Matye 16 - Cebaara Bible 2010

Farisibèle ní Sadusebèle i kakpɔɔgaa caa

¹ A Farisibèle ní Sadusebèle nùuni Zyezu na n sáà wi pye n wéle níì jo wi nyɛ̀ʔɛni kakpɔɔgaa tɛ̀ɛn poro na.

² A wi be yari: «[Cángi ga jée kavɔn, yele n jo zěgi a too í, níì cán nyɛ̀ʔɛni n nyɛ́nɛgɛ.

³ Nyǐngi si ga tali, yele n jo zěgi ní káfalakpɔʔɔ a pan, níì cán nyɛ̀ʔɛni n nyɛ́nɛgɛ, á fàfaanyi li tɔ́n. Amɛɛ si yele nyɛ̀ʔɛni kèlē cán n láʔala keyɛɛ na lè, yele a wɔ́ɔ gbǎn tɔ́ɔliw naa wòʔolo cán bi láʔa keyɛɛ na ì?]

⁴ Lǎli naa syɛ̀ɛnnɛ be lè syɛɛnpeebèle ní kanɔnʔɔbyebèle, pe i kakpɔɔgaa caa, kàjáa kakpɔɔgaa faala a kpéʔele be nyɛnɛ na í kapye Zyonasi wógi félege ban í.» Níì núngo be taana n kári.

Farisibèle ní Sadusebèle levé kéele

⁵ A pìitamabèle ga ni jeligi jeligi na, a be fɛ̀ʔɛ pe ga búru láa í.

⁶ A Zyezu be pye: «Ki n yɛlɛ yaa yeyɛɛ kɔ̀rɔsíi Farisibèle ní Sadusebèle levé na.»

⁷ A be i gi nyuu peyɛɛ ma níì jo: «Amɛɛ gi nyɛ lè wolo ga búru láa í, koro na wi toro jo.»

⁸ A Zyezu gi cán. A wi be pye: «Nyàʔá na yele gi nyuu yeyɛɛ ma níì jo yele ga búru láa í. Yele tágali n cɛ́rɛ.

⁹ Yele ga sèʔé kɔ́ɔ̀ yarigaa cán wii ì? Búrubèle kagunɔ syɛ́ɛnbèle selebingéle siin ní saala kagunɔ da lìi lè, yele ga sɔ̀ngi n taa kéeli bee na ì? Sɛ̀ʔɛnyɛ̀nnɛ jòorí yele da koli?

¹⁰ Ba búrubèle kɔrɔsiin syɛ́ɛnbèle selebingèle siin da lìi lè, sɛ̀ʔɛnyɛ̀nnɛ jòorí yele da koli?

¹¹ Mɛ̀ɛ́ gi nyɛ yele si ga gi cán ncan búru kéele na ban mii nyuu yele ma í? Kàjáa ki n yɛlɛ yaa yeyɛɛ kɔ̀rɔsíi Farisibèle ní Sadusebèle levé na.»

¹² Lǎli bee ni a be fala n gi cán ncan wi ga jo poro í da peyɛɛ kɔ̀rɔsíi búruw levé na í, fwɔɔ Farisibèle ní Sadusebèle tamana na.

Pyɛri n jo Zyezu wi nyɛ Kirisi

¹³ A Zyezu ga nan Sezarikaʔa tɛ́nɛmi na, pi lè Filipi tári ni, a wi wi pìitamabèle yíbe níì jo: «Syɛ́ɛnbèle n jo Syɔɔn-pya i nyɛ wìí?»

¹⁴ A be wi pye: «Pèle n jo, Zyan Batisiti wii. A pèle jo, Elii wii. A pèle níì jo, Zyeremii wii, koro ga jáa kanyaajoowaa wii.»

¹⁵ A wi be yari: «A yele doò, wìí si yele jo mii i nyɛ?»

¹⁶ A Siimɔn Pyɛri wi pye: «Mɔ wi nyɛ Kirisi, Kolocɔlɔɔ woweew Jáa.»

¹⁷ A Zyezu wi yari: «Mɔ i nyɛ dùba pyà, Siimɔn, mɔ wi lè Zyonasi jáaw, níì cán syɔɔn ban wi gee naa tɛ̀ɛn mɔ na í, fwɔɔ mii Tóow wi lè nyɛ̀ʔɛni na.

¹⁸ Mii si a gi joo mɔ ma si jo mɔ i nyɛ Pyɛri, mii a mii Egiliziw faan fálagi naa ǹjoʔo ni, tɛɛwɔʔɔgi a gbǎn fànʔa taa wi na í.

¹⁹ Mii a nyɛ̀ʔɛni fànʔa làkilebéle kaan mɔ ma. Mɔ ga yárigee faala pwɔɔ lè tári na, ki n wɔ́ɔ̀ pwɔɔ nyɛ̀ʔɛni na. Mɔ si ga wɔ́ɔ̀ yárigee faala sánʔa lè tári na, ki n wɔ́ɔ̀ sánʔa nyɛ̀ʔɛni na.»

²⁰ Lǎli bee ni a wi náà gi joo n gbàn pìitamabèle ma, níì jo pe a kɔ́ gi joo syɔɔn faala ma si jo woro wi nyɛ Kirisi í.

Zyezu n wi kùúw ni wi nyán yirili kéele joo

²¹ Nlaa lǎli bee ni a Zyezu Kirisi fala n séli ni gi nyuu wi pìitamabèle ma níì jo fwɔɔ woro í kári Zyerusalɛmi ma sa wɔʔɔ gbanʔama wolɛɛbèle, ní sáriga-wòlobèle kàfɔɔlɔ, ní làlwaw sɛ́bɛwelebéle kɔ́yɔ ni, pe woro kpóo, kàjáa candaanri wógi na woro a nyán.

²² A Pyɛri fala n wi cò n kàri kɔlɔ̀ na n sáà gi joo n gbàn wi ma níì jo: «Kolocɔlɔɔ í mɔ syɔɔ gee bee ma, Kàfɔw. Ki ga yɛlɛ koro í kpéʔele mɔ na nyáana í.»

²³ A wi fíige n Pyɛri pye: «Núngo mii taana Sutana. Mɔ i nyɛ tɛɛpùunugo mii ma. Níì cán mɔ o sɔ̀ngí Kolocɔlɔɔ kérigèle na í, fwɔɔ syɛ́ɛnbèle wòʔolo na.»

²⁴ Lǎli bee ni a Zyezu gi joo wi pìitamabèle ma níì jo: «Syɔ́ɔnwee faala wi ga ni caa bi taʔa mii na lè, ki n yɛlɛ wi wi nyɛnɛ kérigèle yaʔa wi wi tiiparigi láa waa maa mii kurugo.

²⁵ Níì cán wee wi ga ni caa bi wi sìíw syɔɔ lè, wee bee fɔ́lɔ a bɔ̀nɔ wi ni. Wee si wi bɔ̀nɔ wi sìi ni mii kéeli na lè, wee bee a ba wi woò taa.

²⁶ Syɔɔn ga dulunyanw yárira myɛ taa, á wi sìíw baa pùuni, nyàʔá gee bee a nyɔɔ wi na? A yarigaa i yaà lé gee syɔɔn a sa kaan lè sìíw lɔ́rɔ, sìíw si taa?

²⁷ Níì cán Syɔɔn-pya a kɔ́ pan wi Tóow nìjangbɔɔrɔ ni ní wi tundunbèle ní. Lǎli bee ni wi a ba syɔɔn o syɔɔn sàra bi yɛlɛ ní wi kapyegèle ní.

²⁸ Mii a gi joo yele ma kányɛʔɛ ni, pèle i naa nɛɛ woyérebéle ní yele ni, pe a kùu í bi taa be Syɔɔn-pya nyaa waa maa wi fǎngi ni.»