Mariki 8 - Cebaara Bible 2010

Zyezu n syɛ̀ɛnnɛ selebingéle siin kaan a be lìi

¹ Cányi bee ni syɛɛnnɛʔɛmɛ maa níì piyɛɛ gbóʔoro, pe si ga yarigaa taa bi lìi í, a Zyezu wi pìitamabèle yeri ní baa be pye:

² «Syɛ́ɛnmi naa nyínimɛ i mii na, níì cán pe n canya taanri kwɔ́ɔ mii taana, yarigaa si o nyɛ be ma be lìi í.

³ Mii si ga be yaʔa a be lúru ni syée ní kateegi ní be kpáayi ma, pe bárigaw a sa kwɔ́ɔ kólogi na, níì cán pèle i naa be ni, a be tɛɛyìriyi léeli.»

⁴ A wi pìitamabèle wi pye: «Sán syɔɔn a gbǎn búru taa fìímɛ tári naa ni bi syɛ́ɛnmi naa kaan pi lìi bi tín?»

⁵ A Zyezu be yíbe níì jo: «Búrubéle jòorí be nyɛ yele ma?» A be jo: «Kɔrɔsiin.»

⁶ A wi syɛ́ɛnmi pye bi tɛ́ɛn tári na, a pi ga tɛ́ɛn, a wi búrubèle kɔrɔsiin láa níì bariga kaan Kolocɔlɔɔ ma, níì wi kabagi n kaan wi pìitamabèle ma níì jo pe wi lɛɛ be na. A be wi lɛɛ syɛ́ɛnmi na.

⁷ Fápiigéle cɛɛri maa wɔ́ɔ̀ pye be ma, a wi dùbaw taʔa ge na níì be pye pe ge lɛɛ be na.

⁸ A be lìi n tín, wogabagiri di kòro lè, a pìitamabèle di koli n le sɛ̀ʔɛgēle kɔrɔsiin ni, a ge nyìn.

⁹ Pe maa pye selebingéle siin félege. Koro kàdoʔo ma a wi be yaʔa a be kári.

¹⁰ A woro ní wi pìitamabèle fala n jée kɔ́rɔw ni n kári Dalimanuta tɛ́nɛmi ma.

Farisibèle i kakpɔɔgaa caa

¹¹ A Farisibèle kári Zyezu ma n sa ni wi kábala, pe maa ni caa bi wi pye wéle, níì wi pye wi nyɛ̀ʔɛni kakpɔɔgaa tɛ̀ɛn poro na.

¹² A Zyezu fun-yáagi ŋɔ́n níì jo: «Nyàʔá na lǎli naa syɛ̀ɛnnɛ kakpɔʔɔ caa? Mii a gi joo yele ma kányɛʔɛ ni, kakpɔʔɔ a gbǎn tɛ̀ɛn lǎli naa syɛ̀ɛnnɛ na í.»

¹³ Koro kàdoʔo ma a wi núngo be taana n ní sáà jée kɔ́rɔw ni n kári lǒgi jelige na.

Farisibèle ní Herodi levéw kéele

¹⁴ Pìitamabèle maa fɛ̀ʔɛ pe ga búru láa í, fwɔɔ búru nibin wi da pye be ma kɔ́rɔw ni.

¹⁵ A Zyezu gi joo n gbàn be ma níì jo: «Yaa yeyɛɛ kɔ̀rɔsíi Farisibèle levé ní Herodi levéw na.»

¹⁶ A pìitamabèle i gi nyuu peyɛɛ ma níì jo: «Amɛɛ gi nyɛ lè búru o naa wolo ma í, koro na wi toro joo.»

¹⁷ A Zyezu gi cán, a wi be pye: «Nyàʔá na yele gi nyuu yeyɛɛ ma níì jo, búru o nyɛ yele ma í? A yele sèʔé i nyɛ lé sícilimɛ fun ni? Yele ga sèʔé kɔ́ɔ̀ keele kɔ́rɔ cán wii ì? A yele fúnyi sèʔé i nyɛ lé wodɔnyɔ ní?

¹⁸ A nyapiigèle i nyɛ lé yele na yele si o nyaagi ge ni í? Ba líiweegèle i nyɛ lé yele na yele si o lúro ge ni í?

¹⁹ Lǎli ni mii da búrubèle kagunɔ kabagi n lɛɛ syɛ́ɛnbèle selebingéle siin ní saala kagunɔ na lè, sɛ̀ʔɛnyɛ̀nnɛ jòorí yele da koli wogabagiw na?» A be jo: «Kɛɛ ní siin.»

²⁰ A wi níì be yíbe níì jo: «Ba lǎli ni mii da búrubèle kɔrɔsiin kabagi lè syɛ́ɛnbèle selebingéle siin na, sɛ̀ʔɛnyɛ̀nnɛ jòorí yele da koli wogabagiw na?» A be jo: «Kɔrɔsiin.»

²¹ A wi be pye: «Yele ga sèʔé kɔ́ɔ̀ keele kɔ́rɔ cán wii ì?»

Zyezu n fúuɔn paʔa Bɛtisayida ni

²² Lǎli ni be sáà nan Bɛtisayida na lè, a syɛ́ɛnbèle pèle kári ní fúuɔn ní wi ma n sáà wi nyɛ́ɛri níì jo wi tánga wi na.

²³ A wi fúunw cò kɔ́gi na n yiri kěgi kàdoʔo ma, ní sáà tɛ́ɛrɛ taʔa wi ma nyapiigèle na, níì kɔ́yi taʔa wi na, níì wi yíbe níì jo: «A mɔ yarigaa nyaa lé?»

²⁴ A wi i wéle, níì jo: «Mii i syɛ́ɛnbèle nyaagi wúuro wúuro mɔ a jo tiiye yii, kàjáa pe i yaà ni táanri.»

²⁵ A Zyezu níì kɔ́yi taʔa wi ma nyapiigèle na. A wi ga ge múgu, a wi pɔʔɔ. A wi náa i yáriri myɛ sámagi ni nyaagi.

²⁶ A Zyezu wi yaʔa wi i syée wi kpaʔa ma níì wi pye: «Mɔ a kɔ́ jée kěgi fúngo ni í.»

Pyɛri n jo Zyezu wi nyɛ Kirisi

²⁷ Koro kàdoʔo ma a Zyezu ní wi pìitamabèle i syée kèyaa ma yi lè Sezarikaʔa tɛ́nɛmi ni, pi lè Filipi tári ni. Lǎli ni be pye lè kólogi na, a wi wi pìitamabèle yíbe níì jo: «Wìí syɛ́ɛnbèle jo mii i nyɛ?»

²⁸ A be wi pye: «Pèle n jo mɔ i nyɛ Zyan Batisiti. A pèle jo mɔ i nyɛ Elii. A pèle níì jo mɔ i nyɛ kanyaajoowaa.»

²⁹ A wi níì be yíbe níì jo: «A yele doò, wìí si yele jo mii i nyɛ?» A Pyɛri wi pye: «Mɔ wi nyɛ Kirisi.»

³⁰ A wi gi joo n gbàn be ma níì jo, pe a kɔ́ kéeli bee joo syɔɔnwaa faala ma í.

Zyezu n wi kùúw ní wi nyán-yirili kéele joo

³¹ Koro kàdoʔo ma a Zyezu séli ni be tama níì jo: Ŋàʔanaga gii fwɔɔ Syɔɔn-pya í wɔʔɔ kèlē saʔa ni, wolɛɛbèle, ní sáriga-wòlobèle kàfɔɔlɔ ní làlwaw sɛ́bɛwelebéle si ba wi cée, si wi kpóo, pe ga wi tɔ́n, canya taanri ga kwɔ́ɔ, wi a nyán.

³² Wi maa tɔ̀nɔ n dee bee joo n fílige be ma. A Pyɛri wi cò n kàri kɔlɔ̀ na, ní sa ni nyuu ni gbàngí wi ma.

³³ A wi fíige ni wi pìitamabèle wéle níì fúlo Pyɛri na níì jo: «Núngo mii taana, Sutana, níì cán mɔ sɔnguri o nyɛ Kolocɔlɔɔ kàbangi na í, fwɔɔ syɛ́ɛnbèle kàbaan na.»

³⁴ A wi syɛ́ɛnmi yeri n fàra wi pìitamabèle na níì be pye: «Syɔ́ɔnwee faala wi ga ni caa bi taʔa mii na lè, ki n yɛlɛ wi wi nyɛnɛ kérigèle yaʔa wí wi tiiparigi láa waa maa mii kurugo.

³⁵ Níì cán wee wi ga ni caa bi wi sìíw syɔɔ lè, wee bee fɔ́lɔ a bɔ̀nɔ wi ni, wee si wi bɔ̀nɔ wi sìi ni mii kéeli na lè, ní Syɛɛnjóocǎnri kéele na, wee bee a ba wi woò taa.

³⁶ Syɔɔn ga dulunyanw yárira myɛ taa, á wi sìíw baa pùuni, nyàʔá gee bee a nyɔɔ wi na?

³⁷ A yarigaa i yaà lé gee syɔɔn a sa kaan lè sìíw lɔ́rɔ sìíw si taa?

³⁸ Níì cán wee wi ga ni fɛ̀ɛrɛ kpéʔele lè tɔ́ɔliw naa kanɔnʔɔbyebèlē nínge ni mii kéeli na, ní mii syɛ́ɛnri kéele na mii joo lè, Syɔɔn-pya a wɔ́ɔ ba fɛ̀ɛrɛ kpéʔele wee bee kéele na lǎli ni wi ga ni maa wi Tóow nìjangbɔɔrɔ ni lè ní wi tundunjanbèle ní.»