Làlwaw Kaanziin 9 - Cebaara Bible 2010

Isirayɛli ga yɛlɛ ní yafyɛn ní í

¹ «Ki n yɛlɛ mi lóʔo Isirayɛli. Mɔ wi a Zyuridɛnw jeli wee níjanʔa, syɛɛnfeleyee yi nɛʔɛ lè á yi séew wɔ́ɔ̀ nɛʔɛ n sɔ̀lɔ mɔ wów na, mɔ a yee bee tára syɔɔ yi ma bi taa, si wɔ́ɔ kèkpoloyi taa, yee tòbēle be tɔnɔ fwɔɔ n sáà nan nyɛ̀ʔɛni na lè.

² Syɛ́ɛnbèle bee n kpólo níì tɔnɔ. Anaki jáabèle bɛɛ, poro bele mɔ cán lè, poro bele kéele mɔ lóʔo lè a gi jo: ‹Wìí syɔ́ɔn wi a gbǎn yére Anaki jáabèle sige?›

³ Ki n yɛlɛ mi gi cán níjanʔa bi cán Yawe wi lè mɔ Kolocɔlɔw, woro wi a ra syée mɔ yɛ́ɛgi na àmɛɛ naà nyɛ, gee gi sórigolo kpéʔele lè. Woro wi a be kálagi, woro wi a be cáan mɔ yɛ́ʔɛ ma, mɔ a be nɛnɛ yirige yaà, si be kálagi kwɔ́ɔ kelekele àmɛɛ Yawe gi joo mɔ ma lè.

⁴ Lǎli ni Yawe mɔ Kolocɔlɔw ga be ŋɔrigɔ ŋɔrigɔ n yirige yaà mɔ yɛ́ʔɛ ma lè, mɔ a kɔ́ gi joo miyɛɛ fúngi ni í si jo: ‹Mii sínni kéele na Yawe mii lége tári naa ni a mii syɔɔ n taa› í. Níì cán syɛɛnfeleyi bee péemɛ kéele na Yawe a yi nɛnɛ bi yirige yaà mɔ yɛ́ʔɛ ma.

⁵ Mɔ sínni, ní mɔ funviiw báriga ni ban mɔ a jée be tári ni bi di syɔɔ taa í, kàjáa Yawe mɔ Kolocɔlɔw a syɛɛnfeleyi bee yirige yaà yi péemi kéele na. Wi a gee bee kpéʔele koro ga pye kéelee na wi kàli mɔ tofɔlɛɛyi Abirahami, ní Izaaki, ní Zyakɔbi ma lè, wi lee bee foro.

⁶ Koro na ki n yɛlɛ mɔ í gi cán mɔ sínni kéele na ban Yawe mɔ Kolocɔlɔw a tácǎnri bee kaan mɔ ma mɔ í di syɔɔ taa í. Níì cán mɔ i nyɛ líiweepɛɛnnɛ syɛɛnfelege.

Isirayɛli ye kapeeli tɛɛ̀ náapiigi kéele na

⁷ «Sɔ̀ngi mi taa, kánmee na mɔ Yawe mɔ Kolocɔlɔw fúngo tanʔa fìími tára ni lè, mɔ a kɔ́ fɛ̀ʔɛ gee bee na í. Nlaa mɔ canyirigi na Ezyipiti tári ni fwɔɔ n taa a yele baa nan tɛ́ɛgi naa na, yele n pye niceebéle Yawe ma.

⁸ N yele yaʔa Horebi ma a yele Yawe fúngi tanʔa. A Yawe fúngi tɔ̀nɔ n yìri yele kurugo, a wi jo woro a yele kálagi.

⁹ Lǎli ni mii lúgu nyanbelegi na lè bi sa kàdɛnɛyɛ kàlagorigèle syɔɔ ke lè joogaanni kàlagorigēle, loro lee Yawe kpéʔele ní yele ní lè, a mii canya togoye siin ní yébiliye togoye siin kwɔ́ɔ nyanbelegi na, mii ga yaliire lìi í, mii ga lɔ̀ʔɔ gbaa í.

¹⁰ A Yawe kàdɛnɛyi kàlagorigēle siin kaan mii ma, gele na Kolocɔlɔɔ kabeli da sɛ́bɛ lè. Syɛ́ɛnree Yawe da joo nyanbelegi na lè náagi nínge ni, kpóʔoroli canʔa na, toro myɛ ti da pye ge na.

¹¹ Cányi bee togoye siin ní yébiliyi togoye siin fúngo ni Yawe kàdɛnɛyi kàlagorigēle siin kaan mii ma, ke lè joogaanni kàlagorigēle.

¹² A Yawe mii pye: ‹Yìri nɛɛ naa mi wári mi tìgi yaà. Níì cán mɔ syɛ́ɛnbèle mɔ yirige Ezyipiti ni lè, pe n peyɛɛ gálagi. Kólogee mii tɛ̀ɛn be na lè pe n gi yaʔa kelekele. Pe n tɛɛ̀ gbàla n yasungo sámaga peyɛɛ ma.›

¹³ A Yawe mii pye: ‹Mii nyɛ́nɛ i nyɛ syɛ́ɛnbèle naa na, pe i nyɛ líiweepɛɛnnɛ syɛɛnnɛ.

¹⁴ Ki yaʔa mii í be kálagi bi be mɛ́ɛgi kwɔ́ɔ yirige yaà nyɛ̀ʔɛgèle láara ni. Mii si mɔ kpéʔele syɛɛnfelegaa, gee fànʔa ki a kpɔ́ʔɔ lè, ki wɔ́ɔ nɛʔɛ bi sɔ̀lɔ syɛ́ɛnbèle naa na.›

¹⁵ A mii lúru n tìgi nyanbelegi na, nyanbelegi myɛ si i nyɛ naà. Joogaanni kàlagorigēle siin si i nyɛ mii kɔ́yi ni.

¹⁶ A mii wéle n gi nyaa a yele kapeele pye Yawe yele Kolocɔlɔw na. Ncan yele maa tɛɛ̀ gbàla n náapiige niwirige sámaga. Kólogee Yawe da tɛ̀ɛn yele na lè, yele maa gi yaʔa kelekele.

¹⁷ A mii kàlagorigèle siin cò, níì ge wáa ní kɔ́yi siin ní, n jabagi yele nyɛ́nɛ na.

Mowizi n Isirayɛli ye kapeeli kùsulugo nyɛ́ɛri

¹⁸ «Níì niyɛɛ to n cáan tári na n kòro nya Yawe yɛ́ʔɛ ma n taa canya togoye siin ní yébiliye togoye siin àmɛɛ gi pye tɔzeligi na lè, mii ga yaliire lìi í, mii ga lɔ̀ʔɔ gbaa í, kapeegèle myɛ kéele na yele kpéʔele Yawe yɛ́ʔɛ ma lè n kapeʔe pye wi na n wi fúngi tanʔa gbanʔama.

¹⁹ Níì cán mii maa fyáa Yawe fundanʔari ní wi fúngi yìrile na yele kurugo. Yawe fúngi maa tɔ̀nɔ n yìri yele kurugo, n nan wi yele kálagi. Kàjáa Yawe maa níì mii nyɛ́ɛrigi lóʔo kátali bee na.

²⁰ Yawe fúngi maa wɔ́ɔ̀ tanʔa Aarɔn kurugo gbanʔama, fwɔɔ n nan wi wi kálagi. Kàjáa a mii wɔ́ɔ níì nyɛ́ɛri Aarɔn kéeli na lǎli bee ni.

²¹ A mii náapiigi láa, yárigi bee gi pye lè yele kapeeli n gi sórigo náagi ni, níì gi purɔ n kàriga míimɛ àmɛɛ cíbige nyɛ lè, níì cíbigi bee wáa lòcoologi ni, gi fóo ni tíri nyanbelegi na lè.

²² N yele yaʔa Tabɛyera, ní Masa, ní Kiburɔti-Hataava ni, a yele Yawe fúngi tanʔa gbanʔama.

²³ Ní lǎli ni Yawe yele yirige Kadɛsyi-Barineya ni n tórigo lè níì jo: ‹Ye lúgu ye sa tári syɔɔ ye taa, dee mii kaan yele ma lè.› Lǎli bee ni a yele céemɛ kpéʔele n Yawe yele Kolocɔlɔw tundunro cée. Yele ga tága wi na í, yele ga wi jóomi lóʔo í.

²⁴ Yele n pye niceebéle Yawe ma n téè láa yaà cángee na mii yele cán lè.

²⁵ Koro na a mii niyɛɛ to n cáan tári na Yawe yɛ́ʔɛ ma, níì kòro wodoo-zínɛɔ ní kánmi bee na canya togoye siin ní yébiliye togoye siin. Níì cán Yawe maa jo woro a yele kálagi.

²⁶ A mii Yawe nyɛ́ɛri níì jo: ‹Kàfɔw Yawe, mɔ a kɔ́ mɔ syɛ́ɛnbèle kálagi í, pe lè mɔ kɔ́rigi, poro bele mɔ syɔɔ lè mɔ kpɔʔɔgbɔɔri báriga ni, n be yirige Ezyipiti ni sée kɔ́lɔ báriga ní.

²⁷ Sɔ̀ngi mɔ falipyebèle kéele na pe lè Abirahami, ní Izaaki, ní Zyakɔbi. Mɔ a kɔ́ ra syɛ́ɛnbèle naa líiweepɛɛnnɛ, ní be péemi, ní be kapeeli wéle í.

²⁸ Koro ga pye syɛ́ɛnbèle bele tára ni mɔ wolo yirige lè, poro a kɔ́ gi taa bàā nyuu si jo: Táree nyɔ́ɔ Yawe da fàli be ma lè wi da pye bi gbǎn be lége di ni wii í, a be kéeli da wɔ́ɔ̀ wi bɛɛn wii, koro na wi be kɔ́ri n yirige jàngó bi sa be kpóo fìími tára ni.

²⁹ Bi si gi taa pe i nyɛ mɔ syɛɛnnɛ, ní mɔ kɔ́rigɔ, gee mɔ yirige lè mɔ séekpɔɔw, ní mɔ kɔ̂zánʔagi báriga ni.›