Luki 2 - Cebaara Bible 2010

Zyezu seeli kéele

¹ Lǎli bee ni a Sezari Ogusiti tundunro tun wi tári tɛ́ɛyɛ myɛ ni níì jo be syɛ́ɛnbèle myɛ córo.

² Córoli bee wozelile n pye lǎli ni Kirinyusi da ni Sirii tári kàragí lè.

³ A pe myɛ i syée be tiimaa kěyi ma be sa poro córo.

⁴ A Zyozɛfu wɔ́ɔ̀ yìri Nazarɛti ma Galile tári ni n kári Davidi kěgi ma ki lè Bɛtilehɛmi Zyude tári ni, níì cán wi i nyɛ Davidi yòdaʔagaa,

⁵ a woro ní wi pìcaaw Marii pínɛ n kári be sa poro córo. Fícɛnni si i nyɛ Marii na.

⁶ Lǎli ni be pye yaà lè, a wi làrizeeli baa nan,

⁷ a wi wi pìiseliw see nàɔn, níì wi mígi ní fàni ní n sínɛgɛ yaweeri yaliire yalege ni, níì cán pe da tɛɛgaa taa nibɔndirige-kpáagi ni í.

Nyɛ̀ʔɛni tundunwaa n wiyɛɛ dɛ̀ɛn bànaʔabèle na

⁸ Bànaʔabèle pèle si maa pye tári bee ni ni be bǎbèle nàʔá ni syɔ̀ɔ́n yaà sìnbirigi ni.

⁹ A Kàfɔw tundunwaa pan n baa yére be taana, a be Kàfɔw nìjangbɔɔrɔ nyaa a di be màʔa ní i nyɛ́ʔɛnɛ. A be fyáa gbanʔama.

¹⁰ A nyɛ̀ʔɛni tunduɔn be pye: «Yele a kɔ́ ra fɛ̀ɛgí í, níì cán syɛɛntaanra mii a joo yele ma, ti a pye fundaangbɔɔrɔ syɛ́ɛnrɛ yele syɛ́ɛnbèle myɛ ma,

¹¹ toro di nyɛ pe n syɔɔfɔlɔ see yele ma níjanʔa Davidi kěgi ni, woro wi nyɛ Kirisi wi lè Kàfɔw.

¹² Gee naa a pye yele ma fɛ̀ɛ, yele a sa sàánnyɛɛnnɛ nyaa pe li mígi ní fàni ní bi sínɛgɛ yaweeri yaliire yalege ni.»

¹³ Lǎli bee ni a nyɛ̀ʔɛni sùlasii-nɛʔɛmaa pàla n pan n baa fàra tundunw na, a be i Kolocɔlɔɔ kpɔ̀ʔɔrɔ́ níì jo:

¹⁴ «Kolocɔlɔɔ na kpɔ̀ʔɔrɔli yɛlɛ wi lè ǹjoʔo ma tɛ́ɛyi myɛ ni, yɛɛ̀nyingi si pye tári na wi syɛɛn-nidaanmabèle ma.»

Bànaʔabèle n kári Bɛtilehɛmi ma

¹⁵ Lǎli ni tundunbèle núngo bànaʔabèle taana n kári nyɛ̀ʔɛni na lè, a bànaʔabèle gi joo peyɛɛ ma níì jo: «Yaa maa wo kári Bɛtilehɛmi ma, kéelee li kpéʔele yaà á Kàfɔw baa li tɛ̀ɛn wolo na lè, wo sa li wéle.»

¹⁶ A be i fyàalá ni syée n sáà Marii ní Zyozɛfu nyaa ní sàánnyɛɛnni ní, a be li sínɛgɛ yaweeri yaliire yalege ni.

¹⁷ A pe ga sáà li nyaa, syɛ́ɛnree nyɛ̀ʔɛni tunduɔn da joo be ma lè pìíw kéele na, a be di joo n tɛ̀ɛn syɛ́ɛnbèle na.

¹⁸ Bele myɛ be bànaʔabèle syɛ́ɛnrɛ lóʔo lè, a be i káama kéeli bee na.

¹⁹ Marii si maa kérigèle bee myɛ kɔn wi fúngi ni ní i sɔ̀ngí ge na.

²⁰ A bànaʔabèle lúru ni syée ní i Kolocɔlɔɔ mɛ́ɛgi kpɔ́ʔɔgi ní i wi kpɔ̀ʔɔrɔ́ poro kanyaagèle ní poro kaloʔogèle kéele na, níì cán gee myɛ ki da joo be ma lè, ànbée be sáà gi nyaa.

Zyezu mɛ́ɛgi lele kéele

²¹ A canya kɔrɔsiin ga sɔ̀lɔ, kɔrɔtaanri wógi na, a koro pye pìíw kɛ́nɛ canʔa, a be wi mɛ́ɛgi le níì jo paa wi yiri Zyezu, mɛ́ɛgee nyɛ̀ʔɛni tunduɔn da tɛ̀ɛn lè n gi yaʔa wi nɔ́ɔw da kɔ́ɔ̀ wi fícɛnni taa í.

Zyezu tɛ̀ɛ́nni kéele kpɔ̀ʔɔrɔli kpaʔa ni

²² Lǎlee ni peyɛɛ zámagali canya baa foro lè n yɛlɛ ní Mowizi làlwaw syɛ́ɛnrɛ ní, a be kári ní pìíw ní Zyerusalɛmi ma sa wi kàlifáa Kàfɔw ma,

²³ àmɛɛ ki da sɛ́bɛ lè Kàfɔw làlwa ni níì jo: «Nànbiiseligèle myɛ n yɛlɛ paa ge córo Kàfɔw wòʔolo.»

²⁴ Pe maa wɔ́ɔ̀ kári sa sárigaw wòlo wee kéele li joo lè Kàfɔw làlwa ni níì jo: «Kàtogèlē siin koro ga jáa lòbwɔɔpiigéle siin.»

²⁵ Nànwaa si maa pye Zyerusalɛmi ni pe i wi yiri Simeyɔn. Nǎnw bee maa pye syɛɛnsiɔn, ní i fɛ̀ɛgí Kolocɔlɔɔ na, ní wɔ́ɔ i yɛɛ̀nyingi sige, gee Kolocɔlɔɔ da joo wi a ba kaan Isirayɛli ye ma lè. Pìicǎnni si maa ni wi kàragí.

²⁶ Pìicǎnni si maa téè gi tɛ̀ɛn wi na n jo, wi a kùu í bi taa wi ba Kirisi nyaa, wi lè Kàfɔw wóo.

²⁷ A wi sáà jée kpɔ̀ʔɔrɔli kpaʔa ni Pìicǎnni báriga ni. Lǎli ni Zyezu seefɔbèle baa jée yaà ní wi ní lè bi Mowizi làlwaw kalɛɛlɛ kpéʔele wi na,

²⁸ a wi wi syɔɔ n cò wi kɔ́yi ni ní i Kolocɔlɔɔ kpɔ̀ʔɔrɔ́ níì jo:

²⁹ «Kàfɔgbɔɔw, mii wee wi lè mɔ púlonǎnw, tɔ́ɔliw ni mɔ a gbǎn mii yaʔa mii í da syée yɛɛ̀nyinge na bi yɛlɛ ní mɔ syɛ́ɛnri ní mɔ da joo lè.

³⁰ Níì cán mii tiimaa nyapiigèle n mɔ syɔɔli nyaa,

³¹ lee mɔ sámaga lè syɛ́ɛnbèle myɛ nyɛ́nɛ na.

³² Li a pye gbɛ̀ɛnmɛ bàā kányɛɛgi tèé dulunyanw syɛɛnfeleye na. Si nìjangbɔɔrɔ kaan mɔ syɛ́ɛnbèle ma be nyɛ lè Isirayɛli ye.»

Simeyɔn kanyaajoori kéele

³³ Syɛ́ɛnree wi joo lè pìíw kéele na, a wi tóow ní wi nɔ́ɔw i káama di na.

³⁴ A Simeyɔn dùbaw kpéʔele be ma níì gi joo Marii ma wi lè pìíw nɔ́ɔ, níì wi pye: «Wéle, Kolocɔlɔɔ n wee naa tɛ́ʔɛ Isirayɛli ye syɛ́ɛnbèle pèle saʔa toolo, ní pèle saʔa yirile kánma na. Wi a ba pye fɛ̀ɛ, wee syɛ́ɛnbèle a ra kábala lè,

³⁵ koro ga pye syɛ̀ɛnnɛ saʔa funzɔngurɔ í yiri kàfugi na, mɔ tiimaa si mɔ nyaa lè, kayaagi a ba pye mɔ ni mɔ a jo pe n mɔ súu n fùru ní ŋɔsée ní.»

Kanyaajoocew Ani

³⁶ Kanyaajoocewaa maa wɔ́ɔ̀ pye yaà pe i wi yiri Ani, wi maa pye Fanuwɛli pyà, ní i nyɛ Azɛɛri yòdaʔagaa. Wi maa tɔ̀nɔ n lɛɛ gbanʔama. Pe maa wi pìcaamatɔw kaan nànwaa ma, a wi kòro ní wi ní n taa yɛ̀ʔɛlɛ kɔrɔsiin,

³⁷ ní náà pye lɔgucaa n taa a wi baa yɛ̀ʔɛlɛ togoye sicɛrɛ ní sicɛrɛ taa, wi da ni fɔ̀ngí kpɔ̀ʔɔrɔli kpaʔa ni í, níì cán wi maa ni Kolocɔlɔɔ kpɔ̀ʔɔrɔ́ ní súnleri, ní nyɛ́ɛriyi ní canʔa ní yébilige.

³⁸ Lǎli bee wonijanna ni a wee bee wɔ́ɔ̀ nan yaà be na, níì bariga kaan Kolocɔlɔɔ ma, ní i pìíw kéele nyuu bele myɛ ma be Zyerusalɛmi syɔɔli sige lè.

Lúrugárili kéele Nazarɛti ma

³⁹ Lǎli ni be kwɔ́ɔ lè kérigèle bee myɛ na n yɛlɛ ní Kàfɔw làlwa syɛ́ɛnrɛ ní, a be lúru n kári pe tiimaa kěgi ma, be yiri lè Nazarɛti, Galile tári ni.

⁴⁰ Pìíw si maa ni leegi ní i báriga taagi. Wi sícilimi maa nɛʔɛ, níì cán Kolocɔlɔɔ kpɔ́ʔɔri maa pye wi na.

Zyezu i nyɛ kpɔ̀ʔɔrɔli kpaʔa ni wi yɛ́ɛgèle kɛɛ ní siin wólo na

⁴¹ Yɛɛlɛ o yɛɛlɛ Zyezu seefɔbèle maa ni syée Zyerusalɛmi ma Sɔ̀lɔ-mí-yaʔali séri ma.

⁴² A Zyezu ga baa yɛ̀ʔɛlɛ kɛɛ ní siin taa, a be kári yaà n yɛlɛ ní sériw kalɛɛlɛ ní.

⁴³ Lǎli ni sériw canya sáà foro lè, a be lúru ni syée kàʔa ma, kàjáa Zyezu si maa kòro kàdoʔo ma Zyerusalɛmi ni, wi seefɔbèle si da gee bee cán í,

⁴⁴ ní i sɔ̀ngí wi i nyɛ poro kôdanʔanyɛnbèle nínge ni, gee bee na a be canʔa nibin tánʔana kpéʔele, ní náà wi fɔ̀n, a be wi caa be senyɛnbèle, ní be cánvɔbèle ma.

⁴⁵ Amɛɛ si be wi caa n fɔ̀rɔ lè, a be lúru ni syée Zyerusalɛmi ma ní i wi caa ni syée.

⁴⁶ A canya siin ga kwɔ́ɔ, candaanri wógi na, a be sáà wi nyaa kpɔ̀ʔɔrɔli kpaʔa ni wodɛ́ɛɔn ní syɛ́ɛnbèle tamafɔɔlɔ nínge ni, a wi i be syɛ́ɛnri lúro, ní i be yíbe.

⁴⁷ Bele pe da wi syɛ́ɛnri lóʔo lè, a bele bee myɛ i káama wi sícilimi, ní wi syɛ́ɛnri lúrugoganma na be ma.

⁴⁸ Amɛɛ si wi seefɔbèle sáà wi nyaa lè nɛɛ bee, a be tɔ̀nɔ́ i káama gi na. A wi nafɔw wi pye: «Dóō, nyàʔá na mɔ kéeli naa kpéʔele wolo na? Wéle, mɔ tóow ní mii ní, wolo maa ni mɔ caa ní nyatinmɛ ní.»

⁴⁹ A wi be yari: «Nyàʔá na yele da ni mii caa? Yele ga gi cán ki i nyɛ ŋàʔanaga kéele mii í da mii Tóow fáli kpéʔele ì?»

⁵⁰ Syɛ́ɛnree si wi da joo be ma lè, pe da di kɔ́rɔw cán í.

⁵¹ A Zyezu pínɛ ní be ní n lúru n kári Nazarɛti ma n sa ni lúro be ma. A wi nafɔw kérigèle bee myɛ kɔn wi fúngi ni.

⁵² Zyezu si maa ni leegi, kàa si i fàrá wi sícilimi na, a wi kéeli i Kolocɔlɔɔ ní syɛ́ɛnbèle dàán.