Luki 4 - Cebaara Bible 2010

Zyezu kárimani kéele

¹ Zyezu fúngi maa nyìn Pìicǎnni na, a wi yìri Zyuridɛnw ma n lúru n kári. A Pìicǎnni wi tórigo fìími tára ni ní sa ni wi kàragí.

² A wi canya togoye siin kwɔ́ɔ, a Dàzɔɔnw i wi kárima bi lége kapeele ni. Wi da yarigaa faala lìi cányi bee ni í, cányi bee kwɔ́ɔlɔ kadoʔo ma a kateegi náà wi jáa.

³ A Dàzɔɔnw wi pye: «Kapye mɔ wi nyɛ Kolocɔlɔɔ Jáaw, mi kàdɛnɛgi naa pye gi kàri búru.»

⁴ A Zyezu wi yari: «Ki n sɛ́bɛ níì jo: ‹Syɔɔn a gbǎn sìíw taa búru lìile yagana báriga ni í.› »

⁵ Koro kàdoʔo ma a Dàzɔɔnw wi kɔ́ri n kári nyanbelege ǹjoʔo ni n sáà dulunyanw fànʔa tɛ́ɛyɛ myɛ tɛ̀ɛn wi na làrinijanna ni

⁶ níì wi pye: «Mii a fǎngi naa myɛ kaan mɔ ma ní gi nìjangbɔɔri myɛ ní. Níì cán pe n gi le mii kɔ́yi ni, syɔ́ɔnwee faala má mii ga ni caa bi gi kaan lè, mii a gbǎn gi kaan wee bee ma.

⁷ Mɔ ga fɔ̀lɔ n kpùmɔnɔ mii taana, ki myɛ a pye mɔ wóʔo.»

⁸ A Zyezu wi pye: «Ki n sɛ́bɛ níì jo: ‹Maa mɔ Kafɔw Kolocɔlɔɔ kpɔ̀ʔɔrɔ́ máā woro nibin fáliw kpéʔele.› »

⁹ A Dàzɔɔnw níì wi kɔ́ri n kári Zyerusalɛmi ma n sáà wi lúrugo kpɔ̀ʔɔrɔli kpaʔa tɛ́ɛtɔnɔgɔ njoʔo ni níì wi pye: «Kapye mɔ wi nyɛ Kolocɔlɔɔ Jáaw, mi kòro nɛɛ, mí ye mi too tári na.

¹⁰ Níì cán ki n sɛ́bɛ níì jo: ‹Wi a mɔ kéeli joo bi gbàn wi tundunbèle ma si jo paa mɔ kpáaw wéle.›

¹¹ Ní níì jo: ‹Pe a mɔ tɔʔɔ cò be kɔ́yi ni, jàngó mɔ tɔ́lɔgaa a kɔ́ círi kàdɛnɛgaa na í.› »

¹² A Zyezu wi yari: «Ki n wɔ́ɔ̀ sɛ́bɛ níì jo: ‹Ki ga yɛlɛ mɔ í kɔ́ mɔ Kafɔw Kolocɔlɔɔ pye wéle í.› »

¹³ Amɛɛ Dàzɔɔnw wi kárima n fɔ̀rɔ lè kánmi bee myɛ na, a wi núngo wi taana bi sa ra làlaa nikwɔɔ sige.

Zyezu n wi fáliw séli Galile tári ni

¹⁴ A Zyezu níì lúru n kári Galile ma Pìicǎnni fànʔa báriga ni, a wi mɛ́ɛgi tɔ̀nɔ n yiri tɛ́nɛmi myɛ ni.

¹⁵ Wi maa ni syɛ́ɛnbèle tama pe sérikpaayi ni, a pe myɛ i wi kpɔ̀ʔɔrɔ́.

Nazarɛti ye n Zyezu cée

¹⁶ A wi kári Nazarɛti ma, kěgee ni pe da wi gbóo lè, n sáà jée sérikpaagi ni cândɛnɛgi canʔa ni, àmɛɛ wi da tàli ni gi kpéʔele lè, níì yìri n yére bi sɛ́bɛw wéle.

¹⁷ A be kanyaajoow Ezayi sɛ́bɛw kaan wi ma. A wi wi múgu níì tɛ́ɛgi caa n nyaa beè gi sɛ́bɛ lè n jo:

¹⁸ «Kàfɔw Pìle i nyɛ mii ni, níì cán wi n mii télege níì fǎngi kaan mii ma mii í da Syɛɛnjóocǎnri nyuu foomɔfɔbèle ma. Wi n mii tun níì jo mii í sa ra wɔ́rɔdi kéele nyuu púlobèle ma, si wɔ́ɔ ra fúunbèle paʔala kéele nyuu fúunbèle ma, sáā fɔ̀rɔyi fɔ̀ɔlɔ yirigi fɔ̀rɔyi ni,

¹⁹ sáā yɛ́ɛli kéele nyuu syɛ́ɛnbèle ma lee ni Kàfɔw a be kpɔ́ʔɔ lè.»

²⁰ Koro kàdoʔo ma a wi sɛ́bɛw tɔ́n níì wi lúrugo n kaan sérikpaagi falipyeo ma, níì tɛ́ɛn. Syɛ́ɛnbèle myɛ be pye yaà lè sérikpaagi ni, a be nyapiigèle le wi ni ni wéle.

²¹ A wi gi séli ni nyuu be ma níì jo: «Syɛɛnsɛbɛri naa yele lóʔo lè dee, ti n foro níjanʔa.»

²² A pe myɛ i wi séeraw kpéʔele ní i káama syɛɛntaanri na di yiri lè wi nyɔ́ɔgi ni. A be i gi nyuu níì jo: «Wee naa ban wi nyɛ Zyozɛfu jáaw ì?»

²³ A Zyezu be pye: «Kányɛʔɛ na yele a ba kàseeli naa wáa mii ma si jo: ‹Nìgbumɔɔn, mi miyɛɛ bɔʔɔ,› si wɔ́ɔ jo: ‹Kérigèle gele mɔ kpéʔele lè Kapɛrinayumi ni á wolo ge kéeli lóʔo, mi wɔ́ɔ mi gele bee félege kpéʔele nɛɛ naa mɔ tiimaa kěgi ni.› »

²⁴ A wi níì gi joo be ma níì jo: «Mii a gi joo yele ma kányɛʔɛ ni, pe o kanyaajoowaa faala córo wi tiimaa kěgi ni í.

²⁵ Mii si a ní gi joo yele ma kányɛʔɛ ni, lɔgucaala saʔa maa pye Isirayɛli ni Elii lǎli ni, àmɛɛ wáami da yére lè yɛ̀ʔɛlɛ taanri ní yeye kɔrɔni, á kateekpɔɔgi baa too tári tɛ́ɛyɛ myɛ ni.

²⁶ Pe si da Elii tun lɔgucew bee wàa faala ma í, kapye Sarɛpita ye lɔgucewaa nibin má ban í, wi pye lè Siidɔn tári ni.

²⁷ Yaanyɛɛnmɛfɔɔlɔ saʔa maa wɔ́ɔ̀ pye Isirayɛli ni kanyaajoow Elize lǎli ni. Kàjáa pe wàa faala da pɔʔɔ í, kapye Naama nibin ban í, wi pye lè Sirii tári wóo.»

²⁸ Bele myɛ be pye lè sérikpaagi ni, lǎli ni be syɛ́ɛnri bee lóʔo lè, a be fúnyi tɔ̀nɔ n tanʔa be na n sɔ̀lɔ.

²⁹ A be yìri n Zyezu ŋɔrigɔ n yirige kěgi kàdoʔo ma, pe kěgi si maa pye nyanbelege na, a be wi kɔ́ri n kári gee bee tɛɛtigibɛnʔɛ nyɔ́ɔ ma bi sa wi ŋɔrigɔ cáan yaà táàma.

³⁰ Kàjáa wi maa sɔ̀lɔ be níngi ni n kári.

Nǎnwee màdeo da ni wɔʔɔ lè

³¹ A wi kári Kapɛrinayumi ma, gi nyɛ lè Galile tári kègaa, n sa ni syɛ́ɛnbèle tama cândɛnɛgi canʔa ni.

³² A be i káama wi tamani na, níì cán wi syɛ́ɛnri maa pye ní fànʔa ní.

³³ Nànwaa si maa pye yaà sérikpaagi ni, màdeo maa pye wi ni. Wi maa tɔ̀nɔ n pee. A wi yákpogbɔɔlɔ wáa gbanʔama níì jo:

³⁴ «Ee, ba nyàʔá gi nyɛ wolo ní mɔ níngi ni, mɔ Zyezu, Nazarɛti ye wów? A mɔ pan lé ba wolo kálagi wii? Mii n mɔ cán mɔ wi nyɛ Kolocɔlɔɔ syɛɛncanw.»

³⁵ A Zyezu fúlo wi na níì wi pye: «Nyɔ́ɔgi tɔ́n mí yiri nǎnw bee ni.» A màdew nǎnw cáan be níngi ni níì yiri wi ni. Wi ga wi kpàli í.

³⁶ A pe myɛ i káama gi na ní i gi nyuu peyɛɛ ma níì jo: «Nyàʔá syɛɛnfelere di dee naa? Wi i gi nyuu ni gbàngí màdebèle ma ní fǎngi, ní séew ní, a be i yirigi syɛ́ɛnbèle ni.»

³⁷ A Zyezu mɛ́ɛgi fala n yiri tɛ́nɛmi myɛ ni.

Zyezu n yaabèlē saʔa pɔʔɔ

³⁸ A Zyezu ga yiri sérikpaagi ni, a wi sáà jée Siimɔn kpáagi ni. Cefuuro si maa pye Siimɔn céw nɔ́ɔ na, ti maa tɔ̀nɔ n gbàn, a be Zyezu nyɛ́ɛri jàngó wi wi pɔʔɔ.

³⁹ A wi lɛ̀ɛlɛ wi nyǔngi ni níì fúlo cefuuri na, a di fala n láʔa wi na. A wi yìri terire ni kpéʔele be ma.

⁴⁰ Lǎli ni cángi jée lè, yaama o yaama félege fɔ́lɔ wi nyɛ syɔɔn o syɔɔn ma lè, a pe myɛ i syée ní be ní Zyezu ma. A wi sa ni wi kɔ́yi taʔala pe myɛ na nibin nibin ni sɔ̀lɔ́, a be i poori.

⁴¹ A màdebèle wɔ́ɔ i yirigi syɛ̀ɛnnɛ saʔa ni ní i yákpogèle wáa ni gi nyuu níì jo: «Mɔ wi nyɛ Kolocɔlɔɔ Jáaw.» A wi i fúlo be na. Wi si da fɔ̀lɔ paa nyuu í, níì cán pe maa gi cán woro wi nyɛ Kirisi.

Zyezu i Kolocɔlɔɔ syɛ́ɛnri nyuu Zyude ni

⁴² Lǎli ni nyǐngi tali lè, a wi yiri n kári fìími tára tɛ́ɛgaa ni. A syɛ́ɛnmi i wi caa ni máari fwɔɔ n sáà wi nyaa, a be i caa bi wi yérige koro ga pye wi a kɔ́ kári si poro yaʔa í.

⁴³ A wi be pye: «Ŋàʔanaga gii fwɔɔ mii í wɔ́ɔ kári kěyi wozanya ma bi sa ra Kolocɔlɔɔ fǎngi syɛɛnjóocànra nyuu nɛɛ bee. Níì cán gee bee kéele na Kolocɔlɔɔ mii tun naa.»

⁴⁴ A wi sa ni Kolocɔlɔɔ syɛ́ɛnri nyuu Zyude tári sérikpaaya ni.