Matye 19 - Cebaara Bible 2010

Zyezu tamani ceyaʔari kéele na

¹ A Zyezu ga syɛ́ɛnri bee joo n kwɔ́ɔ, a wi yiri Galile tári ni n kári Zyude tári màʔama na, Zyuridɛnw jelige na.

² A syɛɛnnɛʔɛmɛ taʔa wi na, a wi sáà be pɔʔɔ.

³ A Farisibèle nùuni wi na bi wi nyɔ́ɔgi pye wéle níì wi pye: «A gi yɛlɛ lé nàɔn í wi cɔɔ̀ yaʔa keelaa faala na?»

⁴ A wi be yari: «Yele ga kɔ́ɔ̀ gi nyaa sɛ́bɛw ni ì, àmɛɛ pe Faanfɔw be faan lè ki sélimi na nàɔn ní cɔlɔɔ ì?»

⁵ Ní wɔ́ɔ̀ jo: « ‹Koro na nàɔn n yɛlɛ wi wi tóow ní wi nɔ́ɔw yaʔa si tan wi céw na. Pe siinw a pye cere nibin.›

⁶ Koro na pe ní o nyɛ siin í, fwɔɔ cere nibin. Gee si Kolocɔlɔɔ kpéʔele a gi bɛ̀ɛ lè, ki ga yɛlɛ syɔɔn í gi láʔa kiyɛɛ na í.»

⁷ A be wi yari: «Nyàʔá na si Mowizi da jo, syɔɔn n yɛlɛ wi ceyaʔa-sɛ́bɛ kaan céw ma si wi yaʔa?»

⁸ A wi be pye: «Yele fungbanyi kéele na Mowizi da fɔ̀lɔ yele í da yele cébèle yaari, kàjáa nlaa ki sélimi na, ki da pye ànbée í.

⁹ Mii si a gi joo yele ma si jo, wàa ga wi cɔɔ̀ yaʔa, kapye kanɔnʔɔrɔ kéele na ban í, ní sáà wàa nikwɔɔ pɔri, wee bee n ceyuugo kpéʔele.»

¹⁰ A wi pìitamabèle wi pye: «Ki ga pye ànbée nàɔn ma wi céw kàbaan na, nyùngo o nyɛ cèpɔrigi kpéʔelele na í.»

¹¹ A wi be pye: «Pe myɛ a gbǎn syɛ́ɛnri naa cò í, fwɔɔ bele má Kolocɔlɔɔ fànʔa kaan lè pe gbǎn di cò.

¹² Níì cán nìgbɛɛnbèle pèle i yaà, a be be see kánmi bee na, nànjaliya. Nìgbɛɛnbèle pèle si wɔ́ɔ i yaà, a syɛ́ɛnbèle be kàriga nìgbɛɛnbēle, nìgbɛɛnbèle pèle si ní wɔ́ɔ i yaà n peyɛɛ bye nìgbɛɛnbēle nyɛ̀ʔɛni fànʔa kéele na. Wee wi a gbǎn syɛ́ɛnri naa cò lè, ki n yɛlɛ wi di cò.»

Zyezu n dùbaw kpéʔele pìíbèle pèle ma

¹³ Lǎli bee ni a pèle pan ní pìíbèle pèle ní Zyezu ma, jàngó wi ba kɔ́yi taʔa be na si nyɛ́ɛri be kéeli na. Kàjáa a wi pìitamabèle fúlo be na.

¹⁴ A Zyezu be pye: «Ye pìíbèle yaʔa paa maa mii ma, ki ga yɛlɛ ye be lúrugo í. Níì cán nyɛ̀ʔɛni fànʔa i nyɛ pèle wóʔo, bele be nyɛ àmɛɛ pìíbèle naa nyɛ lè.»

¹⁵ A wi ga wi kɔ́yi taʔa be na n kwɔ́ɔ, a wi núngo nɛɛ bee.

Lɔrɔfɔ-nǎnw kéele

¹⁶ Koro kàdoʔo ma a nànwaa nùuni wi na n baa wi pye: «Tamafɔw, nyàʔá kacàn-vélile mii yɛlɛ mii í kpéʔele, koro ga pye mii í sìibangwɔɔw taa?»

¹⁷ A wi wi yari: «Nyàʔá na mɔ mii yíbe kacànna kéele na? Wàa nibin wi nyɛ wojanw. Kàjáa mɔ ga ni caa bi jée sìíw ni, ki n yɛlɛ mɔ í tundunri cò.»

¹⁸ A wi wi pye: «Dìí dii toro?» A Zyezu wi yari: «Mɔ a kɔ́ syɔɔn kpóo í. Mɔ a kɔ́ kanɔnʔɔrɔ kpéʔele í. Mɔ a kɔ́ yùu í. Mɔ a kɔ́ jànvaa séera kpéʔele í.

¹⁹ Máā mɔ tóow ní mɔ nɔ́ɔw kpɔ̀ʔɔrɔ́. Mɔ syɛɛnnyɛnw kéele yaʔa li mɔ dɛ́nɛ àmɛɛ mɔ miyɛɛ dɛ́nɛ lè.»

²⁰ A nǎnw wi yari: «Mii maa téè tundunri bee myɛ cò. Keelìí si li níì kòro mii ma?»

²¹ A Zyezu wi pye: «Mɔ ga ni caa bi pye syɛɛnsindeleo, maa syée mi sa mɔ kɔ́lɔ yáriri myɛ pára mi kaan foomɔfɔbèle ma, máā maa mi ba taʔa mii na, lɔrɔ saʔa a pye mɔ ma nyɛ̀ʔɛni na.»

²² A nǎnw ga syɛ́ɛnri bee lóʔo, a wi lúru n kári funbɛɛnrɛ na, ncan wi kɔlɔ̀ yáriri maa nɛʔɛ.

²³ A Zyezu gi joo wi pìitamabèle ma níì jo: «Mii a gi joo yele ma kányɛʔɛ ni lɔrɔfɔlɔ jéeganmi n tɔ̀nɔ n gbàn nyɛ̀ʔɛni fànʔa ni.

²⁴ Mii a ní gi joo yele ma si yele pye, fàlibaʔa jéevorolo n wɛ́ʔɛri sàriweele ni lɔrɔfɔlɔ jéeganmi na Kolocɔlɔɔ fǎngi ni.»

²⁵ A pìitamabèle ga gee bee lóʔo a be i káama gi na gbanʔama níì jo: «Wìí si wi a gbǎn syɔɔ?»

²⁶ A Zyezu i be wéle ní kɔ́ɔ̀ be pye: «Gee bee a gbǎn kpéʔele syɔɔn báriga ni í, kàjáa Kolocɔlɔɔ fánʔa i nyɛ kérigèle myɛ na.»

²⁷ Lǎli bee ni a Pyɛri gi joo wi ma níì jo: «Wéle, wolo n wolo yáriri myɛ yaʔa níì taʔa mɔ na, nyàʔá si wolo a ba taa?»

²⁸ A Zyezu be pye: «Mii a gi joo yele ma kányɛʔɛ ni, yele bele ye taʔa mii na lè, Syɔɔn-pya ga baa tɛ́ɛn wi nìjangbɔɔri fàngolo na kúbèle cânnyán-yìrige na, yele a wɔ́ɔ tɛ́ɛn fàngorigèle kèle kɛɛ ní siin na bi Isirayɛli syɛɛnfeleyi kɛɛ ní siin kútii ceri.

²⁹ Syɔ́ɔnwee faala si ga wi kpáayi, ní wi senyɛnnǎnbèle, ní wi senyɛnjebèle, ní wi tóow, ní wi nɔ́ɔw, ní wi pìíbèle, ní wi séyi yaʔa lè mii mɛ́ɛgi kéele na, wee bee a di feleye saʔa taa bi fàra sìibangwɔɔw na.

³⁰ Kàjáa yɛʔɛ̀ ma syɛ́ɛnbèle pèle saʔa a ba pye kàdoʔo ma, kàdoʔo ma wóbèle pèle saʔa si ba pye yɛʔɛ̀ ma.