Matye 11 - Cebaara Bible 2010

Zyan Batisiti tundunbèle

¹ A Zyezu ga kérigèle bee joo n kwɔ́ɔ wi pìitamabèle kɛɛ ní siin ma, a wi núngo nɛɛ bee bi sa ra syɛ́ɛnbèle tama sáā Syɛɛnjóocǎnri nyuu be kěyi ni.

² Amɛɛ Zyan pye lè kàsow ni níì Kirisi kapyegèle kéele lóʔo, a wi wi pìitamabèle tun.

³ A be sáà wi yíbe níì jo: «Wee be jo lè wi i maa, mɔ lé wi láà, ba fwɔɔ wolo í da wàa nikwɔɔ sige?»

⁴ A Zyezu be yari: «Yaa syée ye sa gi tɛ̀ɛn Zyan na, gee yele lóʔo lè ní gee yele nyaa lè.

⁵ Fúunbèle i nyaagi, syɛɛnmɔngɔbèle si i táanri, yaanyɛɛnmi fɔ̀ɔlɔ si wɔ́ɔ i poori, dùnɔbèle si i lúro, kúbèle si wɔ́ɔ i nyángi, foomɔfɔbèle si i Syɛɛnjóocǎnri lúro.

⁶ Mii kéeli ga pye li o nyɛ wee ma lè tɛɛtoolo sábabu í, wee bee i nyɛ dùba pyà!»

⁷ A Zyan pìitamabèle ga lúru ni syée, a Zyezu séli ni nyuu ní syɛ́ɛnmi ní Zyan kéeli na níì jo: «Nyàʔá yele da kári sa wéle fìími tára ni? Nyàákanga lé yele da kári sa wéle, gee káfalagi fíigi lè?

⁸ Ba nyàʔá yele da kári sa wéle? Nànwaa lé yele da kári sa wéle, wee wi fànicàɔn le lè? Wéle, bele be fànicǎnw nii lè, bele bee i nyɛ fànʔafɔbèle kpaaya ni.

⁹ Ba nyàʔá si yele da kári sa wéle? Kanyaajoowaa lé wii? Mii si a gi joo yele ma si yele pye, wi n kpɔ́ʔɔ n sɔ̀lɔ kanyaajooo na.

¹⁰ Níì cán Zyan kéeli na ki da sɛ́bɛ níì jo: ‹Wéle, mii a mii tundunw tórigo mɔ yɛ́ʔɛ ma. Wi a sa mɔ kólogi sámaga mɔ yɛ́ʔɛ ma.›

¹¹ Mii a gi joo yele ma kányɛʔɛ ni, bele myɛ cébèle see lè, wàa ga kɔ́ɔ̀ yìri pe níngi ni wee wi kpɔ́ʔɔ n sɔ̀lɔ Zyan Batisiti na lè í. Kàjáa wee wi cɛ́rɛ lè pe myɛ na nyɛ̀ʔɛni fànʔa ni, wee bee n sèʔê kpɔ́ʔɔ n sɔ̀lɔ Zyan na.

¹² Nlaʔa Zyan Batisiti lǎli na n baa nan níjanʔa na, pèle i ŋàʔaná ni jǐn nyɛ̀ʔɛni fànʔa ni, ncan syɛɛnniribèle be gi taagi.

¹³ Níì cán kanyaajoobèle myɛ, ní Mowizi làlwaw sɛ́bɛ syɛ́ɛnrɛ maa tée ni nyuu nlaa yaà booma ni fwɔɔ n baa nan Zyan na.

¹⁴ Yele ga ni caa bi fɔ̀lɔ gi na, ye gi cán Elii pe da jo lè wi i maa, woro wi nyɛ Zyan.

¹⁵ Líiweele ga pye wee na lè, wi líiyi cáan waa lúro.

¹⁶ Nyàʔá ní si mii a tɔ́ɔliw naa syɛ̀ɛnnɛ tímana? Pe i nyɛ àmɛɛ pìibēle nyɛ lè, bele be tɛ́ɛn lè cédaala na, ní i yákpogèle wáa be pìinyɛnbèle ma níì jo:

¹⁷ ‹Wolo maa ni máagèle wíi yele ma, yele si da ni yóo í. A wolo wɔ́ɔ i nyamɛɛgèle wáa, yele si da ni nyaan í.›

¹⁸ Níì cán Zyan pan lè, wi o líi í, wi si wɔ́ɔ o gbo í, a be jo: ‹Màdeo i nyɛ wi ni.›

¹⁹ Syɔɔn-pya si pan lè n ba ni líi ní i gbo, a be jo: ‹Wéle, lìigena-n-ban ní singbaadiɔn wii. Wi i nyɛ wálisyɔɔbèle ní kapeebyebèle tàannyɛnnɛ.› Sícilimi si n tànʔa taa bi kapyegèle báriga ni.»

Kěyee yi tágali cée lè

²⁰ Kěyee ni Zyezu da kakpoloyi saʔa kpéʔele lè, yi syɛ́ɛnbèle si ga kàdoʔo wáa be kapeegèle ma lè í, a wi tìgi yi na níì jo:

²¹ «Wɔʔɔli a pye mɔ na Korazɛn! Wɔʔɔli a wɔ́ɔ pye mɔ na Bɛtisayida! Níì cán kakpoloyi yi kpéʔele yele ni lè, yi ga maa kpéʔele Tiiri, ní Siidɔn ni, yi wóbèle mǎà dée gɔ̀nvaʔaya búroyo le si cɔnʔɔ tɛ́ʔɛ bi peyɛɛ vílige bi gi tɛ̀ɛn poro n kàdoʔo wáa be kapeegèle ma.

²² Mii si a gi joo yele ma, Tiiri, ní Siidɔn kútiiw a ba cɛ́rɛ bi sɔ̀lɔ yele wów na kútiiw canjerige na.

²³ A mɔ, Kapɛrinayumi, a pe a ba mɔ yìrige lé fwɔɔ bi sa nan nyɛ̀ʔɛni na? Eʔe, mɔ si a tìgi fwɔɔ bi sa nan tɛɛwɔʔɔgi na. Níì cán kakpoloyi yi kpéʔele mɔ ni lè, yi ga maa kpéʔele Sodɔmi ni, ki mǎà dée kòro beè, fwɔɔ bi ba nan níjanʔa na.

²⁴ Mii si a gi joo yele ma, Sodɔmi tári kútii a ba cɛ́rɛ bi sɔ̀lɔ yele wów na kútiiw canjerige na.»

Yaa maa mii ma yele a ŋɔ́ndaali taa

²⁵ Lǎli bee ni a Zyezu fala n gi joo níì jo: «Mii i bariga kaangi mɔ ma, Abaa, mɔ wi lè nyɛ̀ʔɛni ní tári Kàfɔlɔ, níì cán mɔ n kérigèle naa làriga sícilibèle ní kacánbèle na, níì ge tɛ̀ɛn pìíbèle na.

²⁶ Ɛɛn, Abaa, ncan ki maa pye mɔ nyɛ́nɛ kéele bi gi kpéʔele ànbée.

²⁷ Mii Tóow n yáriri myɛ le mii kɔ́yi ni. Wàa faala ga Jaafɔw cán n foro í, kapye Tofɔw ban í. Wàa faala si ga wɔ́ɔ̀ Tofɔw cán n foro í, kapye Jaafɔw ban í, ní wee na Jaafɔw caa bi wi tɛ̀ɛn lè, fwɔɔ woro.

²⁸ Yaa maa mii ma yele bele myɛ ye fɔ̀rɔgí lè, àmɛɛ yele túgori líbe lè, mii a ba ŋɔ́ndaali kaan yele ma.

²⁹ Ye mii fáliw túgoro tugo yeyɛɛ na àmɛɛ pe gáà nìye zúu taʔa yi na lè, ye pye mii pìitamabéle. Níì cán mii i màama kpéʔele, á mii fúngi wɔ́ɔ̀ nyíngi. Yele a ŋɔ́ndaali taa yele fúnyi ni.

³⁰ Níì cán mii zúuw i nyɛ fɔ̀rɔgɔ fun, mii túgori ga líbe í.»