Luki 23 - Cebaara Bible 2010

Pe n kári ní Zyezu ní Pilati ma

¹ A syɛ́ɛnmi bee myɛ yìri n wi kɔ́ri n kári Pilati ma

² n sa ni Pilati sɔ́ɔn wi na níì jo: «Wolo n nǎnw naa nyaa wi i wolo tári syɛ̀ɛnnɛ fáana ni pùuní, wi i be yéregi níì jo pe a kɔ́ ra nyǔnyi lɔ́rɔ kaangi Sezari ma í, ní wɔ́ɔ̀ jo woro tiimaa wi nyɛ Kirisi, ní i nyɛ fànʔafɔlɔ.»

³ A Pilati wi yíbe níì jo: «Mɔ lé wi nyɛ Zyefubèle fànʔafɔlɔ?» A Zyezu wi yari: «Ɛɛn, mii wii.»

⁴ A Pilati gi joo sáriga-wòlobèle kàfɔɔlɔ ní syɛ́ɛnmi ma níì jo: «Mii ga tɛɛkololo nyaa nǎnw naa na í.»

⁵ A be sèʔé i gi nyuu ni gbàngí níì jo: «Wi i kàsiiw légi syɛ́ɛnbèle nínge ni Zyude tári tɛ́ɛyɛ myɛ ni wi tamani báriga ni, n séli Galile tári ma fwɔɔ n taa n baa nan nɛɛ naa.»

Pe n Zyezu yérige Herodi yɛ́ʔɛ ma

⁶ Lǎli ni Pilati Galile mɛ́ɛgi lóʔo lè, a wi be yíbe níì jo: «A nǎnw naa i nyɛ lé Galile tári wówaa?»

⁷ Amɛɛ wi gi nyaa lè wi i nyɛ Herodi tári tɛ́nɛmɛ wówaa, a wi pèle tórigo ní wi ní Herodi ma, ncan Herodi maa wɔ́ɔ̀ pye yaà Zyerusalɛmi ni cányi bee ni.

⁸ Amɛɛ Herodi tɛ́nɛ̀ Zyezu nyaa lè, a gi wi dɛ́nɛ gbanʔama. Níì cán nlaa yaà làridɔɔnnɔ ni wi maa ni caa bi wi nyaa, níì cán wi maa kèlē saʔa lóʔo wi kéeli na, wi maa wɔ́ɔ ni sɔ̀ngí woro í wi nyaa wí kakpɔɔgaa kpéʔele.

⁹ A wi Zyezu yíbe n sìgiri, kàjáa wi ga yafyɛn joo í.

¹⁰ A sáriga-wòlobèle kàfɔɔlɔ ní làlwaw sɛ́bɛwelebéle yére ní i Herodi sɔ́ɔn Zyezu na gbanʔama.

¹¹ A Herodi ní wi sùlasiibèle wi faʔa cama, ní i peyɛɛ nyɛ́nɛ wi na. Koro kàdoʔo ma a Herodi burojànga le wi na níì wi lúrugo n tórigo Pilati ma.

¹² Cángi bee tiimaa na Herodi ní Pilati baa pye tàmaga na, ncan pe maa sélì pye nigooro na.

Pe n Zyezu kpóoli kútii ceri

¹³ A Pilati sáriga-wòlobèle kàfɔɔlɔ, ní yɛɛ̀kinibèle, ní syɛ́ɛnbèle yeri n kpóʔoro

¹⁴ ní baa be pye: «Yele n pan mii ma ní nǎnw naa ní níì jo wi i céemi sɔ̀ngurɔ légi syɛ́ɛnbèle fúnyo ni. Yele n kèlē saʔa joo n taʔa wi na, á mii si baa wi sìgiri yele nyɛ́nɛ na, kàjáa mii ga tɛɛkololo faala nyaa wi na í.

¹⁵ Herodi ga wɔ́ɔ̀ wi nyaa a wi kolo í, koro na wi wi lúrugo n tórigo naa wolo ma, ye wéle, kéelee li yɛlɛ lè ní kùu ní, wi ga loro làa pye í.

¹⁶ Gee bee na mii a wi kpúmɔn ní sapile ní si wi yaʔa waa syée.»

¹⁷ [Ki si maa pye ŋàʔanaga kéele yɛɛlɛ o yɛɛlɛ sériw làla ga baa nan, fwɔɔ Pilati í kàsolewaa nibin yirige bi yaʔa syɛ́ɛnbèle ma.]

¹⁸ A pe myɛ yákpogèle pínɛ n wáa níì jo: «Wee naa kpóo, mí Barabasi yirige mi yaʔa wolo ma.»

¹⁹ Bi gi taa pe maa Barabasi cò n le kàsow ni céemi kàsiikpɔʔɔ ní syɛɛnkpoori kéele na pe da kpéʔele lè kěgi ni.

²⁰ Amɛɛ Pilati da ni caa bi Zyezu yaʔa lè, a wi níì joo ní be ní.

²¹ Kàjáa a be níì yákpogèle wáa níì jo: «Wi kóri tiiparigi na! Wi kóri tiiparigi na!»

²² A wi níì gi joo be ma tɔdaanri wógi na níì jo: «Nyàʔá kapee-félile nǎnw naa kpéʔele? Mii ga sábabuwaa faala nyaa wi na kùu wóo í. Gee bee na mii a wi kpúmɔn ní sapile ní si wi yaʔa waa syée.»

²³ A be sèʔé i gi nyuu ni gbàngí ní i yákpogèle wáa gbanʔama níì jo, wi n yɛlɛ pe wi kóri tiiparigi na. A be yákpowáari wári Pilati na fwɔɔ n fànʔa taa wi na.

²⁴ Lǎli bee ni a Pilati gi nyaa gee be nyɛ́ɛri lè, ki n yɛlɛ woro í gi kpéʔele be ma.

²⁵ Wee pe da cò n le kàsow ni céemi kàsiikpɔʔɔ, ní syɛɛnkpoori kéele na lè, a wi wee bee yirige n yaʔa be ma waa syée àmɛɛ pe da wi nyɛ́ɛri lè, níì Zyezu yaʔa be ma pe sa wi kpéʔele be fungo.

Zyezu kórili kéele tiiparigi na

²⁶ Amɛɛ be syée lè ní wi ní, a be sáà Sirɛni tári nànwaa fàra n nyaa pe i wi yiri Siimɔn, wi maa yìri seʔe ma ni maa, a be wi cò, níì tiiparigi tugo wi na níì jo waa syée ní gi ní Zyezu kurugo.

²⁷ Syɛɛnnɛʔɛmɛ maa taʔa wi na ni syée wi kurugo. Càbala saʔa maa wɔ́ɔ̀ pye yaà, a poro i be fìcibiyi kpúmɔn, ní i sùpiigèle wáa wi kéeli na.

²⁸ A Zyezu fíige be ma níì be pye: «Yele Zyerusalɛmi calipiigèle, yele a kɔ́ ra nyaan mii kéeli na í, fwɔɔ yaa nyaan yele ní yele pìíbèle keele na.

²⁹ Ye wéle, canyaa i maa yee ni syɛ́ɛnbèle a ba ra gi nyuu lè si jo: ‹Cébèle bele be nyɛ lè cenaa-sìnzeebèle, poro bele be nyɛ lè pe ga pìibēle see n be kaan a be ŋɔri lè í, bele bee i nyɛ dùba pìibēle.›

³⁰ Lǎli bee ni syɛ́ɛnbèle a gi séli da nyuu nyanbeleyi ma si jo: ‹Ye too wolo na,› si wɔ́ɔ ra gi nyuu dǎndamayi ma si jo: ‹Ye wolo tɔ́n.›

³¹ Pe si ga ni kérigèle naa kpéʔele tiipirigi na, nyàʔá si ki a kpéʔele tiiwaagi na?»

³² A be wɔ́ɔ̀ kapeebyebèle pèle siin kɔ́ri n fàra Zyezu na bi sa be pínɛ kpóo ní wi ní.

³³ Lǎli ni be sáà nan lè tɛ́ɛgi na be yiri lè Nyùngbokɔrigɔ, a be wi kóri tiiparigi na nɛɛ bee, woro ní kapeebyebèle ní. Wàa maa pye wi kàliige ma wee si i nyɛ wi kàmɔnɔ ma.

³⁴ A Zyezu jo: «Abaa, mi be kapeegèle kùsulugo syɔɔ, níì cán gee be kpéʔele lè pe ga gi cán wii í.» A be gɔ̌nw wáa wi yaleri kéele na n di tíla peyɛɛ na.

³⁵ A syɛ́ɛnbèle yére yaà ni wi wéle. Kùndigibèle si i wi tɛ́ʔɛ níì jo: «Wi maa ni pèle nikwɔɔlɔ syoo, ki n yɛlɛ wi wiyɛɛ zyɔɔ kapye woro wi nyɛ Kirisi, wi lè Kolocɔlɔɔ wów.»

³⁶ A sùlasiibèle wɔ́ɔ i peyɛɛ nyɛ́nɛ wi na, níì nùuni wi na n sáà vinɛgiri fìin wi na

³⁷ níì jo: «Kapye mɔ wi nyɛ Zyefubèle fànʔafɔlɔ, mi miyɛɛ zyɔɔ.»

³⁸ Pe maa syɛɛnraa sɛ́bɛ n táriga tiiparigi na wi ǹjogi ni, a di jo: WEE NAA WI NYƐ ZYEFUBELE FANʔAFƆLƆ.

³⁹ Kapeebyebèle siin pe da cɔ̀rɔ lè wi taana, a poro wàa nibin i wi teeri níì jo: «Mɔ ban wi nyɛ Kirisi ì? Mi miyɛɛ zyɔɔ, mí wɔ́ɔ wolo syɔɔ.»

⁴⁰ Kàjáa a wi pínɛnyɛnw fúlo wi na níì wi pye: «Mɔ o fɛ̀ɛgí Kolocɔlɔɔ na wii ì? Jo wɔʔɔnijangi ni mɔ nyɛ.

⁴¹ Wolo na wɔʔɔgi naa yɛlɛ, níì cán wolo kapeegèle kéele na wolo wɔʔɔ. Kàjáa nǎnw naa ga kapeelaa faala kpéʔele í.»

⁴² Níì fala n gi joo Zyezu ma níì jo: «Zyezu, mɔ ga kɔ́ɔ̀ pan bi ba tɛ́ɛn mɔ fangi na lǎli ni lè, mi sɔ̀ngi mi taa mii na.»

⁴³ A Zyezu wi pye: «Mii a gi joo mɔ ma kányɛʔɛ ni, níjanʔa mɔ a pye ní mii ní kúsegi tɛɛcànga ni.»

Zyezu kùúw kéele

⁴⁴ Lǎli ni cángi tɛ́ɛn lè nyùngo ni, a tári myɛ kàri yébilimɛ n baa nan cangàrigi na,

⁴⁵ níì cán cángi maa kàri yébilimɛ, fàniw pe da pari lè kpɔ̀ʔɔrɔli kpaʔa fúngo ni, a wi yabi siin.

⁴⁶ A Zyezu yákpogbɔɔlɔ wáa níì jo: «Abaa, mii n mii pǐli le mɔ kɔ́yi ni.» Syɛ́ɛnri bee joolo kadoʔo ma a wi kùu.

⁴⁷ Gee gi kpéʔele lè, a sùlasiibèle dabata kàrigafɔlɔ ga gee bee nyaa, a wi i Kolocɔlɔɔ kpɔ̀ʔɔrɔ́ níì jo: «Kányɛʔɛ gii, nǎnw naa maa pye syɛɛnsiɔn.»

⁴⁸ Syɛɛnnɛʔɛmi myɛ pi da piyɛɛ gbóʔoro yaà lè ni wéle, a pi ga kérigèle bee nyaa gele ge kpéʔele lè, a bi lúru ni syée ní i be fìcibiyi kpúmɔn.

⁴⁹ Bele myɛ be nyɛ lè Zyezu cánvɔbèle, n fàra cébèle na pe da taʔa wi na lè n yìri Galile tári ma, a poro myɛ yére léelige ní i kérigèle bee wéle yaà.

Zyezu tɔ́nni kéele

^50-51 Nànwaa maa pye yaà pe i wi yiri Zyozɛfu, wi maa pye Arimate ye wóo gi pye lè Zyefukègaa, wi maa pye kpóʔorojooli kacɔɔnriwaa, ní i nyɛ syɛɛncaɔn, ní wɔ́ɔ̀ sín, ní i Kolocɔlɔɔ fǎngi sige. Wi da fɔ̀lɔ wozanbèle syɛɛnjóoro, ní be kapyeli na í.

⁵² A nǎnw bee kári Pilati ma n sáà Zyezu kúceri nyɛ́ɛri wi ma.

⁵³ A wi sáà di tìrige tíigi na n baa pwɔɔ ní fànicàɔn ní, níì di láa n sáà le nyanga ni, gee pe da túgu lè fálaga na, pe si da kɔ́ɔ̀ kpóō tɔ́n gi ni í.

⁵⁴ Ki maa pye sériw sámaga-yaʔala canʔa, á cândɛnɛgi làrizelile kɔ́ ni caa bi nan.

⁵⁵ Cébèle bele si pe da yìri Galile tári ma n pan ní Zyezu ní lè, a poro taʔa Zyozɛfu na ni syée wi kurugo n sáà nyángi wéle, ní wɔ́ɔ̀ Zyezu kúceri sínɛgɛganma wéle,

⁵⁶ níì lúru n kári n sáà nùndaanna míige ní nùndaanna sìnmɛ sámaga. Níì ŋɔ́n n daa cândɛnɛgi canʔa ni, n yɛlɛ ní Kolocɔlɔɔ kajooli ní.