Luki 11 - Cebaara Bible 2010

Zyezu ní nyɛ́ɛrigi

¹ Cangaa Zyezu maa ni Kolocɔlɔɔ nyɛ́ɛri tɛɛgaa ni. Lǎli ni wi kwɔ́ɔ lè, a wi pìitamawaa wi pye: «Kàfɔw, mi wolo tama nyɛ́ɛriganmi na àmɛɛ Zyan da wɔ́ɔ̀ wi pìitamabèle tama kánmee na lè.»

² A wi be pye: «Yele ga ni Kolocɔlɔɔ nyɛ́ɛri lǎlee ni lè, ye jo: ‹Wolo Tóow! Ki n yɛlɛ mɔ mɛ́ɛgi í da kpɔ̀ʔɔrɔ́. Mɔ fangi sáā maa!

³ Yaliiree ti a gbǎn wolo yɛlɛ lè, maa dee bee kaangi wolo ma canʔa o canʔa.

⁴ Mí wolo kapeegèle kùsulugo syɔɔ, níì cán bele be kapeegèle kpéʔele wolo na lè, wolo tiimaa wɔ́ɔ i bele bee kùsulugo syoo. Ki ga yɛlɛ mɔ í yarigaa yaʔa gi wolo kárima bi lége kapeele ni í.› »

⁵ A wi níì be pye: «Tàannyɛnnɛ ga pye yele wàa ma, á wi kári wi ma nyǐnlɛʔɛ na n sáà wi pye: ‹Ni tàannyɛnnɛ, búrubéle taanri fwɔ́ɔlɔ le mii na,

⁶ níì cán mii tàannyɛnwaa n yìri tánʔana na n baa tìrige mii na, yarigaa si o nyɛ mii ma bi kaan wi ma í.›

⁷ Wi ga kòro yaà kpáagi fúngo ni níì wi yari: ‹Mɔ a kɔ́ mii fɔ̀rɔ í, mii n kɔ̀rigi sɔ̀ʔɔ n kwɔ́ɔ, níì sínɛ ní mii pìíbèle ní, mii a gbǎn yìri bi wi kaan mɔ ma í,›

⁸ mii a gi joo yele ma, àlí ki ga pye wi a yìri bi wi kaan wi ma tàannyɛnnɛgi kéele na í, wi a yìri bi wi màkonyɔɔri búrubéle myɛ kaan wi ma àmɛɛ wi kɔ́ɔ̀ woro nyɛ́ɛri n mɔn lè.

⁹ Mii a ní gi joo yele ma, yaa nyɛ́ɛri, ye a ra taagi. Yaa caa, ye a ra nyaagi. Yaa kɔ̀rigi kólo, pe a gi múgu yele ma.

¹⁰ Níì cán syɔɔn o syɔɔn wi nyɛ́ɛri lè, wi i taagi, wee wi caa lè, wi i nyaagi, wee wi kɔ̀rigi kólo lè, pe a gi múgu wi ma.

¹¹ Wìí wi naa yele ni, jaafɔlɔ ga pye wi ma á wi wi nyɛ́ɛri búru na, wi a kàdɛnɛgɛ kaan lé wi ma? Wàlá wi ga fyáā nyɛ́ɛri wi ma, wi a wàbiga kaan lé wi ma fáw sìndɛʔɛ ni?

¹² Ba wi ga wɔ́ɔ̀ gòcɛnnɛ nyɛ́ɛri wi ma, wi a náaɔ kaan lé wi ma?

¹³ Koro na àmɛɛ yele pee lè ní sèʔê gi cán ki n yɛlɛ yele í da yacanri kaangi yele pìíbèle ma, Tofɔw wi lè nyɛ̀ʔɛni na, woro a ra Pìicǎnni kaangi wi nyɛ́ɛrifɔbèle ma bi sɔ̀lɔ yele na ì?»

Zyezu n syɛɛnlurugoro kaan kolomɔ kéelaa na pe joo n taʔa wi na lè

¹⁴ Zyezu maa ni màde-boboo nɛnɛ bi yirige nànwaa ni. Lǎli ni màdew yiri lè, a boboow fala ni nyuu, a syɛ́ɛnmi i káama gi na.

¹⁵ Kàjáa be pèle maa jo: «Bɛlizebuli bárigaw ni wi màdebèle nɛnɛ ni yirigi syɛ́ɛnbèle ni, wi lè màdebèle kàfɔlɔ.»

¹⁶ A pèle nikwɔɔlɔ wi nyɛ́ɛri níì jo wi nyɛ̀ʔɛni fɛ̀ɛwaa kpéʔele wi tɛ̀ɛn poro na, gee bee nyúngo maa pye bi wi pye wéle.

¹⁷ Amɛɛ si wi be sɔ̀nguri cán lè, koro na wi be pye: «Tára o tára fanʔa ga ni túngu ní kiyɛɛ ní, fǎngi bee a kálagi, narigbaʔa si ga wɔ́ɔ ni túngu ní kiyɛɛ ní, ki a jaa.

¹⁸ Amɛɛ yele jo lè Bɛlizebuli bárigaw ni mii màdebèle nɛnɛ ni yirigi syɛ́ɛnbèle ni, kapye Sutanaw i túngu ní wiyɛɛ ní, mɛ̀ɛ́ wi fǎngi a gbǎn báriga bi sɛ́ɛ?

¹⁹ Mii ga ni màdebèle nɛnɛ ni yirigi Bɛlizebuli bárigaw ni, wìí báriga ni si yele jáabèle be nɛnɛ ni yirigi? Koro na yele jáabèle timaa pe a pye yele kútiijoobèle.

²⁰ Kàjáa mii ga ni màdebèle nɛnɛ ni yirigi Kolocɔlɔɔ kabeli báriga ni, ye gi cán Kolocɔlɔɔ fǎngi n nan yele na.

²¹ Yakpaliya ga pye syɛɛnnirio ma lǎlee ni lè a wi i wi kàcooli kɔ̀rɔsíi, wi kɔlɔ̀ yáriri n pye yɛɛ̀nyinge na.

²² Kàjáa nǎnwee si wi ga nìri n sɔ̀lɔ woro na lè, wee bee ga nan wi na níì wi jáa, yakpaliyee na wi da wi sɔ̀ngumi taʔa lè, wi a yee bee nɛnɛ syɔɔ wi ma, si wi kɔlɔ̀ yáriri láa bi lɛɛ pèle nikwɔɔlɔ na.

²³ Wee wi lè wi ga bɛ̀ɛ ní mii ní í, wee bee i túngu ní mii ní. Wee wi lè wi o syɛ́ɛnbèle kpóʔoro ní mii ní í, wee bee i be caragi mii na.

Màdew lúrubanna kéele

²⁴ «Màdeo ga yiri syɔɔn ni, wi n sa ni nyaari ni máari lǒgi fun tɛ́ɛyɛ ni, ni tɛɛ̀ŋɔndaʔa caa. Wi ga gi caa n fɔ̀rɔ, wi n jo: ‹Mii a lúru kári sa jée mii kpáagi ni, gee ni mii da yiri lè.›

²⁵ Wi ga pan ní baa gi nyaa a be gi sámaga n pɛ́ɛ níì yacanra tɛ́ʔɛ yaà gi ni,

²⁶ lǎli bee ni wi n kári n sáà màdebèle pèle kɔrɔsiin yeri n fàra wiyɛɛ na, bele be pee n sɔ̀lɔ woro na lè. Pe n baa jée n kòro yaà syɔ́ɔnw bee ni, lǎli bee kàdoʔo kele n náa baa gbàn n sɔ̀lɔ wozeligèle na wee bee ma.»

Dùbaw wodeleo kéele

²⁷ Lǎli ni Zyezu pye lè syɛ́ɛnri bee joolo na, cewaa maa pye syɛ́ɛnmi nínge ni, a wee bee yákpoli wáa níì jo: «Céwee wi mɔ see lè níì mɔ kaan a mɔ ŋɔri, wee bee i nyɛ dùba pyà.»

²⁸ A Zyezu wi pye: «Ɛɛn, kányɛʔɛ gii, kàjáa bele be Kolocɔlɔɔ syɛ́ɛnri lúro lè ní i gi kpéʔele àmɛɛ gi jo lè, poro be nyɛ dùbaw pìibēle n sèʔê sɔ̀lɔ.»

Pe i kakpɔɔgaa caa

²⁹ Amɛɛ syɛ́ɛnmi piyɛɛ gbóʔoro wi na n wi màʔa lè, a wi séli syɛ́ɛnri na ni nyuu níì jo: «Lǎli naa syɛ̀ɛnnɛ i nyɛ kakolobyebèlē. Pe i kakpɔɔgaa caa, kàjáa kakpɔɔgaa faala a kpéʔele be nyɛnɛ na í, kapye Zyonasi wógi félege ban í.

³⁰ Níì cán kánmee na Zyonasi da baa pye lè fɛ̀ɛ Niniivi ye ma, kánmi bee na Syɔɔn-pya a wɔ́ɔ ba pye fɛ̀ɛ tɔ́ɔliw naa syɛ̀ɛnnɛ ma.

³¹ Céw wi da pye lè fànʔafɔlɔ, woro wee wi da yìri lè canʔa parima ma wòrogulo kàbangi na lè, wi a ba nyán kútiiw canjerige na ní tɔ́ɔliw naa syɛ̀ɛnnɛ ní si kútiiw cáan be na, níì cán wi maa yìri tári láʔala na n pan ba Salomɔn sícilimi syɛ́ɛnrɛ lóʔo, ye wéle, kàa i naa, gee gi kpɔ́ʔɔ n sɔ̀lɔ Salomɔn wógi na lè.

³² Niniivi ye syɛ́ɛnbèle a ba yìri bi yére kútiiw canjerige na ní tɔ́ɔliw naa syɛ̀ɛnnɛ ní si kútiiw cáan be na, níì cán Niniivi ye maa kàdoʔo wáa be kapeegèle ma Zyonasi syɛɛnjóori báriga ni. Ye wéle, kàa i naa, gee gi kpɔ́ʔɔ n sɔ̀lɔ Zyonasi wógi na lè.

Céri fètinnɛ kéele

³³ «Syɔɔn faala o fètinnɛ nii ni téeri tɛɛlaraga ni í, wàlá sɛ̀ʔɛlɛ láara ni í, fwɔɔ wi a li taʔa fètindaʔala na, koro ga pye bele be jǐn lè kpáagi ni, poro í da nyaagi li gbɛ̀ɛ́nmi na.

³⁴ Mɔ nyapili li nyɛ mɔ céri fètinnɛ. Lǎli ni mɔ nyapili ga pye lè wojanna ní, mɔ céri myɛ n pye gbɛ̀ɛnmɛ. Kàjáa mɔ nyapili ga pye li ga nyɔɔ í, mɔ céri myɛ n pye yébilimɛ.

³⁵ Koro na gi yɛlɛ maa miyɛɛ kɔ̀rɔsíi koro ga pye gbɛ̀ɛ́nmi bi nyɛ mɔ ni lè, pi a kɔ́ kàri yébilimɛ í.

³⁶ Gee bee na kapye mɔ céri myɛ i nyɛ gbɛ̀ɛnmɛ, yébilimɛ tɛ́ɛlɛ fun, ti myɛ a ra nyín àmɛɛ fètinnɛ nyín ni gbɛ̀ɛ́nmi yirigi mɔ ma lè.»

Zyezu n kolomɔ kaan Farisibèle ní làlwaw sɛ́bɛwelebéle ma

³⁷ Lǎli ni Zyezu joo n kwɔ́ɔ lè, a Farisiwaa wi yeri níì jo wi sa lìi ní woro ní. A wi sáà jée n tɛ́ɛn bàā líi.

³⁸ Amɛɛ si Farisiw wi nyaa lè wi ga kɔ́yi jée gbɛnʔɛnɛ si náa ra líi í, a gi wi fúngi wɔ́ɔ.

³⁹ A Kàfɔw si wi pye: «Yele Farisibèle i yagbaagèle ní pɛ́ɛgèle kàdoyo jé ni mùú, á yele fúnyi si nyìn kàyuugi sɔ̀ngurɔ ní péemi na.

⁴⁰ Yele nilabalabèle, wee wi yárigi kàdoʔo faan lè, woro wonijanw ban wi wɔ́ɔ̀ gi fúngi faan ì?

⁴¹ Kàjáa yáriree di nyɛ lè yaleyi fúnyo ni, ye dee bee kaan foomɔfɔbèle ma, lǎli bee ni yáriri myɛ a sámaga nyɔɔ yele ma.

⁴² Wɔʔɔli a pye yele na, yele Farisibèle! Níì cán yele i mantiw ní wuruw yáʔa wóo ni kaangi Kolocɔlɔɔ ma, n fàra cɛ́ɛngi yasuuzanra féleye myɛ wóo na, ní si kasingèle ní Kolocɔlɔɔ tàmagi yaʔa, yele maa yɛlɛ bi dée ra gele bee kpéʔele bi fàra toro na.

⁴³ Wɔʔɔli a pye yele na, yele Farisibèle! Níì cán ki n yele dɛ́nɛ bàā tɛ̀ɛ́n kòrikpoloyi na sérikpaayi ni, ní wɔ́ɔ i caa syɛ́ɛnbèle í da yele syáanri syɛɛn-kpoʔolomi tɛ́ɛyɛ ni.

⁴⁴ Wɔʔɔli a pye yele na! Níì cán yele n kɔ̀ɔngēle wíri, gele ge làra lè a syɛ́ɛnbèle i táanri ni sɔ̀lɔ́ ge na, pe si ga gi cán í.»

⁴⁵ A làlwaw sɛ́bɛwelewaa wi pye: «Tamafɔw, àmɛɛ mɔ kérigèle naa nyuu lè, mɔ wɔ́ɔ i wolo círi ní syɛ́ɛnri bee ní.»

⁴⁶ A Zyezu wi yari: «Wɔʔɔli a pye yele na, yele làlwaw sɛ́bɛwelebéle! Níì cán yele i tugoliberi tugu syɛ́ɛnbèle na, yele wàa tiimaa si a fɔ̀lɔ bi kabɛɛlɛ nibin tánga di na í.

⁴⁷ Wɔʔɔli a pye yele na! Níì cán yele i kanyaajoobèle kɔ̀ɔngēle faanri, bi gi taa yele tóolɛɛbèle pe da be kpóo.

⁴⁸ Gee bee pyele i nyɛ séera bi gi tɛ̀ɛn yele n fɔ̀lɔ yele tóolɛɛbèle kakpéʔelegéle na. Níì cán poro pe da ni kanyaajoobèle kúu, á yele si ba ni be kɔ̀ɔngèle faanri.

⁴⁹ Koro na Kolocɔlɔɔ Sícilimi wɔ́ɔ̀ gi joo níì jo: ‹Mii a ra kanyaajoobéle ní pìitunbéle tungu be ma. Pe a sa ra bele bee pèle kúu, sáā pèle wɔʔɔ.›

⁵⁰ Koro ga pye kanyaajoobèle sìsyaan wi téē ŋuu lè nlaa yaà dulunyanw sélimɛ na, wi a gi sìndɛɛgi wòlo lǎli naa syɛ̀ɛnnɛ ni.

⁵¹ Ki a séli Abɛli sìsyaanw na fwɔɔ bi taa sa nan Zakarii sìsyaanw na, woro wee pe da kpóo lè sáriga-wòlo-yafaangi, ní kpɔ̀ʔɔrɔli kpaʔa nínge ni. Mii a tɔ̀nɔ́ gi joo yele ma, wi a gi sìndɛɛgi wòlo lǎli naa syɛ̀ɛnnɛ ni.

⁵² Wɔʔɔli a pye yele na, yele làlwaw sɛ́bɛwelebéle, níì cán làkilewee wi kérigèle cánna kɔrigɔ múru lè, yele n wi láa. Yele tiimaa si ga jée yaà í, bele be caa bi jée yaà lè, á yele poro yérige.»

⁵³ Zyezu yirili kàdoʔo ma tɛ́ɛgi bee ni, a làlwaw sɛ́bɛwelebéle ní Farisibèle fala n séli ni nyuu ni dígi wi ni gbanʔama, ní i wi nyɔ́ɔgi syɛ́ɛnrɛ caa kèlē saʔa ni.

⁵⁴ Pe maa ni wi dɛ́dɛ koro ga pye poro í wi taa cò wi nyɔ́ɔgi syɛ́ɛnrɛ na.