Mariki 16 - Cebaara Bible 2010

Zyezu nyán-yirili kéele

¹ A cândɛnɛgi canʔa ga sɔ̀lɔ, Marii wi lè Magidala ye wów, woro ní Marii wi lè Zyaki nɔ́ɔw, n náà fàra Salomɛ na, a be sáà nùndaanna sìnmɛ syɔɔ, ní i caa bi sa Zyezu tíre ní bi ní.

² A ki ga pye cégbooli cânzelige nyɛʔɛ nyɔ́ɔ na, a be yìri n kári nyángi ma canvolovɔ́ngi na.

³ A be i gi nyuu peyɛɛ ma níì jo: «Wìí wi a sa kàdɛnɛgi kòlogo núngo nyanweeli na?»

⁴ A be wéle n kàdɛnɛgi fɔ̀n nyanweeli na níì gi nyaa kɔlɔ̀ na, kàdɛnɛgi bee maa kpɔ́ʔɔ gbanʔama.

⁵ A pe ga jée nyángi ni, a be nìgɔcariɔ nyaa yaà wodɛ́ɛɔn ní kàliige ma ní buroviige ní, a fyáari be cò gbanʔama.

⁶ A wi be pye: «Ki ga yɛlɛ yaa fɛ̀ɛgí í, Zyezu yele pan ba wéle lè, wi lè Nazarɛti ye wów, wee pe da kóri tiiparigi na lè, wi n nyán n yiri, wi ní o nyɛ nɛɛ naa í. Ye wéle nɛɛ naa, beè pe da wi sínɛgɛ lè.

⁷ Yaa syée ye sa gi joo wi pìitamabèle ma ní Pyɛri ní, yé be pye wi n kári Galile tári ma yele yɛ́ʔɛ na, yele a sa wi nyaa yaà nɛɛ bee, àmɛɛ wi da gi joo lè yele ma.»

⁸ A be yiri nyángi ni ni fé ni syée, pe si maa ni fɛ̀ɛgí ní i cɛ̀lɛ́, pe ga sáà yafyɛn joo syɔɔn faala ma í, níì cán fyáari maa be cò.

Zyezu n wiyɛɛ dɛ̀ɛn Marii na wi lè Magidala ye wów

⁹ [Amɛɛ Zyezu nyán n yiri lè cégbooli cânzelige nyɛʔɛ nyɔ́ɔ na pɛ́ɛn pɛ́ɛn, a wi wiyɛɛ dɛ̀ɛn gbɛnʔɛnɛ Marii na, wi lè Magidala ye wów, wee ni wi da màdebēle kɔrɔsiin nɛnɛ n yirige lè.

¹⁰ A wee bee kári n sáà gi joo wi pìitamabèle ma n gi yaʔa be fúnyi maa sèʔê be bɛɛn, a be i nyaan.

¹¹ Lǎli ni be gi lóʔo Marii ma lè ncan Zyezu i nyɛ sìi na, ní wɔ́ɔ̀ gi lóʔo wi ma woro n wi nyaa, pe ga tága wi syɛ́ɛnri na í.

Zyezu n wiyɛɛ dɛ̀ɛn wi pìitamabèle pèle siin na

¹² Koro kàdoʔo ma a Zyezu pìitamabèle pèle siin kɔ́ ni syée kùlo ni, a wi sáà wiyɛɛ dɛ̀ɛn be na kanmaa félege na.

¹³ A be lúru n kári n sáà gi joo wozanbèle ma, kàjáa bele bee ga wɔ́ɔ̀ tága gi na í.

Zyezu n wiyɛɛ dɛ̀ɛn wi pìitamabèle kɛɛ ní nibin na

¹⁴ Koro myɛ kàdoʔo ma, lǎli ni pe kɛɛ ní nibinw tɛ́ɛn ni líi lè, a wi wiyɛɛ dɛ̀ɛn be na, a wi fúlo be na be sìndagali ní be fûndɔnyi kéele na, níì cán bele be woro nyaa lè woro nyán-yirili kàdoʔo ma, pe da tága bele bee syɛ́ɛnrɛ na í.

¹⁵ Lǎli bee ni a Zyezu gi joo be ma níì jo: «Yaa syée dulunyanw tɛ́ɛyɛ myɛ ni ye sa ra Syɛɛnjóocǎnri nyuu syɛ́ɛnbèle myɛ ma.

¹⁶ Syɔ́ɔnwee wi ga tága di na lè níì batize, wee bee a syɔɔ, kàjáa wee ga pye lè wi ga tága di na í, kútiiw a ba kúun wee bee na.

¹⁷ Kérigèle naa a kɔ́ ba ra kpéʔele tágafɔbèle ma bi pye fɛ̀ɛ, koro ge nyɛ: pe a kɔ́ ra màdebèle nɛnɛ da yirigi syɛ́ɛnbèle ni mii mɛ́ɛgi na, pe nyíngèle si ba kàri paa syɛɛnfɔ́nraa féleye nyuu.

¹⁸ Pe a kɔ́ ba ra wàbiyi có ní be kɔ́yi ní. Pe ga wɔ́ɔ̀ yarigaa gbaa gee ki a gbǎn syɔɔn kpóo lè, ki a tée yafyɛn pye be na í. Pe a ra be kɔ́yi taari yáabèle na paa poori.»

Zyezu n lúru n kári Kolocɔlɔɔ ma

¹⁹ A Kàfɔw Zyezu ga syɛ́ɛnri bee joo n kwɔ́ɔ be ma, a wi lúgu nyɛ̀ʔɛni na n sáà tɛ́ɛn Kolocɔlɔɔ kàliige ma.

²⁰ A be yìri n kári n sa ni Syɛɛnjóocǎnri nyuu tɛ́ɛyi myɛ ni. Kàfɔw si maa ni báara ní be ní, ní i be syɛ́ɛnri fíligi kakpoloyi báriga ni yi da pínɛ ní be syɛ́ɛnri ní lè.]