Mariki 1 - Cebaara Bible 2010

Zyan Batisiti syɛɛnjóori

¹ Kolocɔlɔɔ Jáaw wi nyɛ lè Zyezu Kirisi Syɛɛnjóocǎnri di joo lè wi kéeli na, di sélimi bi nyɛ bee naa.

² Kanyaajoow Ezayi maa gi sɛ́bɛ níì jo: «Kolocɔlɔɔ n jo: ‹Wéle, mii n mii tundunw tórigo mɔ yɛ́ʔɛ ma, wee wi a sa mɔ kólogi sámaga lè.

³ Woro wi yákpoli wáa fìími tára ni níì jo: Yaa Kàfɔw kólogo sámagi yáā wi kozɔ̀lɔyi síngi.› »

⁴ Tundunw bee wi nyɛ Zyan, wee wi da pan lè n ba ni syɛ́ɛnbèle batize fìími tára ni, ní i gi nyuu syɛ́ɛnbèle ma àmɛɛ gi yɛlɛ lè be kàdoʔo wáa be kapeegèle ma si batize, koro ga pye Kolocɔlɔɔ í be kùsulugi syɔɔ.

⁵ A Zyude tári wòolo ní Zyerusalɛmi kěgi wòolo myɛ i yirigi ni syée wi ma. A wi sa ni be batize Zyuridɛnw cábiga ni. Pe si maa ni yèré be kapeegèle ni.

⁶ Zyan búrogi maa pye a be gi tìin ní fàlibaʔa síire ní, á wi saliga sɛntiiri tɛ́ʔɛ n wiyɛɛ bwɔɔ sárigèle ni. Wi yaliiri ti da pye kúdow ní tiiweeyi sárigā.

⁷ A wi i gi nyuu níì jo: «Wàa i maa mii kàdoʔo ma, wi séew n kpɔ́ʔɔ n sɔ̀lɔ mii wów na. Alí mii ga caa wɔ́ɔ̀ nyɔɔ n yɛlɛ mii í lɛ̀ɛlɛ bi wi taʔalayi mɛ́ɛngéle sánʔana í.

⁸ Mii n yele batize lǒgi ni, woro si a ba yele batize Pìicǎnni ni.»

Zyezu batɛmiw ní wi kárimani kéele

⁹ Lǎli bee ni a Zyezu yìri Nazarɛti ma Galile tári ni n kári Zyan ma, a wi sáà wi batize Zyuridɛnw ni.

¹⁰ Lǎli ni Zyezu yirigi lǒgi ni lè terire, a wi nyɛ̀ʔɛni nyaa li i múru níì Kolocɔlɔɔ Pǐli nyaa li i tíri ni maa wi ma àmɛɛ kàtolo nyɛ lè.

¹¹ A wi yákpolo lóʔo nyɛ̀ʔɛni na, a li jo: «Mɔ wi nyɛ mii Pìinidaanmaw, mɔ kéeli n mii dɛ́nɛ gbanʔama.»

¹² Lǎli bee ni a Kolocɔlɔɔ Pǐli fala n wi kɔ́ri n tórigo fìími tára ni.

¹³ A wi sáà canya togoye siin kwɔ́ɔ fìími tára ni, a Sutanaw sa ni wi kárima ni wéle. Wi maa pye sìnbirigi yaweere nínge ni, nyɛ̀ʔɛni tundunbéle si maa ni wi dɛ̀ɛmɛ́.

Zyezu n cɔ̀ɔwáabéle sicɛrɛ yeri

¹⁴ Lǎli ni pe Zyan le kàsow ni lè, a Zyezu kári Galile tári ma n sa ni Kolocɔlɔɔ Syɛɛnjóocǎnri nyuu yaà

¹⁵ níì jo: «Lǎli n foro, a Kolocɔlɔɔ fǎngi nùuni. Ye kàdoʔo wáa yele kapeegèle ma, yé tága Syɛɛnjóocǎnri na.»

¹⁶ A wi ga ni sɔ̀lɔ́ Galile lòkpɔɔgi nyɔ́ɔ na, a wi Siimɔn ní wi cɔnɔw Andire nyaa pe i cɔ̀ɔ wáa lòkpɔɔgi ni, ncan pe maa pye cɔ̀ɔwáabéle.

¹⁷ A Zyezu be pye: «Ye taʔa mii na. Amɛɛ yele cɔ̀ɔ́w wáa ni fábèle taagi lè, ànbée mii a wɔ́ɔ yele kpéʔele yele í da syɛ́ɛnbèle taagi.»

¹⁸ A be fala n be cɔ̀ɔ́bèle yaʔa níì taʔa wi na.

¹⁹ A wi ga sɛ̀ʔɛrɛ yɛʔɛ̀ ma cɛɛri, a wi Zebede jáaw nyaa wi lè Zyaki, woro ní wi cɔnɔw Zyan. Pe maa pye kɔ́rɔw ni ni be cɔ̀ɔ́bèle sámagi.

²⁰ A wi fala n poro yeri. A be be tóow Zebede ní falipyebèle yaʔa kɔ́rɔw ni, níì taʔa wi na.

Nǎnwee màdeo da ni kàragí lè

²¹ A be kári Kapɛrinayumi ma. A cândɛnɛgi* canʔa ga nan, a Zyezu sáà jée Zyefubèle sérikpaʔa ni ni syɛ́ɛnbèle tama.

²² A be i káama wi tamani na níì cán wi maa ni be tama ní séew ní. Wi tamani da pye àmɛɛ làlwaw sɛ́bɛwelebéle wólo nyɛ lè í.

²³ Nànwaa si maa pye yaà be sérikpaagi ni, màdeo maa pye wi ni, a wi yákpoli wáa

²⁴ níì jo: «Nyàʔá gi nyɛ wolo ní mɔ níngi ni, mɔ Zyezu, Nazarɛti ye wów? A mɔ pan lé ba wolo kálagi wii láà? Mii n mɔ cán, mɔ wi nyɛ Kolocɔlɔɔ syɛɛncanw.»

²⁵ A Zyezu fúlo màdew na níì wi pye: «Nyɔ́ɔgi tɔ́n, mí yiri nǎnw bee ni.»

²⁶ A màdew nǎnw bee cáan wi i kirigi, níì yákpogbɔɔlɔ wáa níì yiri wi ni.

²⁷ A pe myɛ i káama gi na ní i gi nyuu peyɛɛ ma níì jo: «Nyàʔá gi nyɛ gee naa? Nyàʔá tamavɔnnɔ li lee naa? Ncan fànʔa i nyɛ li ni. Alí wi n màdebèle jáa, a be i lúro wi ma.»

²⁸ A wi mɛ́ɛgi fala n yiri Galile tári tɛ́ɛyɛ myɛ ni.

Zyezu n yaabèlē saʔa pɔʔɔ

²⁹ A pe ga yiri sérikpaagi ni terire, a be sáà jée Siimɔn ní Andire ye kpáagi ni, Zyaki ní Zyan si maa pye ní be ní.

³⁰ Siimɔn céw nɔ́ɔ maa pye wozinɛɔ ní, níì cán cefuuro maa pye wi na. A be fala n wi kéeli joo Zyezu ma.

³¹ A wi nùuni wi na n sáà wi cò kɔ́gi na n yìrige, a cefuuri láʔa wi na. A wi yìri ni kpéʔele be ma.

³² A ki ga pye cângwɔɔgi nyɔ́ɔ na, lǎli ni cángi jée lè, a be i yáabèle myɛ lée ni maa wi ma, n náà fàra màdebèle fɔ̀ɔlɔ na.

³³ A kěgi syɛ̀ɛnnɛ myɛ peyɛɛ gbóʔoro n baa kpoʔolo kpaaweeli nyɔ́ɔ na.

³⁴ A wi yáami féleye syɛɛnnɛ saʔa pɔʔɔ, ní wɔ́ɔ̀ màdebèle nɛnɛ n yirige syɛ̀ɛnnɛ saʔa ni. Wi si da fɔ̀lɔ màdebèle í ní da nyuu í, ncan pe maa wi cán.

Zyezu n Galile tári nyaari n foro

³⁵ A wi sɔ̀li n yìri nyǐnjerigi na n kári fìími tára tɛ́ɛgaa ni n sa ni nyɛ́ɛri yaà.

³⁶ A Siimɔn ní wi pínɛnyɛnbèle kári n sa ni Zyezu caa.

³⁷ Lǎli ni be wi caa n nyaa lè a be wi pye: «Syɛ́ɛnbèle myɛ i yaà ni mɔ caa.»

³⁸ A wi be yari: «Ye bo waa syée wolo taana kěyi ma, koro ga pye mii í wɔ́ɔ sa joo nɛɛ bee, níì cán gee bee gi nyɛ mii kapanni nyúngo.»

³⁹ A wi kári Galile tári tɛ́ɛyɛ myɛ ni n sa ni Kolocɔlɔɔ syɛ́ɛnri nyuu Zyefubèle sérikpaaya ni, ní wɔ́ɔ i màdebèle nɛnɛ ni yirigi syɛ́ɛnbèle ni.

Zyezu n yaanyɛɛnmɛfɔlɔ pɔʔɔ

⁴⁰ A yaanyɛɛnmɛfɔlɔ pan wi ma n baa kpùmɔnɔ wi taana, níì wi nyɛ́ɛri níì jo: «Mɔ ga fɔ̀lɔ mɔ a gbǎn mii kàriga wojaɔn ní.»

⁴¹ A Zyezu nyinimɛ taa wi na níì wi kɔ́gi sánʔa n tánga wi na níì jo: «Mii n fɔ̀lɔ, pɔʔɔ mi nyɔɔ.»

⁴² A yaanyɛɛnmi fala n láʔa wi na terire, a wi kàri wojaɔn ní.

⁴³ Lǎli bee wonijanna ni a Zyezu gi joo n gbàn wi ma níì wi yaʔa waa syée,

⁴⁴ níì wi pye: «Mɔ a kɔ́ gi joo syɔɔn ma í. Kàjáa da syée mi sa miyɛɛ dɛ̀ɛn sáriga-wòlow na, mí sárigaw wòlo mɔ jéemununi kéele na, wee kéele Mowizi da joo lè, jàngó gee bee í pye be ma séera.»

⁴⁵ Kàjáa a nǎnw bee sèʔé sa ni gi nyuu ni yákpoli wáa, a koro gi kaan Zyezu ga gbàn n níì jée kègaa ni syɔɔn nyɛ́nɛ na í, fwɔɔ a wi i kòró fìími tára tɛ́ɛyɛ ni, beè gi nyɛ lè syɔɔn o yaà í. A syɛ́ɛnbèle i yìrigí kàbanyi myɛ na ni syée wi ma.