Malasyii 2 - Cebaara Bible 2010

Sáriga-wòlobèle sàmina kéele

¹ «Tɔ́ɔliw ni, sáriga-wòlobèle, yele má tundunri naa nyuu ni gbàngí!

² Yele ga pye yele ga lóʔo í, yele ga pye yele o gi tímana yele fúnyi ni bàā kpɔʔɔrɔ taari mii mɛ́ɛgi na í, mii a dángaw taʔa yele na, mii a yele dùbaw dánga. Kányɛʔɛ na mii n yele dùbaw dánga, níì cán yele ga wi kéeli cò yele fúnyi ni í.» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya.

³ «Mii wi wee! Mii n gi joo n gbàn bi yele yòdaʔayi kálagi yirige yaà, si fire wáa yele ma yɛɛcɔɔgèle ni, ti lè yele fɛ́tiibèle yaweegéle fíre, pé yele cò bi kári ní dee bee ní.

⁴ Yele a gi cán lǎli bee ni bi cán mii n tundunri naa joo n gbàn yele ma, koro ga pye joogaanni mii kpéʔele ní Levii ní lè, li kòro beè.» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya.

⁵ «Mii joogaanni maa kòro ní wi ní, koro n pye sìíw ní yɛɛ̀nyingi. Mii n di kaan wi ma jàngó waa fɛ̀ɛgí mii na, a wi i fɛ̀ɛgí mii na ní i cɛ̀lɛ́ mii mɛ́ɛgi yɛ́ʔɛ ma.

⁶ Kányɛʔɛ làlwa maa pye wi nyɔ́ɔgi ni, námara ga nyaa wi nyɔɔwari na í. Wi n tánʔa ní mii ní yɛɛ̀nyingi, ní sínni na, wi n syɛɛnnɛʔɛmɛ láʔa kapeebyeri na.

⁷ Níì cán sáriga-wòlow nyɔ́ɔwara i cánni kɔngi, woro nyɔ́ɔgi na be wɔ́ɔ̄ làlwaw kéele yíbe, níì cán Yawe wi lè Nyɛ̀ʔɛni Sùlasiibéle Kafɔlɔ, woro tunduɔn wii.

⁸ Kàjáa yele na, yele n yiri kólogi ni, yele n làlwaw kéele tɛ́ʔɛ n syɛɛnnɛʔɛmɛ kaan a bi kpírige. Yele n Levii joogaanni kálagi,» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya.

⁹ «Mii si na, mii a yele kaan faʔari, ní màámi ma Isirayɛli syɛ́ɛnbèle myɛ yɛ́ʔɛ ma, àmɛɛ gi nyɛ lè yele ga mii kólogi kèlē cò í, yele i syɔɔnwaa yirigi wàa ni làlwaw forolo ni.»

Joogaanni kálagiganma féleye siin

¹⁰ Wo myɛ o nyɛ tofɔlɔ nibin wòolo ì? Kolocɔlɔɔ nibin ban wi wo faan ì? Nyàʔá si na wo woyɛɛ jànváa, ní i joogaanni kálagi, lee Kolocɔlɔɔ da kpéʔele ní wolo tóolɛɛbèle ní lè?

¹¹ Zyuda n jànvaa kpéʔele, yanɔnʔɔgɔ n kpéʔele Isirayɛli, ní Zyerusalɛmi ni. Níì cán yárigee gi yaʔa kɔlɔ̀ na Yawe ma lè, Zyuda n gi nɔ́nʔɔ, koro gee kéele li Yawe dɛ́nɛ lè, ncan wi n kolocɔlɔ-nibɔɔn cálipile pɔri.

¹² Nǎnwee wi gee bee kpéʔele lè, wee wi kpaà wéle lè, ní i yerile syoo, Yawe a wi kwɔ́ɔ yirige yaà Zyakɔbi fànikpaayi ni, Yawe wi lè Nyɛ̀ʔɛni Sùlasiibéle Kafɔlɔ, àlí nǎnwee wi maa ní yakanʔa ní wi ma lè, wi a woro kwɔ́ɔ yirige yaà.

¹³ Yasiin wógi yele ní i kpéʔele lè, koro gi nyɛ gee naa: Yele i Yawe sáriga-wòlo-yafaangi tɔ́ngi ní nyatinmi, ní nyɛnimi, ní cɛ́ɛnmi ní, a gi pye wi ní o kàragí ni yele yakaanyi wéle í, wi o fɔ̀lɔ́ ni yafyɛn syoo yele kɔ́yi ni í.

¹⁴ A yele si i gi nyuu níì jo: «Nyàʔá na?» Gee bee n taa, ncan Yawe maa pye séera mɔ ní mɔ cárima céw nínge ni, woro wee mɔ baa jànváa lè, àlí n gi yaʔa wi n pye mɔ pínɛnyɛnnɛ, ní mɔ joogaanni cɔ́ɔ.

¹⁵ Yawe ga ye kpéʔele syɔɔn nibin, mɔ ní wi ní ì, céri ní pǐli kàbaan na ì? Nyàʔá kurugo si nibinmi bee nyɛ? Ki o nyɛ bi pìibēle taa, bele Kolocɔlɔɔ a kaan lè ì? Koro na, yaa yele fúnyi kɔ̀rɔsíi, yele wàa faala a kɔ́ wi cárima céw jànváa í.

¹⁶ «Níì cán ceyaʔari kéele n mii bɛɛn,» Yawe Isirayɛli ye Kolocɔlɔw wi jo nya! «Ní wee wi wi búrogi tɔ́ngi lè ní peemɛ ní.» Yawe wi lè Nyɛ̀ʔɛni Sùlasiibéle Kafɔlɔ, woro wi jo nya! «Koro na yaa yele fúnyi kɔ̀rɔsíi, yele a kɔ́ jànvaa kpéʔele í.»

Yawe a wi tundunw tun naa

¹⁷ Yele i Yawe fɔ̀rɔgí ní yele syɛ́ɛnri ní, á yele si i gi nyuu níì jo: «Nyàʔá ní wolo wi fɔ̀rɔgí?» Koro gi nyɛ yele i gi nyuu níì jo: «Wee faala wi kapeeyi kpéʔele lè, wee bee n nyɔɔ Yawe nyɛ́nɛ na, syɛ́ɛnbèle bee félege kéele li wi dɛ́nɛ!» Wàlá ni gi nyuu níì jo: «Sán sínni Kolocɔlɔɔ nyɛ?»