Mariki 7 - Cebaara Bible 2010

Tamani tofɔlɛɛyi kaan lè

¹ A Farisibèle ní làlwaw sɛ́bɛwelebèle pèle yìri Zyerusalɛmi ma n peyɛɛ gbóʔoro n pan Zyezu ma.

² A pe baa wi pìitamabèle pèle nyaa pe i líi ní kɔ̂nɔnʔɔyi ní, gi kɔ́rɔw wi nyɛ kɔ́yi sìnjée ni.

³ Níì cán Farisibèle ní Zyefubèle myɛ maa yére wolɛɛbèle kalɛɛgéle ni, pe da ni líi be kɔ́yi sìnjée ni í.

⁴ Pe ga wɔ́ɔ̀ yìri cɛ́nɛgi ma, pe o líi peyɛɛ sìnjée ni í. Kalɛɛgèle kèle saʔa maa níì pye be ma n fàra gele bee na, a be yére ge ni, àmɛɛ yagbaagèle jéele, ní kasǎngèle, ní kanyɛɛnri kòdɔʔɔlɔ jéele nyɛ lè.

⁵ A Farisibèle ní làlwaw sɛ́bɛwelebéle wi yíbe níì jo: «Mɛ̀ɛ́ gi nyɛ mɔ piitamabèle si o wolɛɛbèle kalɛɛgéle kólogo táanri í, fwɔɔ a be i líi kɔ́yi sìnjée ni?»

⁶ A Zyezu be yari: «Ezayi maa tɔ̀nɔ n kányɛʔɛ joo yele na, yele syɛɛnjóotɛɛyi siin joofɔɔlɔ, wi maa gi sɛ́bɛ níì jo: ‹Syɛ́ɛnbèle naa i mii kpɔ̀ʔɔrɔ́ nyɔɔwara na, kàjáa pe fúnyi n léeli mii na.

⁷ Pe i mii kpɔ̀ʔɔrɔ́ gbanzan. Alí tamagèle na be syɛ́ɛnbèle tama lè, ke i nyɛ syɛ́ɛnbèle funzɔngumɔ wòʔolo.›

⁸ Yele ga yére Kolocɔlɔɔ tundunri ni í, níì yére syɛ́ɛnbèle kalɛɛgéle ni.»

⁹ A wi níì be pye: «Yele n tɔ̀nɔ n Kolocɔlɔɔ tundunri cée, níì kòro yele tiimaa kalɛɛgèle na ni kpéʔele.

¹⁰ Níì cán Mowizi n jo: ‹Maa mɔ tóow ní mɔ nɔ́ɔw kpɔ̀ʔɔrɔ́. Wee wi ga syɛɛnpeere joo n wáa wi toò wàlá wi nɔɔ̀ na lè, wee bee a kpóo wii.›

¹¹ A yele si jo: ‹Syɔɔn ga gi joo wi tóow ma koro ga jáa wi nɔ́ɔw ma níì jo: Gee mii a dée kaan mɔ ma lè, ki i nyɛ Koribani,› ki kɔ́rɔw wi nyɛ, ki n kaan Kolocɔlɔɔ ma sáriga,

¹² yele a ní wi yaʔa waa yarigaa kpéʔele wi tóow ma í, koro ga jáa wi nɔ́ɔw ma í.

¹³ Yele i Kolocɔlɔɔ syɛ́ɛnri sàá kánmi bee na yele kalɛɛgèle kéele na. Yele si sèʔé i gele bee kèle féleye saʔa kpéʔele.»

Gee gi syɔɔn nɔ́ɔnri lè

¹⁴ A Zyezu níì syɛ́ɛnmi yeri níì be pye: «Ye myɛ ye lóʔo mii ma, yé gi cán gee mii a joo lè:

¹⁵ Yarigaa a gbǎn yìri kàfugi na bi jée syɔɔn fúngi ni bi wi nɔ́nʔɔ í, fwɔɔ gee gi yirigi lè syɔɔn fúngi ni, koro gi wi nɔ́ɔnri. [

¹⁶ Líiweele ga pye wee na lè wi líiyi cáan waa lúro.]»

¹⁷ Lǎli ni wi núngo lè syɛ́ɛnmi taana n jée kpáagi ni, a wi pìitamabèle sáà wi yíbe kàseeli bee kɔ́rɔ na.

¹⁸ A wi be pye: «Yele tɔ̀ʔɔ́ wɔ́ɔ o keele kɔ́rɔ cángi wii ì? Yele ga gi cán ì ncan gee gi yìrigí lè kàfugi na ni jǐn syɔɔn fúngi ni, gee bee a gbǎn wi nɔ́nʔɔ í ì?

¹⁹ Níì cán gee bee o jǐn wi zɔ̌nw ni í, fwɔɔ wi láagi ni, koro kàdoʔo ma ki n tìgi n yiri kàfugi na.» Wi n gee bee joo bi gi tɛ̀ɛn ncan yaliiri myɛ n nyɔɔ.

²⁰ A wi níì jo: «Gee gi yirigi lè syɔɔn fúngi ni, koro gi wi nɔ́ɔnri,

²¹ níì cán gee gi yìrigí lè zɔ̌nw ma, gee bee gi yirigi syɔɔn fúngi ni. Koro gi nyɛ: Sɔ̀ngubeeri, ní kálagimi, ní kàyuugi, ní syɛɛnkpoori,

²² ní ceyuugi, ní nànyuugi, ní fungbɔɔgi, ní funbeegi, ní fáanagi, ní kanɔnʔɔbyeri, ní nyabɛɛnni, ní mɛ́ɛkalagiri, ní nɛ̀ɛnyɛnɛgi, ní zɔ̀nniriw ní.

²³ Yapeeri bee myɛ di yirigi lè syɔɔn fúngi ni, toro di wi nɔ́ɔnri.»

Syɛɛnfelegaa cɔ́ɔ n tága Zyezu na

²⁴ A Zyezu yiri nɛɛ bee n kári Tiiri tɛ́nɛmi ma. A wi sáà jée kpaagaa ni, níì cán wi da ni caa syɔɔn í woro nyaa í, wi si ga gbàn n làra í.

²⁵ A cewaa wi kéeli lóʔo, níì fala n kári n sáà kpùmɔnɔ wi taana, níì cán màdeo maa pye wi pìíw ni, pìíw si maa pye pìcaapile.

²⁶ Céw bee maa pye Girɛkio, pe maa wi see Sirifenisi tári ni. A wi Zyezu nyɛ́ɛri níì jo wi màdew nɛnɛ wi yirige woro pìíw ni.

²⁷ A Zyezu wi pye: «Tíi pìíbèle í tín gbɛnʔɛnɛ, níì cán syɔɔn ga yɛlɛ wi pìíbèle búru láa wi wáa pɔnbiigèle ma í.»

²⁸ A wi Zyezu yari: «Kányɛʔɛ gii, Kàfɔw kàjáa pɔnbiigèle ge nyɛ lè tàbaliw láara ni, ke sèʔé i pìíbèle búrutooro líi.»

²⁹ Lǎli bee ni a wi wi pye: «Syɛ́ɛnri naa kéele na, da syée, màdew n yiri mɔ piiw ni.»

³⁰ A wi lúru n kári wi kpaʔa ma n sáà pìíw nyaa wozinɛɔ ní yasinɛgi na, a màdew yiri wi ni.

Zyezu n dùnɔ́-boboʔo pɔʔɔ

³¹ A Zyezu níì yiri nɛɛ bee Tiiri tɛ́nɛmi ni n foro Siidɔn ni, n sáà Dekapoli tɛ́nɛmi foro n kári Galile lòkpɔɔgi ma.

³² A be kári wi ma ní nànwaa ní, nǎnw bee maa pye dùnɔ̄ɔ, á nyínni wɔ́ɔ̀ tára wi na. A be sáà wi nyɛ́ɛri níì jo wi wi kɔ́gi taʔa wi na.

³³ A Zyezu wi kɔ́ri n núngo syɛ́ɛnmi taana n sáà yére kɔlɔ̀ na, níì kabegèle le wi ma líiweegèle ni, níì tɛ́ɛrɛ sùlugu n taʔa wi ma nyínni na.

³⁴ Níì nyúngi yìrige ǹjoʔo ma níì fun-yáagi ŋɔ́n níì jo: «Efata,» gi kɔ́rɔw wi nyɛ, múgu.

³⁵ A líiweegèle fala n múgu, a wi nyínni wɔ́ɔ̀ láʔa, a wi náa i sámagi ni nyuu.

³⁶ A Zyezu gi joo n gbàn be ma níì jo pe a kɔ́ gi joo syɔɔn ma í. Kàjáa àmɛɛ wi wírè gi joo n gbàn be ma kánmi bee na lè, a be náa sáà kàa fàra ki jáarili na.

³⁷ A be i káama gi na gbanʔama níì jo: «Gee myɛ wi kpéʔele lè, ki n tɔ̀nɔ n nyɔɔ, bele be pye lè dùnɔbèle, wi n poro kaan a be i lúro, ní bele be pye lè boboobèle, a poro i nyuu.»