Làlwaw Kaanziin 6 - Cebaara Bible 2010

Yawe mɔ Kolocɔlɔw kéele yaʔa li mɔ dɛ́nɛ

¹ «Kajoodɛɛngèle ní làlwaw kèlē ní tundunri di nyɛ dee naa, dee Yawe yele Kolocɔlɔw joo n gbàn níì jo mii í yele tama di na lè, koro ga pye táree ma yele syée bi sa di syɔɔ di pye yele wóro lè, yele í da di kpéʔele tári bee ni.

² Koro ga pye fyáara í pye mɔ ma Yawe mɔ Kolocɔlɔw na, mɔ í wi làlwabèle myɛ, ní wi tundunri myɛ cò mɔ siiw canya myɛ ni, mɔ, ní mɔ jáaw, ní mɔ piinyanbiigi ní, toro dee mii joo n gbàn mɔ ma lè, koro ga pye mɔ siiw canya í tɔnɔ.

³ Koro na di lóʔo Isirayɛli, máā di kɔ̀rɔsíi, mí di sámaga mi cò, jàngó mɔ í kòro fundaanra na, yele sáā nɛʔɛgi gbanʔama tári ni, dee di nyìn nɔ́nɔw ní sárigi na ni fóo lè, àmɛɛ Yawe mɔ tóolɛɛbèle Kolocɔlɔɔ ki nyɔɔfaligi kpéʔele mɔ ma lè.

⁴ Lóʔo Isirayɛli Yawe wolo Kolocɔlɔw wi nyɛ Yawe nibin.

⁵ Ki n yɛlɛ mi Yawe mɔ Kolocɔlɔw kéele yaʔa li mɔ dɛ́nɛ ní mɔ zɔnw myɛ ní, ní mɔ fúngi myɛ, ní mɔ bárigaw myɛ ní.

⁶ Syɛ́ɛnri naa mii nyuu mɔ ma lè níjanʔa, ti n yɛlɛ bi kòro mɔ zɔnw na.

⁷ Da mɔ piibèle tama di na gbanʔama. Mɔ ga pye wodɛ́ɛɔn ní mɔ kpáagi ni yoo, mɔ ga pye tánʔana na yoo, mɔ ga sínɛ yoo, mɔ ga yìri yoo, da nyuu be ma di kéeli na.

⁸ Mɔ a di pwɔɔ mɔ kɔ́gi na di pye fɛ̀ɛ, di pye sápabēle mɔ nyapiigèle lariga ni.

⁹ Mɔ a di sɛ́bɛ mɔ kpáagi kɔ̀riteliye, ní mɔ kpaanweegèle na.

Isirayɛli ga yɛlɛ bi fɛ̀ʔɛ wi Kolocɔlɔw na í

¹⁰ «Lǎli ni Yawe mɔ Kolocɔlɔw ga sáà mɔ lége lè tári ni, dee kéele na wi da kàli mɔ tofɔlɛɛyi Abirahami, ní Izaaki, ní Zyakɔbi ma lè níì jo woro a di kaan mɔ ma, n fàra di kèkpolocǎnyi na, yee yi lè mɔ ban wi yi faan í,

¹¹ ní kpaaya, yee yi nyìn lè yacanri féleye myɛ na, yee yi lè mɔ ban wi yi nyìn í, ní lǒgi wéeye be túgu lè, yee yi lè mɔ ban wi yi túgu í, ní ɛrɛzɛn séyi, ní olivye kɔliyi, yi lè mɔ ban wi yi tíiri cɔ́rɔ í, lǎli ni mɔ ga ba ni líi ni tíngi lè,

¹² maa miyɛɛ kɔ̀rɔsíi, mɔ a kɔ́ fɛ̀ʔɛ Yawe na í, woro wee wi mɔ yirige lè Ezyipiti tári ni, púlori kpaʔa ni.

¹³ Da fɛ̀ɛgí Yawe mɔ Kolocɔlɔw na, woro yagana má mɔ yɛlɛ bàā báara sáā kɛ̀ɛ́ wi mɛ́ɛgi na.

¹⁴ Yele a kɔ́ yeyɛɛ daʔa kolocɔlɔbèle pèle nikwɔɔlɔ na í, syɛɛnfeleyi yi yele màʔa lè yoro kolocɔlɔbèle pèle í.

¹⁵ Níì cán Yawe mɔ Kolocɔlɔw wi nyɛ yele níngi ni lè, wi i nyɛ yejaʔa Kolocɔlɔɔ. Mɔ ga koro pye, Yawe mɔ Kolocɔlɔw fundanʔara a cò naà mɔ kánmi na, wi a mɔ kálagi péw bi láʔa tásaligi na.

¹⁶ Yele a kɔ́ Yawe yele Kolocɔlɔw pye wéle í àmɛɛ yele wi pye n wéle Masa tɛ́ɛgi ni lè í.

¹⁷ Kàjáa Yawe wi lè yele Kolocɔlɔw, ki n yɛlɛ ye wi kajoodɛɛngèle sámaga ye cò, n fàra wi kajoogèle, ní wi làlwaw kèlē na wi joo n gbàn yele ma lè.

¹⁸ Gee gi sín lè, ní gee gi nyɔɔ Yawe nyɛ́nɛ na lè, da koro kpéʔele, jàngó mɔ í pye fundaanra na, mɔ si tácǎnri fáliga taa, dee kéele na Yawe kàli mɔ tofɔlɛɛyi ma lè,

¹⁹ níì jo woro a mɔ nigoobèle myɛ nɛnɛ bi yirige di ni mɔ yɛ́ʔɛ ma àmɛɛ woro Yawe gi joo lè.

²⁰ Lǎli ni mɔ jáaw ga baa mɔ yíbe lè nyɛ̀ʔɛna níì jo: ‹Kajoogèle, ní làlwaw kèlē, ní tundunri bee Yawe wolo Kolocɔlɔw joo n gbàn yele ma lè, nyàʔá gi nyɛ di kɔ́rɔw?›

²¹ Mɔ a mɔ jáaw pye: ‹Wolo maa pye pulobèlē Faraɔnw ma Ezyipiti ni, á Yawe wolo yirige Ezyipiti ni ní fannɛʔɛgɛ kɔ́lɔ ní.

²² Yawe n fɛ̀ɛbēle, ní kálagila bingaataa-kakpoloyo kpéʔele wolo nyɛ́nɛ na, Ezyipiti kánmi na, ní Faraɔnw, ní wi kpáagi myɛ kánma na.

²³ Wi si n wolo yirige yaà beè koro ga pye bi wolo tórigo tári ma, dee kéele na wi kàli wolo tóolɛɛyi ma lè níì jo woro a di kaan wolo ma.

²⁴ Yawe n gi joo n gbàn wolo ma níì jo wolo í da làlwa kérigèle bee myɛ kpéʔele, sáā fɛ̀ɛgí Yawe wolo Kolocɔlɔw na koro ga pye wolo í kòro fundaanra na làla o làla, woro si wolo yaʔa sìi na, ànbée si gi nyɛ níjanʔa.

²⁵ Gee ki a pye wolo ma lè sínni, koro gi nyɛ wolo í kajoodɛɛngèle bee myɛ sámaga cò sáā ge kpéʔele Yawe wolo Kolocɔlɔw yɛ́ʔɛ ma, bi yɛlɛ ní gi ní àmɛɛ wi gi joo n gbàn wolo ma lè.›