Matye 14 - Cebaara Bible 2010

Zyan Batisiti kùúw kéele

¹ Lǎli bee ni a fànʔafɔw Herodi ga Zyezu kéeli lóʔo,

² a wi gi joo wi nìgwɔɔbèle ma níì jo: «Zyan Batisiti wii! Wi n nyán n yiri kúbèle nínge ni, koro na wi gbàn ni kakpoloyi naa kpéʔele.»

³ Níì cán Herodi maa Zyan cò n pwɔɔ n sáà le kàsow ni wi cɔnɔw Filipi céw kéele na be yiri lè Herojadi.

⁴ Níì cán Zyan maa gi joo wi ma níì jo: «Ki ga yɛlɛ mɔ í céw bee syɔɔ í.»

⁵ A Herodi i caa bi Zyan kpóo. Kàjáa wi maa fyáa syɛ́ɛnmi na, níì cán syɛ́ɛnmi maa ni Zyan córo kanyaajooo.

⁶ A Herodi canzeegi ga màʔa n nan, a Herojadi pìíw pan n ba ni yóo be níngi ni wi lè pìcaaw, a wi kéeli tɔ̀nɔ n Herodi dɛ́nɛ.

⁷ A wi fala n kàli n kaan wi ma níì jo gee faala wi ga ni caa lè, woro a gi kaan wi ma.

⁸ A wi nɔ́ɔw ga sáà wi sɔ́ɔn, a wi pan n baa Herodi pye: «Mi Zyan Batisiti nyúngi kaan mii ma gǒnaʔa ni.»

⁹ A gi fànʔafɔw bɛɛn, kàjáa wi kàligi ní wi suliinyɛnbèle kéele na, a wi jo woro a gi kaan wi ma.

¹⁰ Níì tun be sa Zyan nyúngi ceri kàsokpaagi ni paa maa.

¹¹ A be sáà gi ceri n le gǒnaagi ni n pan n baa kaan pìcaaw ma. A wi sáà gi kaan wi nɔ́ɔw ma.

¹² A Zyan pìitamabèle pan n baa wi céri láa n sáà tɔ́n ní sáà gi joo Zyezu ma.

Zyezu n nànbēle selebingéle siin ní saala kagunɔ kaan a be lìi

¹³ Lǎli ni Zyezu syɛ́ɛnri bee lóʔo lè, a wi núngo nɛɛ bee n sáà jée kɔ́rɔw ni n kári fìími tára tɛ́ɛgaa ni, wi nibin. A syɛ́ɛnmi ga gee bee lóʔo, a bi yiri kěyi ni n kári wi kurugo tɔlɔyɔ na.

¹⁴ A wi ga sáà yiri kɔ́rɔw ni a wi syɛ́ɛnmi nyaa wogboʔolomɔ ní. A bi nyínimi wi taa gbanʔama. A wi fala n be yáabèle pɔʔɔ.

¹⁵ A ki ga pye cânjeevɔngi na, a wi pìitamabèle nùuni wi na níì wi pye: «Mɔ nyɛ́nɛ i cángi na, á gi kwɔ́ɔ. Gee naa si i nyɛ fìími tára tɛ́ʔɛ. Koro na gi yɛlɛ mɔ í syɛ́ɛnmi yaʔa bi sa jée kěyi ni bi yaliire syɔɔ piyɛɛ ma.»

¹⁶ A Zyezu be yari: «Ki ga yɛlɛ be kári í. Ki n yɛlɛ yele tiimaa í be kaan be lìi.»

¹⁷ A be wi pye: «Yafyɛn o naa wolo ma í kapye búrubéle kagunɔ ní fàala siin yagana ban í.»

¹⁸ A wi be pye: «Ye di láa yaa maa.»

¹⁹ Níì syɛ́ɛnmi pye bi tɛ́ɛn nyàági na, a bi tɛ́ɛn, a wi fala n búrubèle kagunɔ ní fábèle siin láa, níì wi yɛ́ɛgi yìrige n le nyɛ̀ʔɛni ni níì dùbaw taʔa di na, níì fala n búrubèle kabagi kabagi n kaan wi pìitamabèle ma, a pìitamabèle wi lɛɛ syɛ́ɛnmi na.

²⁰ A pe myɛ lìi n fɔ̀rɔ. A be wogabagiri koli, dee di kòro lè, a di sɛ̀ʔɛgēle kɛɛ ní siin nyìn.

²¹ Lìifɔbèle maa pye nànbēle selebingéle siin ní saala kagunɔ felege. Cébèle ní pìíbèle ga córo yaà í.

Zyezu tánʔani kéele lǒgi ǹjoʔo ni

²² Lǎli bee ni a Zyezu wi pìitamabèle lége kɔ́rɔw ni níì jo paa syée woro yɛ́ʔɛ na lǒgi jelige na, woro si syɛ́ɛnmi yaʔa bi kári.

²³ A wi ga syɛ́ɛnmi yaʔa n kwɔ́ɔ, a wi lúgu nyanbelegi na wi nibin bi sa Kolocɔlɔɔ nyɛ́ɛri. A cángi jée n wi yaʔa yaà wi nibin.

²⁴ Kɔ́rɔw si maa léeli lógbew na n kwɔ́ɔ, a lǒgi kùnguruyo i kɔ́rɔw ŋɔrɔgi, níì cán káfalagi maa ni be fàrá.

²⁵ Lǎli ni gòpɔ́nyɛnini nùuni lè, a Zyezu i táanri lǒgi ǹjoʔo ni ni maa be ma.

²⁶ A wi pìitamabèle ga wi nyaa wi i táanri lǒgi ǹjoʔo ni ni maa poro ma, a be fúnyi fala n curugo be na. A be jo: «Màdeo wii!» Pe maa ni yákpogèle wáa àmɛɛ pe da ni fɛ̀ɛgí lè.

²⁷ A Zyezu fala n gi joo be ma níì jo: «Ye yele fúnyi nyíngi, mii wii, ye a kɔ́ fyáa í!»

²⁸ A Pyɛri wi yari: «Kàfɔw, kapye mɔ wii, mi tíi mii í da syée yaà mɔ ma lǒgi ǹjoʔo ni.»

²⁹ A Zyezu wi pye: «Da maa!» A Pyɛri yiri kɔ́rɔw ni ni táanri lǒgi ǹjoʔo ni ni syée Zyezu ma.

³⁰ A wi ga káfalagi nyaa àmɛɛ gi kpɔ́ʔɔ lè, a fyáari wi cò. A wi i caa bi kéle. A wi fala n yákpoli wáa níì jo: «Kàfɔw, mi mii syɔɔ!»

³¹ A Zyezu kɔ́gi sánʔa terire n wi cò, níì wi pye: «Nàɔn, mɔ tágali n cɛ́rɛ, nyàʔá na mɔ miyɛɛ gábala?»

³² A be ga jée kɔ́rɔw ni, a káfalagi fala n yére.

³³ Bele be pye kɔ́rɔw ni lè, a be fala n wi kpɔ̀ʔɔrɔ níì jo: «Mɔ wi tɔ̀nɔ́ nyɛ Kolocɔlɔɔ Jáaw kányɛʔɛ ni.»

Zyezu n yáabèle pɔʔɔ Zyenezarɛti tɛ́nɛmi ni

³⁴ A pe ga jeli lǒgi jelige na, a be nan Zyenezarɛti tɛ́nɛmi na.

³⁵ A tɛ́ɛgi bee syɛ̀ɛnnɛ ga wi wéle n cán, a be fala n tun tɛ́nɛmi bee kèye myɛ ma, a be pan ní yáabèle myɛ ní wi ma.

³⁶ Ní baa wi nyɛ́ɛri níì jo wi tɛ́nɛ fɔ̀lɔ be tánga wi búrogi kàgomɔ yagana na. Bele myɛ be tánga lè bi na, a be pɔʔɔ.