Luki 18 - Cebaara Bible 2010

Lɔgucew ní kútiijoow kàseele

¹ A Zyezu kàseele wáa bi gi tɛ̀ɛn be na àmɛɛ be yɛlɛ paa nyɛ́ɛri lè làrigèle myɛ ni sìnvɔrɔ ni.

² Wi maa jo: «Kútiijoowaa maa pye kègaa ni, wi da ni fɛ̀ɛgí Kolocɔlɔɔ na í, wi si da wɔ́ɔ ni syɔɔn faala córo í.

³ Lɔgucewaa si maa wɔ́ɔ̀ pye yaà kěgi bee ni, a wi i syée kútiijoow bee ma ni taʔala n sa ni gi nyuu wi ma níì jo: ‹Mi tànʔa kaan mii ma, mí mii syɔɔ mii kàsiitun-nyɛ́nw ma.›

⁴ A gi làla saʔa kwɔ́ɔ wi ga yére gi ni í. Koro kàdoʔo ma a wi kɔ́ɔ̀ gi joo wiyɛɛ fúngi ni níì jo: ‹Alí ki ga caa wírè pye mii o fɛ̀ɛgí Kolocɔlɔɔ na í, mii si wɔ́ɔ o syɔɔn faala córo í,

⁵ kàjáa àmɛɛ lɔgucew naa maa ni mii fɔ̀rɔgí ni caanri lè, mii a tànʔa kaan wi ma, koro ga pye wi si a ní kɔ́ ba ra mii fɔ̀rɔgí í.› »

⁶ A Kàfɔw níì jo: «Syɛ́ɛnree sínnɛ fun kútiijoow joo lè, yele n di lóʔo.

⁷ Kolocɔlɔɔ syɛɛnnyɛnɛ-wòlobèle si be wi yiri lè canʔa ní yébilige, wi a tɔ̀ʔɔ́ tànʔa kaan bele bee ma ì? A wi a fúngi nyíngi lé be dɛ̀ɛmɛni kurugo?

⁸ Mii a gi joo yele ma, wi a wári tànʔa kaan be ma. Koro ní ki myɛ ní Syɔɔn-pya ga pan, a wi a ba tágali nyaa lé naa tári na?»

Farisiw ní wálisyɔɔw kàseele

⁹ Syɛ́ɛnbèle bele pe be sɔ̀ngumi taʔa peyɛɛ na ní i sɔ̀ngí poro n sín lè, pe si o wozanbèle córo yafyɛn í, a Zyezu kàseeli naa wáa bele bee ma níì jo:

¹⁰ «Nànbēle siin maa kári kpɔ́ʔɔrɔli kpaʔa ma sa Kolocɔlɔɔ nyɛ́ɛri. Wàa maa pye Farisio, wee si i nyɛ wálisyɔɔɔ.

¹¹ A Farisiw yìri n yére ní i nyɛ́ɛrigi naa nyɛ́ɛri bi wiyɛɛ gbɔ́ʔɔ níì jo: ‹Kolocɔlɔɔ, mii i bariga kaangi mɔ ma, níì cán mii ní syɛɛnsanbèle o nyɛ sèjira í, poro bele be nyɛ lè syɛɛnnɔʔɔrɔbèle, ní syɛɛnnaa-sìnzinbèle, ní ceyuubèle, mii wɔ́ɔ o nyɛ àmɛɛ wálisyɔɔw naa nyɛ lè í.

¹² Cégboolo o cégboolo mii i súnw nii tɔlɔyɔ siin, yáriree myɛ mii taagi lè, mii i di yáʔaw wóo ni kaangi mɔ ma.›

¹³ Kàjáa a wálisyɔɔw yére tɛɛ̀leelige ni, àlí wi ga fɔ̀lɔ bi wi nyúngi yìrige ǹjoʔo ma bi nyɛ̀ʔɛni wéle í, ní i wiyɛɛ gbúmɔn fìcibigi ni níì jo: ‹Kolocɔlɔɔ, mi nyinimɛ taa mii na, mii wee wi nyɛ lè kapeebyeo.›

¹⁴ Mii a gi joo yele ma, nǎnw bee n kári ní tànʔa ní wi kpaʔa ma, Farisiw si ga gi taa í. Níì cán syɔɔn o syɔɔn wi wiyɛɛ gbɔ́ʔɔgi lè, pe a ba wee bee cɛ́rɛ, wee si wi ga ni wiyɛɛ jɛ́rɛgi lè, pe a ba wee bee kpɔ́ʔɔ.»

Zyezu n dùbaw kpéʔele pìíbèle pèle ma

¹⁵ Pe maa ni maa ní pìiyilibèle ní Zyezu ma koro ga pye wi ba tánga be na. Amɛɛ wi pìitamabèle be nyaa lè pe i maa, a be i fúlo be na.

¹⁶ Kàjáa a Zyezu pìiyilibèle yeri níì jo: «Ye pìíbèle yaʔa paa maa mii ma, ki ga yɛlɛ ye be lúrugo í. Níì cán Kolocɔlɔɔ fǎngi i nyɛ pèle wóʔo, bele be nyɛ àmɛɛ pìíbèle naa nyɛ lè.

¹⁷ Mii a gi joo yele ma kányɛʔɛ ni, syɔ́ɔnwee ga pye wi ga fɔ̀lɔ Kolocɔlɔɔ fǎngi na àmɛɛ pyà nyɛ lè í, wee bee a tée jée gi ni í.»

Lɔ́ri fɔ́lɔ kéele

¹⁸ A kùndigiwaa Zyezu yíbe níì jo: «Tamafɔjǎnw, nyàʔá gi yɛlɛ mii í kpéʔele koro ga pye mii í sìibangwɔɔw taa?»

¹⁹ A Zyezu wi pye: «Nyàʔá na mɔ mii yeri wojaɔn? Wàa o beè wojaɔn ní í, kapye Kolocɔlɔɔ nibin ban í.

²⁰ Mɔ n kajoodɛɛngèle cán, ke n jo: ‹Mɔ a kɔ́ kanɔnʔɔrɔ kpéʔele í. Mɔ a kɔ́ syɔɔn kpóo í. Mɔ a kɔ́ yùu í. Mɔ a kɔ́ jànvaa séera kpéʔele í. Máā mɔ tóow ní mɔ nɔ́ɔw kpɔ̀ʔɔrɔ́.› »

²¹ A wi jo: «Nlaa yaà mii cárimi làla ni, mii n tundunri bee myɛ cò.»

²² Amɛɛ Zyezu dee bee lóʔo lè, a wi wi pye: «Keele nibin n sèʔê fɔ̀n mɔ ma, loro li nyɛ mi sa mɔ kɔ́lɔ yáriri myɛ pára mi lɛɛ foomɔfɔbèle na, lɔrɔ a pye mɔ ma nyɛ̀ʔɛni na. Koro kàdoʔo ma máā maa mi ba taʔa mii na.»

²³ A wi ga syɛ́ɛnri bee lóʔo, a wi yɛ́ɛgi tɔ̀nɔ n tanʔa wi na, níì cán wi lɔ́ri maa tɔ̀nɔ n nɛʔɛ gbanʔama.

²⁴ A Zyezu ga wi nyaa àmɛɛ wi yɛ́ɛgi tanʔa lè, a wi jo: «Bele má lɔ́ri nyɛ lè, pe jéeganmi n tɔ̀nɔ n gbàn Kolocɔlɔɔ fǎngi ni.

²⁵ Níì cán fàlibaʔa jéevorolo n wɛ́ʔɛri sàriweele ni n sɔ̀lɔ lɔrɔfɔlɔ jéeganmi na Kolocɔlɔɔ fǎngi ni.»

²⁶ Bele be syɛ́ɛnri bee lóʔo lè, a be jo: «Wìí si wi a gbǎn syɔɔ?»

²⁷ A Zyezu be yari: «Gee gi syɛ́ɛnbèle jáa lè, gee bee a gbǎn Kolocɔlɔɔ jáa nyáana í.»

²⁸ A Pyɛri wi pye: «Wéle, wolo n wolo kɔ́lɔ yáriri yaʔa níì taʔa mɔ na.»

²⁹ A wi be pye: «Mii a gi joo yele ma kányɛʔɛ ni, syɔ́ɔnwee wi ga wi kpáagi yaʔa lè ní wɔ́ɔ̀ wi céw, ní wi senyɛnbèle, ní wi seefɔbèle, ní wi pìíbèle yaʔa Kolocɔlɔɔ fǎngi kéele na lè,

³⁰ wee bee a di saʔa taa bi sɔ̀lɔ dulunyanw naa ni, si ní sìibangwɔɔw taa nyɛ̀ʔɛna.»

Zyezu n wi kùúw ní wi nyányirili kéele joo tɔdaanri wógi na

³¹ A Zyezu wi pìitamabèle kɛɛ ní siin yeri n kàri kɔlɔ̀ na ní sáà be pye: «Wéle, wolo i syée bele Zyerusalɛmi ma. Syɛ́ɛnree myɛ kanyaajoobèle da sɛ́bɛ lè Syɔɔn-pya kéeli na, ti a sa foro.

³² Níì cán pe a sa wi le syɛɛnfeleyaa kɔ́yɔ ni pe sa ra peyɛɛ nyɛ́nɛ wi na, sáā wi teeri, sáā tɛ́ɛri wáa wi na,

³³ si wi kpúmɔn ní sapile ní, si náa wi kpóo. Wi si a nyán candaanri wógi na.»

³⁴ Kàjáa wi pìitamabèle ga kérigèle bee làa faala kɔ́rɔ cán í. Syɛ́ɛnri bee maa làra be na. Dee wi joo be ma lè, pe da di kɔ́rɔw cán í.

Zyezu n fúunnaɔn paʔa

³⁵ Amɛɛ Zyezu sa ni nùuní Zyeriko na lè, fúuɔn maa pye yaà wodɛ́ɛɔn ní kólogi nyɔ́ɔ na ni yáriri nyɛ́ɛri syɛ́ɛnbèle ma.

³⁶ Amɛɛ si syɛ́ɛnmi ba ni sɔ̀lɔ́ lè á fúunnanw bi kàfulogi lóʔo, a wi be yíbe níì jo: «Ba nyàʔá gi yaà?»

³⁷ A be wi yari: «Zyezu wi sɔ̀lɔ́, wi lè Nazarɛti ye wów.»

³⁸ A wi yákpoli wáa níì jo: «Zyezu, mɔ wi lè Davidi Jáaw, nyinimɛ taa mii na.»

³⁹ Syɛ́ɛnbèle be pye lè yɛʔɛ̀ ma, a poro i fúlo wi na níì jo wi pyèri. A wi náa i yákpoli wáa gbanʔama n sɔ̀lɔ níì jo: «Davidi Jáaw, nyinimɛ taa mii na.»

⁴⁰ A Zyezu yére níì be pye paa maa ní wi ní. A wi ga baa nan Zyezu na, a Zyezu wi pye:

⁴¹ «Nyàʔá mɔ caa mii í kpéʔele mɔ ma?» A wi jo: «Kàfɔw, mii i caa mii í tɛ́nɛ da nyaagi.»

⁴² A Zyezu wi pye: «Maa nyaagi, mɔ tágali n mɔ pɔʔɔ.»

⁴³ A wi fala ni nyaagi, níì taʔa Zyezu na ni Kolocɔlɔɔ kpɔ̀ʔɔrɔ́. Syɛ́ɛnbèle bele myɛ be gee bee nyaa lè, a be i Kolocɔlɔɔ sòoló.