Mariki 12 - Cebaara Bible 2010

Ɛrɛzɛn sefalabèle be pee lè poro kàseeli

¹ A Zyezu níì séli ni nyuu be ma kàseegéle ni níì jo: «Nànwaa maa ɛrɛzɛn séʔe sámaga níì gi faan n sùlu, níì ɛrɛzɛnw tɛɛnùgugo sámaga yaà, níì kpaatɔnɔgɔ faan yaà, níì gi kàlifáa sefalabèle pèle ma páā woro lɛɛli kaangi woro ma, níì yiri n kári kùlaa ni.

² A ɛrɛzɛnw làrilaala ga baa nan a wi wi falipyewaa tun sefalabèle ma wi sa woro lɛɛli syɔɔ be ma.

³ A be sáà wi cò n kpúmɔn níì wi lúrugo n tórigo wowaaɔ ní.

⁴ A wi níì falipyewaa nikwɔɔ tun be ma, a be ní sáà wee bee kpúmɔn nyǔngi ni n kpàli, ní i wi teeri.

⁵ A wi níì wàa nikwɔɔ tun, a be sáà wee bee kpóo. Wi maa tɔ̀nɔ n tundunbéle saʔa tun be ma, a be sáà pèle kpúmɔn, níì pèle kpóo.

⁶ Wàa nikwɔɔ si maa sèʔê pye wi ma wi lè wi pìinidaanmaw, a wi wee bee tun be ma pe myɛ kàdoʔo ma níì jo: ‹Pe a sa fɛ̀ɛrɛ taa mii jáaw na.›

⁷ A ɛrɛzɛn sefalabèle ga wi wéle n nyaa wi i maa, a be gi joo peyɛɛ ma níì jo: ‹Wee naa wi nyɛ wi kɔriliiw, ye tíi wo wi kpóo, kɔ́rigi si kòro wolo wóʔo.›

⁸ A be wi cò n kpóo n wáa ɛrɛzɛn ségi kàdoʔo ma.

⁹ Nyàʔá ɛrɛzɛn ségi fɔ́lɔ a pye? Wi a lúru pan ba sefalabèle bee kpóo, si ségi kàlifáa pèle nikwɔɔlɔ ma.

¹⁰ Yele ga kɔ́ɔ̀ syɛ́ɛnri naa wéle Kolocɔlɔɔ syɛɛnsɛbɛri ni ì? Ti n jo: ‹Kàdɛnɛgee kpaafaanbèle da cée lè, koro ki baa pye kpáagi jɛ̀ɛ́nnɛ kadɛnɛzelige.

¹¹ Gee bee i nyɛ Kàfɔw kapyele, li si i nyɛ wo ma kakpɔɔlɔ.› »

¹² A Zyefubèle yɛɛ̀kinibéle fala ni caa bi Zyezu cò, níì cán pe maa gi cán poro na wi kàseeli bee wáa, kàjáa pe maa ni fɛ̀ɛgí syɛ́ɛnmi na. A be núngo wi taana n kári.

Nyǔnyi lɔ́rɔ ti yɛlɛ taa sàrá Sezari ma lè

¹³ Pe maa Farisibèle pèle ní Herodi taʔafɔbèle pèle tun Zyezu ma koro ga pye pe sa wi taa cò wi nyɔ́ɔgi syɛ́ɛnrɛ na.

¹⁴ A be sáà wi pye: «Tamafɔw, wolo n gi cán mɔ i kányɛɛgi nyuu, mɔ wɔ́ɔ o syɔɔnwaa yirigi wàa ni í. Níì cán mɔ o syɛ́ɛnbèle wéle pe yɛ́ɛyi kpólolo na í, mɔ i Kolocɔlɔɔ kólogi tèé syɛ́ɛnbèle na kányɛʔɛ ni. A gi yɛlɛ lé wolo í da nyǔnyi lɔ́rɔ kaangi Sezari ma? A gi yɛlɛ lé wolo í da di kaangi láà, ba wolo í ŋɔ́n?»

¹⁵ Zyezu si maa be syɛɛnjóotɛɛyi siin joolo sɔngurɔ cán, a wi be pye: «Nyàʔá na yele mii pingi ni wéle? Ye sa deniye láa yaa maa mii í ba wéle.»

¹⁶ A be sáà wi láa n pan. A wi baa be yíbe níì jo: «Wìí syɔ́ɔn yɛ́ʔɛ ní wi mɛ́ɛgi gi gee wáliw na?» A be wi pye: «Sezari wii.»

¹⁷ A wi be pye: «Koro na gee gi nyɛ lè Sezari wógi, ye gi kaan Sezari ma. Gee si gi nyɛ lè Kolocɔlɔɔ wógi, ye gi kaan Kolocɔlɔɔ ma.» A be i káama wi syɛɛnlurugori kéele na.

Pe n Zyezu yíbe kúbèle nyán-yirile kéele na

¹⁸ A Sadusebèle kári Zyezu ma, poro bele be gi nyuu lè níì jo kúbèle a nyán í, a poro baa wi yíbe níì jo:

¹⁹ «Tamafɔw, Mowizi maa gi sɛ́bɛ n yaʔa wolo ma níì jo: Nànwaa ga kùu níì wi cɔɔ̀ yaʔa wi ga pyà taa í, fwɔɔ wi senyɛnw í céw bee láa, wi ga pyà taa, pìíw bee a pye wi senyɛnw mɛ́ʔɛ na.

²⁰ Nànbēle kɔrɔsiin si maa pye senyɛ̀nnɛ. A wozeliw cɔlɔɔ láa ní baa kùu, yòdaʔaga sìndaa ni.

²¹ A siin wów céw bee láa ní baa kùu, wi ga wɔ́ɔ̀ pyà taa í. A taanri wów ní baa pye nya,

²² a pe myɛ kɔrɔsiinw wi láa níì kùu, wi ga pyà taa wàa faala ma í. A céw náa baa kùu.

²³ Kúbèle cân-nyánga ga baa nan, á be nyán, nǎnbèle bee ni wìí wóo wi a pye céw? Níì cán pe myɛ kɔrɔsiinw maa wi láa n sɔ̀lɔ.»

²⁴ A Zyezu be pye: «Amɛɛ yele nyɛ lè yele ga Kolocɔlɔɔ syɛɛnsɛbɛri ní wi séew cán lè í, gee bee ban gi yele pùuni ì?

²⁵ Kàjáa kúbèle ga baa nyán, nàɔn a ní cɔlɔɔ láa í, cɔlɔɔ a ní kòro nàɔn ma í, fwɔɔ pe a pye àmɛɛ nyɛ̀ʔɛni tundunbéle nyɛ lè nyɛ̀ʔɛni ni.

²⁶ Gee gi kúbèle nyán-yirile kéele kwɔ́ɔ lè, yele ga tɔ̀ʔɔ́ kɔ́ɔ̀ gee bee wéle Mowizi sɛ́bɛw ni wii ì? Kolocɔlɔɔ maa gi joo wi ma tiipiigi ni níì jo: ‹Mii wi nyɛ Abirahami Kolocɔlɔw, ní Izaaki Kolocɔlɔw, ní Zyakɔbi Kolocɔlɔw.›

²⁷ Kolocɔlɔɔ o nyɛ kúbèle Kolocɔlɔɔ í, niweebèle wóo wi nyɛ. Yele n tɔ̀nɔ n pùuni n léeli.»

Tundunri di kpɔ́ʔɔ n sɔ̀lɔ ti myɛ na lè

²⁸ Làlwaw sɛ́bɛwelewaa maa kári n sa ni be kàkabalagi lúro, a wi gi cán Zyezu n tɔ̀nɔ n sámaga n joo be ma, a wi nùuni Zyezu na n baa wi pye: «Kolocɔlɔɔ tundunrìí di nyɛ ti myɛ yɛ́ʔɛ ma?»

²⁹ A Zyezu wi yari: «Wozelidi di nyɛ dee naa: ‹Lóʔo Isirayɛli! Kàfɔw wi lè wolo Kolocɔlɔw, woro nibin wi nyɛ Kàfɔw.

³⁰ Ki n yɛlɛ mi mɔ Kafɔw Kolocɔlɔɔ kéeli yaʔa li mɔ dɛ́nɛ ní mɔ zɔnw myɛ ní, ní mɔ fúngi myɛ ní, ní mɔ sɔngumi myɛ ní, ní mɔ bárigaw myɛ ní.›

³¹ Siin wóri si di nyɛ dee naa, a di jo: ‹Mɔ syɛɛnnyɛnw kéele yaʔa li mɔ dɛ́nɛ àmɛɛ mɔ miyɛɛ dɛ́nɛ lè.› Tundunraa nikwɔɔ ní o nyɛ dee naa yɛ́ʔɛ ma í.»

³² A làlwaw sɛ́bɛweleo wi pye: «Mɔ n tɔ̀nɔ n kányɛʔɛ joo Tamafɔw. Kolocɔlɔɔ i nyɛ nibin, wàa o yaà í, kapye woro nibin ban í.

³³ Ní syɔɔn ga Kolocɔlɔɔ kéeli yaʔa a li wi dɛ́nɛ ní wi fúngi myɛ ní, ní wi sɔ̀ngumi myɛ ní, ní wi bárigaw myɛ ní, ní wɔ́ɔ̀ wi syɛɛnnyɛnw kéele yaʔa a li wi dɛ́nɛ àmɛɛ wi tiimaa wiyɛɛ dɛ́nɛ lè, gee bee gi sɔ̀lɔ sáriga-sórigow myɛ na n fàra sáriga-wòlori wozanra myɛ na.»

³⁴ A Zyezu ga gi nyaa àmɛɛ wi sámaga n joo ní sícilimɛ ní lè, a wi wi pye: «Mɔ ga léeli Kolocɔlɔɔ fǎngi na í.» Syɔɔn faala ga níì soro bi Zyezu yíbe keelaa na í.

Kirisi ní Davidi

³⁵ Lǎli ni Zyezu da ni syɛ́ɛnbèle tama lè kpɔ̀ʔɔrɔli kpaʔa ni, a wi be yíbe níì jo: «Nyàʔá na làlwaw sɛ́bɛwelebéle gi nyuu níì jo Kirisi i nyɛ Davidi jáa?

³⁶ Bi gi taa Davidi tiimaa maa gi joo Pìicǎnni báriga ni níì jo: ‹Kàfɔw n gi joo mii Kàfɔw ma níì jo: Ba tɛ́ɛn mii kàliige ma fwɔɔ bi taa mii í mɔ nigoobèle cáan, mɔ si mɔ tɔ́lɔyi taʔa be na.›

³⁷ Davidi tiimaa maa Kirisi yeri Kàfɔw. Mɛ̀ɛ́ si wi a gbǎn ní pye wi jaà bi sɛ́ɛ?» Syɛ́ɛnmi maa ni Zyezu syɛ́ɛnri lúro ní fundaanra ní.

Zyezu n jo syɛ́ɛnmi í da piyɛɛ kɔ̀rɔsíi làlwaw sɛ́bɛwelebéle na

³⁸ A wi i gi nyuu be ma wi tamani ni níì jo: «Yaa yeyɛɛ kɔ̀rɔsíi làlwaw sɛ́bɛwelebéle na, ki n be dɛ́nɛ bàā burogboloyi nii da nyaari, ní wɔ́ɔ i caa syɛ́ɛnbèle í da poro syáanri syɛɛnkpoʔolomi tɛ́ɛyɛ ni.

³⁹ Pe i sɔ̀ngí poro í da tɛ̀ɛ́n kòrikpoloyi na sérikpaayi ni, ní wɔ́ɔ i caa bàā tɛ̀ɛ́n kpɔ́ɔmi tɛ́ɛyɛ ni sáā sériw lìile líi,

⁴⁰ ní i lɔgucebèle kɔ́lɔ yárira nɔ̀ʔɔrɔ́ ni líi, ní i Kolocɔlɔɔ nyɛ́ɛri ni mɔngi jàngó bi peyɛɛ dɛ̀ɛn syɛ́ɛnbèle na syɛɛnsinbéle. Bele bee kútii a ba kpɔ́ʔɔ sɔ̀lɔ.»

Lɔgucewaa yakanʔa kéele

⁴¹ Koro kàdoʔo ma a Zyezu tɛ́ɛn n yɛ́ɛgi le wálile-kásuw ni, ní i syɛ́ɛnmi wéle àmɛɛ bi wáliw nii lè wi ni. Lɔ́ri fɔ̀ɔlɔ saʔa maa ni wálinɛʔɛɔ nii yaà.

⁴² A lɔgucewaa pan n baa támapiigéle siin le yaà. Wi maa pye foomɔfɔlɔ. Ke myɛ bìnɛw i nyɛ tàngáaw tíla félege.

⁴³ A Zyezu wi pìitamabèle yeri níì be pye: «Mii a gi joo yele ma kányɛʔɛ ni, nyɔ́ɔgee lɔguca-foomɔfɔw naa le lè kásuw ni, ki n nɛʔɛ n sɔ̀lɔ bele myɛ wóʔo na be le lè wi ni.

⁴⁴ Níì cán poro myɛ n wàa wòlo be wonɛʔɛw ni n le yaà, kàjáa céw naa, wi fóomi ní ki myɛ ní, wi n wi wów myɛ le yaà, lìile lɔ́rɔ ga níì kòro wi ma í.»