Luki 16 - Cebaara Bible 2010

Lɔ́ri kakarigaɔ wi cìlige lè

¹ A Zyezu níì wi pìitamabèle pye: «Nànwaa maa pye lɔrɔfɔlɔ, wi si maa wàa láa n télege wi pye woro lɔ́ri kakarigaɔ, a wàa kɔ́ɔ̀ kári lɔ́ri fɔ́lɔ ma n sáà gi joo n tɛ̀ɛn wi na àmɛɛ wi lɔ́ri kakarigaɔ wi lɔ́ri nyɔʔɔrɔ lè.

² A lɔ́ri fɔ́lɔ wi lɔ́ri kakarigaɔ yeri ní baa wi pye: ‹Gee mii lúro mɔ kéeli na lè, mɛ̀ɛ́ gi nyɛ n sɛ́ɛ? Ki n yɛlɛ mi córomi kpéʔele mí mɔ fáliw kéele tɛ̀ɛn, wee mɔ kpéʔele lè, níì cán mɔ a ní gbǎn pye mii lɔ́ri kakarigaɔ í.›

³ A wi lɔ́ri kakarigaɔ gi joo wiyɛɛ fúngi ni níì jo: ‹Nyàʔá mii a kpéʔele àmɛɛ mii kàfɔw a mii yirige fáliw ni lè? Mii fánʔa si o nyɛ vàlá na í, á nyɛ́ɛrigi fɛ̀ɛrɛ si wɔ́ɔ i mii taagi.

⁴ Gee mii a kpéʔele lè koro ga pye wi ga baa mii yirige fáliw ni, syɛ́ɛnbèle í da mii sámagi da có cama be kpáayi ni lè, mii n gee bee cán tɔ́ɔliw ni.›

⁵ A wi wi kàfɔw fwɔ́ɔgéle fɔɔlɔ myɛ yeri nibin nibin ní baa wozeliw pye: ‹Mii kàfɔw fwɔ́ɔlɔ li nyɛ mɔ na lè, jòorí wii?›

⁶ A wee bee jo: ‹Sìngbonyɛnyɛ dabata.› A wi wee bee pye: ‹Mɔ fwɔ́ɔli sɛ́bɛ láa mi tɛ́ɛn mí sìngbonyɛnyɛ togoye siin ní kpɔrigɔ sɛ́bɛ kelekele.›

⁷ Koro kàdoʔo ma a wi níì gi joo wàa nikwɔɔ ma níì jo: ‹A mɔ, wi jòorí wi nyɛ mɔ na?› A woro jo: ‹Syɔ̀ɔ̄lɔ gɔnvaʔanyɛnyɛ saala kagunɔ.› A wi wee bee pye: ‹Mɔ fwɔ́ɔli sɛ́bɛ láa mi gɔ̀nvaʔanyɛnyɛ saala sicɛrɛ sɛ́bɛ.›

⁸ A kàfɔw bee wi lɔ́ri kakarigaɔ kpɔ́ʔɔ, woro wee wi pye lè syɛɛnnaa-sìnzinw, àmɛɛ wi gee bee kpéʔele lè ní sícilimɛ ní. Níì cán dulunyanw naa pìibēle n cìlige n be syɛɛnnyɛnbèle kèlē cán n sɔ̀lɔ gbɛ̀ɛ́nmi pìibēle na.

⁹ Mii a tɔ̀nɔ́ gi joo yele ma, ki n yɛlɛ yaa tàannyɛ̀nnɛ caa yeyɛɛ na ní dulunyanw naa lɔ́rɔ ní, koro ga pye ti ga kɔ́ baa kwɔ́ɔ, pe sa yele sámaga cò bàngwɔɔ tɛɛkòroyi ni,

¹⁰ wee wi nyɛ lè tágala syɔ́ɔn kapiipiigèle ni, wee bee wɔ́ɔ i nyɛ tágala syɔ́ɔn kakpologèle ni. Wee si wi nyɛ lè syɛɛnnaa-sìnziɔn kapiipiigèle ni, wee bee wɔ́ɔ i nyɛ syɛɛnnaa-sìnziɔn kakpologèle ni.

¹¹ Gee bee na kapye yele ga pye tágala syɛɛnnɛ dulunyanw naa lɔ́rɔ kéele na í, wìí wi a kɔ́ ba lɔ́ri wodelere kàlifáa yele ma?

¹² Ba kapye yele ga pye tágala syɛɛnnɛ wàa nikwɔɔ lɔ́rɔ kéele na í, wìí wi a kɔ́ ba yele tiimaa wóri kaan yele ma?

¹³ Falipyewaa faala a gbǎn báara kùndigibéle siin ma í. Fwɔɔ wàa kéele í wi bɛɛn, wàa wólo si wi dɛ́nɛ, wi a tan wàa na, si wiyɛɛ láagi yirige wàa ni. Yele a gbǎn pye Kolocɔlɔɔ falipyebèlē, si ní pye lɔ́ri falipyebèlē í.»

Zyezu kajoogèle kèle

¹⁴ A Farisibèle ga kérigèle bee myɛ lóʔo Zyezu ma, a be i wi tɛ́ʔɛ, níì cán lɔ́ri kéele n be dɛ́nɛ n sɔ̀lɔ.

¹⁵ A wi be pye: «Bele be tànʔa kaangi peyɛɛ ma syɛ́ɛnbèle nyɛ́nɛ na lè, poro be nyɛ yele. Kàjáa Kolocɔlɔɔ n yele fúnyi cán. Níì cán kéelee li líbe lè syɛ́ɛnbèle nyɛ́nɛ na, lee bee i Kolocɔlɔɔ níma.

¹⁶ Mowizi làlwaw sɛ́bɛ, ní kanyaajoobèle syɛ́ɛnrɛ ti da ni syɛ́ɛnbèle kàragí fwɔɔ n taa n baa nan Zyan lǎli na. Nlaʔa lǎli bee na pe i Kolocɔlɔɔ fǎngi syɛɛnjóocànra nyuu, syɛ́ɛnbèle myɛ si i ŋàʔaná ni jǐn gi ni.

¹⁷ Nyɛ̀ʔɛni ní tári kwɔ́ɔlɔ si n wɛ́ʔɛri Mowizi làlwaw syɛɛnkan-biipiilaa sàala na.

¹⁸ Syɔɔn o syɔɔn wi wi cɔɔ̀ yaʔa níì wàa nikwɔɔ pɔri lè, wee bee n ceyuugo kpéʔele. Céwee nàɔn si ga wi yaʔa lè, wee wi ga wee bee pɔri lè, woro n wɔ́ɔ̀ ceyuugo kpéʔele.

Lɔ́ri fɔ́lɔ ní Lazari kéeli

¹⁹ «Nànwaa maa pye yaà lɔrɔfɔlɔ, wi maa ni lɔgbanra faninyɛɛnw nii n náà fàra fànicàn-dèlewaa nikwɔɔ na, ní i fànʔafɔbèle lìijànna líi, ní i fundaanra kpéʔele canʔa o canʔa.

²⁰ A nànwaa si wɔ́ɔ̀ pye yaà foomɔfɔlɔ pe i wi yiri Lazari, wi maa pye wozinɛɔ ní lɔ́ri fɔ́lɔ nìkpaanweele nyɔ́ɔ na, namira maa pye wi céri tɛ́ɛyɛ myɛ na.

²¹ Wi maa ni sɔ̀ngí bàā suwologiri líi, dee di wologi lè lɔ́ri fɔ́lɔ tàbali láara ni. Alí pɔ́nbèle maa ni wi námiri laala.

²² A foomɔfɔw baa kùu, a nyɛ̀ʔɛni tundunbéle pan n baa wi láa n sáà télege Abirahami taana. A lɔ́ri fɔ́lɔ wɔ́ɔ baa kùu, a be wi tɔ́n.

²³ N wi yaʔa tɛɛwɔʔɔgi ni a wi kɔ́ɔ̀ wi nyǔngi yìrige n wéle n Abirahami nyaa tɛɛ̀leelige ni, ní wɔ́ɔ̀ Lazari nyaa wi taana.

²⁴ A wi yákpoli wáa níì jo: ‹Mii tóo Abirahami, mi nyinimɛ taa mii na, mí Lazari tórigo jàngó wi sa kabeli fínaana tàmi lǒgi ni wi ba taʔa mii ma nyínni na koro ga pye li nyíngi. Níì cán mii i naa ni wɔʔɔ ni caanri náagi naa fúngo ni.›

²⁵ Kàjáa a Abirahami wi pye: ‹Ni pyà, mi sɔ̀ngi mi taa gi na bi cán mɔ maa mɔ yacanri myɛ taa n kwɔ́ɔ mɔ wéemi làla ni, á Lazari yapeeri taa, tɔ́ɔliw ni wi i nyɛ yɛɛ̀nyinge na, á mɔ si i nyɛ wɔʔɔgi ni.

²⁶ Yarigaa ní i yaà, koro gi nyɛ weekpɔɔ-cùrugo i nyɛ wolo ní yele níngi ni, koro gi gi kaan bele pe ga ni caa lè bi yìri nɛɛ naa bi kári yaà yele ma, pe fanʔa a taa í. Pèle a wɔ́ɔ gbǎn yìri nɛɛ bee bi pan naa wolo ma í.›

²⁷ A lɔ́ri fɔ́lɔ sèʔê jo: ‹Mii tóo, kapye koro gii, mii i mɔ nyɛ́ɛri mi wi tórigo mii tóow kpaʔa ma.

²⁸ Níì cán senyɛ̀nnɛ kagunɔ i yaà mii ma nànbēle. Ki n yɛlɛ wi sa be sàmi koro ga pye poro a wɔ́ɔ kɔ́ pan tɛɛwɔʔɔgi naa ma í.›

²⁹ A Abirahami wi pye: ‹Mowizi ní kanyaajoobèle syɛ́ɛnrɛ i yaà be ma, ki n yɛlɛ pe dee bee lóʔo.›

³⁰ A lɔ́ri fɔ́lɔ jo: ‹Eʔe, mii tóo Abirahami, kàjáa wàa ga yiri kúbèle nínge ni n kári yaà be ma, pe a kàdoʔo wáa pe kapeegèle ma.›

³¹ A Abirahami wi pye: ‹Kapye pe ga Mowizi ní kanyaajoobèle syɛ́ɛnrɛ lóʔo í, àlí wàa ga nyán n yiri kúbèle nínge ni, pe fúnyi a sèʔé kàri í.› »