Matye 17 - Cebaara Bible 2010

Zyezu kàrili kéele

¹ A canya kɔrɔni ga kwɔ́ɔ, a Zyezu, Pyɛri ní Zyaki kɔ́ri n fàra Zyan na wi lè Zyaki senyɛnw, a be kári n sáà lúgu nyanbe-nyundɔnɔgɔ ǹjoʔo ni pe yagwɔɔlɔ.

² A wi sáà kàri pe nyɛnɛ na. A wi yɛ́ɛgi tɔ̀nɔ́ i daragi àmɛɛ cángi nyɛ lè, á wi búroyi kàri n fílige àmɛɛ gbɛ̀ɛnmɛ nyɛ lè.

³ A be wéle n Mowizi ní Elii nyaa pe i nyuu ní wi ní.

⁴ A Pyɛri gi joo Zyezu ma níì jo: «Kàfɔw, àmɛɛ wolo pan naa lè, ki n nyɔɔ. Mɔ ga fɔ̀lɔ mii a kpáagéle taanri kpúmɔn, làa í pye mɔ wólo, làa si pye Mowizi wólo, làa si pye Elii wólo.»

⁵ N wi yaʔa syɛ́ɛnri bee joolo na, a fàfaanfii-fárafāraga baa be tɔ́n. A be yákpolo lóʔo fàfaangi fúngo ni a li jo: «Wee naa wi nyɛ mii pìinidaanmaw, wi kéeli n mii dɛ́nɛ gbanʔama. Ki n yɛlɛ yaa lúro wi ma.»

⁶ A pìitamabèle ga syɛ́ɛnri bee lóʔo a be too n yɛ́ɛyi cíbele ní i fɛ̀ɛgí gbanʔama.

⁷ A Zyezu nùuni be na n baa kɔ́yi taʔa be na níì be pye: «Ye yìri ye yére, ye a kɔ́ ra fɛ̀ɛgí í.»

⁸ A pe ga nyapiigèle múgu, a be Zyezu nyaa wi nibin, pe ga níì wàa nyaa ní wi ní í.

⁹ A pe ga ni tíri nyanbelegi na, a Zyezu gi joo n gbàn be ma níì jo: «Yele a kɔ́ kanyaani naa joo wàa ma í bi taa Syɔɔn-pya í ba nyán yiri kúbèle nínge ni.»

¹⁰ A pìitamabèle wi yíbe níì jo: «Nyàʔá na làlwaw sɛ́bɛwelebéle gi nyuu níì jo: ‹Ŋàʔanaga gii fwɔɔ Elii í séli pan gbɛnʔɛnɛ?› »

¹¹ A wi be pye: «Kányɛʔɛ gii, Elii n tɔ̀nɔ n yɛlɛ wi pan bi ba yáriri myɛ sámaga di pye àmɛɛ ti da séli pye lè.

¹² Kàjáa mii si a gi joo yele ma, Elii maa téè pan n kwɔ́ɔ, syɛ́ɛnbèle si ga baa wi cán í, a be wi kpéʔele be fungo. Anbée si Syɔɔn-pya a wɔ́ɔ ba wɔʔɔ be kɔ́yi ni.»

¹³ Lǎli bee ni a pìitamabèle fala n gi cán ncan Zyan Batisiti kéeli wi nyuu poro ma.

Zyezu n zaanna láʔa pìiwaa na

¹⁴ A be ga sáà nan syɛ́ɛnmi na, a nànwaa nùuni wi na n baa kpùmɔnɔ wi taana níì jo:

¹⁵ «Kàfɔw, mi nyinimɛ taa mii jáaw na, zaanna i nyɛ wi na, li n tɔ̀nɔ n pee. Wi i tuun náagi, ní lǒgi ni tɔlɔyɔ saʔa.

¹⁶ A mii si pan ní wi ní mɔ piitamabèle ma, pe ga gbàn n wi pɔʔɔ í.»

¹⁷ A Zyezu gi joo níì jo: «Yele lǎli naa syɛ̀ɛnnɛ, yele i nyɛ sìndagabéle ní kakolobyebèlē. Làla jòorí mii yɛlɛ bi ní kwɔ́ɔ ní yele ní? Ba làrigēle jòorí ni mii yɛlɛ bi yele kpàraco? Yaa maa nɛɛ naa ní wi ní mii ma.»

¹⁸ A Zyezu fúlo màdew na, a wi yiri pìíw ni. A wi fala n pɔʔɔ lǎli bee wonijanna ni.

¹⁹ Lǎli bee ni a pìitamabèle nùuni Zyezu na, pe yagwɔɔlɔ, n baa wi yíbe níì jo: «Nyàʔá na wolo ga gbàn n màdew naa nɛnɛ n yirige í?»

²⁰ A wi be pye: «Yele tágali cɛ́rɛlɛ kéele lii. Mii si a gi joo yele ma kányɛʔɛ ni, àlí yele tágali ga pye àmɛɛ mutaridi tíige piifalila nyɛ lè, á yele nyanbelegi naa pye, Yìri nɛɛ naa, ki a yìri. Ncan yarigaa faala a gbǎn yele jáa í. [

²¹ Kàjáa màdew naa félege a gbǎn yiri nyɛ́ɛrigi ní súnleri kàdoʔo ma í.]»

Zyezu n níì wi kùúw ní wi nyán yirili kéele joo

²² Amɛɛ pe da pínɛ ni nyaari ni máari Galile tári ni lè, a Zyezu be pye ki n kòro cɛɛri bé Syɔɔn-pya le syɛ́ɛnbèle kɔ́yɔ ni

²³ pe wi kpóo. Kàjáa candaanri wógi na wi a nyán yiri kúbèle nínge ni. A pìitamabèle fúnyo fala n curugo be na.

Kolocɔlɔɔ kpɔ̀ʔɔrɔli kpaʔa lɔ́rɔ kaanna kéele

²⁴ A pe ga sáà nan Kapɛrinayumi na, a wálisyɔɔbèle pan, bele be nyǔnyi lɔ́rɔ syoo lè kpɔ̀ʔɔrɔli kpaʔa kéele na, n baa Pyɛri yíbe níì jo: «Nyǔnyi lɔ́rɔ be kaangi lè kpɔ̀ʔɔrɔli kpaʔa kéele na, mɔ tamafɔw tɔ̀ʔɔ́ o wi sàra ì?»

²⁵ A wi jo: «Ɛɛn.» A Pyɛri ga jée kpáagi ni, sáni wi yarigaa joo lè, a Zyezu wi pye: «Nyàʔá mɔ sɔ̀ngí, Siimɔn? Bɛ̀lɛ́ má tári fànʔafɔɔlɔ nyǔnyi lɔ́rɔ syoo? Pe jáabèle má láà ba fwɔɔ pe nibɔnbèle ma?»

²⁶ A Pyɛri wi pye: «Nibɔnbèle má kɛ!» A Zyezu wi yari: «Koro na pe jáabèle ŋɔ́n.

²⁷ Koro ní ki myɛ ní, da syée mi sa mɛ̀ʔɛni cáan lòkpɔɔgi ni. Fáseliw mɔ ga cò lè, mi wi nyɔ́ɔgi múgu, mɔ a wáli nyaa yaà. Mi wee bee wòlo mi sa kaan be ma, mii ní mɔ wów, jàngó pe fúnyi a kɔ́ tanʔa í.»