Mariki 15 - Cebaara Bible 2010

Pe n baa Zyezu yérige Pilati yɛ́ʔɛ ma

¹ A nyǐngi ga tali, a sáriga-wòlobèle kàfɔɔlɔ, ní wolɛɛbèle, ní làlwaw sɛ́bɛwelebéle ní Sanedirɛnw myɛ kpóʔoro n joo n bɛ̀ɛ, níì Zyezu pwɔɔ n kári n sáà kaan Pilati ma.

² A Pilati wi yíbe níì jo: «Mɔ lé wi nyɛ Zyefubèle fànʔafɔlɔ?» A Zyezu wi yari: «Ɛɛn, mii wii.»

³ A sáriga-wòlobèle kàfɔɔlɔ kèlē saʔa joo n taʔa wi na.

⁴ A Pilati níì wi yíbe níì jo: «Mɔ ga keelaa taa bi joo wii ì? Wéle, àmɛɛ be kèlē saʔa nyuu ni taari mɔ na lè.»

⁵ Zyezu si ga yarigaa faala joo í. A Pilati i káama gi na.

Pe n Zyezu kpóoli kútii ceri

⁶ Ki si maa pye kalɛɛlɛ, sériw canʔa ga baa nan, á syɛ́ɛnbèle sáà kàsolewee nyɛ́ɛri Pilati ma lè, wi n wee bee yirige n yaʔa.

⁷ Nànwaa maa pye kàsow ni ní wi niceenyɛnbèle ní, pe i wi yiri Barabasi. Pe maa syɔɔn kpóo be céemi báriga ni.

⁸ A syɛ́ɛnmi kári Pilati ma n sáà wi nyɛ́ɛri níì jo, gee wi tàli ni kpéʔele lè, wi gee bee kpéʔele poro ma.

⁹ A Pilati be pye: «Zyefubèle fànʔafɔlɔ lé yele caa mii í yaʔa yele ma?»

¹⁰ Níì cán Pilati maa gi cán nyabɛɛnni kéele na sáriga-wòlobèle kàfɔɔlɔ baa Zyezu kaan woro ma.

¹¹ A sáriga-wòlobèle kàfɔɔlɔ syɛ́ɛnmi sɔ́ɔn jàngó Pilati í Barabasi yirige yaʔa poro ma Zyezu sìndɛɛgi ni.

¹² A Pilati níì be pye: «Mɛ̀ɛ́ si yele jo mii í nǎnw naa pye, wee yele yiri lè Zyefubèle fànʔafɔlɔ?»

¹³ A be yákpogèle wáa níì jo: «Wi kóri tiiparigi na.»

¹⁴ A Pilati be pye: «Nyàʔá kapee-félile wi kpéʔele?» A be níì yákpogèle wáa gbanʔama níì jo: «Wi kóri tiiparigi na.»

¹⁵ Pilati maa ni caa bi syɛ́ɛnmi kanidaanna kpéʔele, gee bee na wi Barabasi yirige n yaʔa be ma a wi kári, níì Zyezu kpúmɔn ní sapile ní, ní náà wi kaan be ma pe sa wi kóri tiiparigi na.

Sùlasiibèle n peyɛɛ nyɛ́nɛ Zyezu na

¹⁶ A sùlasiibèle wi kɔ́ri n sáà jée kàcooli fúngo ni fànʔafɔw tɛɛkòrogo ni, níì be sùlasiinyɛnbèle myɛ yeri n kpóʔoro.

¹⁷ A be sáà burogbɔɔ-nyɛ̀nʔɛ le wi na, níì wúuro mígele di pye fànʔafɔ-ǹdɔnnɔ n tɔ́n wi na,

¹⁸ níì fala ni wi syáanri níì jo: «Mɔ o faana, Zyefubèle fànʔafɔlɔ.»

¹⁹ Ní i wi kpúmɔn nyǔngi ni ní kàgaanna ní, ní i tɛ́ɛri wáa wi na, ní ba ni yégunri cáan ní i tíri ni tuun wi yɛʔɛ̀ ma.

²⁰ Lǎli ni be peyɛɛ nyɛ́nɛ n kwɔ́ɔ wi na lè, a be burogbɔɔ-nyɛ̀ɛ́ngi wòlo wi na, níì wi tiimaa búroyi le wi na, níì wi kɔ́ri ni syée bi sa kóri tiiparigi na.

Zyezu kórili kéele tiiparigi na

²¹ A pe ga ni syée n sáà fàra ní nànwaa ní, a wi yìri seʔe ma, pe maa ni wi yiri Siimɔn, Sirɛni tári wówaa wi da pye. Alɛkisandiri ní Wurufusi ye tóow wi da pye, a be wi kɔ́ri, a wi Zyezu tiiparigi tugo.

²² A be kári ní Zyezu ní tɛ́ɛgi ma be yiri lè Gɔligota, ki kɔ́rɔw wi nyɛ Nyùngbokɔrigɔ tɛ́ɛgi.

²³ A be sáà míiri nyáʔami dùvɛɛn ni n kaan Zyezu ma wi gbaa. Wi si ga fɔ̀lɔ n wi gbaa í.

²⁴ A be fala n wi kóri tiiparigi na, níì wi yaleri lɛɛ ní gɔ̌nwáara ní jàngó pe myɛ í be lɛɛgéle cán.

²⁵ Lǎli ni pe wi kóri tiiparigi na lè, cángi maa nan dɔnwolomɔ na.

²⁶ A be wi kpóoli nyúngo sɛ́bɛ n táriga tiiparigi na wi ǹjogi ni a gi jo: ZYEFUBELE FANʔAFƆLƆ.

²⁷ A be kàyuu-fànʔafɔɔlɔ siin kóri tiipariyaa na wi taana, wàa maa pye wi kàliige ma wee si i nyɛ wi kàmɔnɔ ma.

²⁸ [Kánmi bee na Kolocɔlɔɔ syɛɛnsɛbɛri foro, àmɛɛ ki da sɛ́bɛ lè níì jo: «Pe n wi córo kapeebyebèle nínge ni.»]

²⁹ A kozɔ̀lɔbèle i wi teeri ní i nyǔnyi kólo níì jo: «Cɔ́ɔ! Mɔ wee wi jo lè mɔ a kpɔ̀ʔɔrɔli kpaʔa cáan si ní gi faan canya taanri nínge ni,

³⁰ mi miyɛɛ zyɔɔ mi tìgi tiiparigi na.»

³¹ A sáriga-wòlobèle kàfɔɔlɔ ní làlwaw sɛ́bɛwelebéle wɔ́ɔ i peyɛɛ nyɛ́nɛ wi na, ní i gi nyuu peyɛɛ ma níì jo: «Wi n pèle nikwɔɔlɔ syɔɔ, woro tiimaa si a gbǎn wiyɛɛ zyɔɔ í.

³² Ye Kirisi pye wi tìgi tiiparigi na wo wi nyaa, wi lè Isirayɛli fànʔafɔw, koro ga pye wolo í tága wi na.» Bele pe da kóri wi taana lè, a poro wɔ́ɔ i wi teeri.

Zyezu kùúw kéele

³³ Lǎli ni cángi tɛ́ɛn lè nyùngo ni, a tári myɛ kàri yébilimɛ fwɔɔ n taa n baa nan cangàrigi na.

³⁴ Lǎli bee ni a Zyezu yákpogbɔɔlɔ wáa níì jo: «Elowi, Elowi, lama sabatani?» Ki kɔ́rɔw wi nyɛ, «Mii Kolocɔlɔɔ, mii Kolocɔlɔɔ, nyàʔá na mɔ mii yaʔa?»

³⁵ Syɛ́ɛnbèle bele be pye yaà lè woyérebéle ní, a bele bee pèle gi lóʔo níì jo: «Wéle, wi i yaà ni Elii yiri.»

³⁶ A wàa fàn n sáà cétɛɛ fɔɔn vinɛgiri ni, níì wi nɔɔri kàgaanna na n baa kaan wi ma wi gbaa, níì jo: «Ye tíi waa wi wéle kapye Elii a pan ba wi tìrige.»

³⁷ A Zyezu yákpoli wáa gbanʔama níì kùu.

³⁸ Fàniw pe da pari lè kpɔ̀ʔɔrɔli kpaʔa fúngo ni, a wi yabi siin nlaa ǹjoʔo ma n tìgi táàma.

³⁹ Sùlasiibèle dabata kàrigafɔlɔ wi pye yaà lè woyéreo ní Zyezu zǐnmi na, a wi ga wi nyaa a wi kùu kùuganmi bee na, a wi jo: «Kányɛʔɛ na, nǎnw naa maa tɔ̀nɔ n pye Kolocɔlɔɔ Jáa.»

⁴⁰ Cébèle pèle maa wɔ́ɔ̀ canʔana n yére léelige ní i wéle yaà. Poro pèle pe da pye Marii, Magidala ye wów, ní Zyakipile ní Zyozi ye nɔ́ɔw Marii ní, n fàra Salomɛ na.

⁴¹ Lǎli ni Zyezu pye lè Galile ma, cébèle bee maa taʔa wi na ni wi fáliw kpéʔele. Cébèle pèle saʔa maa wɔ́ɔ̀ pye yaà, bele pe da pínɛ n kári Zyerusalɛmi ma ní wi ní lè.

Zyezu leli kéele nyángi ni

⁴² Lǎli ni cángi jée lè kavɔn, koro n gi taa ki maa pye sériw sámaga-yaʔala canʔa gee bee n jo cángi bee nyǐndaliga a pye cândɛnɛgi canʔa.

⁴³ A Arimate ye Zyozɛfu wi nyúngi waʔa níì kári Pilati ma n sáà Zyezu kúceri nyɛ́ɛri wi ma. Wi maa pye kútiijoobèle gboolo wogbɔɔwaa, ní wɔ́ɔ i Kolocɔlɔɔ fǎngi sige.

⁴⁴ Amɛɛ Pilati gi lóʔo lè Zyezu n kùu kelekele nya, a wi i káama gi na, níì wi sùlasiibèle dabata kàrigafɔlɔ yeri n baa yíbe kapye wi n kùu booma ni.

⁴⁵ Lǎli ni wi Zyezu kùúw kéele fílige n cán sùlasiibèle dabata kàrigafɔlɔ ma lè, a wi Zyezu kúceri kaan Zyozɛfu ma.

⁴⁶ A wi sáà fànicàɔn syɔɔ, ní baa Zyezu tìrige tiiparigi na, níì wi pwɔɔ ní fàniw bee ní, níì wi láa n sáà le nyángi ni, gee pe da túgu fálaga na lè, koro kàdoʔo ma a wi kàdɛnɛgbɔʔɔ kòlogo n baa tɔ́n nyanweeli na.

⁴⁷ Marii wi lè Magidala ye wów, n fàra Marii na wi lè Zyozi nɔ́ɔw, poro maa pye yaà, a be gi wéle beè pe a wi sínɛgɛ lè.