Matye 12 - Cebaara Bible 2010

Zyezu ní cândɛnɛgi kéele

¹ Koro kàdoʔo ma a Zyezu i forogi syɔ̀ɔ̄lɔ séye ni, cândɛnɛgɛ canʔa ni. Kateegi si maa wi pìitamabèle jáa, a be fala ni supiigèle kabagi ni kúru.

² A Farisibèle ga gee bee nyaa, a be Zyezu pye: «Wéle, gee gi lè ki ga yɛlɛ gi kpéʔele cândɛnɛgi ni í, mɔ piitamabèle i gee bee kpéʔele.»

³ A wi be pye: «Yele ga kɔ́ɔ̀ gi wéle sɛ́bɛw ni ì, gee Davidi da kpéʔele lè lǎli ni kateegi da wi jáa lè woro ní wi taʔafɔbèle ní ì?

⁴ Wi maa sáà jée Kolocɔlɔɔ kpáagi ni búruw wi kaan Kolocɔlɔɔ ma lè n wi lìi, wee wi lè woro ní wi taʔafɔbèle da yɛlɛ bi wi lìi í, fwɔɔ sáriga-wòlobèle yagana.

⁵ Ba yele ga wɔ́ɔ kɔ́ɔ̀ gi wéle Mowizi làlwaw sɛ́bɛ ni ì, àmɛɛ sáriga-wòlobèle cândɛnɛgi kálagi lè kpɔ̀ʔɔrɔli kpaʔa ni cégboolo o cégboolo ní sèʔé i nyɛ kajoolo fun ì?

⁶ Mii si a gi joo yele ma: Keelaa i naa, lee li kpɔ́ʔɔ n sɔ̀lɔ lè kpɔ̀ʔɔrɔli kpaʔa wólo na.

⁷ Yele ga maa syɛ́ɛnri naa kɔ́rɔ cán dee di jo lè: ‹Nyinimɛ mii caa, mii o sáriga caa í,› yele mǎà dée syɛɛnsinbèle faʔa í.

⁸ Níì cán Syɔɔn-pya wi nyɛ cândɛnɛgi kàfɔlɔ.»

Kɔwaʔa-nanw kéele

⁹ A wi ga yìri nɛɛ bee a wi sáà jée be sérikpaagi ni.

¹⁰ Nànwaa si maa pye yaà ní kɔwaʔa ní. A be Zyezu yíbe níì jo: «A gi yɛlɛ lé be syɔɔn pɔʔɔ cândɛnɛgi ni?» Kolomɔ kéelaa pe da ni caa bi taʔa wi na.

¹¹ A wi si be yari: «Wìí wi naa yele níngi ni, byà nibin ga pye wi ma á wi too weʔe ni cândɛnɛgi canʔa ni, wi wi yaʔa sìn-yirige ni?

¹² Syɔɔn si n pɔ́rɔ n sɔ̀lɔ byà na. Koro na gi yɛlɛ be kacànna kpéʔele syɔɔn na cândɛnɛgi ni.»

¹³ Níì nǎnw pye: «Mɔ kɔ́gi sánʔa.» A nǎnw gi sánʔa, a gi fala n pɔʔɔ n pye àmɛɛ siin wógi nyɛ lè.

¹⁴ A Farisibèle fala n yiri n sáà peyɛɛ kpóʔoro n joo àmɛɛ poro a gi pye lè si Zyezu taa kpóo.

Falipyew Kolocɔlɔɔ nyɛ́nɛ n wòlo lè

¹⁵ Kàjáa Zyezu maa gi cán, a wi yiri nɛɛ bee ni syée. A syɛɛnnɛʔɛmɛ taʔa wi na, a wi pe myɛ pɔʔɔ,

¹⁶ níì gi joo n gbàn be ma níì jo pe a kɔ́ woro tɛ̀ɛn syɛ́ɛnbèle na í.

¹⁷ Jàngó syɛ́ɛnri í foro dee kanyaajoow Ezayi da joo lè níì jo:

¹⁸ «Kolocɔlɔɔ n jo: ‹Mii falipyew wéle wee, woro wee mii nyɛ́nɛ n wòlo lè. Woro wi nyɛ mii syɛɛn-nidaanmaw, wee kéele li mii dɛ́nɛ lè gbanʔama mii fúngi ni. Mii a mii pǐli le wi ni. Wi a ba ra kútiiw kéele nyuu da tèé Syɛɛnfeleyi na.

¹⁹ Wi a ba ra túngu ní syɛ́ɛnbèle ní í, wi si a wɔ́ɔ ba ra fúlo be na í. Pe si a wɔ́ɔ ra wi yákpoli lúro kóloyi na í.

²⁰ Wi a tée nyɛ́nɛri kàgaangabi-bánana kabi bi foro í. Alí wírigi ga ni yirigi fètinfigi-bánana ni, wi a li fígi foro í bi taa sínni í ba fànʔa taa woro bárigaw ni.

²¹ Syɛɛnfeleyi a ba wi mɛ́ɛgi pye yi sɔ̀ngumi tɛɛtaʔaga.› »

Zyezu n syɛɛnlurugoro kaan kolomɔ kéelaa na pe joo n taʔa wi na lè

²² Lǎli bee ni a be pan ní màdebēle syɔ́ɔn ní Zyezu ma, wi maa pye fúuɔn ní wɔ́ɔ i nyɛ boboo, a wi baa wi pɔʔɔ, a wi fala ni nyuu ní wɔ́ɔ i nyaagi.

²³ A syɛ́ɛnmi myɛ i káama gi na níì jo: «A yele jo lé Davidi Jáaw ban wi nyɛ wee naa í?»

²⁴ A Farisibèle ga gi lóʔo, a be jo: «Nǎnw naa o màdebèle nɛnɛ ni yirigi syɛ́ɛnbèle ni Bɛlizebuli kàdoʔo ma í, wi lè màdebèle kàfɔlɔ.»

²⁵ Amɛɛ si Zyezu be sɔ̀nguri cán lè, a wi be pye: «Fànʔa o fànʔa ga ni túngu ní kiyɛɛ ní, ki a kɔ́ ba kálagi. Kàʔa o kàʔa ga wɔ́ɔ ni túngu ní kiyɛɛ ní, wàlá narigbaʔa o narigbaʔa, ki a báriga í.

²⁶ Koro na Sutanaw ga ni Sutanaw nɛnɛ ni yirigi, a wi túngu ní wiyɛɛ ní wii, mɛ̀ɛ́ si wi fǎngi a gbǎn báriga bi sɛ́ɛ?

²⁷ Mii ga ni màdebèle nɛnɛ ni yirigi Bɛlizebuli bárigaw ni, wìí báriga ni si yele jáabèle be nɛnɛ ni yirigi? Koro na poro pe a ba pye yele kútiijoobèle.

²⁸ Amɛɛ si mii màdebèle nɛnɛ ni yirigi Kolocɔlɔɔ Pǐli báriga ni lè, ye gi cán Kolocɔlɔɔ fǎngi n nùuni yele na.

²⁹ Mɛ̀ɛ́ syɔɔn a gbǎn jée nànnirio kpaʔa ni bi wi yáriri láa wi sìnbwɔɔ ni? Fwɔɔ wi wi pwɔɔ gbɛnʔɛnɛ si náa wi kpáagi fuguru.

³⁰ Wee wi lè wi ga bɛ̀ɛ ní mii ní í, wee bee mii kéeli bɛɛn. Wee wi lè wi o syɛ́ɛnbèle kpóʔoro ní mii ní í, wee bee i be caragi mii na.

³¹ Koro na mii a gi joo yele ma, kapeele o kapeele syɛ́ɛnbèle kpéʔele lè, ní Kolocɔlɔɔ mɛ́ɛkalagiri joomɔ myɛ be nyuu lè, gee bee kùsulugo a syɔɔ be ma. Kàjáa wàa ga ni Pìicǎnni mɛ́ʔɛ kálagi, gee bee kùsulugo a tée syɔɔ í.

³² Syɔ́ɔnwee faala ga syɛɛnpeere joo n wáa Syɔɔn-pya na lè, di kùsulugi a syɔɔ wi ma. Kàjáa wee ga syɛɛnpeere joo n wáa Pìicǎnni na lè, di kùsulugi a tée syɔɔ wi ma dulunyanw naa ni í, n náa kɔ́ɔ̀ yére dulunyanwee wi maa lè í.

Tíiyi i cángi yi yasanri báriga ni

³³ «Ki n yɛlɛ ye gi joo ye jo: ‹Tíigi n nyɔɔ, a gi yasanri wɔ́ɔ̀ nyɔɔ.› Koro ga jáa ye jo: ‹Tíigi n pee a gi yasanri wɔ́ɔ̀ pee.› Níì cán tiige i cángi ki yasanri báriga ni.

³⁴ Yele màátɔnw jàala, àmɛɛ yele pee lè, mɛ̀ɛ́ yele a gbǎn ra syɛɛncanra nyuu bi sɛ́ɛ? Níì cán gee gi syɔɔn fúngi nyìn lè, koro gi yirigi wi nyɔ́ɔgi ni.

³⁵ Syɛɛncaɔn i yacanri yirigi wi lɔjanri ni, dee wi kɔn lè. Syɛɛnpeeo si i yapeeri yirigi wi lɔbeeri ni, dee wi kɔn lè.

³⁶ Mii a gi joo yele ma si jo, faʔami syɛ́ɛnrɛ myɛ syɛ́ɛnbèle nyuu lè, kútiiw canjerige ga nan, pe a di kɔ́rɔw joo.

³⁷ Mɔ a ba tànʔa taa mɔ syɛ́ɛnri báriga ni, wàlá bi kolomɔ taa toro bárigaw ni.»

Pe i kakpɔʔɔ caa

³⁸ Lǎli bee ni a làlwaw sɛ́bɛwelebèle pèle ní Farisibèle pèle gi joo Zyezu ma níì jo: «Tamafɔw, wolo i caa mɔ í kakpɔɔgaa kpéʔele tɛ̀ɛn wolo na.»

³⁹ A wi be yari: «Syɛɛnpeebèle ní kanɔnʔɔbyebèle i kakpɔɔgaa caa, kàjáa kakpɔɔgaa faala a kpéʔele be nyɛnɛ na í, kapye Zyonasi wógi félege ban í, wi da pye lè kanyaajoow.

⁴⁰ Níì cán àmɛɛ ‹Zyonasi da canya taanri ní yébiliye taanri kwɔ́ɔ lè lòkpɔɔgi ni, fákpɔɔgi láʔa ni lè,› ànbée Syɔɔn-pya a wɔ́ɔ ba canya taanri ní yébiliye taanri kwɔ́ɔ tári fúngo ni.

⁴¹ Niniivi ye syɛ́ɛnbèle a ba yìri bi yére kútiiw canjerige na ní lǎli naa syɛ̀ɛnnɛ ní si kútiiw cáan be na. Níì cán Niniivi ye maa kàdoʔo wáa be kapeegèle ma Zyonasi syɛɛnjóori báriga ni. Ye wéle, kàa i nɛɛ naa, gee gi kpɔ́ʔɔ n sɔ̀lɔ Zyonasi na lè.

⁴² Céw wi da pye lè fànʔafɔlɔ, woro wee wi da yìri lè canʔa parima ma wòrogulo kàbangi na lè, wi a ba nyán kútiiw canjerige na ní lǎli naa syɛ̀ɛnnɛ ní si kútiiw cáan be na. Ncan wi maa yìri tári láʔala na n pan ba Salomɔn sícilimi syɛ́ɛnrɛ lóʔo. Ye wéle, kàa i nɛɛ naa, gee gi kpɔ́ʔɔ n sɔ̀lɔ Salomɔn na lè.

Màdew lúrubanna kéele

⁴³ «Màdeo ga yiri syɔɔn ni, wi n sa ni nyaari ni máari lǒgi fun tɛ́ɛyɛ ni ni tɛɛ̀ŋɔndaʔa caa, wi si a kàa taa í.

⁴⁴ Lǎli bee ni wi n jo: ‹Mii a lúru kári sa jée mii kpáagi ni, gee ni mii da yiri lè.› Wi ga pan ní baa gi nyaa wowaʔa ní, á be gi sámaga n pɛ́ɛ níì yacanra tɛ́ʔɛ yaà gi ni,

⁴⁵ wi n kári n sáà màdebèle pèle kɔrɔsiin yeri n fàra wiyɛɛ na, bele be pee n sɔ̀lɔ woro na lè. Pe n baa jée n kòro yaà wi ni, lǎli bee kàdoʔo kele n náa baa gbàn n sɔ̀lɔ wozeligèle na syɔ́ɔnw bee ma. Amɛɛ lǎli naa syɛ̀ɛnnɛ pee lè, ànbée ki a wɔ́ɔ ba pye be ma.»

Zyezu nɔ́ɔw ní wi cɔnɔbèle kéele

⁴⁶ Lǎli ni Zyezu sèʔé pye ni nyuu ní syɛ́ɛnmi ní lè, a wi nɔ́ɔw ní wi cɔnɔbèle pan n baa yére kàfugi na ní i caa bi joo ní wi ní.

⁴⁷ [A wàa wi pye: «Mɔ nɔ́ɔw ní mɔ cɔnɔbèle i yaà woyérebéle ní kàfugi na. Pe i caa bi joo ní mɔ ní.»]

⁴⁸ A wi syɛ́ɛnri bee joofɔlɔ pye: «Wìí wi nyɛ mii nɔ́ɔw? Bɛ̀lɛ́ si i nyɛ mii cɔnɔbèle?»

⁴⁹ Níì wi kɔ́gi fìin wi pìitamabèle na níì jo: «Wéle, mii nɔ́ɔw ní mii cɔnɔbèle be nyɛ bele naa.

⁵⁰ Syɔɔn o syɔɔn ga ni mii Tóow nyɛ́nɛ kèlē kpéʔele, wi lè nyɛ̀ʔɛni na, a wi náà pye nàɔn yoo, cɔlɔɔ yoo, wee bee wi nyɛ mii senyɛnw ní i nyɛ mii nɔ́ɔw.»