Matye 1 - Cebaara Bible 2010

Zyezu Kirisi tóolɛɛbèle mɛ́ɛyɛ kéele

¹ Zyezu Kirisi wi lè Davidi ní Abirahami jáaw, wi toolɛɛbèle mɛ́ɛyɛ yi nyɛ yee naa.

² Abirahami wi da Izaaki see. A Izaaki Zyakɔbi see. A Zyakɔbi Zyuda ní wi senyɛnbèle see.

³ A Zyuda Farɛsi ní Zara see Tamari na. A Farɛsi Ɛsurɔmi see. A Ɛsurɔmi Arami see.

⁴ A Arami Aminadabi see. A Aminadabi Naasɔn see. A Naasɔn Salimɔn see.

⁵ A Salimɔn Bowɔzi see Arahabi na. A Bowɔzi Obɛdi see Wuruti na. A Obɛdi Izayi see.

⁶ A Izayi fànʔafɔw Davidi see. A Davidi Salomɔn see Urii céw na.

⁷ A Salomɔn Worobowami see. A Worobowami Abya see. A Abya Aza see.

⁸ A Aza Zyozafati see. A Zyozafati Yorami see. A Yorami Ozyasi see.

⁹ A Ozyasi Yotami see. A Yotami Akazi see. A Akazi Ezekyasi see.

¹⁰ A Ezekyasi Manase see. A Manase Amɔn see. A Amɔn Zyozyasi see.

¹¹ A Zyozyasi Yekonya ní wi senyɛnbèle see wojo-mí-káribèle làla ni Babilɔni ma.

¹² Wojo-mí-káribèle kadoʔo ma Babilɔni ma, a Yekonya Salatyɛli see. A Salatyɛli Zorobabɛli see.

¹³ A Zorobabɛli Abiyudi see. A Abiyudi Eliyakimi see. A Eliyakimi Azɔri see.

¹⁴ A Azɔri Sadɔki see. A Sadɔki Ahimi see. A Ahimi Eliyudi see.

¹⁵ A Eliyudi Eleyazari see. A Eleyazari Matan see. A Matan Zyakɔbi see.

¹⁶ A Zyakɔbi Zyozɛfu see wi da pye lè Marii nǎnw. A Marii Zyezu see, wee be yiri lè Kirisi.

¹⁷ Koro na nlaʔa Abirahami na n baa nan Davidi na, a koro pye yìrigēle kɛɛ ní sicɛrɛ. Nlaʔa Davidi na n baa nan cò-mí-kárili làla na Babilɔni ma, a koro wɔ́ɔ̀ pye yìrigēle kɛɛ ní sicɛrɛ. Nlaʔa cò-mí-kárili làla na Babilɔni ma n baa nan Kirisi na, a koro wɔ́ɔ níì pye yìrigēle kɛɛ ní sicɛrɛ.

Zyezu Kirisi seeganmi syɛ́ɛnrɛ

¹⁸ Wéle, kánmee na Zyezu Kirisi seeganmi da pye lè, ncan Zyozɛfu maa wi nɔ́ɔw Marii cò wi pìcaa. Sáni pe peyɛɛ ján lè, a wi wi nyaa ní fícɛnnɛ ní Pìicǎnni báriga ni.

¹⁹ Wi nìyiliw Zyozɛfu maa pye syɛɛnsiɔn. Wi da ni caa bi wi mɛ́ɛgi kálagi í, ní i sɔ̀ngí bi wi yaʔa làrama ni.

²⁰ Kàjáa àmɛɛ wi kéeli bee sɔ̀ngí lè, a Kàfɔw tundunwaa baa wiyɛɛ dɛ̀ɛn wi na ŋúnɔgɔ na níì wi pye: «Zyozɛfu, mɔ wi lè Davidi jáaw, ki ga yɛlɛ mɔ í fyáa mɔ picaaw Marii pɔrili na í, níì cán Pìicǎnni báriga ni wi fícɛnni taa.

²¹ Wi a pyà see nàɔn. Mɔ si a ra wi mɛ́ɛgi yiri Zyezu, níì cán woro wi a ba wi syɛ́ɛnbèle syɔɔ pe kapeebyeri ma.»

²² Gee bee myɛ n kpéʔele jàngó Kàfɔw syɛ́ɛnrɛ í gbǎn foro dee wi da joo lè wi kanyaajoow nyɔ́ɔ ni níì jo:

²³ «Wéle, nàngeele sinján pìcaaw a ba fícɛnnɛ taa bi pyà see nàɔn, pe si a ra wi mɛ́ɛgi yiri Emanuwɛli. Ki kɔ́rɔw wi nyɛ, Kolocɔlɔɔ i nyɛ ní wolo ní.»

²⁴ A Zyozɛfu ga yìri ŋúnɔmi na, a wi fala n Marii láa wi pye wi cɔɔ̀, àmɛɛ Kàfɔw tunduɔn gi joo wi ma lè.

²⁵ Wi si ga wi cán wi cɔɔ̀ í n taa a wi baa pìíw see nàɔn. A wi i wi mɛ́ɛgi yiri Zyezu.