Luki 7 - Cebaara Bible 2010

Zyezu n wɔrɔmi ye sùlasiibèle kàfɔwaa falipyeo pɔʔɔ

¹ Lǎli ni Zyezu wi syɛ́ɛnri myɛ joo n kwɔ́ɔ syɛ́ɛnbèle ma lè, a wi jée Kapɛrinayumi ni.

² Sùlasiibéle dabata kàrigafɔwaa falipyeo si maa ni yáa, fwɔɔ ni caa bi kùu, wee bee kéele si maa tɔ̀nɔ n wi dɛ́nɛ gbanʔama.

³ Amɛɛ wi Zyezu kéeli lóʔo lè, a wi Zyefubèle wólɛɛbèle pèle tun wi ma níì jo pe sa wi nyɛ́ɛri wi ba woro falipyew pɔʔɔ.

⁴ A pe ga sáà nan Zyezu na, a be wi nyɛ́ɛri gbanʔama níì jo: «Mɔ ga fɔ̀lɔ n gi pye, ki i nyɛ kpéʔelemɛ wi ma.

⁵ Níì cán wolo Zyefubèle kéele n tɔ̀nɔ n wi dɛ́nɛ, woro wi wolo sérikpaagi faan.»

⁶ A Zyezu pínɛ ni syée ní be ní, a wi ga sáà nùuni sùlasiibèle dabata kàrigafɔlɔ kpaʔa na, a woro níì wi tàannyɛnbèle pèle tun níì jo: «Ye sa Kàfɔw pye, wi a kɔ́ wiyɛɛ vɔ̀rɔ í. Níì cán mii ga nyɔɔ n yɛlɛ woro í jée mii kpáagi ni í.

⁷ Gee bee na mii ga niyɛɛ jóro yafyɛn bi nùuni woro na í. Kàjáa wi syɛɛnkanga nibin joo, mii falipyew a pɔʔɔ.

⁸ Níì cán pèle i mii tiimaa kàragí, mii si wɔ́ɔ i sùlasiibèle pèle kàragí. Mii ga wee pye: ‹Da syée!› Wi n ni syée. Níì wàa nikwɔɔ pye: ‹Da maa!›Wi n ni maa. Mii ga wɔ́ɔ̀ mii falipyew pye: ‹Gee kpéʔele!› Wi n ni gi kpéʔele.»

⁹ A Zyezu ga syɛ́ɛnri bee lóʔo, a wi i káama wi na, syɛ́ɛnmi pi da taʔa wi na lè, a wi fíige ni bi wéle, níì bi pye: «Mii a gi joo yele ma, mii ga kɔ́ɔ̀ tágali naa félege nyaa Isirayɛli ye wówaa ma í.»

¹⁰ Lǎli ni tundunbèle lúru n nan yaà lè kpáagi na, a be sáà falipyew nyaa a wi téè pɔʔɔ n kwɔ́ɔ.

Zyezu n lɔgucewaa pyà nyán n yìrige

¹¹ Koro kàdoʔo ma a Zyezu kári kègaa ma pe i gi yiri Nayɛn. Wi pìitamabèle ní syɛɛnnɛʔɛmɛ maa pínɛ ni syée ní wi ní.

¹² A wi ga sa ni nùuní kěgi kpàánweele na, a wi syɛ́ɛnbèle nyaa pe i yirigi gi ni ní kpóō ní, kúw si maa pye nìgɔcariɔ, ní i nyɛ nafɔw ma pìinibinge, nafɔw si i nyɛ lɔgucaa. Kěgi syɛ̀ɛnnɛ saʔa maa pye ní wi ní a be i syée.

¹³ Lǎli ni Kàfɔw kúw nɔ́ɔ nyaa lè, a wi nyínimi wi taa. A wi wi pye: «Mɔ a ní kɔ́ ra nyaan í!»

¹⁴ A wi nùuni be na n sáà tánga kúlaa-yárigi na. A kúlaabèle yére. A wi jo: «Nìgɔcariɔ, mii n jo mɔ í yìri!»

¹⁵ A kúw fala n yìri n tɛ́ɛn níì séli ni nyuu. A Zyezu wi kaan wi nafɔw ma.

¹⁶ A pe myɛ fala ni fɛ̀ɛgí ní i Kolocɔlɔɔ kpɔ̀ʔɔrɔ́ níì jo: «Kanyaajookpɔɔwaa n yìri wolo nínge ni.» Ní níì jo: «Kolocɔlɔɔ n pan wi syɛ́ɛnbèle ma ba be dɛ̀ɛmɛ.»

¹⁷ A Zyezu kéeli fala n cariga n Zyude tári myɛ foro ní di taana tɛ́ɛyi myɛ ní.

Zyan Batisiti tundunbèle kéele

¹⁸ Zyan pìitamabèle maa baa kérigèle bee myɛ joo wi ma. A wi wi pìitamabèle pèle siin yeri

¹⁹ n tun Kàfɔw ma níì jo pe sa wi pye: «Wee be jo lè wi i maa, woro lé wi nyɛ mɔ láà, ba fwɔɔ wolo í da wàa nikwɔɔ sige?»

²⁰ A nǎnbèle bee ga sáà nan Zyezu na, a be wi pye: «Zyan Batisiti n wolo tun mɔ ma níì jo wolo í ba mɔ pye: ‹Wee be joo lè wi i maa, mɔ lé wi láà, ba fwɔɔ wolo í da wàa nikwɔɔ sige?› »

²¹ Lǎli bee wonijanna ni a Zyezu syɛ̀ɛnnɛ saʔa yáama ní pe wɔʔɔyi láʔa be na, níì màdebèle nɛnɛ n yirige syɛ̀ɛnnɛ saʔa ni, níì fúunbéle saʔa paʔala,

²² níì Zyan tundunbèle yari: «Gee yele nyaa lè ní gee yele lóʔo lè, yaa syée ye sa gee bee joo Zyan ma yé wi pye: ‹Fúunbèle i nyaagi, syɛɛnmɔngɔbèle si i táanri, yaanyɛɛnmi fɔ̀ɔlɔ si wɔ́ɔ i poori. Dùnɔbèle si i lúro, kúbèle si wɔ́ɔ i nyángi, foomɔfɔbèle si i Syɛɛnjóocǎnri lúro.

²³ Mii kéeli ga pye li o nyɛ wee ma lè tɛɛtoolo sábabu í, wee bee i nyɛ dùba pyà.› »

²⁴ Lǎli ni Zyan tundunbèle kári n kwɔ́ɔ lè, a Zyezu séli ni nyuu ní syɛ́ɛnmi ní Zyan kéeli na níì jo: «Nyàʔá yele da kári sa wéle fìími tára ni? Nyàákanga lé yele da kári sa wéle, gee káfalagi fíigi lè?

²⁵ Ba nyàʔá yele da kári sa wéle? Nànwaa lé yele da kári sa wéle, wee wi fànicàɔn le lè? Wéle, bele be lɔgbanra faniw nii lè ní i fànʔafɔbèle lìile líi lè, bele bee i nyɛ fànʔafɔbèle kpaaya ni.

²⁶ Ba nyàʔá si yele da kári sa wéle? Kanyaajoowaa lé wii? Ɛɛn, mii si a gi joo yele ma si yele pye, wi n kpɔ́ʔɔ n sɔ̀lɔ kanyaajooo na.

²⁷ Níì cán Zyan kéeli na ki da sɛ́bɛ níì jo: ‹Wéle, mii a mii tundunw tórigo mɔ yɛ́ʔɛ ma. Wi a sa mɔ kólogi sámaga mɔ yɛ́ʔɛ ma.›

²⁸ Mii a gi joo yele ma si yele pye, bele cébèle see lè, pe wàa faala ga kpɔ́ʔɔ n sɔ̀lɔ Zyan na í. Kàjáa wee wi cɛ́rɛ lè pe myɛ na Kolocɔlɔɔ fǎngi ni, wee bee n sèʔê kpɔ́ʔɔ n sɔ̀lɔ Zyan na.»

²⁹ Syɛ́ɛnbèle bele myɛ pe da ni wi syɛ́ɛnri lúro lè n náà fàra wálisyɔɔbèle na, pe maa gi cán tànʔa i nyɛ Kolocɔlɔɔ ma, a be batɛmiw kpéʔele Zyan ma.

³⁰ Kàjáa Farisibèle ní làlwaw sɛ́bɛwelebéle maa Kolocɔlɔɔ kakɔrirɔgèle cée, gele wi da kɔ̀rirɔ lè be tiimaa kéeli na, níì cán pe da batɛmiw kpéʔele Zyan ma í.

³¹ A Zyezu níì jo: «Nyàʔá ní si mii a tɔ́ɔliw naa syɛ̀ɛnnɛ tímana? Ba nyàʔá be wíri?

³² Pe i nyɛ àmɛɛ pìibēle nyɛ lè, bele be tɛ́ɛn lè cédaala na ní i yákpogèle wáa peyɛɛ ma níì jo: ‹Wolo maa ni máagèle wíi yele ma, yele si da ni yóo í. A wolo wɔ́ɔ i nyamɛɛgèle wáa, yele si da ni nyaan í.›

³³ Níì cán Zyan Batisiti pan lè, wi o yaliire líi í, wi si wɔ́ɔ o dùvɛɛn gbo í, a yele jo: ‹Màdeo i nyɛ wi ni.›

³⁴ Syɔɔn-pya si pan lè n ba ni líi ní i gbo, a yele jo: ‹Wéle, lìigena-n-ban ní singbaadiɔn wii, wi i nyɛ wálisyɔɔbèle ní kapeebyebèle tàannyɛnnɛ.›

³⁵ Sícilimi si n tànʔa taa bi pìíbèle myɛ báriga ni.»

Zyezu i nyɛ Farisinanw Siimɔn kpáagi ni

³⁶ Farisiwaa maa Zyezu yeri níì jo wi sa lìi ní woro ní. A wi sáà jée Farisiw bee kpaʔa ni n tɛ́ɛn ni líi.

³⁷ Cewaa si maa pye kěgi bee ni, wi maa pye kapeebyeo. Amɛɛ si wi gi cán lè Zyezu i yaà ni líi Farisiw bee kpaʔa ni, a wi kári ní lɔgbanra singbopile ní, lee li da nyìn nùndaanna sìnmɛ na lè.

³⁸ A wi sáà yére Zyezu tɔ́lɔyi taana ní i nyaan, níì nyatinmi yaʔa pi i ŋuu wi tɔ́lɔyi na, ní i yi kurugu ní wi ǹjoori ní, ní i wi tɔ́lɔyi syɔɔnri syɔɔnri, ní i nùndaanni bee sìnmɛ ŋuu yi na.

³⁹ Farisiwee wi da Zyezu yeri lè, lǎli ni wi gee bee nyaa lè, a wi i gi sɔ̀ngí wiyɛɛ fúngi ni níì jo: «Nǎnw naa ga maa pye kanyaajooo, céw naa wi tángi wi na lè, wi mǎà dée wi kéeli cán si wɔ́ɔ wi kánmi cán bi cán wi i nyɛ kapeebyeo.»

⁴⁰ A Zyezu wi pye: «Siimɔn, mii a yarigaa joo mɔ ma.» A Siimɔn wi yari: «Tamafɔw, ki joo kɛ.»

⁴¹ A Zyezu jo: «Fwɔɔlewaa fwɔ́ɔgéle maa pye syɛ̀ɛnnɛ siin na. Selebingéle kagunɔ maa pye wàa na, saala kagunɔ si i nyɛ wee na.

⁴² Yafyɛn si o nyɛ be ma bi gbǎn fwɔ́ɔgèle tɔ́n í, a fwɔɔlew fwɔ́ɔgèle yaʔa pe myɛ siinw ma. Wìí fwɔɔlew kéele yɛlɛ bi dɛ́nɛ sɔ̀lɔ wìí na?»

⁴³ A Siimɔn wi yari: «Mii i gi sɔ̀ngí wee má wi wonɛʔɛw yaʔa lè, woro wii.» A Zyezu wi yari: «Mɔ n kányɛʔɛ joo.»

⁴⁴ A wi fíige céw ma níì Siimɔn pye: «A mɔ céw naa nyaa lé? Mii n jée mɔ kpáagi ni, mɔ ga tɔjeelɔʔɔ kaan mii ma í, á céw naa si tɔ̀nɔ n mii tɔ́lɔyi jée ní wi nyatinmi ní, níì yi kurugo ní wi ǹjoori ní.

⁴⁵ Mɔ ga mii syɔɔnri í, kàjáa nlaa mii jée mɔ kpáagi ni lè, céw naa ga kɔ́ɔ̀ láʔa mii tɔ́lɔyi syɔɔnrilɔ na nyáana í.

⁴⁶ Mɔ ga wɔ́ɔ̀ sìnmɛ wo mii nyúngi na í, kàjáa céw naa si n nùndaanna sìnmɛ wo mii tɔ́lɔyi na.

⁴⁷ Gee bee na mii a gi joo mɔ ma, wee naa tàmaga n kpɔ́ʔɔ wi kapeenɛʔɛgèle kùsulugo syɔɔlɔ báriga ni. Kàjáa syɔ́ɔnwee má kapeegèlē cɛɛri kusulugo syɔɔ lè, wee bee tàmaga n cɛ́rɛ.»

⁴⁸ Koro kàdoʔo ma a wi céw pye: «Mɔ kapeegèle kùsulugo n syɔɔ.»

⁴⁹ Lǎli bee ni a Zyezu suliinyɛnbèle fala ni gi sɔ̀ngí peyɛɛ fúnyi ni níì jo: «Wee naa wi kapeegèle kùsulugo syoo lè, woro wi nyɛ wìí?»

⁵⁰ A wi si céw pye: «Mɔ tágali n mɔ syɔɔ, da syée fûnnyinge na.»