Mariki 2 - Cebaara Bible 2010

Zyezu n syɛɛnmɔngɔɔ pɔʔɔ

¹ A canyaa ga kwɔ́ɔ, a Zyezu níì lúru n kári Kapɛrinayumi ma. A pe ga lóʔo wi i yaà kpaʔa ma,

² a syɛ́ɛnmi piyɛɛ gbóʔoro wi na fwɔɔ n baa cɔ̀ɔnri. Alí tɛɛ̀yérege ga níì taa kpaaweeli yɛ́ʔɛ ma í. A wi i Kolocɔlɔɔ syɛ́ɛnri nyuu be ma.

³ A syɛ̀ɛnnɛ sicɛrɛ syɛɛnmɔngɔɔ tugo n pan wi ma.

⁴ Amɛɛ si syɛ́ɛnmi da nɛʔɛ n sɔ̀lɔ lè, pe ga tɛɛsɔ̀lɔgɔ taa bi gbǎn nan Zyezu na í. Wi si maa pye binge ni. A be sáà bindàáli fùru, níì syɛɛnmɔngɔw tìrige ní yasinɛgi myɛ ní wéegi bee ni.

⁵ A Zyezu ga be tágali nyaa, a wi syɛɛnmɔngɔw pye: «Ni pyà, mɔ kapeegèle kùsulugo n syɔɔ.»

⁶ Làlwaw sɛ́bɛwelebèle pèle maa pye yaà wodɛ́ɛnbéle ní, a be i gi sɔ̀ngí be fúnyi ni níì jo:

⁷ «Nyàʔá nǎnw naa nyuu ànbée? Wi i Kolocɔlɔɔ mɛ́ɛgi kálagi. Wìí wi a gbǎn syɔɔn kapeegèle kùsulugo syɔɔ kapye Kolocɔlɔɔ nibin ban í?»

⁸ A Zyezu fala n be sɔ̀nguri cán, a wi be pye: «Nyàʔá na yele sɔ̀nguri bee félege sɔ̀ngí yele fúnyi ni?

⁹ Bi syɛɛnmɔngɔw pye: ‹Mɔ kapeegèle kùsulugo n syɔɔ,› koro ga jáa bi wi pye: ‹Yìri mi mɔ yasinɛgi láa maa táanri,› gìí gi wɛ́ʔɛri?

¹⁰ Koro ga pye yele í gi cán séew i nyɛ Syɔɔn-pya ma tári na bàā kapeegèle kùsulugo syoo.»

¹¹ Níì syɛɛnmɔngɔw pye: «Mii n jo mɔ í yìri bi mɔ yasinɛgi láa bàā syée mɔ kpaʔa ma.»

¹² A wi fala n yìri níì wi yasinɛgi láa n yiri pe myɛ nyɛ́nɛ na, fwɔɔ a pe myɛ i káama gi na, ní i Kolocɔlɔɔ kpɔ̀ʔɔrɔ́ níì jo: «Wolo ga kɔ́ɔ̀ gee naa kàa félege nyaa í.»

Zyezu n Levii yeri

¹³ A Zyezu níì yiri n kári lòkpɔɔgi nyɔ́ɔ ma, a syɛ́ɛnmi myɛ i syée wi ma, a wi sa ni be tama.

¹⁴ A wi ga kwɔ́ɔ nɛɛ bee ní i sɔ̀lɔ́, a wi Levii nyaa wi lè Alife jáaw, wi maa pye wodɛ́ɛɔn ní wálisyɔɔbèle kpaʔa ni. A wi wi pye: «Taʔa mii na wo kári.» A wi yìri n taʔa wi na.

¹⁵ Lǎli ni Zyezu sa ni líi lè Levii kpáagi ni, a wálisyɔɔbèle ní kapeebyebèle saʔa baa tɛ́ɛn ni líi ní wi ní n fàra wi pìitamabèle na, níì cán syɛ̀ɛnnɛ saʔa maa taʔa wi na.

¹⁶ Sɛ́bɛwelebèle be lè Farisibèle kabiga wóbèle pèle, a bele bee ga wi nyaa wi i líi ní wálisyɔɔbèle, ní kapeebyebèle ní, a be wi pìitamabèle yíbe níì jo: «Nyàʔá na wi pínɛ ni líi ní i gbo ní wálisyɔɔbèle, ní kapeebyebèle ní?»

¹⁷ A Zyezu ga gee bee lóʔo, a wi be pye: «Bele be cólogo lè, pe màko o nyɛ lɔ̀ʔɔtɔrɔ na í, fwɔɔ bele be yáa lè. Mii ga pan ba syɛɛnsinbèle yeri í, fwɔɔ kapeebyebèle.»

Zyezu ní súnw kéele

¹⁸ Zyan pìitamabèle ní Farisibèle maa pye súnw na. A syɛ́ɛnbèle pèle pan n baa Zyezu pye: «Nyàʔá na Zyan pìitamabèle ní Farisibèle wòolo súnw nii, mɔ wóbèle si o wi nii í?»

¹⁹ A Zyezu be yari: «Cefɔnw fɔ́lɔ ga pye ní wi cèpɔrigi syɛ̀ɛnnɛ ní lǎlee ni lè, a pe a gbǎn sún le lé lǎli bee ni? Eʔe, cefɔnw fɔ́lɔ ga pye ní be ní, pe a gbǎn sún le í.

²⁰ Làlaa si i maa lee ni pe a ba cefɔnw fɔ́lɔ yirige lè pe níngi ni, lǎli bee ni pe a náa súnw le.

²¹ Syɔɔn faala o fànifɔɔn téeri ni fànilɛɛɔ tɛɛsulugo jɔli í. Ki ga pye ànbée, fànifɔnw a kùru wiyɛɛ na bi láʔa fànilɛɛw na, tɛɛsulugi si náa pee bi sɔ̀lɔ.

²² Pe wɔ́ɔ o dùvɛɛnfɔɔn nii saliya kpàbilɛɛbéle ni í. Ki ga pye ànbée, dùvɛɛnw a kpàbibèle fologi cɛnɛ, dùvɛɛnw ní kpàbibèle myɛ si pínɛ kálagi. Kàjáa pe i dùvɛɛnfɔɔn nii saliya kpàbifɔnbéle ni.»

Zyezu ní cândɛnɛgi kéele

²³ Cangaa Zyezu maa ni forogi syɔ̀ɔ̄lɔ séye ni cândɛnɛgɛ canʔa ni. A pe ga ni sɔ̀lɔ́, a wi pìitamabèle i supiigèle kabagi.

²⁴ A Farisibèle wi pye: «Wéle, gee gi lè ki ga yɛlɛ gi kpéʔele cândɛnɛgi ni í, nyàʔá na pe gee bee kpéʔele?»

²⁵ A wi be pye: «Amɛɛ kateegi da Davidi jáa lè woro ní wi taʔafɔbèle ní, yaliire si da pye be ma be lìi í, gee wi da kpéʔele lè, yele ga kɔ́ɔ̀ gee bee wéle sɛ́bɛw ni ì?

²⁶ Amɛɛ wi sáà jée Kolocɔlɔɔ kpáagi ni lè Abyatari lǎli ni, wi pye lè sáriga-wòlobèle kàfɔgbɔɔɔ, búruw wi kaan Kolocɔlɔɔ ma lè, ki da yɛlɛ syɔɔn í búruw bee lìi í, kapye sáriga-wòlobèle yagwɔɔlɔ ban í, a Davidi sáà wàa láa n lìi, níì wàa kaan wi taʔafɔbèle ma.»

²⁷ A wi níì be pye: «Cândɛnɛgi n kpéʔele syɔɔn nyɔɔmi kéele na, syɔɔn ga kpéʔele cândɛnɛgi kéele na í.

²⁸ Koro na Syɔɔn-pya i nyɛ cândɛnɛgi kàfɔlɔ.»