée, a ɛrɛzɛn ségi fɔ́lɔ gi joo wi nìgwɔɔw ma níì jo: ‹Mi falipyebèle yeri mi ba sàra. Mi gi séli kàdotɔnbèle na bi taa ba nan wozelibèle na.›

⁹ A gbaa ziinw làla wòolo ga pan, a be taa toko toko.

¹⁰ A wozelibèle ga pan, a be i gi sɔ̀ngí poro a saʔa taa bi sɔ̀lɔ bele na. Kàjáa a be wɔ́ɔ̀ taa toko toko.

¹¹ A pe ga wáliw syɔɔ n kwɔ́ɔ, a be i kàcooli fɔ́lɔ sànʔá,

¹² níì jo: ‹Kàdotɔnbèle naa n lɛ́ɛri nibin yagana báara, á mɔ baa be córo ní wolo ní sèjira, wolo bele wo cángi fɔ̀rɔgɔ ní gi káfugi kpàraco lè.›

¹³ Kàjáa a wi poro wàa pye: ‹Ni tàannyɛnnɛ, mii ga kolo mɔ ma í. Toko na ban wo da bɛ̀ɛ mii ní mɔ ní ì?

¹⁴ Mɔ saraw láa maa syée, mii a wɔ́ɔ kàdotɔnw naa kaan ní mɔ ní sèjira.

¹⁵ Gee gi mii dɛ́nɛ lè, koro ban mii yɛlɛ bi kpéʔele ní mii kɔ́lɔ yáriri ní ì? Nyàʔá na mɔ mii kacǎnni córo kapeele?›

¹⁶ Kánmi bee na kàdoʔo ma syɛ́ɛnbèle a ba pye yɛʔɛ̀ ma, yɛʔɛ̀ ma wóbèle si ba pye kàdoʔo ma.»

Zyezu n wi kùúw ní wi nyán yirili kéele joo tɔdaanri wógi na

¹⁷ A Zyezu ga ni syée Zyerusalɛmi ma, n wi yaʔa kólogi na, a wi wi pìitamabèle kɛɛ ní siin yeri n kàri kɔlɔ̀ na níì be pye:

¹⁸ «Wéle, wolo i syée bele Zyerusalɛmi ma, pe si a sa Syɔɔn-pya le sáriga-wòlobèle kàfɔɔlɔ ní làlwaw sɛ́bɛwelebéle kɔ́yɔ ni be kútiiw kúun wi na, si jo wi n yɛlɛ ní kùu ní,

¹⁹ si wi kaan syɛɛnfeleyi ma yi sa ra yiyɛɛ nyɛ́nɛ wi na, si wi kpúmɔn ní sapile ní si wi kóri tiiparigi na. Kàjáa wi si a nyán yiri kúbèle nínge ni candaanri wógi na.»

Zyaki ní Zyan nɔ́ɔw n nyɛ́ɛrigɛ kpéʔele

²⁰ Lǎli bee ni a Zebede jáabèle nɔ́ɔ pan Zyezu ma ní wi pìíbèle ní n baa tìgi n too wi taana bi wi nyɛ́ɛri.

²¹ A Zyezu wi pye: «Nyàʔá mɔ caa?» A wi wi yari: «Mi gi yaʔa mii pìíbèle naa siin í tɛ́ɛn mɔ taana, wee í pye mɔ kaliige ma, wee si pye mɔ kamɔnɔ ma mɔ fangi ni.»

²² A Zyezu be pye: «Gee yele nyɛ́ɛri lè, yele ga gi cán í. A yele fánʔa i nyɛ lé bi gbǎn gbaa yagbaali ni, lee ni mii a gbaa lè?» A be wi pye: «Wolo fánʔa i nyɛ.»

²³ A wi be pye: «Yele a gbaa mii yagbaali ni, koro i nyɛ kányɛʔɛ, kàjáa bi tɛ́ɛn mii kàliige ma, wàlá mii kàmɔnɔ ma, gee bee o nyɛ mii kéele mii í gi kaan yele ma í. Ki i nyɛ pèle wóʔo bele kéele na mii Tóow gi sámaga lè.»

²⁴ A pìitamabèle bele kɛɛ ga gee bee lóʔo, a be fúnyi tanʔa bele bee siin kurugo.

²⁵ A Zyezu be yeri ní baa be pye: «Yele n gi cán bele be nyɛ lè syɛɛnfeleyi nyúngo na, pe fǎngi kólogo n gbàn. Yi syɛɛnkpolobèle si i yi kàragí ní be fǎngi ní.

²⁶ Kàjáa ki ga yɛlɛ gi pye ànbée yele níngi ni í. Wee wi ga ni caa lè bi pye yele ni syɛɛnkpɔɔɔ, wee bee n yɛlɛ wi pye yele nìgwɔɔ.

²⁷ Wee wi caa lè bi pye yele ni yɛʔɛ̀ ma, wee bee n yɛlɛ wi wiyɛɛ bye yele púlo.

²⁸ Kánmi bee na Syɔɔn-pya wɔ́ɔ̀ pan, wi ga pan syɔɔn í ba ra báara wi ma í. Kàjáa wi n pan bi ba ra báara syɛ́ɛnbèle ma si wi sìíw kaan syɛ̀ɛnnɛ saʔa nyunzyɔɔrɔ kéele na.»

Zyezu n fúunbéle siin paʔa

²⁹ A pe ga yiri Zyeriko ni, a syɛɛnnɛʔɛmɛ taʔa Zyezu na.

³⁰ Fúunbéle siin si maa pye wodɛ́ɛnbéle ní kólogi nyɔ́ɔ na. A pe ga lóʔo Zyezu wi sɔ̀lɔ́, a be i yákpogèle wáa níì jo: «Kàfɔw, mɔ wi lè Davidi Jáaw, nyinimɛ taa wolo na.»

³¹ A syɛ́ɛnmi i fúlo be na níì jo be pyèri. A be sèʔé i yákpogèle wáa n sɔ̀lɔ wozeligi na níì jo: «Kàfɔw, mɔ wi lè Davidi Jáaw, nyinimɛ taa wolo na.»

³² A Zyezu yére níì be yeri ní baa be pye: «Nyàʔá yele caa mii í kpéʔele yele ma?»

³³ A be wi pye: «Kàfɔw, wolo i caa wolo nyapiigèle í tɛ́nɛ múgu.»

³⁴ A be nyínimi Zyezu taa, a wi tánga be nyapiigèle na, a be fala ni nyaagi níì taʔa wi na.