Matye 18 - Cebaara Bible 2010

Wìí wi kpɔ́ʔɔ n sɔ̀lɔ pe myɛ na?

¹ Lǎli bee ni a pìitamabèle nùuni Zyezu na n baa wi yíbe níì jo: «Wìí wi kpɔ́ʔɔ n sɔ̀lɔ pe myɛ na nyɛ̀ʔɛni fànʔa ni?»

² A wi fala n pìiwaa yeri n baa yérige be níngi ni,

³ níì be yari: «Mii a gi joo yele ma kányɛʔɛ ni, yele ga pye yele ga kàri n pye àmɛɛ pìíbèle nyɛ lè í, yele a gbǎn jée nyɛ̀ʔɛni fànʔa ni nyáana í.

⁴ Koro na, wee wi ga ni màama kpéʔele àmɛɛ pìíw naa nyɛ lè, wee bee wi kpɔ́ʔɔ n sɔ̀lɔ pe myɛ na nyɛ̀ʔɛni fànʔa ni.

⁵ Syɔ́ɔnwee faala wi ga pìíw naa wàa láa mii mɛ́ɛgi na lè, mii tiimaa wi láa.

Kapeeli gbànganma kéele

⁶ «Kàjáa pìipiigèle ge tága mii na lè, syɔ́ɔnwee faala wi ga lee bee làa nibin kaan a li lúru kàdoʔo ma lè, syɔ́ɔnw bee n yɛlɛ pe tírekpɔʔɔ pwɔɔ wi yátiigi ni pé wi wáa sólomi lòkpɔʔɔ tɛɛcùrugo ni.

⁷ Wɔʔɔli a pye dulunyanw ni kérigèle báriga ni ge syɛ́ɛnbèle pùuní lè! Níì cán fwɔɔ kérigèle kèle í pye beè, gele ke a ra syɛ́ɛnbèle pùuní lè. Kàjáa wɔʔɔli a pye syɔ́ɔnw bee na wee báriga ni syɛ́ɛnbèle a pùuni lè.

⁸ Mɔ kɔ́gi ga ni mɔ légi kapeegèle ni, wàlá mɔ tɔ́lɔgi, mi gi ceri mi wáa. Mɔ ga jée sìíw ni ní kɔjerigi ní, wàlá ní tɔjerigi ní, koro a pɔ́rɔ mɔ ma sáni lè mɔ í kòro ní mɔ kɔ́yi siin ní, wàlá ní tɔ́lɔyi siin ní, pe sa mɔ wáa bànvigi náagi ni.

⁹ Mɔ nyapili ga ni mɔ légi kapeegèle ni, mi li lòʔori mi wáa. Mɔ ga jée sìíw ni ní nyapile nibin ní, koro a pɔ́rɔ mɔ ma sáni lè nyapiigèlē siin í pye mɔ na pé sa mɔ wáa tɛɛwɔʔɔgi ni, beè náagi nyɛ lè.

Bàpuuniw kàseele, ní wi nyaani

¹⁰ «Yaa kɔ̀rɔsíi, yele a kɔ́ pìipiigèle naa làa nibin faʔa í, níì cán mii a gi joo yele ma kányɛʔɛ ni, pe nyɛ̀ʔɛni tundunbéle i yaà ni mii Tóow yɛ́ʔɛ nyaagi làla o làla, wi lè nyɛ̀ʔɛni na. [

¹¹ Níì cán wee wi pùuni lè, Syɔɔn-pya n pan ba wi syɔɔ.]

¹² Nyàʔá yele sɔ̀ngí? Bàala dabata ga pye syɔɔnwaa ma, á wàa nibin pùuni, wi a bele dabata nibin fɔ̀n yaʔa nyanbelegi na si sa wobuuniw caa ì?

¹³ Wi ga sáà wi caa n nyaa, mii a gi joo yele ma kányɛʔɛ ni, wi a ra fundaanra kpéʔele wee bee kéele na bi sɔ̀lɔ bele togoye sicɛrɛ ní kpɔrigɔ ní kpanjɛrɛ kéele na, bele be nyɛ lè pe ga pùuni í.

¹⁴ Anbée si gi wɔ́ɔ̄ nyɛ yele Tóow ma wi lè nyɛ̀ʔɛni na, wi o caa pìipiigèle naa làa nibin í pùuni í.

Senyɛnwaa ga kapeele pye

¹⁵ «Mɔ senyɛnnɛ ga kapeele kpéʔele mɔ na, mi kári mi sa joo ní wi ní yele yagwɔɔlɔ. Wi ga mɔ wóri lóʔo, mɔ n mɔ ní mɔ senyɛnw bɛ̀ɛ.

¹⁶ Kàjáa wi ga pye wi ga sáà yére di ni í, mi ní mi sa wàa láa, a be i nyɛ siin yoo, jàngó ‹séerafɔbèle siin, wàlá taanri í syɛ́ɛnri myɛ fílige.›

¹⁷ Wi ga sáà poro wóri cée, mi sa gi joo Egiliziw ma. Wi ga sèʔê Egiliziw wóro cée, mi wi córo syɛɛnfelegaa ní wálisyɔɔɔ.

Bi gi pwɔɔ, ní bi gi sánʔa

¹⁸ «Mii a gi joo yele ma kányɛʔɛ ni, yele ga yárigee faala pwɔɔ lè tári na, ki n wɔ́ɔ̀ pwɔɔ nyɛ̀ʔɛni na, yele si ga wɔ́ɔ̀ yárigee faala sánʔa lè tári na, ki n wɔ́ɔ̀ sánʔa nyɛ̀ʔɛni na.

¹⁹ Mii a ní gi joo yele ma kányɛʔɛ ni, syɛ̀ɛnnɛ siin ga wɔ́ɔ yariga o yariga na tári na yele níngi ni, níì gi nyɛ́ɛri mii Tóow ma wi lè nyɛ̀ʔɛni na, wi a gi kaan be ma.

²⁰ Níì cán syɛ̀ɛnnɛ siin, wàlá syɛ̀ɛnnɛ taanri ga peyɛɛ gbóʔoro tɛ́ɛgee ni lè mii mɛ́ɛgi na, mii i nyɛ be níngi ni.»

Falipyew wi kùsulugi syɔɔlɔ cée lè woro kàseeli

²¹ Lǎli bee ni a Pyɛri nùuni Zyezu na n baa wi yíbe níì jo: «Kàfɔw, mii senyɛnwaa ga kòro ni kapeegèle kpéʔele mii na, tɔlɔyɔ jòorí mii yɛlɛ mii í wi kùsulugi syɔɔ? Tɔlɔyɔ kɔrɔsiin lé láà?»

²² A Zyezu wi yari: «Mii ga jo tɔlɔyɔ kɔrɔsiin í, fwɔɔ maa gi kpéʔele bi taa ba nan tɔlɔyɔ togoye taanri ní kpɔrigɔ tɛɛyɛ kɔrɔsiin na.

²³ Koro na nyɛ̀ʔɛni fànʔa i nyɛ àmɛɛ fànʔafɔwaa nyɛ lè, wee wi da ni caa bi wi fwɔ́ɔgèle jáari wi falipyebèle na lè.

²⁴ Lǎli ni wi gi séli lè, a be pan ní wàa ní wi ma, wee na wi sirakamayɛ sirakama fwɔ́ɔlɔ da pye lè.

²⁵ Yafyɛn si da pye wi ma bi fwɔ́ɔli bee tɔ́n í. A wi kàfɔw be pye be sa wi pára ní wi céw, ní wi pìíbèle, ní wi kɔlɔ̀ yáriri myɛ ní jàngó woro fwɔ́ɔli í tɔ́n.

²⁶ A falipyew tìgi n kpùmɔnɔ wi taana níì wi nyɛ́ɛri níì jo: ‹Mi mii kpàraco, mii a mɔ fwɔ́ɔli myɛ tɔ́n.›

²⁷ A falipyew bee nyínimɛ wi taa, a wi wi yaʔa ní wɔ́ɔ̀ fwɔ́ɔli bee yaʔa wi ma.

²⁸ A falipyew bee ga yiri ni syée, a wi sáà fàra ní wi falipyenyɛnwaa ní, wee na woro fwɔ́ɔlɔ nyɛ lè selebinnɛ. A wi wi cò níì wi còri yákpoli ni níì jo: ‹Mi mii fwɔ́ɔli tɔ́n.›

²⁹ A wi falipyenyɛnw tìgi n kpùmɔnɔ wi taana níì wi nyɛ́ɛri níì jo: ‹Mi mii kpàraco, mii a mɔ fwɔ́ɔli tɔ́n.›

³⁰ Kàjáa wi ga fɔ̀lɔ í, níì wi cò n sáà le kàsow ni fwɔɔ bi taa wi woro fwɔ́ɔli tɔ́n.

³¹ A wi falipyenyɛnbèle ga gi nyaa gee wi kpéʔele lè, a gi i be yáa gbanʔama, a be pan n baa gi joo be kàfɔw ma gee myɛ wi kpéʔele lè.

³² Lǎli bee ni a wi kàfɔw wi yeri ní baa wi pye: ‹Mɔ i nyɛ falipyepeeo, ncan mɔ maa mii nyɛ́ɛri, a mii mɔ fwɔ́ɔli myɛ yaʔa mɔ ma.

³³ Ki da wɔ́ɔ̀ yɛlɛ mɔ í nyinimɛ taa mɔ falipyenyɛnw na, àmɛɛ mii nyinimɛ taa mɔ na lè ì?›

³⁴ A wi kàfɔw wi cò fundanʔara na n sáà le kàsow ni, jàngó paa wi wɔʔɔ bi taa wi woro fwɔ́ɔli myɛ tɔ́n.

³⁵ Yele myɛ nibin nibin ga pye yele o yele senyɛnbèle kapeegéle kusulugo syoo ní fundaanra ní í, ànbée mii Tóow a wɔ́ɔ gi kpéʔele yele na wi lè nyɛ̀ʔɛni na.»