Matye 15 - Cebaara Bible 2010

Tamani tofɔlɛɛyi kaan lè

¹ Koro kàdoʔo ma a Farisibèle pèle, ní làlwaw sɛ́bɛwelebèle pèle yìri Zyerusalɛmi ma n pan Zyezu ma n baa wi yíbe níì jo:

² «Nyàʔá na mɔ piitamabèle wolɛɛbèle kalɛɛgéle cée? Ncan pe i líi kɔ́yi sìnjée ni.»

³ A wi be yari: «A yele doò? Nyàʔá na yele Kolocɔlɔɔ kajooli cée yele kalɛɛgèle kéele na?

⁴ Níì cán Kolocɔlɔɔ n jo: ‹Maa mɔ tóow ní mɔ nɔ́ɔw kpɔ̀ʔɔrɔ́.› Ní níì jo: ‹Wee wi ga syɛɛnpeere joo n wáa wi toò wàlá wi nɔɔ̀ na lè, wee bee a kpóo wii.›

⁵ Kàjáa yele si n jo: Syɔ́ɔnwee faala ga gi joo wi tóow ma, koro ga jáa wi nɔ́ɔw ma lè níì jo: ‹Gee mii mǎà dée kaan mɔ ma lè, mii n gi kaan Kolocɔlɔɔ ma sáriga,›

⁶ syɔ́ɔnw bee ga níì yɛlɛ wi wi tóow ní wi nɔ́ɔw kpɔ̀ʔɔrɔ í. Anbée yele Kolocɔlɔɔ syɛ́ɛnri faari yele kalɛɛgèle kéele na.

⁷ Yele syɛɛnjóotɛɛyi siin joofɔɔlɔ, kérigèle Ezayi nyaa n joo yele na lè, ke i nyɛ kányɛʔɛ, àmɛɛ wi da jo lè.

⁸ ‹Syɛ́ɛnbèle naa i mii kpɔ̀ʔɔrɔ́ nyɔɔwara na, kàjáa pe fúnyi n léeli mii na.

⁹ Pe i mii kpɔ̀ʔɔrɔ́ gbanzan. Alí tamagèle na be syɛ́ɛnbèle tama lè, ke i nyɛ syɛ́ɛnbèle funzɔngumɔ wòʔolo.› »

Gee gi syɔɔn nɔ́ɔnri lè

¹⁰ A wi syɛ́ɛnmi yeri n nùuni wiyɛɛ na níì bi pye: «Ye yele líiyi cáan ye syɛ́ɛnri naa lóʔo yé di kɔ́rɔw cán.

¹¹ Toro di nyɛ ncan yarigaa a gbǎn jée syɔɔn nyɔ́ɔgi ni bi wi nɔ́nʔɔ í. Fwɔɔ gee gi yirigi lè wi nyɔ́ɔgi ni, gee bee gi wi nɔ́ɔnri.»

¹² Lǎli bee ni a pìitamabèle nùuni wi na n baa wi pye: «Mɔ ga cán àmɛɛ Farisibèle mɔ syɛ́ɛnri naa lóʔo lè ki n be bɛɛn ì?»

¹³ A wi be yari: «Tiige o tiige gi nyɛ lè mii Tóow ga gi cɔ́rɔ í, wi lè nyɛ̀ʔɛni na, pe a gi kɔ́n wáa.

¹⁴ Ye be yaʔa yaà, fúunbéle be nyɛ, ní i fúunbèle pèle tala. Fúuɔn ga ni wi fúunnyɛnnɛ tala, pe myɛ siinw a pínɛ too weʔe ni.»

¹⁵ A Pyɛri wi yari: «Mi kàseeli kɔ́rɔ tɛ̀ɛn wolo na.»

¹⁶ A wi be pye: «A yele sèʔé wɔ́ɔ i nyɛ lé kanaa-sìnjánbéle n baa nan níjanʔa na?

¹⁷ Yele ga gi cán yárigee myɛ ki ga jée syɔɔ nyɔ́ɔgi ni lè, ki n tìgi láagi ni pé náa gi yirige wáa kàfugi na ì?

¹⁸ Gee si gi yirigi lè syɔɔn nyɔ́ɔgi ni, syɔɔn fúngi ma gi yìrigí. Koro gi wi nɔ́ɔnri.

¹⁹ Níì cán dee di yìrigí lè syɔɔn fúngi ma, toro di nyɛ sɔ̀ngubeeri, ní syɛɛnkpoori, ní ceyuugi, ní nànyuugi, ní kanɔnʔɔbyeri, ní kàyuugi, ní jànvaaw séera, ní Kolocɔlɔɔ mɛ́ɛkalagiri ní,

²⁰ dee bee di syɔɔn nɔ́ɔnri. Kàjáa wi ga ni líi kɔ́yi ní sìnjée ni, gee bee o wi nɔ́ɔnri í.»

Kanaan ye céw kéele

²¹ Koro kàdoʔo ma a Zyezu núngo nɛɛ bee n kári Tiiri ní Siidɔn tɛ́nɛmi ma.

²² A Kanaan ye céwaa yìri yaà tɛ́nɛmi bee ni n pan n ba ni yákpoli wáa wi kurugo níì jo: «Kàfɔw, mɔ wi lè Davidi Jáaw, nyinimɛ taa mii na. Mii pìíw wi lè pìcaapile, màdebeeo i nyɛ wi ni.»

²³ Zyezu si ga yafyɛn joo wi ma í. A wi pìitamabèle nùuni wi na ní baa wi nyɛ́ɛri níì jo: «Mi céw yaʔa wi lúru wolo kurugo àmɛɛ wi yákpoli wáa ni maa wolo kurugo lè.»

²⁴ A wi be yari: «Pe ga mii tun pèle faala ma í, kapye Isirayɛli narigbaagi bàala má ban í, poro bele be pùuni lè.»

²⁵ A céw sèʔê pan n baa kpùmɔnɔ wi taana níì jo: «Kàfɔw, mi mii dɛ̀ɛmɛ.»

²⁶ A Zyezu wi yari: «Syɔɔn ga yɛlɛ wi pìíbèle búru láa wi wáa pɔnbiigèle ma í.»

²⁷ A céw jo: «Ɛɛn, Kàfɔw, kàjáa pɔnbiigèle sèʔé i búrutoori líi, dee di tuun lè ge kàfɔbèle tàbalibéle láara ni.»

²⁸ Lǎli bee ni a Zyezu wi pye: «Cɔlɔɔ, mɔ tágali n kpɔ́ʔɔ. Ki n yɛlɛ ki pye mɔ ma àmɛɛ mɔ gi sɔ̀ngí lè.» A wi pìíw fala n pɔʔɔ lǎli bee wonijanna ni.

Zyezu n yaabèlē saʔa pɔʔɔ

²⁹ A Zyezu ga núngo nɛɛ bee n kári n sáà nan Galile lòkpɔɔgi na, a wi sáà lúgu n tɛ́ɛn nyanbelegi na.

³⁰ A syɛɛnnɛʔɛmɛ pan wi ma ní syɛɛnmɔngɔbèle, ní yasɛɛ-kabagiyi fɔ̀ɔlɔ, ní fúunbèle, ní boboobèle ní n náà fàra pèle nikwɔɔlɔ saʔa na n baa tɛ́ʔɛ wi taana, a wi be pɔʔɔ.

³¹ A syɛ́ɛnmi i káama gi na àmɛɛ bi boboobèle nyaa lè pe i nyuu, á yasɛɛ-kabagiyi fɔ̀ɔlɔ cólogo, syɛɛnmɔngɔbèle si i táanri, fúunbèle si wɔ́ɔ i nyaagi. A be fala n Isirayɛli ye Kolocɔlɔw kpɔ̀ʔɔrɔ.

Zyezu n nànbēle selebingéle siin kaan a be lìi

³² A Zyezu wi pìitamabèle yeri n nùuni wiyɛɛ na níì be pye: «Syɛ́ɛnmi nyínimɛ i nyɛ mii na ncan pe n canya taanri kwɔ́ɔ mii taana. Pe ga yarigaa taa n lìi í. Mii si o caa bi be yaʔa paa syée sìnlii ni í. Kapye koro ban í, pe bárigaw a sa kwɔ́ɔ kólogi na.»

³³ A wi pìitamabèle wi pye: «Sán si wolo a búru taa fìimɛ tári naa ni bi syɛɛnnɛʔɛmi naa kaan bi lìi bi tín?»

³⁴ A Zyezu be yari: «Búrubéle jòorí be nyɛ yele ma?» A be jo: «Pe i naa kɔrɔsiin n fàra fápiigéle cɛɛri na.»

³⁵ A wi syɛ́ɛnmi pye bi tɛ́ɛn tári na,

³⁶ níì búrubèle kɔrɔsiin láa n fàra fábèle na níì bariga kaan Kolocɔlɔɔ ma, níì be kabagi n kaan wi pìitamabèle ma, a wi pìitamabèle be lɛɛ syɛ́ɛnmi na.

³⁷ A pe myɛ lìi n fɔ̀rɔ, a pìitamabèle wogabagiri koli dee di kòro lè, a di sɛ̀ʔɛgēle kɔrɔsiin nyìn.

³⁸ Lìifɔbèle nyɔ́ɔ maa pye nànbēle selebingéle siin, cébèle ní pìíbèle ga córo yaà í.

³⁹ Koro kàdoʔo ma a Zyezu syɛ́ɛnmi yaʔa, níì jée kɔ́rɔw ni n kári Magadan tɛ́nɛmi ma.