Mariki 3 - Cebaara Bible 2010

Kɔwaʔa-nanw kéele

¹ Zyezu maa ní sáà jée Zyefubèle sérikpaʔa ni. Nànwaa si maa pye yaà ní kɔwaʔa ní.

² A be i Zyezu kɔ̀rɔsíi kapye wi a nǎnw bee pɔʔɔ cândɛnɛgi ni jàngó poro si taa tún ní wi ní.

³ A wi kɔwaʔa nanw pye: «Yìri mi yére syɛ́ɛnbèle nínge ni.»

⁴ Níì be pye: «A gi yɛlɛ lé syɔɔn í kacànna kpéʔele cândɛnɛgi ni láà, koro ga jáa wi kapeele kpéʔele gi ni? Ba gi yɛlɛ lé be syɔɔn pɔʔɔ wi pye sìi na láà, koro ga jáa pe wi yaʔa wi kùu?» A be pyèri.

⁵ A wi i be wéle ni máari ní fundanʔara ní, a gi i wi yáa wi fúngi ni àmɛɛ wi gi nyaa a be zɔ̌nbèle gbàn lè, ní náà nǎnw pye: «Mɔ kɔ́gi sánʔa.» A wi gi sánʔa, a kɔ́gi fala n pɔʔɔ.

⁶ A Farisibèle yiri n sáà peyɛɛ nyaa n jo terire, poro ní Herodi taʔafɔbèle ní, àmɛɛ poro a pye lè si wi taa kpóo.

Syɛɛnnɛʔɛmɛ i maa Zyezu ma

⁷ A Zyezu yiri n kári ní wi pìitamabèle ní Galile lòkpɔɔgi ma. A syɛɛnnɛʔɛmɛ kári yaà wi kurugo. Pe maa yìri Galile, ní Zyude ma,

⁸ n náà fàra Zyerusalɛmi kěgi wòolo ní Idume tári, ní Zyuridɛnw jelige woolo na, a syɛɛnnɛʔɛmɛ wɔ́ɔ̀ yìri Tiiri ní Siidɔn taana kěyi ma, àmɛɛ pe da wi kapyegèle myɛ kéele lóʔo lè.

⁹ A wi wi pìitamabèle pye be kɔ́rɔwaa yaʔa woro ma, jàngó àmɛɛ syɛ́ɛnmi nɛʔɛ lè pe a kɔ́ woro cɔ̀ɔnri í.

¹⁰ Amɛɛ wi da ni yáabèle saʔa poori lè gee bee na yáabèle myɛ da peyɛɛ gbóʔoro ní i ŋàʔaná bi taa tánga wi na.

¹¹ A màdebèle ga Zyezu nyaa, a be sa ni kpùmɔnɔ́ wi taana ní i yákpogèle wáa níì jo: «Mɔ wi nyɛ Kolocɔlɔɔ Jáaw.»

¹² A wi gi joo n gbàn be ma gbanʔama níì be pye pe a kɔ́ woro tɛ̀ɛn í.

Zyezu n pìitunbèle kɛɛ ní siin nyɛ́nɛ n wòlo

¹³ Koro kàdoʔo ma a Zyezu lúgu nyanbelegi na, syɛ́ɛnbèle bele wi caa lè, a wi bele bee yeri, a be kári wi ma.

¹⁴ A wi sáà syɛ̀ɛnnɛ kɛɛ ní siin nyɛ́nɛ n wòlo n yaʔa ní wiyɛɛ ní koro ga pye bàā be tórogi tɛ́ɛyi myɛ ni, pe sa ra Kolocɔlɔɔ syɛ́ɛnri nyuu,

¹⁵ ní wɔ́ɔ̀ fǎngi kaan be ma pe sa ra màdebèle nɛnɛ da yirigi syɛ́ɛnbèle ni.

¹⁶ Bele kɛɛ ní siin wi da nyɛ́nɛ n wòlo lè, poro mɛ́ɛyi yi nyɛ yee naa: Pe i wàa yiri Siimɔn, a Zyezu mɛ́ɛgaa le wi na ni wi yiri Pyɛri,

¹⁷ ní Zebede jáabèle siin ní, pe lè Zyaki, ní wi senyɛnw Zyan, a wi wɔ́ɔ̀ mɛ́ɛgaa le be na ni be yiri Bonɛrizye, gi kɔ́rɔw wi nyɛ nyɛ̀ʔɛvōloli pìibēle,

¹⁸ ní i bele yiri Andire, ní Filipi, ní Baritelemii, ní Matye, ní Toma, ní Zyaki wi lè Alife jáaw, ní Tade, ní Siimɔn, wi félegi si i nyɛ Kanaan,

¹⁹ n fàra Zyudasi Isikariyɔti na, woro wee wi baa Zyezu le wi nigoobèle kɔ́yɔ ni lè.

Zyezu kpáagi wòolo i caa bi wi kɔ́ri kári

²⁰ Koro kàdoʔo ma a be jée kpaagaa ni, a syɛ́ɛnmi ní sáà piyɛɛ gbóʔoro be na, àlí pe ga làla taa bi lìi í.

²¹ A wi kpaʔa wóbèle ga gee bee lóʔo, a be kári sa wi kɔ́ri, níì cán pe maa jo: «Wi nyúngi o nyɛ wi ma í.»

Zyezu n syɛɛnlurugoro kaan kolomɔ kéele na be joo n taʔa wi na lè

²² Làlwaw sɛ́bɛwelebèle pèle si maa yìri Zyerusalɛmi ma a poro baa jo: «Bɛlizebuli i nyɛ wi ni. Màdebèle kàfɔlɔ báriga ni wi màdebèle nɛnɛ ni yirigi syɛ́ɛnbèle ni.»

²³ A Zyezu be yeri níì kàseegéle wáa be ma níì jo: «Mɛ̀ɛ́ Sutanaw a gbǎn Sutanaw nɛnɛ yirige bi sɛ́ɛ?

²⁴ Tára o tára ga ni túngu ní tiyɛɛ ní, tári bee a báriga í.

²⁵ Narigbaʔa o narigbaʔa ga ni túngu ní kiyɛɛ ní, narigbaagi bee a báriga í.

²⁶ Sutanaw ga ni túngu ní wiyɛɛ ní wi n too wiyɛɛ na, wi a gbǎn báriga í, ki ga pye ànbée wi a kwɔ́ɔ.

²⁷ Syɔɔn faala a gbǎn jée syɛɛnnirio kpaʔa ni sa wi yáriri láa wi sìnbwɔɔ ni í, fwɔɔ wi syɛɛnniriw bee pwɔɔ gbɛnʔɛnɛ si náa wi kpáagi fuguru.

²⁸ Mii a gi joo yele ma kányɛʔɛ ni, kapeegèle gele myɛ syɛ́ɛnbèle kpéʔele lè ní Kolocɔlɔɔ mɛ́ɛkalagiri syɛ́ɛnrɛ be nyuu lè, toro myɛ kùsulugi a syɔɔ.

²⁹ Kàjáa syɔɔn ga ni Pìicǎnni mɛ́ʔɛ kálagi, wee bee kapeegéle kusulugo a tée syɔɔ nyáana í, níì cán kapeeli bee a kwɔ́ɔ bi nyaa í.»

³⁰ Amɛɛ làlwaw sɛ́bɛwelebéle da jo lè màdeo i nyɛ Zyezu ni, koro na wi da kàseegèle bee wáa.

Zyezu nɔ́ɔw ní wi cɔnɔbèle

³¹ A wi nɔ́ɔw ní wi cɔnɔbèle pan n baa yére kàfugi na níì tun wi ma, níì jo pe wi yeri yaà.

³² Syɛ́ɛnmi si maa tɛ́ɛn n wi màʔa, a be wi pye: «Mɔ nɔ́ɔw ní mɔ cɔnɔbèle i mɔ wéle yaà kàfugi na.»

³³ A wi be yari: «Wìí wi nyɛ mii nɔ́ɔw, bɛ̀lɛ́ si i nyɛ mii cɔnɔbèle?»

³⁴ Bele be tɛ́ɛn n wi màʔa lè, a wi i be wéle ni máari níì jo: «Wéle, mii nɔ́ɔw ní mii cɔnɔbèle be nyɛ bele naa.

³⁵ Syɔ́ɔnwee faala wi ga ni Kolocɔlɔɔ nyɛ́nɛ kérigèle kpéʔele lè, wee bee wi nyɛ mii senyɛnw ní mii nɔ́ɔw.»