Mariki 14 - Cebaara Bible 2010

Zyefubèle yɛɛ̀kinibéle n nyɔɔ kúun Zyezu na

¹ Ki maa kòro canya siin Sɔ̀lɔ-mí-yaʔali séri ní levé fun búruw séri canʔa si nan. A sáriga-wòlobèle kàfɔɔlɔ ní làlwaw sɛ́bɛwelebéle i kanmaa caa bi Zyezu lɛ́ɛlɛ taa cò bi kpóo.

² Níì cán pe maa jo: «Ki ga yɛlɛ gi pye sériw làla ni í jàngó kàfulogo a kɔ́ yìri syɛ́ɛnbèle nínge ni í.»

Cewaa n nùndaanna sìnmɛ wo Zyezu nyúngi na

³ Lǎli ni Zyezu pye lè lìíli na Betanii ni Siimɔn kpáagi ni wi lè yaanyɛɛnmi fɔ́lɔ, a cɔlɔɔ jée ní lɔgbanra singbolo ní, loro lee ni náari lɔgbanra sinmɛ pye lè. A wi baa sìngboli nyɔ́ɔ kabi níì bi wo Zyezu ma nyǔngi ni.

⁴ A syɛ́ɛnbèle pèle fúnyo tanʔa be na, a be i gi nyuu peyɛɛ ma níì jo: «Nyàʔá na wi nùndaanna sǐnmi naa kálagi nya?

⁵ Pe mǎà dée gbǎn bi pára pi wáliw í nɛʔɛ bi sɔ̀lɔ selebingéle taanri na, si wáliw bee kaan foomɔfɔbèle ma.» A be i nyuu ni céw bɛɛngi.

⁶ Kàjáa a Zyezu jo: «Ye wi yaʔa sági. Nyàʔá na yele wári nya wi na? Kacànna wi pye mii na.

⁷ Níì cán foomɔfɔbèle i nyɛ ní yele ní làla o làla, lǎlee faala ni yele ga ni caa bi kacàngēle kpéʔele be na lè, yele a gbǎn ge kpéʔele, kàjáa mii a pye ní yele ní làla o làla í.

⁸ Gee fánʔa na wi taa lè, koro wi kpéʔele. Wi n sǐnmi naa tɛ́ʔɛ n mii céri sámaga sáni mii í kùu lè pé mii tɔ́n.

⁹ Mii a gi joo yele ma kányɛʔɛ ni, syɛ́ɛnbèle ga ni Kolocɔlɔɔ Syɛɛnjóocǎnri nyuu dulunyanw ni tɛʔɛ o tɛʔɛ ni, gee céw naa kpéʔele lè, pe a wɔ́ɔ ra gi nyuu yaà, pe a fɛ̀ʔɛ wi na í.»

Zyudasi i làrijànna caa bi Zyezu le sáriga-wòlobèle kàfɔɔlɔ kɔ́yɔ ni

¹⁰ Wi pìitamabèle kɛɛ ní siin ni, a be wàa nibin kári sáriga-wòlobèle kàfɔɔlɔ ma, pe i wi yiri Zyudasi Isikariyɔti, ní sáà be pye woro a wi le be kɔ́yi ni.

¹¹ Lǎli ni pe dee bee lóʔo lè, a gi tɔ̀nɔ n be dɛ́nɛ, a be fala n nyɔɔ fàli wi ma níì jo poro a wáli kaan wi ma. A Zyudasi fala ni làrijànna caa bi wi le be kɔ́yi ni.

Zyezu n Sɔ̀lɔ-mí-yaʔali séri lìile lìi ní wi pìitamabèle ní

¹² Levé fun búruw séri cânzelige na, lǎlee ni pe sériw bàpiigéle kúu lè, a wi pìitamabèle wi pye: «Sán mɔ caa wolo í kári sa Sɔ̀lɔ-mí-yaʔali séri lìile sámaga mɔ ma mɔ í lìi?»

¹³ A wi wi pìitamabèle pèle siin tun níì be pye: «Yaa syée ye sa jée kěgi ni, yele a sa nànwaa fàrá nyaa wi lɔ̀ʔɔ kasànna tugo, ye taʔa wi na.

¹⁴ Wi ga sáà jée kpáagee ni lè, ye kpáagi fɔ́lɔ pye: ‹Tamafɔw n jo, sán woro kpáagi nyɛ, gee ni woro a ba Sɔ̀lɔ-mí-yaʔali séri lìile lìi ní woro pìitamabèle ní lè?›

¹⁵ Wi a kpaataʔaga tɛ̀ɛn yele na. Pe n gi sámaga n kwɔ́ɔ níì yáriri tɛ́ʔɛ yaà. Nɛɛ bee yele a Sɔ̀lɔ-mí-yaʔali séri lìile sámaga wolo ma.»

¹⁶ A pìitamabèle bee kári n sáà jée kěgi ni, a be gi nyaa àmɛɛ wi da gi joo poro ma lè, a be Sɔ̀lɔ-mí-yaʔali séri lìile sámaga yaà.

¹⁷ Cângwɔɔgi nyɔ́ɔ na a wi pan ní wi pìitamabèle kɛɛ ní siin ní.

¹⁸ Lǎli ni be tɛ́ɛn ni líi lè, a Zyezu be pye: «Mii a gi joo yele ma kányɛʔɛ ni, wàa i naa yele ni ni líi ní mii ní, woro wi a mii cǒ kaan.»

¹⁹ A be fala n yɛ́ɛyi tanʔa ní i wi yíbe nibin nibin, wee n jo: «Mii wi lé?» Wee n jo: «Mii wi lé?»

²⁰ A wi be pye: «Yele kɛɛ ní siinw ni, yele wàa nibin wii, wee wi kɔ́gi nii ní mii ní pɛ́ɛli ni lè.

²¹ Syɔɔn-pya tɔ̀nɔ́ i syée àmɛɛ ki da sɛ́bɛ lè wi kéeli na. Kàjáa wɔʔɔlɔ a pye nǎnw bee na, wee wi a Syɔɔn-pya cǒ kaan lè! Ki da caà yɛlɛ pe dée nǎnw bee see í.»

Lìizanni kéele

²² Lǎli ni be pye lìíli na lè a Zyezu búruw láa níì bariga kaan Kolocɔlɔɔ ma, níì wi kabagi n lɛɛ be na níì jo: «Ye syɔɔ, wee naa wi nyɛ mii céri.»

²³ Koro kàdoʔo ma a wi yagbaala láa níì bariga kaan Kolocɔlɔɔ ma, níì li kaan be ma, a pe myɛ gbaa li ni.

²⁴ Níì be pye: «Wee naa wi nyɛ mii sìsyaanw, joogaanni sìsyaan, wee wi a wo lè syɛ̀ɛnnɛ saʔa kéele na.

²⁵ Mii a gi joo yele ma kányɛʔɛ ni, nlaʔa níjanʔa na mii a ní ɛrɛzɛn tírire yasanra lɔ́ʔɔ gbaa nyáana í bi taa cángi í ba nan gee ni mii a ní gi gbaa lè kavɔn Kolocɔlɔɔ fǎngi ni.»

²⁶ Koro kàdoʔo ma a pe ga ŋùu n kwɔ́ɔ, a be yiri n kári Olivye tíiri nyanbelege ma.

Zyezu n jo Pyɛri a woro cée

²⁷ A Zyezu be pye: «Yele myɛ a mii cée, níì cán ki maa sɛ́bɛ níì jo: ‹Mii a bànaʔaw kpúmɔn kpóo, bǎbèle si càri.›

²⁸ Mii si ga baa nyán, mii a kári Galile ma yele yɛ́ʔɛ na.»

²⁹ A Pyɛri wi pye: «Alí bele myɛ ga mɔ cée, mii a tée mɔ cée í.»

³⁰ A Zyezu wi yari: «Mii a gi joo mɔ ma kányɛʔɛ ni, àlí yébiligi naa tiimaa ni sáni gòpɔ́seliw í nyɛni lè, siin wów í ba nyɛni, mɔ a mii cée tɔlɔyɔ taanri.»

³¹ Koro ní ki myɛ ní, a Pyɛri sèʔé i gi nyuu gbanʔama níì jo: «Alí ki ga yére mii í kùu ní mɔ ní, koro ki a tɔ́ɔ pye, mii a tée mɔ cée í.» A pe myɛ wɔ́ɔ̀ gi joo nya.

Zyezu n nyɛ́ɛri Zyɛtisemane ni

³² A be sáà nan tɛɛgaa na pe i gi yiri Zyɛtisemane. A wi wi pìitamabèle pye: «Ye tɛ́ɛn nɛɛ naa, mii si kári bi sa nyɛ́ɛri.»

³³ Níì Pyɛri, ní Zyaki, ní Zyan kɔ́ri n kári, a funjurugori ní fun-yáagi tɔ̀nɔ n sáà jée wi ni gbanʔama.

³⁴ A wi be pye: «Mii fúngi n curugo mii na n sɔ̀lɔ, fwɔɔ n baa nan kùúw na. Ye kòro nɛɛ naa nyɛ̀nɛ na.»

³⁵ A wi ga sɛ̀ʔɛrɛ yɛʔɛ̀ ma cɛɛri, a wi sáà tìgi n too tári na ní i nyɛ́ɛri jàngó kapye ki a gbǎn kpéʔele woro í syɔɔ lǎli bee kéele ma.

³⁶ Wi maa jo: «Mii Tóow Abaa, keelaa faala ga mɔ jáa í, yagbaagi naa léeli mii na, kàjáa ki ga yɛlɛ mii nyɛ́nɛ kéeli í kpéʔele í, fwɔɔ mɔ nyɛ́nɛ wóli.»

³⁷ A wi lúru n pan n baa be nyaa pe i ŋúnɔ, a wi Pyɛri pye: «Siimɔn, ba mɔ ŋúnɔ lé wii? Mɔ a gbǎn kòro nyɛ̀nɛ na bi lɛ́ɛri nibin kwɔ́ɔ ì?

³⁸ Ki n yɛlɛ ye kòro nyɛ̀nɛ na yaa Kolocɔlɔɔ nyɛ́ɛri, koro ga pye yarigaa a kɔ́ yele kárima bi lége kapeele ni í. Ki láagi i nyɛ syɔɔn pili na, kàjáa wi céri fànʔa n cɛ́rɛ.»

³⁹ A wi níì kári n sa ni nyɛ́ɛri, níì syɛɛnnijanri joo.

⁴⁰ A wi ga níì lúru n pan, a wi baa be nyaa pe i ŋúnɔ. Níì cán ŋúnɔmi maa be jáa gbanʔama. Pe ga níì pye bi gbǎn yarigaa cán bi joo wi ma í.

⁴¹ A wi kári níì lúru n pan tɔdaanri wógi na n baa be pye: «Yaa ŋúnɔ tɔ́ɔliw ni, ye ŋɔ́n ye daa. Ki n kwɔ́ɔ. Wéle, lǎli n nan, lee ni pe a Syɔɔn-pya le kapeebyebèle kɔ́yɔ ni lè.

⁴² Ye yìri wo kári. Wéle, wee wi a mii cǒ kaan lè, wi n nùuni naa n kwɔ́ɔ.»

Zyezu cǒli kéele

⁴³ Lǎli ni Zyezu sèʔê pye ni nyuu lè, a Zyudasi kàri n nan, wi lè kɛɛ ní siinw ni, wi maa pan ní syɛ̀ɛnnɛ saʔa ní, ŋɔséebéle ní kàgbeegēle si i nyɛ be ma, sáriga-wòlobèle kàfɔɔlɔ ní làlwaw sɛ́bɛwelebéle ní wolɛɛbèle pe da be tun.

⁴⁴ Wee si wi nyɛ lè wi levɔw nigoobèle kɔ́yɔ ni, woro maa joo n tɛ̀ɛn be na níì be pye: «Yele ga sáà mii nyaa a mii wee syɔɔnri lè, woro wii. Ye wi cò yaa syée ní wi ní, yáā wi kɔ̀rɔsíi.»

⁴⁵ Lǎli ni wi pan lè ní be ní, a wi fala n nùuni Zyezu na níì wi pye: «Tamafɔw.» Níì wi syɔɔnri syɔɔnri.

⁴⁶ A syɛ́ɛnbèle bee fala n kpóʔoro Zyezu na n wi cò.

⁴⁷ Bele be pye ní Zyezu ní lè, a poro wàa wi ŋɔséew kɔ́n n sáriga-wòlobèle kàfɔgbɔɔɔ falipyeo kpúmɔn n líigi láʔa wi na.

⁴⁸ A Zyezu be pye: «A yele pan lé ba mii cò ní ŋɔséebéle, ní kàgbeegēle ní, àmɛɛ mɔ lóʔo lè kàyuuo mii nyɛ?

⁴⁹ Mii maa pye yele níngi ni canʔa o canʔa ni syɛ́ɛnbèle tama kpɔ̀ʔɔrɔli kpaʔa ni, yele ga taa si mii cò í. Kàjáa gee naa myɛ n kpéʔele koro ga pye gee ki da sɛ́bɛ lè Kolocɔlɔɔ syɛɛnsɛbɛri ni, gi foro.»

⁵⁰ A wi pìitamabèle myɛ fàn níì wi yaʔa.

⁵¹ Nìgɔcariwaa maa taʔa wi na níì làgo yagana wáa wiyɛɛ na, a be wi cò.

⁵² A wi làgow yaʔa be ma ní i fé ni syée níbori.

Pe n baa Zyezu yérige kútiijoobèle yɛ́ʔɛ ma

⁵³ A be Zyezu kɔ́ri n kári sáriga-wòlobèle kàfɔgbɔɔɔma, beè lè sáriga-wòlobèle kàfɔɔlɔ myɛ, ní wolɛɛbèle, ní làlwaw sɛ́bɛwelebéle peyɛɛ gbóʔoro lè.

⁵⁴ A Pyɛri taʔa wi na léelige ni syée wi kurugo fwɔɔ n taa n sáà jée sáriga-wòlobèle kàfɔgbɔɔɔ kàcoolo ni, n sáà tɛ́ɛn ni naà waari ní nìgwɔɔbèle ní.

⁵⁵ Sáriga-wòlobèle kàfɔɔlɔ ní Sanedirɛnw myɛ maa ni keelaa caa bi joo taʔa Zyezu na, koro ga pye poro í wi taa kpóo, pe si ga làa taa í.

⁵⁶ A syɛ̀ɛnnɛ saʔa tɔ̀nɔ n jànvaa kérigèle kèle joo n taʔa wi na, koro ní ki myɛ ní pe kajoogèle da pye sèjira í.

⁵⁷ Pèle maa pye yaà, a poro yìri n yére, níì finɛ n taʔa wi na níì jo:

⁵⁸ «Wolo tiimaa maa gi lóʔo wi ma a wi jo: ‹Mii a kpɔ̀ʔɔrɔlɔ kpáagi naa cáan, gee syɛ́ɛnbèle faan lè ní be kɔ́yi ní, si kàa nikwɔɔ faan canya taanri nínge ni, gee gi lè syɔɔn kɔ́lɔ a gi faan í.› »

⁵⁹ Alí koro ní ki myɛ ní, pe séeraw ga sèʔê pye sèjira í.

⁶⁰ A sáriga-wòlobèle kàfɔgbɔɔɔ yìri n yére be níngi ni, níì Zyezu yíbe níì jo: «Mɔ ga yarigaa taa bi joo wii ì? Nyàʔá séerafɔbèle naa nyuu ni taari mɔ na?»

⁶¹ A wi pyèri, wi ga yafyɛn joo í. A sáriga-wòlobèle kàfɔgbɔɔɔ níì wi yíbe níì jo: «Mɔ lé wi nyɛ Kirisi wee wi lè dùbaw myɛ Kàfɔlɔ jáa?»

⁶² A Zyezu jo: «Ɛɛn, mii wii.» Ní wɔ́ɔ̀ jo: «Yele si a kɔ́ Syɔɔn-pya nyaa wodɛ́ɛɔn ní, séew myɛ fɔ́lɔ Kolocɔlɔɔ kàliige ma, si kɔ́ wi nyaa waa maa fàfaanyi ni.»

⁶³ A sáriga-wòlobèle kàfɔgbɔɔɔ búroyi sulugu wiyɛɛ na níì jo: «Séerafɔwìí si wolo a ní da caa?

⁶⁴ Yele n Kolocɔlɔɔ mɛ́ɛkalagi-syɛ́ɛnri lóʔo wi nyɔ́ɔgi na. Mɛ̀ɛ́ si yele jo wo wi pye?» A pe myɛ jo wi n yɛlɛ be wi kpóo.

⁶⁵ A pèle fala n séli ni tɛ́ɛri wáa wi na, níì wi yɛ́ɛgi tɔ́n ní i wi kpúmɔn ní kágungèle ní níì jo: «Mi mɔ kpúmɔnfɔw mɛ́ʔɛ tɛ̀ɛn wolo na.» A kpɔ̀ʔɔrɔli kpaʔa kpaàwelebéle wi kɔ́ri ni syée ní i wi kpúmɔn ní kadaagèle ní.

Pyɛri n Zyezu cée

⁶⁶ Lǎli ni Pyɛri pye kàcooli ni táàma lè, a sáriga-wòlobèle kàfɔgbɔɔɔ falipyecewaa pan

⁶⁷ n baa Pyɛri nyaa wi i náagi waari, a wi i wi wéle, ní kɔ́ɔ̀ jo: «Mɔ maa wɔ́ɔ̀ pye ní Zyezu ní wi lè Nazarɛti ye wów.»

⁶⁸ A wi gi kábala níì jo: «Gee mɔ nyuu lè mii ga gi cán í, mii ga caa wɔ́ɔ̀ gi kɔ́rɔw cán í.» Níì fala n núngo be taana n sáà jée nìkpaangi ni. [A gòpɔ́w fala n nyɛni.]

⁶⁹ A falipyecew ní sáà wi nyaa syɛ́ɛnbèle pèle taana, a wi bele bee pye: «Nǎnw naa yele nyaa lè wee, wi pìitamawaa wii.»

⁷⁰ A Pyɛri níì gi kábala. Bele be pye yaà lè, a cɛɛri ga pye a poro níì Pyɛri pye: «Kányɛʔɛ gii, mɔ tɔ̀nɔ́ i nyɛ bele bee wàa, níì cán mɔ wɔ́ɔ i nyɛ Galile tári wówaa.»

⁷¹ A Pyɛri fala ni joobeemi nyuu, ní i kɛ̀ɛ́ níì jo: «Nǎnw bee kéele yele nyuu lè, mii ga wi cán í.»

⁷² Lǎli bee ni a gòpɔ́siin wów nyɛni. A Pyɛri fala n Zyezu syɛ́ɛnri sɔ̀ngi n taa àmɛɛ wi da gi joo lè woro ma níì jo: «Sáni gòpɔ́seliw í nyɛni lè siin wów í ba nyɛni, mɔ a mii cée tɔlɔyɔ taanri.» A wi ga gee bee sɔ̀ngi n taa a wi fala ni nyaan.