Mariki 10 - Cebaara Bible 2010

Zyezu tamani ceyaʔari kéele na

¹ A Zyezu yiri nɛɛ bee n kári Zyude tári ma, Zyuridɛnw jelige na. A syɛ́ɛnmi níì piyɛɛ gbóʔoro wi na, a wi níì séli ni bi tama àmɛɛ wi da tàli ni gi kpéʔele lè.

² A Farisibèle nùuni wi na bi wi nyɔ́ɔgi pye wéle, níì wi yíbe níì jo: «A gi yɛlɛ lé nàɔn í wi cɔɔ̀ yaʔa?»

³ A wi be yari: «Nyàʔá Mowizi da joo yele ma kéeli bee na?»

⁴ A be jo: «Mowizi maa fɔ̀lɔ syɔɔn í ceyaʔa-sɛ́bɛw kúun si céw yaʔa.»

⁵ A Zyezu be pye: «Yele fungbanyi kéele na Mowizi da tundunri bee sɛ́bɛ n kaan yele ma.

⁶ Kàjáa dulunyanw sélimɛ na ‹Kolocɔlɔɔ n be faan nàɔn ní cɔlɔɔ.

⁷ Koro na nàɔn a wi tóow ní wi nɔ́ɔw yaʔa si tan wi céw na,

⁸ pe siinw a pye cere nibin.› Kánmi bee na pe ní o nyɛ siin í, fwɔɔ cere nibin.

⁹ Gee si Kolocɔlɔɔ kpéʔele a gi bɛ̀ɛ lè, ki ga yɛlɛ syɔɔn í gi láʔa kiyɛɛ na í.»

¹⁰ A pe ga jée kpáagi ni, a wi pìitamabèle níì wi yíbe kéeli bee na.

¹¹ A wi be pye: «Nàɔn ga wi cɔɔ̀ yaʔa níì wàa nikwɔɔ pɔri, wi n kanɔnʔɔrɔ kpéʔele, níì kapeele pye wi ceseliw na.

¹² Cɔlɔɔ ga wɔ́ɔ̀ wi nàɔn cée níì kòro wàa nikwɔɔ ma, wi n kanɔnʔɔrɔ kpéʔele.»

Zyezu n dùba kpéʔele pìibēle ma

¹³ Syɛ́ɛnbèle pèle maa ni maa ní pìibēle ní Zyezu ma jàngó wi ba tánga be na, a wi pìitamabèle yìri ni fúlo be na.

¹⁴ A Zyezu ga koro nyaa, a gi wi bɛɛn, a wi be pye: «Ye pìíbèle yaʔa paa maa mii ma, ki ga yɛlɛ ye be lúrugo í. Níì cán bele be nyɛ àmɛɛ pìíbèle naa nyɛ lè, Kolocɔlɔɔ fǎngi i nyɛ bele bee wóʔo.

¹⁵ Mii a gi joo yele ma kányɛʔɛ ni, syɔ́ɔnwee ga pye wi ga fɔ̀lɔ Kolocɔlɔɔ fǎngi na àmɛɛ pyà nyɛ lè í, wi a jée gi ni í.»

¹⁶ A wi i be có ni taari wiyɛɛ na ní i kɔ́yi taari be na, ní i dùbaw kpéʔele be ma.

Lɔ́ri fɔ́lɔ kéele

¹⁷ A wi ga yiri ni syée kólogi na, a nànwaa fàn n sáà tìgi n too yégunri na wi yɛʔɛ̀ ma níì wi yíbe níì jo: «Tamafɔjǎnw, nyàʔá gi yɛlɛ mii í kpéʔele koro ga pye mii í sìibangwɔɔw taa?»

¹⁸ A Zyezu wi pye: «Nyàʔá na mɔ mii yeri wojaɔn? Wàa o beè wojaɔn ní í, kapye Kolocɔlɔɔ nibin ban í.

¹⁹ Mɔ n kajoodɛɛngèle cán, ke n jo: ‹Mɔ a kɔ́ syɔɔn kpóo í. Mɔ a kɔ́ kanɔnʔɔrɔ kpéʔele í. Mɔ a kɔ́ yùu í. Mɔ a kɔ́ jànvaa séera kpéʔele í. Mɔ a kɔ́ syɔɔn nɔ̀ʔɔrɔ í. Máā mɔ tóow ní mɔ nɔ́ɔw kpɔ̀ʔɔrɔ́.› »

²⁰ A nǎnw wi yari: «Tamafɔw, nlaa yaà mii cárimi làla ni, mii n tundunri bee myɛ cò.»

²¹ A Zyezu i wi wéle a wi kéeli wi dɛ́nɛ a wi wí pye: «Keele nibin n fɔ̀n mɔ ma, loro li nyɛ mɔ í da syée sa mɔ kɔ́lɔ yáriri myɛ pára bi kaan foomɔfɔbèle ma, lɔrɔ a pye mɔ ma nyɛ̀ʔɛni na. Koro kàdoʔo ma, máā maa mi ba taʔa mii na.»

²² Amɛɛ wi syɛ́ɛnri bee lóʔo lè, a wi yɛ́ɛgi tanʔa, níì lúru n kári funbɛɛnrɛ na, níì cán wi kɔlɔ̀ yáriri maa nɛʔɛ.

²³ A Zyezu wéle n wiyɛɛ màʔa, níì wi pìitamabèle pye: «Bele má lɔ́ri nyɛ lè, pe jéeganmi a tɔ̀nɔ́ gbàn Kolocɔlɔɔ fǎngi ni!»

²⁴ A pìitamabèle i káama wi syɛ́ɛnri na. A wi níì be pye: «Ni pìibēle, bele má lɔ́ri nyɛ lè, pe jéeganmi n tɔ̀nɔ n gbàn Kolocɔlɔɔ fǎngi ni.

²⁵ Fàlibaʔa jéevorolo n wɛ́ʔɛri sàriweele ni n sɔ̀lɔ lɔrɔfɔlɔ jéeganmi na Kolocɔlɔɔ fǎngi ni.»

²⁶ A pìitamabèle náa i káama gi na n sɔ̀lɔ ní i gi nyuu peyɛɛ ma níì jo: «Ba wìí si wi a gbǎn syɔɔ?»

²⁷ A Zyezu i be wéle ní kɔ́ɔ̀ be pye: «Gee bee a gbǎn kpéʔele syɔɔn báriga ni í, fwɔɔ Kolocɔlɔɔ bárigaw ni, níì cán Kolocɔlɔɔ fánʔa i nyɛ kérigèle myɛ na.»

²⁸ A Pyɛri fala n wi pye: «Wéle, wolo n wolo yáriri myɛ yaʔa níì taʔa mɔ na.»

²⁹ A Zyezu be yari: «Mii a gi joo yele ma kányɛʔɛ ni, syɔ́ɔnwee wi ga wi kpáagi yaʔa lè, ní wɔ́ɔ̀ wi senyɛnnǎnbèle, ní wi senyɛnjebèle, ní wi nɔ́ɔw, ní wi tóow, ní wi pìíbèle, ní wi séyi yaʔa mii kéeli ní Syɛɛnjóocǎnri kéele na lè,

³⁰ wee bee a di dabata-da tɔ̀nɔ taa dulunyanw naa ni, gee bee n jo kpáayi, ní senyɛnnǎnbèle, ní senyɛnjebèle, ní nafɔbèle, ní pìíbèle, ní séyi ní. Ki si a wɔ́ɔ pye ní wɔʔɔlɔ ní, wi náa ba sìibangwɔɔw taa nyɛ̀ʔɛna.

³¹ Kàjáa yɛʔɛ̀ ma syɛ́ɛnbèle pèle saʔa a ba pye kàdoʔo ma, kàdoʔo ma wóbèle pèle saʔa si ba pye yɛʔɛ̀ ma.»

Zyezu n wi kùúw ní wi nyán-yirili kéele joo tɔdaanri wógi na

³² Lǎli ni be pye kólogi na ni syée Zyerusalɛmi ma lè, a Zyezu kíni be yɛ́ɛgi na. A gi pye pìitamabèle na fyáara. Bele be pye ní be ní wi kurugo lè, a poro i fɛ̀ɛgí. A wi wi pìitamabèle kɛɛ ní siin yeri n kàri kɔlɔ̀ na, ní níì gi joo be ma gee ki a sa kpéʔele woro na lè.

³³ Wi maa be pye: «Wéle, wolo i syée bele Zyerusalɛmi ma, pe si a Syɔɔn-pya le sáriga-wòlobèle kàfɔɔlɔ ní làlwaw sɛ́bɛwelebéle kɔ́yɔ ni be kútiiw kúun wi na, si jo wi n yɛlɛ ní kùu ní, si wi kaan Syɛɛnfeleyi ma,

³⁴ yi sa ra yiyɛɛ nyɛ́nɛ wi na, sáā tɛ́ɛri wáa wi na, si wi kpúmɔn ní sapile ní, si náa wi kpóo. Canya taanri si ga kwɔ́ɔ wi a nyán.»

Zyaki ní Zyan nyɛ́ɛrigi

³⁵ Zebede jáabèle siin, be lè Zyaki ní Zyan, a poro nùuni Zyezu na n sáà wi pye: «Tamafɔw, wolo ga yárigee faala nyɛ́ɛri mɔ ma lè, wolo i caa mɔ í gi kpéʔele wolo ma.»

³⁶ A wi be pye: «Nyàʔá yele caa mii í kpéʔele yele ma?»

³⁷ A be wi pye: «Mɔ ga pye mɔ nijangbɔɔri ni lǎlee ni lè, mi gi yaʔa wolo wàa í tɛ́ɛn mɔ kaliige ma, wee si tɛ́ɛn mɔ kamɔnɔ ma.»

³⁸ A Zyezu be pye: «Gee yele nyɛ́ɛri lè yele ga gi cán í. A yele fánʔa i nyɛ lé bi gbǎn gbaa yagbaali ni, lee ni mii a gbaa lè, koro ga jáa bi batɛmiw kpéʔele, wee félege mii a kpéʔele lè?»

³⁹ A be wi pye: «Wolo fánʔa i nyɛ.» A Zyezu be yari: «Kányɛʔɛ gii, yele a gbaa yagbaali ni, lee ni mii a gbaa lè, si wɔ́ɔ batɛmiw kpéʔele, wee félege mii a kpéʔele lè.

⁴⁰ Kàjáa bi tɛ́ɛn mii kàliige ma, wàlá mii kàmɔnɔ ma, gee bee o nyɛ mii kéele mii í gi kaan yele ma í, ki i nyɛ pèle wóʔo bele kéele na gi sámaga lè.»

⁴¹ A bele kɛɛ ga gee bee lóʔo, a be fúnyi tanʔa Zyaki ní Zyan kurugo.

⁴² A Zyezu be yeri níì be pye: «Yele n gi cán bele be nyɛ lè syɛɛnfeleyi kùndigibéle, poro i be fǎngi gbàngí syɛɛnfeleyi na, syɛɛnkpolobèle si i yi kàragí ní be fǎngi ní.

⁴³ Kàjáa ki ga yɛlɛ gi pye ànbée yele níngi ni í. Wee wi ga ni caa lè bi pye yele ni syɛɛnkpɔɔɔ, wee bee n yɛlɛ wi pye yele nìgwɔɔ.

⁴⁴ Wee wi caa lè bi pye yele ni yɛʔɛ̀ ma, wee bee n yɛlɛ wi wiyɛɛ bye yele myɛ púlo.

⁴⁵ Níì cán Syɔɔn-pya ga pan syɔɔn í ba ra báara wi ma í. Kàjáa wi n pan bi ba ra báara syɛ́ɛnbèle ma, si wi sìíw kaan syɛ̀ɛnnɛ saʔa nyunzyɔɔrɔ kéele na.»

Zyezu n fúunnanw Baritimɛ paʔa

⁴⁶ A be sáà nan Zyeriko na. A Zyezu ga ni yirigi Zyeriko ni ní wi pìitamabèle ní n fàra syɛɛnnɛʔɛmɛ na, fúunnaɔn maa pye wodɛ́ɛɔn ní kólogi nyɔ́ɔ na ni syɛ́ɛnbèle nyɛ́ɛri, pe i wi yiri Baritimɛ, wi lè Timɛ jáaw.

⁴⁷ A wi ga lóʔo Zyezu wi sɔ̀lɔ́, Nazarɛti ye wów, a wi i yákpoli wáa wi kurugo níì jo: «Zyezu, mɔ wi lè Davidi Jáaw nyinimɛ taa mii na!»

⁴⁸ A syɛ̀ɛnnɛ saʔa fúlo wi na níì jo wi pyèri, a wi sèʔé i yákpoli wáa n sɔ̀lɔ wozeligi na níì jo: «Davidi Jáaw, nyinimɛ taa mii na!»

⁴⁹ A Zyezu yére níì jo: «Ye wi yeri yaà.» A be fúunnanw yeri níì wi pye: «Fúngi nyíngi mí yìri, wi i mɔ yiri.»

⁵⁰ A fúunnanw wi búrogi kàriga n cáan níì ye n yìri n kári Zyezu ma.

⁵¹ A Zyezu sáà wi pye: «Nyàʔá mɔ caa mii í kpéʔele mɔ ma?» A fúunnanw wi pye: «Tamafɔw, mii i caa mii í tɛ́nɛ da nyaagi.»

⁵² A Zyezu wi pye: «Da syée, mɔ tágali n mɔ pɔʔɔ.» A wi fala ni nyaagi, níì taʔa Zyezu na ni syée wi kurugo kólogi na.