Luki 17 - Cebaara Bible 2010

Kapeeli ní kùsuluzyɔɔri

¹ A Zyezu gi joo wi pìitamabèle ma níì be pye: «Kérigèle ge syɛ́ɛnbèle pùuní ni légi kapeebyeri ni lè, ke a tɔ̀nɔ́ gbǎn fɔ̀n beè í, kàjáa wee báriga ni syɛ́ɛnbèle a pùuni lè, wɔʔɔli a pye wee bee na.

² Sáni wi pìipiigèle naa làa nibin kaan li lúru kàdoʔo ma lè, ki a pɔ́rɔ wi ma pe tírekpɔʔɔ pwɔɔ wi yátiigi ni, si wi wáa sólomi lòkpɔʔɔ ni.

³ Yaa yeyɛɛ kɔ̀rɔsíi. Mɔ senyɛnwaa ga kapeele kpéʔele mɔ na, mi jo ní wi ní, wi ga kàdoʔo wáa wi kapeeli ma, mi wi kùsulugi syɔɔ.

⁴ Wi ga ni kapeegèle kpéʔele mɔ na cángi nibin ni n baa taa tɔlɔyɔ kɔrɔsiin, ní wɔ́ɔ i syée mɔ ma n baa taa tɔlɔyɔ kɔrɔsiin n sa ni gi nyuu níì jo: ‹Mii n kàdoʔo wáa mii kapeegèle ma, maa wi kùsulugi syoo.› »

Tágali

⁵ A pìitunbèle gi joo Kàfɔw ma níì wi pye: «Mi kàa fàra wolo tágali na.»

⁶ A Kàfɔw be yari: «Alí yele tágali ga maa pye àmɛɛ mutaridi tíige piifalila nyɛ lè, yele mǎà dée gbǎn gi joo miriye tíigi naa ma si gi pye: ‹Mi kɔ́n mi sa cɔ́rɔ sólomi lòkpɔʔɔ ni,› ki mǎà dée lóʔo yele ma.

Gee falipyew yɛlɛ da kpéʔele lè

⁷ «Wìí syɔ́ɔn wi naa yele ni falipyeo ga pye wi ma ni fála, wàlá a wi i yaweere nàʔá, wi ga yìri ségi ma n pan, mɔ a ba wi pye lé: ‹Ba tɛ́ɛn kelekele mi lìi?›

⁸ Eʔe, mɔ a gi joo wi ma si wi pye: ‹Mi mii lìíli sámaga, mí mɔ búroyi fàli máā lìíli kaangi mii ma bi taa mii í lìi gbɛnʔɛnɛ si gbaa, koro kàdoʔo ma mɔ a náa miyɛɛ daa bi lìi si gbaa.›

⁹ Kapye falipyew bee n gi kpéʔele àmɛɛ wi kàfɔw jo lè, a gi yɛlɛ lé wi wi syáanri gee bee na? Eʔe.

¹⁰ Anbée si gi wɔ́ɔ̄ nyɛ yele ma. Gee Kolocɔlɔɔ joo yele í kpéʔele lè, lǎli ni yele gee bee myɛ kpéʔele n kwɔ́ɔ lè, ki n yɛlɛ yele í sèʔé jo: ‹Wolo i nyɛ tɔ̀nɔ fun falipyebèlē, gee wolo da yɛlɛ bi kpéʔele lè, gee bee yagana wolo kpéʔele.› »

Zyezu n yaanyɛɛnmɛfɔɔlɔ kɛɛ pɔʔɔ

¹¹ Lǎli ni Zyezu pye kólogi na ni syée Zyerusalɛmi ma lè, a wi sa ni forogi Samarii tári ní Galile tári nínge ni.

¹² A wi ga sa ni jǐn kègaa ni, a yaanyɛɛnmɛfɔɔlɔ kɛɛ i wi fàrá, níì yére tɛɛ̀leelige ni,

¹³ ní i yákpogèle wáa níì jo: «Zyezu, mɔ wi lè wo Kàfɔw, mi nyinimɛ taa wolo na.»

¹⁴ A Zyezu ga be nyaa a wi be pye: «Yaa syée ye sa yeyɛɛ dɛ̀ɛn sáriga-wòlobèle na.» Amɛɛ be syée lè, a be pɔʔɔ n nyɔɔ.

¹⁵ A wàa nibin ga gi nyaa àmɛɛ woro pɔʔɔ lè, a wi lúru ni Kolocɔlɔɔ kpɔ̀ʔɔrɔ́ ní yákpogbɔɔlɔ ní ni maa,

¹⁶ ní baa too n wi yɛ́ɛgi cíbele Zyezu taana, níì bariga kaan wi ma. Wi si maa pye Samarii ye wóo.

¹⁷ Lǎli bee ni a Zyezu jo: «Syɛ̀ɛnnɛ kɛɛ ban be pɔʔɔ n nyɔɔ ì? Sán si bele kpanjɛrɛ nyɛ?

¹⁸ Syɛ́ɛnbèle bee wàa nibin ga taa si lúru naa ba Kolocɔlɔɔ kpɔ̀ʔɔrɔ lé í, kapye nibɔnnanw naa ban í?»

¹⁹ Níì wi pye: «Yìri maa syée, mɔ tágali n mɔ pɔʔɔ.»

Kolocɔlɔɔ fǎngi panna kéele

²⁰ Farisibèle maa Zyezu yíbe níì jo: «Làlìí ni Kolocɔlɔɔ fǎngi a pan?» A wi be pye: «Kolocɔlɔɔ fǎngi a tée pan syɔɔn í gi wéle nyaa í.

²¹ Pe si a wɔ́ɔ gi joo si jo: ‹Ye wéle, ki i naa gee,› wàlá ‹ki i yaà gee› í. Níì cán Kolocɔlɔɔ fǎngi i nyɛ yele níngi ni.»

²² A wi gi joo pìitamabèle ma níì jo: «Canyaa a kɔ́ ba pye, yee ni yele a tɔ̀nɔ́ da caa bi Syɔɔn-pya cángaa nibin nyaa lè, yele si a gi nyaa í.

²³ Pe a kɔ́ ba gi joo yele ma si yele pye: ‹Ye wéle nɛɛ yaa,› wàlá ‹nɛɛ naa.› Ki si ga yɛlɛ yele í kári yaà í, ki ga wɔ́ɔ̀ yɛlɛ yele í taʔa be na í.

²⁴ Níì cán àmɛɛ nyɛ̀ʔɛni nyɛ́ʔɛnɛmɛ gbɛɛnmɛ gáà yiri nyɛ̀ʔɛni kàbangaa nibin ma fwɔɔ n sáà nan kàbangee na kánmee na lè, ànbée Syɔɔn-pya a wɔ́ɔ ba pye wi canbangi na.

²⁵ Kàjáa sáni gee bee í kpéʔele lè, ŋàʔanaga gii fwɔɔ wi tɔ̀nɔ́ wɔʔɔ kèlē saʔa ni, tɔ́ɔliw naa syɛ̀ɛnnɛ si wi cée.

²⁶ Amɛɛ ki da pye lè Nowe lǎli ni, ànbée ki a wɔ́ɔ ba pye Syɔɔn-pya lǎli ni.

²⁷ Níì cán syɛ́ɛnbèle maa ni líi, ní i gbo, ní i cèpɔrigi kpéʔele, ní wɔ́ɔ i be pìíbèle kaangi pe i be pɔri, níì kòro gee bee myɛ na ni kpéʔele n taa n sáà nan Nowe cânjeegi na kɔ́rɔkpɔɔgi ni. A lònɛʔɛgi pan n baa pe myɛ kpóo.

²⁸ Ki si a wɔ́ɔ ba pye àmɛɛ ki da pye lè Lɔti lǎli ni. Syɛ́ɛnbèle maa kòro ni líi, ní i gbo, ní i yáriri syoo, ní wɔ́ɔ i pára, ní i fála, ní i kpáayi faanri.

²⁹ Kàjáa cángee na Lɔti yiri lè Sodɔmi ni, a náagi ní dìrigíw yìri nyɛ̀ʔɛni na n baa too àmɛɛ zàʔá nyɛ lè n pe myɛ kpóo.

³⁰ Anbée si ki a wɔ́ɔ ba pye cángee na Syɔɔn-pya a ba wiyɛɛ dɛ̀ɛn lè.

³¹ Cángi bee na wee ga pye lè binge ǹjoʔo ni, wi kɔlɔ̀ yáriri si i yaà bíngi ni, ki ga yɛlɛ wi tìgí jée gi ni bi jo woro a di láa í. Wee wi ga wɔ́ɔ̀ pye lè seʔe ni, ki ga yɛlɛ wi lúru kári kàʔa ma bi jo woro a sa wi yáriri láa í.

³² Ki n yɛlɛ ye sɔ̀ngi ye taa Lɔti céw kéele na.

³³ Wee wi ga ni caa bi wi sìíw syɔɔ lè, wee bee a bɔ̀nɔ wi ni. Wee si wi ga bɔ̀nɔ wi sìi ni lè, wee bee a ba wi woò taa.

³⁴ Mii a gi joo yele ma, cángi bee yébilige ni syɛ̀ɛnnɛ siin a pye yasinɛgɛ nibin na, pe a wàa nibin láa si wàa yaʔa.

³⁵ Càbala siin a pye bi pínɛ da tire, pe a wàa nibin láa si wàa yaʔa.

³⁶ [Nànbēle siin a pye seʔe ni, pe a wàa nibin láa si wàa yaʔa.]»

³⁷ A pìitamabèle wi pye: «Kàfɔw, sán gee bee a kpéʔele?» A wi be yari: «Yakuugo ga pye tɛ́ɛgee ni lè, nɛɛ bee kàcɔʔɔri a tiyɛɛ gbóʔoro.»