Matye 10 - Cebaara Bible 2010

Pìitunbèle kɛɛ ní siin

¹ A Zyezu wi pìitamabèle kɛɛ ní siin yeri níì séew kaan be ma koro ga pye pe gbǎn ra màdebèle nɛnɛ da yirigi syɛ́ɛnbèle ni, sáā yáami féleye myɛ láari be na.

² Pìitunbèle kɛɛ ní siin mɛ́ɛyɛ yi nyɛ yee naa: Wozeligi gi nyɛ Siimɔn, wee be yiri lè Pyɛri, woro ní wi cɔnɔw Andire, ní i wee yiri Zyaki, ní i wi cɔnɔw yiri Zyan, be nyɛ lè Zebede jáabèle,

³ ní i bele yiri Filipi, ní Baritelemii, ní Toma, ní Matye, wi lè wálisyɔɔnanw, ní Zyaki wi lè Alife jáaw, ní Tade,

⁴ ní Siimɔn, wi lè Kanaan ye wów, n fàra Zyudasi Isikariyɔti na, wee wi baa Zyezu le wi nigoobèle kɔ́yɔ ni lè.

Zyezu n kɛɛ ní siinw tun

⁵ A Zyezu kɛɛ ní siinw bee tun níì gi joo n gbàn be ma níì jo: «Ye a kɔ́ kári Syɛɛnfeleyaa ma í. Ye si a wɔ́ɔ kɔ́ jée Samarii ye kègaa ni í.

⁶ Kàjáa ki n yɛlɛ yaa syée Isirayɛli narigbaagi bàala ma, poro bele be pùuni lè.

⁷ Yele ga ni syée, yaa gi nyuu kólogi na yaa syée ye jo: ‹Nyɛ̀ʔɛni fànʔa n nùuni,›

⁸ yáā yáabèle poori, yé wɔ́ɔ yaa kúbèle nyángi, yáā yaanyɛɛnmi fɔ̀ɔlɔ poori, yáā màdebèle nɛnɛ yaa yirigi syɛ́ɛnbèle ni. Yele n di taa màā na, ye wɔ́ɔ yaa di kaangi màā na.

⁹ Ki ga yɛlɛ yele í tɛɛ̀, wàlá wálifiio, wàlá kanyɛɛnrɛ wáli le yele cófaabèle ni í.

¹⁰ Yele a wɔ́ɔ kɔ́ kùsɛɛ-kpàbibēle láa í, wàlá bi buroyo siin-ziin láa í, koro ga jáa taʔalaya ní kpèegēle í. Níì cán falipyeo n yɛlɛ paa wi kaangi waa líi.

¹¹ Yele ga jée kèkpɔɔgaa ni, wàlá kèpilaa faala ni, ki n yɛlɛ ye yíbege kpéʔele bi gi cán wee wi nyɛ lè báriga syɔ́ɔn gi ni. Ye kòro ní wee bee ní bi taa yele làrigárili í ba nan.

¹² Yele ga jée kpáagee ni lè, ye dùba kpéʔele be ma yɛɛ̀nyingi kéele na.

¹³ Kpáagi bee syɛ̀ɛnnɛ ga pye báriga syɛ̀ɛnnɛ, yele yɛɛ̀nyingi a kòro yaà. Kàjáa pe ga pye báriga fun syɛ̀ɛnnɛ, yele yɛɛ̀nyingi a lúru pan yele ma.

¹⁴ Kapye pe ga fɔ̀lɔ yele na kpáagee ni lè í, wàlá kěgee ni lè í, ní wɔ́ɔ i yele syɛ́ɛnri lúro í, yele ga yiri kpáagi bee ni, wàlá kěgi bee ni, ki n yɛlɛ yele í cíbigi kóri láʔa yele tɔ́lɔyi na.

¹⁵ Mii a gi joo yele ma kányɛʔɛ ni, Sodɔmi, ní Gomɔri tári kútii a ba cɛ́rɛ bi sɔ̀lɔ kěgi bee wóo na kútiiw canjerige na.

Zyezu n be sàmi wɔʔɔli kéele na li maa lè

¹⁶ «Ye wéle, mii i yele tórogi solomikaari nínge ni àmɛɛ bàala nyɛ lè. Koro na gi yɛlɛ yele í cìlige àmɛɛ wàbiyi nyɛ lè, si pye kajoolo fun àmɛɛ kàtogèle nyɛ lè.

¹⁷ Yaa yeyɛɛ kɔ̀rɔsíi syɛ́ɛnbèle na, ncan pe a kɔ́ ba ra yele nii kútiijoobèle kɔ́yɔ ni sáā yele kpúmɔn pe sérikpaayi ni.

¹⁸ Pe a wɔ́ɔ kɔ́ yele kɔ́ri bi sa yérige tári kacɔɔnribéle ní fànʔafɔbèle yɛ́ʔɛ ma mii kéeli na, jàngó yele í pye séera poro ní syɛɛnfeleyi myɛ ma.

¹⁹ Kàjáa lǎli ni pe ga yele le be kɔ́yi ni lè, syɛ́ɛnree yele a joo lè, ní kánmee na yele a di joo lè, ki ga yɛlɛ yele fúnyi í kɔ́ curugo kéeli bee na í. Dee yele a joo lè, Kolocɔlɔɔ a di kaan yele ma lǎli bee ni.

²⁰ Níì cán yele ban ye a ra nyuu í, fwɔɔ yele Tóow Pìle li a ra nyuu yele ni.

²¹ Syɔɔn a ba ra wi senyɛnnɛ kaangi kùúw ma, tofɔlɔ í da wi pyà kaangi kùúw ma, pìíbèle si wɔ́ɔ ba yìri be seefɔbèle kurugo sáā be kúu.

²² Yele kéeli a ba syɛ́ɛnbèle myɛ bɛɛn mii mɛ́ɛgi kéele na. Kàjáa syɔ́ɔnwee wi ga fɔ̀rɔgi kpàraco lè n taa n baa nan gi kwɔ́ɔmi na, wee bee a syɔɔ.

²³ Pe ga ni yele wɔʔɔ kègaa ni, yaa fyàalá yaa syée kàa nikwɔɔ ma. Mii a gi joo yele ma kányɛʔɛ ni, yele a gbǎn Isirayɛli kěyi myɛ foro í bi taa Syɔɔn-pya í lúru pan.

²⁴ Pìitamawaa faala ga kpɔ́ʔɔ n sɔ̀lɔ wi tamafɔlɔ na í. Pulowaa faala ga wɔ́ɔ̀ kpɔ́ʔɔ n sɔ̀lɔ wi kàfɔlɔ na í.

²⁵ Ki tɛɛ̀yéregi gi nyɛ pìitamaw í pye ní wi tamafɔw ní sèjira, púlow si wɔ́ɔ pye ní wi kàfɔw ní sèjira. A be si gbàn ni narigbaagi wólɛɛɔ yiri Bɛlizebuli yɔ́ɔ̀, n náa kɔ́ɔ̀ yére wi kpaʔa wóbèle na.

Wee na syɔɔn yɛlɛ bàā fɛ̀ɛgí lè

²⁶ «Koro na ki ga yɛlɛ yele í da fɛ̀ɛgí be na í. Níì cán yárigee gi lè wodɔngɔ ní, ki a kɔ́ kòro sìndɛ̀ɛn ni í, wàlá ki ga pye wolaraga ní, ki a kɔ́ kòro sìnján ni í.

²⁷ Dee mii nyuu yele ma lè yébilimi ni, ki n yɛlɛ yaa di nyuu gbɛ̀ɛ́nmi na. Dee si yele lúro lè líiye taana, yaa di nyuu yaa yákpogèle wáa ní di ní kpáayi ǹjoʔo ni.

²⁸ Bele be céri kúu lè, pe si a gbǎn pǐli kpóo í, yele a kɔ́ ra fɛ̀ɛgí bele bee na í. Kolocɔlɔɔ na yele yɛlɛ bàā fɛ̀ɛgí, woro wee wi a gbǎn pǐli ní céri myɛ pínɛ kálagi lè tɛɛwɔʔɔgi ni.

²⁹ Pe o cɔ̀ɔrɔbiigéle siin pára kàkɛɛlɛ nibin na ì? Koro ní ki myɛ ní li làa nibin a gbǎn too tári na yele Tóow kàdoʔo ma í.

³⁰ Yele si na, wi n yele ǹjoori myɛ nyɔ́ɔ cán.

³¹ Koro na ki ga yɛlɛ yaa fɛ̀ɛgí í, ncan yele lɔ́ri n gbàn n sɔ̀lɔ cɔ̀ɔrɔbiigéle saʔa wóro na.

Zyezu Kirisi cánvɔbèle ní wi céefɔbèle

³² «Koro na syɔɔn o syɔɔn wi fɔ̀lɔ mii na lè syɛ́ɛnbèle nyɛ́nɛ na, mii a wɔ́ɔ fɔ̀lɔ wee bee na mii Tóow nyɛ́nɛ na, wi lè nyɛ̀ʔɛni na.

³³ Wee faala si ga mii cée lè syɛ́ɛnbèle nyɛ́nɛ na, mii a wɔ́ɔ wee bee cée mii Tóow nyɛ́nɛ na, wi lè nyɛ̀ʔɛni na.

Gee Zyezu baa lége lè

³⁴ «Ki ga yɛlɛ yele í da sɔ̀ngí mii n pan ba bɛ̀ɛlɛ lége dulunyanw ni í. Mii ga pan ba bɛ̀ɛlɛ lége wi ni í, fwɔɔ ŋɔsée.

³⁵ Níì cán mii n pan ba nigooro lége nàɔn ní wi tóow nínge ni, si wɔ́ɔ di lége pìcaa ní wi nɔ́ɔw nínge ni, si wɔ́ɔ di lége cefɔɔn ní wi nǎnw nɔ́ɔ nínge ni.

³⁶ Syɔɔn narigbaagi wòolo a ba kàri wi nigoolo.

³⁷ Syɔ́ɔnwee faala wi ga wi tóow, wàlá wi nɔ́ɔw kéele yaʔa a li wi dɛ́nɛ n sɔ̀lɔ mii wóli na lè, wee bee ga nyɔɔ n yɛlɛ bi pye mii wóo í. Wee pyà ga pye lè nàɔn, wàlá cɔlɔɔ yoo, á wi wi kéeli yaʔa a li wi dɛ́nɛ n sɔ̀lɔ mii wóli na, wee bee ga nyɔɔ n yɛlɛ bi pye mii wóo í.

³⁸ Wee ga wɔ́ɔ̀ pye lè wi o wi tiiparigi lée ni maa mii kurugo í, wee bee ga nyɔɔ n yɛlɛ bi pye mii wóo í.

³⁹ Wee wi ga wi sìíw syɔɔ lè, wi a kɔ́ ba bɔ̀nɔ wi ni. Wee si wi bɔ̀nɔ wi sìi ni lè mii kéeli na, wee bee a ba wi woò taa.

Tɔ̀nɔw félege taaganma

⁴⁰ «Wee wi ga fɔ̀lɔ yele na lè, mii na wi wɔ́ɔ̀ fɔ̀lɔ. Wee si wi fɔ̀lɔ mii na lè, mii Tunvɔw na wi sèʔê fɔ̀lɔ.

⁴¹ Wee wi ga fɔ̀lɔ lè kanyaajoowaa na àmɛɛ wi nyɛ lè kanyaajooo, wee bee a ba kanyaajooo tɔnɔfeleo taa. Wee ga wɔ́ɔ̀ fɔ̀lɔ lè syɛɛnsinwaa na àmɛɛ wi nyɛ lè syɛɛnsiɔn, wee bee a ba syɛɛnsiɔn tɔnɔfeleo taa.

⁴² Mii a gi joo yele ma kányɛʔɛ ni, àlí syɔ́ɔnwee faala ga lònyínge yagbaanyɛnnɛ kaan bele naa wàa wobile ma lè, àmɛɛ wi nyɛ lè mii pìitamaɔ, wee bee a ba bɔ̀nɔ wi tɔ̀nɔw ni nyáana í.»