Luki 5 - Cebaara Bible 2010

Zyezu n pìitamazelibèle yeri

¹ Cangaa syɛɛnnɛʔɛmɛ maa Zyezu màʔa fwɔɔ n wi cɔ̀ɔnri jàngó bi Kolocɔlɔɔ syɛ́ɛnri lóʔo wi ma, wi si maa pye woyéreo ní Zyenezarɛti lòkpɔɔgi nyɔ́ɔ na,

² a wi kɔ́rɔbéle siin nyaa lòkpɔɔgi kàgomɔ na, cɔ̀ɔwaabéle maa yiri be ni n sa ni be cɔ̀ɔ́bèle jé.

³ A wi jée kɔ́rɔbèle bee wàa ni, wee wi pye lè Siimɔn wów, níì wi nyɛ́ɛri wi kɔ́rɔw léeli lógbew na cɛɛri. A wi tɛ́ɛn kɔ́rɔw ni n kòro yaà ni syɛ́ɛnmi tama.

⁴ A wi ga kwɔ́ɔ wi syɛ́ɛnri joolo na, a wi Siimɔn pye: «Ye kɔ́rɔw lége lǒgi tɛɛcùrugo ni, yé yele cɔ̀ɔ́bèle wáa yaà, yele a fàala taa.»

⁵ A Siimɔn wi pye: «Kàfɔw, wolo n syɔ́ɔn naa fáliw naa na, wolo ga yarigaa taa n cò í. Kàjáa mɔ syɛ́ɛnri báriga ni mii a ní cɔ̀ɔ́bèle wáa.»

⁶ Amɛɛ pe be wáa lè, a be tɔ̀nɔ n fàala saʔa cò, fwɔɔ a cɔ̀ɔ́bèle i caa bàā cɛnɛ.

⁷ A be kɔ́yi nyáʔana be pínɛnyɛnbèle ma kɔ́rɔwaa nikwɔɔ ni níì jo pe ba poro dɛ̀ɛmɛ. A be pan n baa kɔ́rɔbèle myɛ siin nyìn fábèle na, fwɔɔ a be i caa bi kéle.

⁸ Amɛɛ Siimɔn Pyɛri gee bee nyaa lè, a wi kpùmɔnɔ Zyezu taana níì jo: «Ni Kàfɔlɔ, léeli mii na, àmɛɛ mii nyɛ lè kapeebyeo.»

⁹ Níì cán fyáari maa wi cò woro ní wi pínɛnyɛnbèle myɛ ní fánɛʔɛri bee còlo kéele na.

¹⁰ A Zyaki ní Zyan wɔ́ɔ̀ fyáa, Zebede jáabèle pe da wɔ́ɔ̀ pínɛ ni báara ní Siimɔn ní lè. A Zyezu Siimɔn pye: «Mɔ a kɔ́ fyáa í. Nlaʔa lǎli naa na mɔ a ra syɛ́ɛnbèle taagi.»

¹¹ A pe ga kɔ́rɔbèle kíle n yirige lǒgi ni, a be be yáriri myɛ yaʔa, níì taʔa wi na.

Zyezu n yaanyɛɛnmɛfɔlɔ pɔʔɔ

¹² Cangaa Zyezu maa pye kègaa ni, nànwaa si maa pye yaà ní yaanyɛɛnmɛ ní, a bi pee wi na gbanʔama. Lǎli ni wi Zyezu nyaa lè, a wi too n wi yɛ́ɛgi cíbele, níì wi nyɛ́ɛri níì jo: «Kàfɔw, mɔ ga fɔ̀lɔ mɔ a gbǎn mii kàriga wojaɔn ní.»

¹³ A Zyezu wi kɔ́gi sánʔa n tánga wi na níì jo: «Mii n fɔ̀lɔ, pɔʔɔ mi nyɔɔ.» A yaanyɛɛnmi fala n láʔa wi na.

¹⁴ A Zyezu gi joo n gbàn wi ma níì jo wi a kɔ́ gi joo syɔɔn faala ma í, níì wi pye: «Kàjáa da syée mi sa miyɛɛ dɛ̀ɛn sáriga-wòlow na, mí sárigaw wòlo mɔ jéemununi kéele na, wee kéele Mowizi da joo lè, jàngó gee bee í pye be ma séera.»

¹⁵ A Zyezu mɛ́ɛgi sèʔê yiri fwɔɔ n baa sɔ̀lɔ, a syɛɛnnɛʔɛmɛ i piyɛɛ gbóʔoro bàā wi syɛ́ɛnri lúro, wi wɔ́ɔ ra poro yáami poori.

¹⁶ Kàjáa wi maa ni syée fìími tára ni wi nibin n sa ni Kolocɔlɔɔ nyɛ́ɛri yaà.

Zyezu n syɛɛnmɔngɔɔ pɔʔɔ

¹⁷ Cangaa Zyezu maa ni syɛ́ɛnbèle tama. Farisibèle ní làlwaw sɛ́bɛwelebéle si maa wɔ́ɔ̀ pye yaà wodɛ́ɛnbéle ní. Pe maa yìri Galile tári, ní Zyude tári kèye myɛ ma n fàra Zyerusalɛmi na. Kàfɔw fànʔa si maa pye Zyezu ma bàā yáabèle poori.

¹⁸ Wéle, a nǎnbèle pèle pan ní syɛɛnmɔngɔɔ ní yasinɛgɛ na ní ba ni ŋàʔaná bi jée bíngi ni bi sa wi sínɛgɛ Zyezu yɛ́ʔɛ ma.

¹⁹ Pe si ga tɛɛsɔ̀lɔgɔ taa bi wi lége yaà í syɛ́ɛnmi nɛʔɛnɛ báriga ni. A be lúgu bíngi na n tɛɛgaa fùru, níì wi tìrige tɛ́ɛgi bee ni ní wi yasinɛgi myɛ ní syɛ́ɛnmi nínge ni n tɛ́ʔɛ Zyezu yɛ́ʔɛ ma.

²⁰ A Zyezu ga be tágali nyaa, a wi jo: «Nàɔn, mɔ kapeegèle kùsulugo n syɔɔ.»

²¹ A làlwaw sɛ́bɛwelebéle ní Farisibèle fala ni gi sɔ̀ngí peyɛɛ fúnyi ni níì jo: «Wee naa wi Kolocɔlɔɔ mɛ́ɛgi kálagi lè nya, woro wi nyɛ wìí? Wìí wi a gbǎn syɔɔn kapeegèle kùsulugo syɔɔ kapye Kolocɔlɔɔ nibin ban í?»

²² Amɛɛ si Zyezu be sɔ̀nguri cán lè, a wi be pye: «Nyàʔá na yele sɔ̀nguri bee félege sɔ̀ngí yele fúnyi ni?

²³ Bi jo: ‹Mɔ kapeegèle kùsulugo n syɔɔ,› koro ga jáa bi jo: ‹Yìri maa táanri,› gìí gi wɛ́ʔɛri?

²⁴ Koro ga pye yele í gi cán séew i nyɛ Syɔɔn-pya ma tári na bàā kapeegèle kùsulugo syoo.» A wi ga syɛ́ɛnri bee joo n kwɔ́ɔ, a wi fala n syɛɛnmɔngɔw pye: «Mii n jo mɔ í yìri bi mɔ yasinɛgi láa bàā syée mɔ kpaʔa ma.»

²⁵ A wi fala n yìri pe nyɛnɛ na, níì wi yasinɛgi láa ni syée wi kpaʔa ma, ní i Kolocɔlɔɔ kpɔ̀ʔɔrɔ́.

²⁶ A pe myɛ tɔ̀nɔ i káama gi na, ní i Kolocɔlɔɔ kpɔ̀ʔɔrɔ́. A be fyáa gbanʔama ní i gi nyuu peyɛɛ ma níì jo: «Wolo n tɔ̀nɔ n bìngaara kele nyaa níjanʔa.»

Zyezu n Levii yeri

²⁷ Koro kàdoʔo ma a Zyezu ga yiri ni syée, a wi sáà wálisyɔɔwaa nyaa pe i wi yiri Levii. Wi maa pye wodɛ́ɛɔn ní wálisyɔɔbèle kpaʔa ni. A wi wi pye: «Taʔa mii na wo kári.»

²⁸ A wi fala n yáriri myɛ yaʔa, níì yìri n taʔa wi na.

²⁹ A Levii fɛ́tiikpɔɔɔ kpéʔele wi kpáagi ni Zyezu kéeli na, wálisyɔɔbèle saʔa ní syɛ́ɛnbèle pèle nikwɔɔlɔ maa pye yaà wodɛ́ɛnbéle ní ni líi ní be ní.

³⁰ A Farisibèle ní làlwaw sɛ́bɛwelebéle be báara lè ní poro ní, a bele bee ba ni nyuu ní Zyezu pìitamabèle ní fundanʔara na níì be pye: «Nyàʔá na yele pínɛ ni líi ní i gbo ní wálisyɔɔbèle, ní kapeebyebèle ní?»

³¹ A Zyezu be yari: «Bele be cólogo lè, pe màko o nyɛ lɔ̀ʔɔtɔrɔ na í, fwɔɔ bele be yáa lè.

³² Mii ga pan ba syɛɛnsinbèle yeri be kàdoʔo wáa be kapeegèle ma í, fwɔɔ kapeebyebèle.»

Zyezu ní súnw lele kéele

³³ A be wi pye: «Zyan pìitamabèle i súnw nii làrigèle saʔa ni ní i Kolocɔlɔɔ nyɛ́ɛri, Farisibèle wòolo wɔ́ɔ i gi kpéʔele ànbée, á mɔ wóbèle si i líi ní i gbo.»

³⁴ A Zyezu be yari: «Cefɔnw fɔ́lɔ ga pye ní wi cèpɔrigi syɛ̀ɛnnɛ ní lǎlee ni lè, a yele a gbǎn be pye lé pe súnw le lǎli bee ni?

³⁵ Làlaa si i maa, lee ni pe a cefɔnw fɔ́lɔ yirige be níngi ni lè, pe a náa súnw le lǎli bee ni.»

³⁶ A wi níì kàseelaa wáa be ma níì jo: «Syɔɔn faala a fànifɔɔn tɛ́ɛgaa sulu bi tɛ́ʔɛ fànilɛɛɔ wéʔe tɔ́n í. Ki ga pye ànbée, wi n fànifɔnw sulugu gbanzan, fànifɔnbili bee si a wɔ́ɔ yɛlɛ fànilɛɛw na í.

³⁷ Pe wɔ́ɔ o dùvɛɛnfɔɔn nii saliya kpàbilɛɛbéle ni í. Ki ga pye ànbée, dùvɛɛnw a kpàbibèle fologi cɛnɛ si wo, kpàbibèle si wɔ́ɔ kálagi.

³⁸ Kàjáa dùvɛɛnfɔnw n yɛlɛ pe wi le saliya kpàbifɔnbéle ni.

³⁹ Syɔ́ɔnwee wi dùvɛɛnlɛɛɔ gbaa n tàli lè, dùvɛɛnfɔɔn láa o wee bee taagi í, níì cán wi n ni gi nyuu níì jo: ‹Dùvɛɛnlɛɛw n pɔ́rɔ.› »