Làlwaw Kaanziin 5 - Cebaara Bible 2010

Kajoodɛɛngèle kɛɛ kéele

¹ A Mowizi Isirayɛli ye myɛ yeri ní baa be pye: «Isirayɛli ye, làlwaw kèlē ní tundunri mii nyuu ni nii yele líiweegèle ni lè níjanʔa, ye di tama, ye di sámaga ye cò, yáā di kpéʔele.

² Yawe wolo Kolocɔlɔw n joogaanna kpéʔele ní wolo ní, Horebi ma.

³ Wolo tóobèle ní ban Yawe joogaanni kpéʔele í, fwɔɔ ní wolo ní, wolo bele myɛ wo nyɛ nɛɛ naa lè sìi na níjanʔa.

⁴ Yawe n yele nyaa n joo ní yele ní nyanbelegi na, náagi nínge ni.

⁵ A mii si yére lǎli bee ni yele ní Yawe níngi ni bàā Yawe syɛ́ɛnri nyuu da tèé yele na. Níì cán yele maa fyáa náagi na, yele ga fɔ̀lɔ n lúgu nyanbelegi na í. Wi maa jo:

⁶ ‹Mii wi nyɛ Yawe mɔ Kolocɔlɔw, wee wi mɔ yirige lè Ezyipiti tári ni, púlori kpaʔa ni.

⁷ Ki ga yɛlɛ kolocɔlɔwaa í ní kɔ́ pye mɔ ma mii yɛ́ʔɛ ma í.

⁸ Mɔ a kɔ́ yasungo sámaga í. Yáriri di nyɛ lè nyɛ̀ʔɛni na ǹjogi ni, ní dee ní di nyɛ lè naa tári na, ní dee di nyɛ lè lǒyi fúngo ni yaà tári táàma, mɔ a kɔ́ gee bee kàa faala niwirige tan í.

⁹ Mɔ a kɔ́ ra kpùmɔnɔ́ yatanyi bee kàa taana í, wàlá bàā gi fáliw kpéʔele í. Níì cán mii wi lè Yawe mɔ Kolocɔlɔw, mii i nyɛ yejaʔa Kolocɔlɔɔ. Mii i tofɔbèle kolomɔ gɔlɔ́ wóo pe ní be yòdaʔayi na bi taa sa nan yìrigēle taanri ní sicɛrɛ wóli na, poro bele mii kéeli bɛɛn lè.

¹⁰ Bele si be tàmaga le ní mii ní lè, níì mii tundunri kɔn ní i di kpéʔele, mii i funjànga kpéʔele ní bele bee ní bi taa sa nan pe yòdaʔayi yìrigēle saala kagunɔ na.

¹¹ Mii Yawe wi lè mɔ Kolocɔlɔw, mɔ a kɔ́ ra mii mɛ́ɛgi yeri gbanzan í. Níì cán wee wi ga mii Yawe mɛ́ɛgi yeri lè gbanzan, mii a wi córo kolomɔ-funvɔlɔ í.

¹² Yákirii yaʔa cândɛnɛgi na mi gi yaʔa kɔlɔ̀ na àmɛɛ Yawe mɔ Kolocɔlɔw gi joo n gbàn mɔ ma lè.

¹³ Ki n yɛlɛ maa báara canya kɔrɔni bi mɔ fáliw myɛ kwɔ́ɔ.

¹⁴ Kàjáa canya kɔrɔsiin wógi i nyɛ mii Yawe mɔ Kolocɔlɔw cândɛnɛgɛ. Mɔ a kɔ́ fali faala kpéʔele gi ni í. Mɔ ní mɔ piiwee wi lè nàɔn wàlá cɔlɔɔ, n fàra mɔ falipyenǎnw, ní mɔ falipyecew, ní mɔ nifalagi, ní mɔ jofaniw, ní mɔ yaweeri myɛ, ní nibɔnwee na wi baa tɛ́ɛn ní mɔ ní lè, koro ga pye mɔ falipyenǎnw ní mɔ falipyecew í ŋɔ́ndaa àmɛɛ mɔ ŋɔ́n n daa lè.

¹⁵ Sɔ̀ngi mi taa gi na mi cán mɔ maa pye puloo Ezyipiti tári ni, á Yawe mɔ Kolocɔlɔw mɔ yirige yaà ní sée kɔ́lɔ ní, ní kɔ̂zánʔaga ní, koro na Yawe mɔ Kolocɔlɔw gi joo n gbàn mɔ ma níì jo mɔ í cândɛnɛgi yaʔa.

¹⁶ Da mɔ tóow ní mɔ nɔ́ɔw kpɔ̀ʔɔrɔ́ àmɛɛ Yawe mɔ Kolocɔlɔw gi joo n gbàn mɔ ma lè koro ga pye mɔ siiw canya í nɛʔɛ, mɔ si wɔ́ɔ pye fundaanra na tári ni, dee Yawe mɔ Kolocɔlɔw a kaan mɔ ma lè.

¹⁷ Mɔ a kɔ́ syɔɔn kpóo í.

¹⁸ Mɔ a kɔ́ kanɔnʔɔrɔ kpéʔele í.

¹⁹ Mɔ a kɔ́ yùu í.

²⁰ Mɔ a kɔ́ jànvaa séera joo bi taʔa mɔ syɛɛnnyɛnnɛ na í.

²¹ Mɔ syɛɛnnyɛnnɛ cɔ́ɔ nyabɛɛnnɛ ga yɛlɛ bi pye mɔ na í. Mɔ syɛɛnnyɛnnɛ kpaʔa láa ga yɛlɛ bi pye mɔ na í, wàlá wi ségi, wàlá wi falipyenǎnw, wàlá wi falipyecew, wàlá wi nìfalagi, wàlá wi jòfaniw, wàlá wi kɔlɔ̀ yárigaa faala nyabɛɛnnɛ a kɔ́ pye mɔ na í.›

²² Syɛ́ɛnri bee si Yawe joo yele syɛɛnkpoʔolomi myɛ ma, ní yákpogbɔɔlɔ ní, nyanbelegi na, náagi nínge ni, ní fàfaanyi, ní fàfaanwɔɔgi ni, wi ga kàa taʔa di na í. A wi di sɛ́bɛ kàdɛnɛyɛ kàlagorigēle siin na n kaan mii ma.

Kolocɔlɔɔ syɛɛnloʔo-mí-jóow Mowizi

²³ «Lǎli ni yele yákpoli lóʔo n kwɔ́ɔ lè yébilimi ni, a nyanbelegi si i nyɛ naà, a yele nùuni mii na ní yele syɛɛnfeleyi kùndigibéle myɛ, ní yele wólɛɛbèle ní.

²⁴ A yele jo: ‹Wéle, Yawe wolo Kolocɔlɔw n wi nìjangbɔɔri ní wi kpɔ́ʔɔganmi tɛ̀ɛn wòlo na. A wolo wɔ́ɔ̀ wi yákpoli lóʔo náagi nínge ni. Wolo n gi nyaa níjanʔa ncan Kolocɔlɔɔ a gbǎn joo ní syɔɔn ní, syɔɔn si sèʔé kòro sìi na.

²⁵ Tɔ́ɔliw ni doò, nyàʔá na gi yɛlɛ wolo í kɔ́ kùu? Níì cán naakpɔɔgi naa a wolo sórigo kwɔ́ɔ. Wolo ga kòro ni Yawe wolo Kolocɔlɔw yákpolo lúro, wolo a kùu.

²⁶ Níì cán syɔɔnwìí wi kɔ́ɔ̀ Kolocɔlɔɔ Woweew yákpolo lóʔo àmɛɛ wolo nyɛ lè a wi i nyuu naà nínge ni, ní sèʔê kòro sìi na?

²⁷ Mɔ maa nùuní yaà mi sa ra gi lúro gee myɛ Yawe wolo Kolocɔlɔw ga joo lè, mí ba ra gi nyuu wolo ma. Gee myɛ Yawe wolo Kolocɔlɔw ga joo mɔ ma lè, wolo a ra gi lúro sáā gi kpéʔele.›

²⁸ Yawe maa yele syɛ́ɛnri lóʔo lǎli ni yele da ni nyuu mii ma lè, a Yawe mii pye: ‹Gee syɛ́ɛnbèle naa joo mɔ ma lè, mii n gi lóʔo. Gee myɛ be joo lè, ki n nyɔɔ.

²⁹ Ee! Ki maa yɛlɛ be fúnyi í dée kòro kánmi naa na làla o làla, paa fɛ̀ɛgí mii na si mii kajoodɛɛngèle myɛ sámaga cò, koro ga pye be kòro fundaanra na kwɔ́ɔmɔ fun, poro ní be pìíbèle ní.

³⁰ Da syée mi sa be pye: Ye lúru ye sa jée yele fànikpaayi ni.

³¹ Mɔ si na, kòro nɛɛ naa ní mii ní, mii si kajoodɛɛngèle myɛ, ní làlwaw kèlē, ní tundunri joo mɔ ma, dee na mɔ a be tama lè pe sa ra kpéʔele tári ni, dee mii a kaan be ma lè di pye pe worò.›

³² Dee Yawe yele Kolocɔlɔw joo n gbàn yele ma lè ye di sámaga ye cò, yele a kɔ́ wàli bi láʔa di na bi kári kàliige wàlá kàmɔnɔ ma í.

³³ Kólogee kéele Yawe yele Kolocɔlɔw joo n gbàn yele ma lè, yaa gi táanri gi tánʔaganmi na, jàngó yele í kòro sìi na, si pye fundaanra na, si cannɛʔɛyɛ kwɔ́ɔ tári ni, dee yele a taa lè di pye yele wóro.