Làlwaw Kaanziin 8 - Cebaara Bible 2010

Yawe n Isirayɛli ye tama fìími tára ni

¹ «Tundunri myɛ mii nyuu yele ma lè níjanʔa, ye di sámaga ye cò yáā di kpéʔele jàngó yele í kòro sìi na, sáā nɛʔɛgi, yele si jée bi tári syɔɔ taa, dee kéele na Yawe kàli yele tofɔlɛɛyi ma níì jo woro a di kaan be ma lè.

² Sɔ̀ngi mi taa kólogi myɛ na, gee Yawe mɔ Kolocɔlɔw mɔ kɔ́ri a mɔ tánʔa lè yɛ́ɛgèle naa togoye siin fúngo ni fìími tára ni, koro ga pye wi mɔ tìrige táàma si mɔ sɛʔɛ wéle, bi gi cán gee ki da pye yaà mɔ zɔnw na lè, kapye mɔ a woro kajoodɛɛngèle cò wàlá mɔ a ge cò í.

³ Wi n mɔ tìrige táàma, wi n kateegi yaʔa a gi mɔ jáa, níì mánɛw kaan mɔ ma lìile wee wi lè mɔ da wi cán í, mɔ tóolɛɛbèle da wɔ́ɔ̀ wi cán í. Jàngó bi gi tɛ̀ɛn mɔ na mɔ í gi cán yaliiri yagana lìile báriga ni ban syɔɔn sìi taagi í, fwɔɔ syɛ́ɛnree myɛ di yirigi Yawe nyɔ́ɔgi ni lè, toro bárigaw ni syɔɔn sìi taagi.

⁴ Mɔ búrogi ga lɛɛ n sulugu n láʔa mɔ na í. Mɔ tɔ́lɔgaa ga wɔ́ɔ̀ fɛɛ yɛ́ɛgèle bee togoye siin fúngo ni í.

⁵ Koro na ki sámaga mi cán mɔ fúngi ni mi cán Yawe mɔ Kolocɔlɔw i mɔ kóro àmɛɛ nàɔn wi jaà kóro lè.

⁶ Yawe mɔ Kolocɔlɔw kajoodɛɛngēle sámaga mi cò, máā wi kóloyi táanri, máā fɛ̀ɛgí wi na.

Taali tàanma a kɔ́ mɔ láʔa Yawe na nyɔɔfaligi tára ni í

⁷ «Níì cán Yawe mɔ Kolocɔlɔw a mɔ lége tácànra ni, ti lè lòfóozɔ̀lɔyi, ní púloweegèle, ní tári fúngo lonɛʔɛyɛ, yee yi púlo ni yirigi lè jǐnlɔyi, ní nyanbeleyi ni.

⁸ Bilew, ní orizyew tára dii, n fàra ɛrɛzɛn tíriri, ní děsyaantiiri, ní girenadi tíiri na, olivye tíiri, ní sélogi tára dii.

⁹ Táree ni yele a ra yaliiri líi lè sìnlɛɛ ni yeyɛɛ na, beè lè yafyɛn a tée mɔ fɔ̀n í. Tári bee kàdɛnɛyɛ i nyɛ tunmɔrɔ, toro dee nyanbeleye ni mɔ a ra kanyɛɛnri yirigi lè.

¹⁰ Lǎli ni mɔ ga sa ni líi ni tíngi lè, mɔ a ra Yawe mɔ Kolocɔlɔw kpɔ̀ʔɔrɔ́ tácǎnri kéele na, dee wi kaan mɔ ma lè.

¹¹ Da miyɛɛ kɔ̀rɔsíi, mɔ a kɔ́ fɛ̀ʔɛ Yawe mɔ Kolocɔlɔw na í, si wi kajoodɛɛngèle, ní wi kajoogèle, ní wi làlwaw kèlē cée í, koro gele mii nyuu mɔ ma lè níjanʔa.

¹² Lǎli ni mɔ ga sáà lìi n tín lè, ní lǎli ni mɔ ga sáà kpaacanya faan n tɛ́ɛn yi ni lè,

¹³ lǎli ni mɔ yaweekpologèle, ní mɔ yaweeyiligèle ga baa nɛʔɛ lè, á wálifiiw, ní tɛ́ɛw wɔ́ɔ baa nɛʔɛ mɔ ma, lǎli ni mɔ kɔ́lɔ yáriri myɛ ga baa nɛʔɛ lè,

¹⁴ da miyɛɛ kɔ̀rɔsíi jàngó kpɔɔmɔ a kɔ́ jée mɔ fúngi ni mɔ í fɛ̀ʔɛ Yawe mɔ Kolocɔlɔw na í, woro wee wi mɔ yirige Ezyipiti tári ni lè, púlori kpaʔa ni.

¹⁵ Wi n mɔ kɔ́ri n foro fìimɛ tákpɔɔri naa ni, ti nyɛ lè fyáara wóro ní. Tári bee di nyɛ lè sɔɔnpeere wàbiya, ní náabéle, ní lògbaalaagi tára, bèe lè lɔ̀ʔɔ o nyɛ í, á wi lɔ̀ʔɔ yirige mɔ ma fála-nìrige ni.

¹⁶ Wi n mánɛw kaan mɔ ma fìími tára ni lìile, woro wee wi lè mɔ tóolɛɛyi da wi cán í, jàngó woro í mɔ tìrige táàma si mɔ sɛʔɛ wéle, si gi kàdogi pye mɔ ma fundaanra.

¹⁷ Da miyɛɛ kɔ̀rɔsíi, jàngó mɔ a kɔ́ gi joo miyɛɛ fúngi ni si jo: ‹Mii séew, ní mii kɔ́gi fànʔa báriga ni mii lɔnɛʔɛri naa taa› í.

¹⁸ Sɔ̀ngi mi taa Yawe mɔ Kolocɔlɔw na, woro wee wi lɔ́ri bee taala sée kaan mɔ ma lè, koro ga pye nyɔɔfaligi wi kpéʔele mɔ tofɔlɛɛyi ma lè, wi gi kpéʔele nya àmɛɛ gi nyɛ lè níjanʔa.

¹⁹ Mɔ si ga tɔ̀nɔ n fɛ̀ʔɛ Yawe mɔ Kolocɔlɔw na, níì miyɛɛ daʔa kolocɔlɔbèle pèle nikwɔɔlɔ na ni báara poro ma, ní i kpùmɔnɔ́ pe yɛʔɛ̀ ma, mii a gi joo fílige yele ma níjanʔa si yele pye, yele a tɔ̀nɔ́ kwɔ́ɔ yiri yaà.

²⁰ Syɛɛnfeleyee Yawe a kwɔ́ɔ yirige yaà yele yɛ́ʔɛ ma lè, yele a kwɔ́ɔ yiri yaà yee bee kwɔ́ɔganma na, níì cán yele ga fɔ̀lɔ n lóʔo Yawe yele Kolocɔlɔw ma í.