Mariki 13 - Cebaara Bible 2010

Zyezu n kpɔ̀ʔɔrɔli kpaʔa cáanna kéele joo

¹ A wi ga ni yirigi kpɔ̀ʔɔrɔli kpaʔa ni, a wi pìitamawaa wi pye: «Ee, Tamafɔw, mɔ mi kàdɛnɛgboloyi naa wéle àmɛɛ be yi tɛ́ʔɛ n kpáayi naa sámaga n faan lè.»

² A Zyezu wi pye: «Kpaakpoloyi naa lé mɔ wéle? Kàdɛnɛgaa faala a kòro kàa na í, pe a ba yi myɛ cáan.»

Kapeeye ní wɔʔɔyɔ kéele

³ A Zyezu sáà tɛ́ɛn Olivye tíiri nyanbelege na, níì yɛ́ɛgi le kpɔ̀ʔɔrɔli kpaʔa ni, a Pyɛri, ní Zyaki, ní Zyan, ní Andire wi yíbe, pe yagwɔɔlɔ, níì jo:

⁴ «Mi kérigèle bee làrigbeʔelele tɛ̀ɛn wolo na, ní nyàʔá fɛ̀ɛfeleo wi a kɔ́ ba kérigèle bee làrivorolo tɛ̀ɛn wolo na?»

⁵ A Zyezu fala ni gi nyuu be ma níì jo: «Yaa yeyɛɛ kɔ̀rɔsíi, yele a kɔ́ syɔɔn faala yaʔa wi yele fáana pùuni í.

⁶ Syɛ̀ɛnnɛ saʔa a kɔ́ pan ba ra mii mɛ́ɛgi nii peyɛɛ na si jo poro be nyɛ Kirisi. Pe a tɔ̀nɔ́ ba syɛ̀ɛnnɛ saʔa fáana pùuni.

⁷ Yele ga kɔ́ ni kapɛɛngèle tìnmɛ lúro, ní wɔ́ɔ i kapɛɛngèle kéele lúro, ki ga yɛlɛ yele í da fɛ̀ɛgí í, níì cán kérigèle bee myɛ n yɛlɛ ge kpéʔele. Kàjáa gee bee ban ki a pye gi kwɔ́ɔmi í.

⁸ Syɛɛnfelegaa a ba ra tuun kàa na, fàngaa si wɔ́ɔ ba ra tuun kàa na. Tári si wɔ́ɔ cúngo tɛɛyaa ni. Kateekpoloyi a wɔ́ɔ ba ra tuun. Kérigèle bee myɛ ke a pye wɔʔɔli sélimɛ.

⁹ Ki n yɛlɛ ye sámaga ye yére. Pe a ba ra yele nii kútiijoobèle kɔ́yɔ ni, sáā yele kpúmɔn sérikpaayi ni. Yele a kɔ́ sa yére tári kacɔɔnribéle ní fànʔafɔbèle yɛ́ʔɛ ma mii kéeli na, jàngó bi pye séera be ma.

¹⁰ Ki si n yɛlɛ Syɛɛnjóocǎnri í joo gbɛnʔɛnɛ syɛɛnfeleyi myɛ ma.

¹¹ Lǎli ni pe ga ni syée ní yele ní kútiijoobèle ma lè, dee yele a sa joo lè, yele a kɔ́ yele fúnyi yaʔa yi curugo di kéeli na í, dee di ga jée yele fúnyi ni lǎli bee ni lè, ye dee bee joo. Níì cán yele ban ye a ra nyuu í, fwɔɔ Pìicǎnni.

¹² Syɔɔn a ba ra wi senyɛnnɛ kaangi kùúw ma, tofɔlɔ í da wi pyà kaangi kùúw ma. Pìíbèle si wɔ́ɔ ba yìri be seefɔbèle kurugo sáā be kúu.

¹³ Yele kéeli a ba syɛ́ɛnbèle myɛ bɛɛn mii mɛ́ɛgi kéele na. Kàjáa wee wi ga fɔ̀rɔgi kpàraco lè n taa n baa nan gi kwɔ́ɔmi na, wee bee a syɔɔ.

Kálagili kapeekpɔʔɔ

¹⁴ «Lǎli ni yele ga baa ‹kálagili kapeekpɔʔɔ› nyaa a gi yére tɛ́ɛgee ni ki ga yɛlɛ bi yére lè í, (wee wi tɛ́ɛgi naa syɛ́ɛnrɛ wéle ni nyuu lè, wee bee n yɛlɛ wi di kɔ́rɔw cán) lǎli bee ni, bele be nyɛ lè Zyude tári ni, ki n yɛlɛ be fàn be kári nyanbeleyi ma.

¹⁵ Wee wi ga pye lè wi binge ǹjoʔo ni, ki ga yɛlɛ wi tìgi bi jée gi ni bi sa yarigaa láa í.

¹⁶ Wee wi ga wɔ́ɔ̀ pye lè seʔe ni, ki ga yɛlɛ wi lúru kári kàʔa ma sa wi búrogi láa í.

¹⁷ Ki si a tɔ̀nɔ́ gbàn fícarigèle fɔ̀ɔlɔ ma cányi bee ni, n fàra bele na pe a ra pìibēle kaangi paa ŋɔri lè.

¹⁸ Ki n yɛlɛ yaa nyɛ́ɛri jàngó ki a kɔ́ ba pye weere làla ni í.

¹⁹ Níì cán cányi bee a ba pye wɔʔɔgɔ canya, nlaa Kolocɔlɔɔ dulunyanw kpéʔele lè n baa nan níjanʔa na, wɔʔɔgi bee félege ga kɔ́ɔ̀ kpéʔele í, gi félegi si a ní wɔ́ɔ kpéʔele gee bee kàdoʔo ma í.

²⁰ Kapye Kàfɔw da gi kɔ̀rirɔ bi kàa yirige cányi bee ni í, syɔɔn faala mǎà dée syɔɔ í. Kàjáa wi n kàa yirige yi ni wi syɛɛnnyɛnɛ-wòlobèle kéele na.

²¹ Syɔɔn ga yele pye: ‹Kirisi i naa wee,› koro ga jáa: ‹Wi i yaà wee,› ki ga yɛlɛ yele í tága gi na í.

²² Níì cán kirisi-fáanabéle, ní kanyaajoo-fáanabéle a ba yìri, sáā fɛ̀ɛbēle ní kakpoloyo kpéʔele, jàngó be fanʔa ga taa poro í Kolocɔlɔɔ syɛɛnnyɛnɛ-wòlobèle fáana pùuni.

²³ Ki si n yɛlɛ yaa yeyɛɛ kɔ̀rɔsíi, a mii gi myɛ joo n yele sàmi n yaʔa wii.

Syɔɔn-pya lúrubanni kéele

²⁴ «Kàjáa wɔʔɔli bee canya kàdoʔo ma ‹cángi a kàri yébilimɛ, yégi a ní fílige í.

²⁵ Ŋɔripiigèle sáā yìrigí nyɛ̀ʔɛni na bi ba ra tuun, nyɛ̀ʔɛni fàngboloyo a cúngo.›

²⁶ Lǎli bee ni pe a Syɔɔn-pya nyaa waa maa fàfaanyi ni ní séekpɔɔw, ní nìjangbɔɔri ní.

²⁷ Lǎli bee ni wi a wi tundunbèle tun be sa wi syɛɛnnyɛnɛ-wòlobèle kpóʔoro peyɛɛ na, poro bele be nyɛ lè tári kàbanya myɛ sicɛrɛ na káfalagi kàban-yìriye ma, beè nyɛ̀ʔɛni ní tári tiyɛɛ vàra lè.

Gee na děsyaantiigi wo tama lè

²⁸ «Ye wɔ́ɔ ye děsyaantiigi kéele wéle, ki ga kɔlɔ, á káganyi ba ni wâburo yirigi lǎli ni lè, yele n gi cán wɔ̀ɔ́gi n nùuni.

²⁹ Anbée si gi wɔ́ɔ i nyɛ, lǎli ni yele ga kɔ́ɔ̀ kérigèle bee nyaa ke i kpéʔele lè, ki n yɛlɛ ye gi cán Syɔɔn-pya n nùuni naa, fwɔɔ n baa nan kpàánweeli na.

³⁰ Mii a gi joo yele ma kányɛʔɛ ni, lǎli naa syɛ̀ɛnnɛ a kwɔ́ɔ í bi taa kérigèle bee myɛ í ba kpéʔele.

³¹ Nyɛ̀ʔɛni ní tári a kwɔ́ɔ, kàjáa mii syɛ́ɛnri a tɔ̀nɔ́ kwɔ́ɔ í.

Kolocɔlɔɔ nibin wi làrigwɔɔli cán

³² «Syɔɔn faala ga cángi bee ní lǎli bee cán í, àlí nyɛ̀ʔɛni tundunbéle yoo, Jaafɔw yoo, kapye Tofɔw nibin ban í.

³³ Ki n yɛlɛ ye kpóʔoro ye yaʔa, yé kòro nyɛ̀nɛ na, níì cán yele ga lǎli cán í.

³⁴ Ki i nyɛ àmɛɛ syɔɔn gáā syée kùlo ni lè, níì wi kpáagi ní wi yáriri myɛ kàlifáa wi falipyebèle ma, níì fáliw tɛ̀ɛn be na nibin nibin, níì kpàánweeli tɛ́ɛnfɔlɔ pye wi kòro nyɛ̀nɛ na.

³⁵ Koro na gi yɛlɛ ye kòro nyɛ̀nɛ na, níì cán yele ga kpáagi fɔ́lɔ làribanna cán í, dɔ̀ʔɔ́ cângwɔʔɔ nyɔ́ɔ na ki a pye yoo, nyǐnlɛʔɛ na yoo, gòpɔ́nyɛninɛ na yoo, nyɛ̀ʔɛ nyɔ́ɔ na yoo, yele ga cán í.

³⁶ Kapye yele ga kòro nyɛ̀nɛ na í, wi a kɔ́ foo pan ba yele nyaa ŋúnɔmi na.

³⁷ Gee mii nyuu yele ma lè, gee bee mii wɔ́ɔ̄ nyuu syɛ́ɛnbèle myɛ ma: ‹Ye kòro nyɛ̀nɛ na.› »