Mariki 4 - Cebaara Bible 2010

Yaliiwáaw kàseele

¹ Zyezu maa níì séli ni syɛ́ɛnbèle tama lòkpɔɔgi nyɔ́ɔ na, a syɛɛnnɛʔɛmɛ piyɛɛ gbóʔoro wi na. Gee bee na wi da jée n tɛ́ɛn kɔ́rɔwaa ni lǒgi ni, á syɛ́ɛnmi yére lǒgi nyɔ́ɔ na.

² A wi i be tama kèlē saʔa ni ní kàseegéle ní, ní i gi nyuu be ma níì jo:

³ «Ye lóʔo, yaliiwáaɔ maa kári sa yaliire wáa.

⁴ A wi ga ni di wáa, a tàa too kólogi nyɔ́ɔ na, a féjɛɛngèle pan n baa di jɔ́ɔ.

⁵ A tàa too fálaya tɛ́ʔɛ ni, tári si da nɛʔɛ yaà í. A di wárì fìin, níì cán tári da cùru í.

⁶ A cángi ga yiri ni wáa, a di pábari, níì cán ti da nìnre taa í, a di waʔa.

⁷ A tàa too wúuro tɛ́ʔɛ ni, a wúuri yìri n di cò, ti ga gbàn n san í.

⁸ A dee too tácànra tɛ́ʔɛ ni, a toro fìin n baa tɔnɔ, ní baa san n taa, tàa toko ní kpɔrigɔ, tàa togoye taanri, tàa dabata.

⁹ Líiweeloʔolo ga pye wee na lè wi líiyi cáan waa lúro.»

Kɔ́rɔwee na Zyezu nyuu kàseegéle ni lè

¹⁰ Lǎli ni Zyezu léeli lè syɛ́ɛnmi na, bele be pye wi taana lè, a poro ní wi pìitamabèle kɛɛ ní siin wi yíbe kàseegèle kɔ́rɔ na.

¹¹ A wi be pye: «Kolocɔlɔɔ fǎngi kalaragēle cánna n kaan yele ma, kàjáa bele be lè pe o nyɛ ní wolo ní í, kérigèle myɛ i nyuu poro ma kàseegéle ni.

¹² ‹Koro ga pye paa gi wéle, pe si a kɔ́ gi nyaa í. Pe wɔ́ɔ ra gi lúro, pe si a kɔ́ gi kɔ́rɔw cán í, jàngó pe a kɔ́ kàri, pe kapeegèle kùsulugo si syɔɔ í.› »

Zyezu n yaliiwáaw kàseele kɔ́rɔ tɛ̀ɛn

¹³ A wi níì be pye: «Yele ga kàseeli naa kɔ́rɔ cán lé í? Mɛ̀ɛ́ si yele a gbǎn pye si wozangèle kɔ́rɔ cán?

¹⁴ Yaliiree yaliiwáaw wáa lè, toro di nyɛ Kolocɔlɔɔ syɛ́ɛnri.

¹⁵ Yaliiree di too kólogi nyɔ́ɔ na lè, koro gi nyɛ syɛ́ɛnbèle ga syɛ́ɛnri lóʔo, á di jée be ni, Sutanaw n pan terire n baa di yirige be ni.

¹⁶ Dee di too lè fálagi tɛ́ʔɛ ni, koro gi nyɛ syɛ́ɛnbèle ga syɛ́ɛnri lóʔo níì di cò ní fundaanra ní,

¹⁷ ti si ga nìnre wáa pe fúnyi ni í, ti n kòro be ni n làla cɛɛri kwɔ́ɔ. Funjurugori wàlá wɔʔɔli ga nan be na Kolocɔlɔɔ syɛ́ɛnri kéele na, gee bee n be kaan pe n lúru kàdoʔo ma.

¹⁸ Dee si di too lè wúuri tɛ́ʔɛ ni, koro gi nyɛ syɛ́ɛnbèle ga syɛ́ɛnri lóʔo,

¹⁹ á dulunyanw naa kasɔngugēle pan ní lɔ́ri fáanaga ní n fàra ki laànitaagi yárira na, dee bee n baa syɛ́ɛnri tɔ́n, koro n gi kaan ti n kòro tɔ̀nɔ fun.

²⁰ Dee si di too lè tácǎnri tɛ́ʔɛ ni, koro gi nyɛ syɛ́ɛnbèle ga syɛ́ɛnri lóʔo níì di cò, pe n ni sangi ni taagi, tàa toko ní kpɔrigɔ, tàa togoye taanri, tàa dabata.»

Fètinni kàseele

²¹ A wi be pye: «Syɔɔn ga fètinnɛ le, a gi yɛlɛ lé wi li tɔ́n sɛ̀ʔɛlɛ láara ni, koro ga jáa yasinɛgɛ láara ni? Yele ga cán wi ga li taʔa fètindaʔala na, koro gi pɔ́rɔ ì?

²² Yariga o yariga syɔɔn làriga lè, ki a ba kòro sìn-yiri ni kàfugo na í, kalaralaa faala a ba kòro sìnján ni í.

²³ Líiweeloʔolo ga pye wee na lè, wi líiyi cáan waa lúro.»

²⁴ A wi níì be pye: «Dee mii a joo yele ma lè, ki n yɛlɛ ye di sámaga ye lóʔo. Yalegee ni yele yáriri kíri ni kaangi syɛ́ɛnbèle ma lè, gee bee félege ni pe a wɔ́ɔ ba yele wóri kíri kaan yele ma, kàa si a ba taʔa yele wógi na.

²⁵ Níì cán wee wi taa lè, pe a ní wi kaan taʔa. Wee si wi fɔ̀n lè, àlí cɛɛriwee wi nyɛ wi ma lè, pe a wee bee syɔɔ wi ma.»

Yaliiri kàseele àmɛɛ ti leegi tiyɛɛ ma lè

²⁶ A wi níì jo: «Kolocɔlɔɔ fǎngi i nyɛ àmɛɛ yaliire nyɛ lè, dee nànwaa lùgu lè seʔe ni.

²⁷ A wi i ŋúnɔ yoo, a wi kòro nyɛ̀nɛ na n yébiligi pínɛ cángi ni yoo, yaliiri a fìin sáā leegi, bi gi yaʔa wi ga gi cán àmɛɛ gi pingi ni sée lè í.

²⁸ Tári si di yaliiri kaan di i fíin, ní i tɔnɔgi bi ba puru, koro kàdoʔo ma ti n pye yaliire.

²⁹ Ti làrilaali ga nan, wi n kɔ́nigi láa n sa ni di kɔɔn, níì cán di làrilaali n nan.»

Mutaridi tíigi pìifalila kaseele

³⁰ A wi níì jo: «Nyàʔá ní wolo a gbǎn Kolocɔlɔɔ fǎngi tímana, wàlá ní nyàʔá kàseefelile ní wolo a gi kánmi joo tɛ̀ɛn?

³¹ Ki i nyɛ àmɛɛ mutaridi tíige piifalila nyɛ lè, li n cɛ́rɛ n sɔ̀lɔ tári yaliire myɛ pìifalida na pe lúru lè tári ni.

³² Pe ga li lùgu, li n fìin, ní i tɔnɔgi n baa kpɔ́ʔɔ n sɔ̀lɔ yaliiri fíinye myɛ na, níì kágangboloyo yirige, féjɛɛngèle n ba ni kòró yaà ki nyínmi ni.»

³³ Wi maa ni Kolocɔlɔɔ syɛ́ɛnri nyuu be ma ní kàseegèle bee féleye saʔa ní ni yɛlɛgi ní wi syɛɛnloʔobèle cánna ní.

³⁴ Wi da ni yarigaa nyuu syɛ́ɛnbèle ma kàseele kadoʔo na í. Koro kàdoʔo ma a wi ke myɛ kɔ́rɔ joo wi pìitamabèle ma kɔlɔ̀ na.

Zyezu n káfalakpɔʔɔ yérige

³⁵ Cángi bee cângwɔʔɔ nyɔ́ɔ na, a Zyezu be pye: «Ye tíi wo jeli lǒgi jelige na.»

³⁶ A be núngo syɛ́ɛnmi taana n sáà jée kɔ́rɔw ni Zyezu kurugo ni syée ní wi ní, kɔ́rɔbèle pèle maa fàra wi wojeew na.

³⁷ A káfalakpɔʔɔ sáà yìri, a lǒgi kùnguruyo i jǐn kɔ́rɔw ni, a kɔ́rɔw i caa bi nyìn.

³⁸ Zyezu si maa sínɛ n nyǔngi taʔa nyùndaʔaga na ni ŋúnɔ kɔ́rɔw fúngo ni kàdoʔo ma. A be wi yìrige, níì wi pye: «Tamafɔw, wolo a wáa lǒgi ni, gee bee ga tɔ̀ʔɔ̂ wári mɔ na wii ì?»

³⁹ A wi yìri ŋúnɔmi na níì fúlo káfalagi na níì lǒgi pye: «Yére.» A káfalagi yére, a lǒgi wɔ́ɔ̀ sámaga n yére.

⁴⁰ A wi be pye: «Nyàʔá na yele fɛ̀ɛgí? Yele ga sèʔé kɔ́ɔ̀ tága wii ì?»

⁴¹ A be fyáa gbanʔama ní i gi nyuu peyɛɛ ma níì jo: «Nyàʔá syɛɛnfeleo wi wee naa, àlí káfalagi ní lòkpɔɔgi i lúro wi ma?»