Luki 19 - Cebaara Bible 2010

Zyezu ní Zasye

¹ Zyezu maa sáà jée Zyeriko ni ni forogi gi ni.

² Nànwaa si maa pye yaà kěgi bee ni pe i wi yiri Zasye, wi maa pye wálisyɔɔbèle kùndigi, ní i nyɛ lɔrɔfɔlɔ.

³ Wi maa ni ŋàʔaná bi Zyezu nyaa jàngó bi wi cán, wi fanʔa si ga taa í syɛ́ɛnmi nɛʔɛnɛ báriga ni, níì cán wi maa pye nàngbele.

⁴ A wi fàn n kári yɛʔɛ̀ ma n sáà lúgu děsyaantiige ni koro ga pye woro í Zyezu taa nyaa, níì cán nɛɛ bee wi da ni maa ba sɔ̀lɔ.

⁵ Lǎli ni Zyezu sáà nan tɛ́ɛgi bee na lè, a wi nyǔngi yìrige n wéle ǹjogi ni, níì wi pye: «Zasye, da tíri naa kelekele. Níì cán ŋàʔanaga gii fwɔɔ mii í syɔ́ɔn mɔ kpáagi ni níjanʔa.»

⁶ A wi tìgi kelekele n sáà wi tìrige wi kpáagi ni ní fundaanra ní.

⁷ Amɛɛ syɛ́ɛnbèle gee bee nyaa lè, a pe myɛ i Zyezu sànʔá níì jo: «Wi n jée kapeebyeo kpaʔa ni bi syɔ́ɔn yaà.»

⁸ A Zasye yìri n yére níì gi joo Kàfɔw ma níì jo: «Ni Kàfɔlɔ, wéle, mii a mii kɔ́lɔ yáriri tíla bi kaan foomɔfɔbèle ma. Kapye mii n syɔɔnwaa yárira nɔ̀ʔɔrɔ n syɔɔ wi ma, mii a dee bee féleye sicɛrɛ lúrugo kaan wi ma.»

⁹ A Zyezu fala n jo: «Syɔɔli n nan kpáagi naa wòolo na níjanʔa, ncan wee naa wɔ́ɔ i nyɛ Abirahami yòdaʔagaa.

¹⁰ Níì cán bele be pùuni lè Syɔɔn-pya n pan ba be caa syɔɔ.»

Wáli kàseele

¹¹ Bele be pye ni syɛ́ɛnri bee lúro lè, a Zyezu níì kàseele wáa be ma n fàra di na, àmɛɛ wi da ni nùuní lè Zyerusalɛmi na, ní àmɛɛ be sɔ̀ngí lè Kolocɔlɔɔ fǎngi làridɛ̀ɛnnɛ n nùuni n kwɔ́ɔ,

¹² gee bee na a wi jo: «Nànwaa maa pye fànʔafɔlɔ jáa, a wi si kɔ́ ni syée kùleelile ni pe sa fǎngi kaan woro ma, wí náa lúru ba tɛ́ɛn gi na.

¹³ A wi wi falipyebèle pèle kɛɛ yeri n baa wáli selebingéle kɛɛ kaan be ma níì be pye: ‹Ye sa ra jàgi wáa ní wáliw naa ní sáni mii í lúru pan lè.›

¹⁴ Kàjáa wi kéeli maa wi tári wòolo bɛɛn. Koro na wi kárigwɔɔli kàdoʔo ma a be tundunbèle pèle tórigo yaà níì jo pe sa jo: ‹Wolo o caa nǎnw naa í pye wolo fànʔafɔlɔ í.›

¹⁵ Lǎli ni wi sáà fǎngi taa n kwɔ́ɔ lè, a wi lúru n pan. Falipyebèle bele má wi da wáliw kaan lè, a wi bele bee yeri níì jo be pan naa woro ma, koro ga pye tɔ̀nɔwee be taa lè jàgiw ni woro í ba wi cán.

¹⁶ A wozeliw pan n baa jo: ‹Ni kàfɔlɔ, mii n wáli selebingéle kɛɛ tɔ̀nɔ taa ní mɔ selebinni ní.›

¹⁷ A wi wi pye: ‹Gee bee n nyɔɔ, mɔ i nyɛ falipyecàɔn. Amɛɛ mii mɔ nyaa lè tágala syɔ́ɔn kapiipiile ni, koro na sa tɛ́ɛn kèye kɛɛ nyúngo na.›

¹⁸ A siin wów pan n baa jo: ‹Ni kàfɔlɔ, mii n wáli selebingéle kagunɔ tɔ̀nɔ taa ní mɔ selebinni ní.›

¹⁹ A wi wi pye: ‹Sa tɛ́ɛn kèye kagunɔ nyúngo na.›

²⁰ A wàa nikwɔɔ pan n baa jo: ‹Ni kàfɔlɔ, mɔ selebinni wéle lee, mii maa li mígi ní fànipile ní n tɛ́ʔɛ.

²¹ Níì cán mii maa ni fɛ̀ɛgí mɔ na, ncan mɔ n tanʔa n caanri. Yárigee gi nyɛ lè mɔ ga gi tɛ́ʔɛ í, mɔ i gee bee lée, yaliiree di wɔ́ɔ̄ nyɛ lè mɔ ga di lùgu í, mɔ i dee bee lée.›

²² A fànʔafɔw wi pye: ‹Mɔ i nyɛ falipyepeeo, mii a kútiiw kúun mɔ na mɔ tiimaa nyɔ́ɔgi syɛ́ɛnrɛ báriga ni. Mɔ da gi cán lè ncan mii n tanʔa n caanri, yárigee gi nyɛ lè mii ga gi tɛ́ʔɛ í, mii i gee bee lée, ní yaliiree di nyɛ lè mii ga di lùgu í, mii i dee bee lée,

²³ nyàʔá na mɔ da mii wáliw kaan wálitɛʔɛ-kpaagi fɔ̀ɔlɔ ma í, koro ga pye mii ga lúru n pan, mii í ba kàa nyaa gi taʔa wi na í?›

²⁴ Bele be pye yaà lè woyérebéle ní, a wi bele bee pye: ‹Ye selebinni syɔɔ wi ma ye kaan selebingèle kɛɛ fɔ́lɔ ma.›

²⁵ A be wi yari: ‹Kàfɔw, jo selebingéle kɛɛ i yaà wee bee ma n kwɔ́ɔ.›

²⁶ A wi jo: ‹Mii a gi joo yele ma, syɔɔn o syɔɔn wi taa lè, pe a ní wi kaan taʔa, wee si wi fɔ̀n lè, cɛɛriwee wi taa lè, pe a ní wee bee syɔɔ wi ma.

²⁷ Kàjáa bele be nyɛ lè mii nigoobèle, poro bele be jo lè pe o caa mii í pye poro fànʔafɔlɔ lè í, yaa maa ní be ní nɛɛ naa, ye ba be kpóo mii nyɛ́nɛ na.› »

Zyezu i syée Zyerusalɛmi ma

²⁸ Lǎli ni Zyezu syɛ́ɛnri bee joo n kwɔ́ɔ lè, a wi kíni pe yɛ́ɛgi na ni syée Zyerusalɛmi ma.

²⁹ A wi ga sa ni nùuní Bɛtifazye ní Betanii na, níì nan nyanbelegi na pe yiri lè Olivye tíiri nyanbelege, a wi pìitamabèle pèle siin tun

³⁰ níì jo: «Yaa syée ye sa jée kěgi yaa ni, ki lè yele yɛ́ʔɛ ma. Yele ga jée gi ni, yele a jòfanipile nyaa wobwɔɔlɔ ní, lee li nyɛ lè syɔɔn ga kɔ́ɔ̀ lúgu li na í. Ye li sánʔa yaa maa.

³¹ Wàa si ga yele yíbe níì jo: ‹Nyàʔá na yele li sánʔana?› Ye wi pye: ‹Kàfɔw wi li caa.› »

³² Bele wi tun lè, a be kári n sáà gi nyaa àmɛɛ wi da gi joo poro ma lè.

³³ Lǎli ni be jòfanipili sánʔana lè, a li kàfɔbèle be pye: «Nyàʔá na yele jòfanipili sánʔana?»

³⁴ A be jo: «Kàfɔw wi li caa.»

³⁵ A be kári ní jòfanipili ní Zyezu ma, ní sáà be búroyi taʔala li na, níì Zyezu lúrugo li na.

³⁶ Amɛɛ wi syée lè, a be i be búroyi cáan kólogi ni.

³⁷ Lǎli ni wi sa ni nùuní Olivye tíiri nyanbelege tigimɛ na lè, a wi pìitama-nɛʔɛmi myɛ fala n séli ni yákpogèle wáa gbanʔama ni Kolocɔlɔɔ sòoló ní fundaanra ní kakpoloyi myɛ kéele na pe da nyaa lè,

³⁸ ní i gi nyuu níì jo: «Kolocɔlɔɔ í dùbaw kpéʔele fànʔafɔw ma, wi maa lè Kàfɔw mɛ́ʔɛ na! Ki n yɛlɛ yɛɛ̀nyingi í pye nyɛ̀ʔɛni na, nìjangbɔɔri si pye ǹjoʔo ma tɛ́ɛyi myɛ ni.»

³⁹ Farisibèle pèle maa pye syɛ́ɛnmi ni, a bele bee Zyezu pye: «Tamafɔw, ki n yɛlɛ mi fúlo mɔ piitamabèle na.»

⁴⁰ A wi be yari: «Mii a gi joo yele ma, àlí bele naa ga pyèri, kàdɛnɛri a ra yákpogèle wáa!»

Zyezu i nyaan Zyerusalɛmi kéeli na

⁴¹ Amɛɛ wi sa ni nùuní lè kěgi na níì gi wéle n nyaa, a wi fala ni nyaan gi kéeli na

⁴² níì jo: «Kérigèle gele ke a dée mɔ lége lè yɛɛ̀nyingi ni, mɔ tiimaa ga maa gele bee cán níjanʔa, koro mǎà dée pɔ́rɔ gbanʔama! Kàjáa tɔ́ɔliw ni ke n làra mɔ na.

⁴³ Làlaa i maa mɔ nigoobèle a ba yafanʔa faan bi mɔ màʔá kpàra bi mɔ tɛɛyiriyi myɛ syɔɔ mɔ na, si mɔ kpɛnʔɛri kàbanyi myɛ na.

⁴⁴ Mɔ piibèle bele be nyɛ lè mɔ fúngi ni, pe a ba mɔ ní bele bee ŋɔrigɔ bi cáan tári na. Pe a tée mɔ kadɛnɛgaa faala yaʔa kàa na í, níì cán lǎli ni Kolocɔlɔɔ pan mɔ ma bi ba mɔ syɔɔ lè, mɔ da lǎli bee cán í.»

Zyezu n jée kpɔ̀ʔɔrɔli kpaʔa kàcoolo ni

⁴⁵ A Zyezu sáà jée kpɔ̀ʔɔrɔli kpaʔa kàcoolo ni, níì fala ni yapárabèle nɛnɛ ni yirigi li ni

⁴⁶ níì be pye: «Ki maa sɛ́bɛ níì jo: ‹Mii kpáagi a pye nyɛ́ɛrigɛ kpaʔa.› Kàjáa yele n baa gi kàriga kàyuubēle tɛɛkòrogo.»

⁴⁷ Wi maa ni syɛ́ɛnbèle tama kpɔ̀ʔɔrɔli kpaʔa ni canʔa o canʔa. Kàjáa sáriga-wòlobèle kàfɔɔlɔ, ní làlwaw sɛ́bɛwelebéle maa ni kanmaa caa bi wi kpóo, a syɛɛnkpolobèle wɔ́ɔ̀ yére ní be ní.

⁴⁸ Kàjáa pe ga yafyɛn taa bi kpéʔele wi na í, níì cán syɛ́ɛnbèle myɛ maa tan wi na ní i wi syɛ́ɛnri lúro gbanʔama.