Làlwaw Kaanziin 7 - Cebaara Bible 2010

Isirayɛli syɛɛnfelegi n yaʔa kɔlɔ̀ na Yawe ma

¹ «Lǎli ni Yawe mɔ Kolocɔlɔw ga sáà mɔ lége lè tári ni, dee ni mɔ a sa jée lè bi di syɔɔ taa, níì syɛɛnfeleyi nɛnɛ mɔ yɛ́ʔɛ ma, yee yi nɛʔɛ lè, yi lè Hɛti ye, ní Giirigasi ye, ní Amɔri ye, ní Kanaan ye, ní Perezi ye, ní Hɛvi ye, ní Yebusi ye, syɛɛnfeleyi kɔrɔsiin, yee yi nɛʔɛ á yi fangi nɛʔɛ n sɔ̀lɔ mɔ wógi na lè,

² lǎli ni Yawe mɔ Kolocɔlɔw ga sáà yi le mɔ kɔ́yi ni lè, a mɔ yi jáa, mɔ a yi kálagi péw. Mɔ a kɔ́ joogaanna kpéʔele ní yi ní í, mɔ a kɔ́ nyinimɛ taa yi na í.

³ Mɔ a kɔ́ bɛ̀ɛ cèpɔrigɔ na ní syɛɛnfeleyi bee ní í. Mɔ a kɔ́ mɔ calipile kaan pe nànbilaa ma í, mɔ a wɔ́ɔ kɔ́ be calipilaa caa kaan mɔ nanbilaa ma í.

⁴ Níì cán pe a mɔ jáabèle léeli mii na, pe sa ra kolocɔlɔbèle pèle nikwɔɔlɔ kpɔ̀ʔɔrɔ́, Yawe fundanʔari si cò naà mɔ kánmi na, wi mɔ kálagi kelekele.

⁵ Gee yele yɛlɛ bi kpéʔele be na lè koro gi nyɛ gee naa, yele a be sáriga-wòlo-yafaanyi jabagi, bi be yasungaangèle tɔ́nʔɔnɔ, si wɔ́ɔ be Asyera tiikóriyi cɛnɛ, bi wɔ́ɔ be yatanyi sórigo ní naà ní.

⁶ Níì cán mɔ i nyɛ syɛɛnfelejànga Yawe mɔ Kolocɔlɔw ma. Yawe mɔ Kolocɔlɔw n mɔ nyɛ́nɛ n wòlo mɔ í pye woro tiimaa syɛɛnfelege syɛɛnfeleyi myɛ nínge ni, yi nyɛ lè tásaligi yɛ́ʔɛ kurugo.

Yawe i wi joogaanni forogi

⁷ «Ki o nyɛ mɔ a jo a yele nɛʔɛ n sɔ̀lɔ syɛɛnfeleyi myɛ na wii, a koro gi kaan a Yawe tan yele na níì yele nyɛ́nɛ n wòlo í. Níì cán yele ye nyɛ syɛɛnfeleyi myɛ wobile.

⁸ Kàjáa a yele kéeli Yawe dɛ́nɛ wii, wi si wɔ́ɔ i caa bi kàligi foro, gee wi da kpéʔele yele tóolɛɛyi ma lè, koro na Yawe yele yirige ní fànnɛʔɛgɛ kɔ́lɔ ní, n yele yirige púlori kpaʔa ni n yaʔa yeyɛɛ ma. Wi n yele syɔɔ n yirige Faraɔnw kɔ́lɔ ni, Ezyipiti fànʔafɔw.

⁹ Koro na gi cán mi cán Yawe mɔ Kolocɔlɔw wi nyɛ Kolocɔlɔɔ Wodelew. Kolocɔlɔw bee wi nyɛ lè tágala syɔ́ɔn, wi i wi joogaanni, ní wi funjǎngi kɔngi fwɔɔ ni nangi bele be tàmaga le ní wi ní, ní i wi kajoodɛɛngèle kɔngi lè, poro yòdaʔayi yìrigēle saala kagunɔw na.

¹⁰ Bele si wi kéeli bɛɛn lè wi i poro wógi sìndɛʔɛ lúrugi be ma zìnmɛ na, ni be kúu. Wee wi kéeli bɛɛn lè, wi a kàdoʔo sige ní woro kálagili ní í, wi a gi sìndɛɛgi lúrugo wi ma zìnmɛ na.

¹¹ Koro na tundunri, ní làlwaw kèlē, ní kajoogèle mii nyuu mɔ ma lè níjanʔa, ke sámaga mi cò, máā ge kpéʔele.

¹² Kérigèle wi joo n gbàn lè yele ga tɛ́nɛ̀ ge lóʔo níì ge cò, ní i ge kpéʔele, Yawe mɔ Kolocɔlɔw a joogaanni ní funjǎngi kɔn mɔ kabangi na bi yɛlɛ ní kàligi ní wi kpéʔele mɔ tofɔlɛɛyi ma lè.

¹³ Mɔ kéeli a wi dɛ́nɛ, wi a dùbaw taʔa mɔ na, si mɔ kpéʔele syɛɛnnɛʔɛmɛ. Wi a dùbaw taʔa mɔ ceseegi na, ní mɔ tári yafálara na ti lè bilew, ní mɔ dùvɛɛnfɔnw, ní mɔ sinmi, n fàra mɔ niyi, ní mɔ yaweeyiligèle seele na, tári ni, dee kéele na wi kàli mɔ tofɔlɛɛyi ma níì jo woro a di kaan mɔ ma lè.

¹⁴ Mɔ a dùbaw taa bi sɔ̀lɔ syɛɛnfeleyi myɛ na. Nànnaa-sìnzeeo, wàlá cenaa-sìnzeeo a pye yele níngi ni í. Yaweenaa-sìnzeele a wɔ́ɔ pye mɔ yaweeri ni í.

¹⁵ Yawe a yáami myɛ léeli mɔ na, yaabeemi myɛ mɔ cán Ezyipiti ni lè, wi a bi pàa faala cáan mɔ na í. Kàjáa bele mɔ kéeli bɛɛn lè wi a bee bee yaʔa bi pye poro myɛ wómɔ.

¹⁶ Syɛɛnfeleyi Yawe mɔ Kolocɔlɔw a le mɔ kɔ́yi ni lè, mɔ a yi myɛ kálagi, mɔ a kɔ́ yi nyaa nyinimɛ wóyo ní í. Mɔ a kɔ́ ra yi kolocɔlɔbèle kpɔ̀ʔɔrɔ́ í, níì cán gee bee a pye mɔ na karinyanga.

Yawe wi nyɛ syɛ́ɛnbèle kpaàweleo

¹⁷ «Mɔ ga ni gi nyuu mɔ fúngi ni níì jo: ‹Syɛɛnfeleyi bee n nɛʔɛ n sɔ̀lɔ wolo na, kanmìí na wolo a gbǎn yi nɛnɛ yirige yaà bi sɛ́ɛ?›

¹⁸ Mɔ a kɔ́ fyáa yi na í. Gee Yawe mɔ Kolocɔlɔw kpéʔele Faraɔnw ní Ezyipiti myɛw na lè, sɔ̀ngi mi taa gi na.

¹⁹ Wɔʔɔgboloyee mɔ nyapiigèle nyaa lè, yi lè fɛ̀ɛ́bèle, ní kakpoloyi, ní séew kɔ́lɔ, ní kɔ̂zánʔagi, lǎli ni Yawe mɔ Kolocɔlɔw mɔ yirige yaà lè, kánmi bee na Yawe a gi kpéʔele syɛɛnfeleyi myɛ na, yee na mɔ fɛ̀ɛgí lè.

²⁰ N fàra gee bee na, Yawe mɔ Kolocɔlɔw a zèrenaàjiriye tórigo bele kurugo pe ga kòro lè níì làra mɔ na yi sa be kpóo.

²¹ Mɔ a kɔ́ ra fɛ̀ɛgí be kéeli na í, níì cán Yawe mɔ Kolocɔlɔw i nyɛ yele níngi ni, woro wi nyɛ Kolocɔlɔɔ wi lè wogbɔɔw, ní i nyɛ fyáara yáriga.

²² Yawe mɔ Kolocɔlɔw a ra syɛɛnfeleyi bee nɛnɛ da yirigi mɔ yɛ́ʔɛ ma cɛɛri cɛɛri. Mɔ a gbǎn yi kálagi kwɔ́ɔ làrinijanna ni í, koro ga pye sìnbirigi yaweere a kɔ́ yìri bi nɛʔɛ wáa yele na í.

²³ Yawe mɔ Kolocɔlɔw a yi le mɔ kɔ́yi ni, si nyáʔamigbɔɔlɔ cáan yi na fwɔɔ bi taa yi ba kálagi kwɔ́ɔ.

²⁴ Wi a yi fànʔafɔbèle le mɔ kɔ́yi ni, mɔ a be mɛ́ɛyi kwɔ́ɔ bi yirige nyɛ̀ʔɛgèle láara ni, wàa faala a gbǎn yére mɔ sige í, fwɔɔ bi taa mɔ í be kálagi kwɔ́ɔ.

²⁵ Ye be kolocɔlɔbèle màdedanya sórigo naà ni. Mɔ a kɔ́ nyabɛɛnnɛ taa wálifiiw ní tɛ́ɛw na wi nyɛ yi na lè í. Mɔ a kɔ́ wi wàa láa bi yaʔa miyɛɛ ma í, jàngó gee bee a kɔ́ pye mɔ na karinyanga í. Níì cán wi i nyɛ yanɔnʔɔgɔ Yawe mɔ Kolocɔlɔw ma.

²⁶ Mɔ a kɔ́ yanɔnʔɔgɔ lége mɔ kpáagi ni í, jàngó mɔ a kɔ́ pye gi felege bi yɛlɛ pe mɔ kálagi péw í. Mɔ a gi córo yanɔnʔɔgɔ ní yapeʔe, níì cán yarigaa gii, gee gi yɛlɛ ki yaʔa lè péw.