Mariki 9 - Cebaara Bible 2010

¹ A wi níì be pye: «Mii a gi joo yele ma kányɛʔɛ ni, pèle i naa nɛɛ yele ni, pe a kùu cán í bi taa be Kolocɔlɔɔ fǎngi nyaa kaa maa ní séew ní.»

Zyezu kàrili kéele

² A canya kɔrɔni ga kwɔ́ɔ, a Zyezu Pyɛri ní Zyaki, ní Zyan kɔ́ri n kári n sáà lúgu nyanbe-nyundɔnɔgɔ njoʔo ni pe yagwɔɔlɔ. A wi sáà kàri pe nyɛnɛ na,

³ a wi búroyi tɔ̀nɔ n fílige ní i nyɛ́ʔɛnɛ gbanʔama, syɔɔn o naa tári na, wee wi a gbǎn wi buroyo jée yi fílige bi yɛlɛ ní yi ní lè í.

⁴ A Elii ní Mowizi peyɛɛ dɛ̀ɛn be na, ní i nyuu ní Zyezu ní.

⁵ A Pyɛri Zyezu pye: «Tamafɔw, àmɛɛ wolo pan naa lè, ki n tɔ̀nɔ n nyɔɔ. Tíi wolo í kpáagéle taanri kpúmɔn, làa í pye mɔ wólo, làa si pye Mowizi wólo, làa si pye Elii wólo.»

⁶ Wi da gi cán gee woro a joo lè í, níì cán fyáari maa be cò gbanʔama.

⁷ A fàfanʔa baa be tɔ́n, a be yákpolo lóʔo fàfaangi fúngo ni a li jo: «Wee naa wi nyɛ mii pìinidaanmaw, ki n yɛlɛ yaa lúro wi ma.»

⁸ A be fala n wéle n màʔa, pe ga níì wàa nyaa ní peyɛɛ ní í, kapye Zyezu nibin ban í.

⁹ A pe ga ni tíri nyanbelegi na, a Zyezu gi joo n gbàn be ma níì be pye, kéelee be nyaa lè pe a kɔ́ li joo wàa ma í kapye lǎli ga baa nan a Syɔɔn-pya nyán n yiri kúbèle nínge ni ban í.

¹⁰ A be syɛ́ɛnri bee cò, ní i peyɛɛ yíbe níì jo: Bi nyán yiri kúbéle nínge ni, nyàʔá gi nyɛ gi kɔ́rɔw?

¹¹ A be wi yíbe níì jo: «Nyàʔá na làlwaw sɛ́bɛwelebéle gi nyuu níì jo: Elii wi yɛlɛ wi séli pan gbɛnʔɛnɛ?»

¹² A wi be pye: «Kányɛʔɛ gii, Elii wi yɛlɛ wi séli pan bi ba yáriri myɛ sámaga di pye àmɛɛ ti da séli pye lè. Nyàʔá na be syɛ́ɛnri naa sɛ́bɛ Syɔɔn-pya kéeli na, níì jo ki n yɛlɛ pe ba wi wɔʔɔ saʔa si wi cée?

¹³ Kàjáa mii a gi joo yele ma Elii maa téè pan n kwɔ́ɔ, a syɛ́ɛnbèle baa wi kpéʔele be fungo n yɛlɛ ní gi ní àmɛɛ ki da sɛ́bɛ lè wi kéeli na.»

Zyezu n pìiwaa pɔʔɔ, wee màdeo da ni kàragí lè

¹⁴ A pe ga sáà nan pìitamazanbèle na, a be syɛɛnnɛʔɛmɛ nyaa a bi be màʔa, làlwaw sɛ́bɛwelebéle si i kàkabalagi kpéʔele ní be ní.

¹⁵ A syɛ́ɛnmi ga Zyezu foo n nyaa, a gi be myɛ fúnyo wɔ́ɔ, a be fàn n kári n sáà wi syáanri.

¹⁶ A wi be yíbe níì jo: «Nyàʔá na yele da ni be kábala?»

¹⁷ Nànwaa si maa pye yaà syɛ́ɛnmi ni, a wee bee Zyezu pye: «Tamafɔw, mii n pan mɔ ma ní mii jáaw ní, màdeo i nyɛ wi ni, wi o gbàn ni nyuu í.

¹⁸ Màdew ga wi yìrige tɛʔɛ o tɛʔɛ ni, wi n wi cáan tári na, tɛ́ɛkabɔlɔgi n ni yirigi wi ma nyɔ́ɔgi ni, wi n ni gǎngèle kúru si syeeli. A mii baa mɔ piitamabèle nyɛ́ɛri níì jo pe màdew yirige wi ni, pe fanʔa si ga taa í.»

¹⁹ A Zyezu be pye: «Yele lǎli naa syɛ̀ɛnnɛ o tági yarigaa na í, làla jòorí mii yɛlɛ bi kwɔ́ɔ ní yele ní? Ba làrigēle jòorí ni mii yɛlɛ bi yele kpàraco? Yaa maa ní pìíw ní mii ma.»

²⁰ A be kári ní wi ní wi ma, lǎli ni màdew Zyezu nyaa lè, a wi fala n pìíw fúugo gbanʔama n cáan tári na, a wi i kòlogí, tɛ́ɛkabɔlɔgi si i yirigi wi ma nyɔ́ɔgi ni.

²¹ A Zyezu pìíw tóo yíbe níì jo: «Làlìí ni màdew jée wi ni?» A tofɔw jo: «Wi n wi séli nlaa wi yìri lè pyà.

²² Wi i wi cáan náagi ni, ní wɔ́ɔ i wi cáan lǒgi ni làrigēle saʔa ni, ní i caa bi wi kpóo. Mɔ fánʔa ga pye gi na mi nyinimɛ taa wolo na mí wolo dɛ̀ɛmɛ.»

²³ A Zyezu wi pye: «Mɔ fánʔa ga tɛ́nɛ̀ pye gi na, syɔ́ɔnwee wi ga tága lè, kérigèle myɛ a gbǎn kpéʔele wee bee ma.»

²⁴ A pìíw tóo fala n yákpoli wáa níì jo: «Mii n tága! Mi sèʔé mi mii dɛ̀ɛmɛ, mí mii sìndagali yirige mii ni!»

²⁵ A Zyezu ga syɛ́ɛnmi nyaa pi i fé ni maa woro ma, a wi fúlo màdew na níì wi pye: «Màdeo, mɔ wi pìíw kaan lè wi o gbàn ni nyuu í, wi si wɔ́ɔ o lúro í, mii n jo mɔ í yiri wi ni, mɔ si a ní kɔ́ jée wi ni í.»

²⁶ A màdew yákpoli wáa níì pìíw fúugo gbanʔama n cáan, níì yiri wi ni. A pìíw kàri mɔ a jo kpóō wii, a syɛ̀ɛnnɛ saʔa jo wi n kùu.

²⁷ A Zyezu wi cò kɔ́gi na n yìrige, a wi yére.

²⁸ Lǎli ni Zyezu jée lè kpáagi ni, a wi pìitamabèle sáà wi yíbe pe yagwɔɔlɔ níì jo: «Nyàʔá na wolo ga gbàn n màdew naa nɛnɛ n yirige í?»

²⁹ A wi be pye: «Màdew naa félege a gbǎn yiri syɔɔn ni Kolocɔlɔɔ nyɛ́ɛrigi kàdoʔo ma í.»

Zyezu n níì wi kùúw ní wi nyán-yirili kéele joo

³⁰ A be yiri nɛɛ bee n sáà foro Galile tári ni. Zyezu si da ni caa syɔɔn í gi cán tɛ́ɛgee ni woro nyɛ lè í.

³¹ Níì cán wi maa ni wi pìitamabèle tama ní i gi nyuu be ma níì jo: «Pe a Syɔɔn-pya le syɛ́ɛnbèle kɔ́yɔ ni. Pe a wi kpóo, wi kùúli kàdoʔo ma canya taanri ga kwɔ́ɔ wi a nyán.»

³² Kàjáa pe da tɔ́ɔ̀ syɛ́ɛnri bee kɔ́rɔ cán í, a fyáari be kaan pe ga gbàn n wi yíbe í.

Wìí wi kpɔ́ʔɔ n sɔ̀lɔ?

³³ A pe ga sáà nan Kapɛrinayumi na, lǎli ni Zyezu jée kpáagi ni lè, a wi be yíbe níì jo: «Nyàʔá na yele da ni yeyɛɛ gábala kólogi na?»

³⁴ A be pyèri níì cán pe maa ni peyɛɛ gábala kólogi na bi gi cán wee wi kpɔ́ʔɔ lè n sɔ̀lɔ poro ni.

³⁵ A wi tɛ́ɛn níì pìitamabèle kɛɛ ní siin yeri níì be pye: «Wee wi ga ni caa lè bi ba pye yɛʔɛ̀ ma, ki n yɛlɛ wee bee í wiyɛɛ bye pe myɛ kàdotɔɔn sáā pe myɛ fáli kpéʔele.»

³⁶ Níì pyà láa n baa yérige pe níngi ni, ní kɔ́ɔ̀ wi láa n cò wi kɔ́yi ni níì be pye:

³⁷ «Wee wi ga pìíw naa wàa félege láa lè mii mɛ́ɛgi na, mii tiimaa wi láa. Wee si wi ga mii láa lè, mii ban wi láa í, mii Tunvɔw wi láa.»

Wee ga pye lè wi o nyɛ wolo nígoo í, wi i nyɛ ní wolo ní

³⁸ A Zyan wi pye: «Tamafɔw, wolo maa nànwaa nyaa wi i màdebèle nɛnɛ ni yirigi syɛ́ɛnbèle ni mɔ mɛ́ɛgi na, wi si o nyɛ ní wolo ní í. A wolo wi pye wi láʔa gee bee na, níì cán wi o nyɛ ní wolo ní í.»

³⁹ A Zyezu be pye: «Ki ga yɛlɛ yele í ní kɔ́ wi yérige í, níì cán syɔ́ɔnwee wi ga kakpɔʔɔ kpéʔele mii mɛ́ɛgi na lè, wee bee a wári syɛɛnpeere joo mii kàbangi na í.

⁴⁰ Níì cán wee ga pye lè wi o nyɛ wolo nígoo í, wee bee i nyɛ ní wolo ní.

⁴¹ Syɔ́ɔnwee wi ga gi cán lè ncan yele i nyɛ Kirisi wòolo, níì lɔ̀ʔɔ cɛrinyɛnnɛ nibin kaan yele ma mii mɛ́ɛgi na, a yele gbaa, mii a gi joo yele ma kányɛʔɛ ni, wee bee a fɔ̀n wi tɔ̀nɔw ni nyáana í.

Kapeeli peeganma kéele

⁴² «Pìipiigèle si ge tága mii na lè, syɔ́ɔnwee faala ga li làa nibin kaan a li lúru kàdoʔo ma lè, wee bee n yɛlɛ pe tírekpɔʔɔ pwɔɔ wi ma yátiigi ni be wáa sólomi lòkpɔʔɔ ni.

⁴³ Mɔ kɔ́gi ga ni mɔ légi kapeegèle ni, gi ceri mi wáa. Mɔ ga sáà jée ní kɔjerigi ní sìíw ni, gee bee a pɔ́rɔ mɔ ma, sáni kɔ́yi siin í pye mɔ na lè pé sa mɔ wáa tɛɛwɔʔɔgi ni, beè gi nyɛ lè náagi o fíri ni nyaagi nyáana í, [

⁴⁴ ki fyɛ́ɛnri o kúu í, ki náagi si wɔ́ɔ o fíri ni nyaagi nyáana í.]

⁴⁵ Mɔ tɔ́lɔgi ga ni mɔ légi kapeegèle ni, gi ceri mi wáa. Mɔ ga sáà jée sìíw ni ní tɔjerigi ní, gee bee a pɔ́rɔ mɔ ma, sáni tɔ́lɔyi siin í pye mɔ na lè pé sa mɔ wáa tɛɛwɔʔɔgi ni. [

⁴⁶ Ki fyɛ́ɛnri o kúu í, ki náagi si wɔ́ɔ o fíri ni nyaagi nyáana í.]

⁴⁷ Mɔ nyapili ga ni mɔ légi kapeegèle ni, li lòʔori mi wáa. Mɔ ga sáà jée Kolocɔlɔɔ fǎngi ni ní nyapile nibin ní, gee bee a pɔ́rɔ mɔ ma, sáni nyapiigèle siin í pye mɔ na lè pé sa mɔ wáa tɛɛwɔʔɔgi ni.

⁴⁸ Ki fyɛ́ɛnri o kúu í, ki náagi si wɔ́ɔ o fíri ni nyaagi nyáana í.

⁴⁹ Níì cán náagi a syɛ́ɛnbèle myɛ sámaga àmɛɛ be solomɔ téeri ni yaliire sámagi lè.

⁵⁰ Sólomi n nyɔɔ, kàjáa bi tàánmi ga kwɔ́ɔ, mɛ̀ɛ́ mɔ a bi pye bi ní tɛ́nɛ? Ki n yɛlɛ sólomi í pye yele ni, ye wɔ́ɔ pye bɛ̀ɛlɛ na ní yeyɛɛ ní.»