Làlwaw Kaanziin 4 - Cebaara Bible 2010

Bàā táanri Kolocɔlɔɔ làlwaw na

¹ «Tɔ́ɔliw ni, Isirayɛli, làlwaw kèlē ní kajoodɛɛngèle lóʔo, gele na mii a mɔ tama lè, máā ge kpéʔele, jàngó yele í kòro sìi na si jée tári ni bi di syɔɔ taa, dee Yawe yele tóolɛɛbèle Kolocɔlɔɔ kaan yele ma lè.

² Syɛ́ɛnree mii nyuu ni gbàngí yele ma lè yele a kɔ́ tàa taʔa di na í, yele si a wɔ́ɔ kɔ́ tàa yirige di ni í. Ye Yawe yele Kolocɔlɔw tundunro sámaga ye cò bi yɛlɛ ní gi ní kánmee na mii di kaan yele ma lè.

³ Gee Yawe kpéʔele Baali-Peyɔɔri kéeli na lè yele nyapiigèle n gi nyaa. Nǎnbèle pe da peyɛɛ daʔa Baali-Peyɔɔri na lè, Yawe yele Kolocɔlɔw n bele bee myɛ kálagi n yirige yele níngi ni.

⁴ Yele bele si ye yeyɛɛ daʔa Yawe yele Kolocɔlɔw na lè, yele myɛ i nyɛ sìi na níjanʔa.

⁵ Ye wéle, mii n yele tama làlwaw kèlē, ní kajoodɛɛngèle na, àmɛɛ Yawe mii Kolocɔlɔw gi joo n gbàn mii ma lè, koro ga pye táree ni yele a jée lè bi di pye yele wóro, yele í da kérigèle bee kpéʔele di ni.

⁶ Yele a ge kɔn sáā ge kpéʔele, níì cán gee bee ki a pye yele sícilimi, ní yele cánni syɛɛnfeleyi nyɛ́nɛ na, yoro yee yi a làlwaw naa kèlē myɛ lóʔo lè sáā gi nyuu si jo: ‹Syɛɛnfelegi naa gi nɛʔɛ lè, ki n cìlige, ní wɔ́ɔ̀ keele cán.›

⁷ Syɛɛnfele-nɛʔɛgìí má kolocɔlɔbèlē nyɛ, bele be nùuni gi na lè àmɛɛ Yawe wolo Kolocɔlɔw nùuni wolo na lè làlee faala ni wolo ga wi yeri lè?

⁸ Ba syɛɛnfele-nɛʔɛgìí gi nyɛ, gee má làlwa kèlē ní kajoodɛɛngēle nyɛ, gele ge sín lè, àmɛɛ làlwaw naa myɛ nyɛ, wee mii tèé yele na lè níjanʔa?

Kolocɔlɔɔ n wiyɛɛ dɛ̀ɛn Horebi nyanbelegi ǹjoʔo ni

⁹ «Ki n yɛlɛ mɔ í tɛ́nɛ miyɛɛ còganmi cán, máā mɔ fúngi kɔ̀rɔsíi gbanʔama mɔ siiw canya myɛ ni, koro ga pye kérigèle gele mɔ nyapiigèle nyaa lè, mɔ a kɔ́ fɛ̀ʔɛ ge na í, ke a kɔ́ yiri mɔ fúngi ni í. Ge tɛ̀ɛn mɔ piibèle, ní mɔ piinyanbiiyi na.

¹⁰ Sɔ̀ngi mi taa cángi na, gee ni mɔ yére Yawe mɔ Kolocɔlɔw yɛ́ʔɛ ma lè Horebi ma, lǎli ni Yawe mii pye lè: ‹Syɛ́ɛnbèle kpóʔoro mii taana, jàngó mii í gi yaʔa pe mii syɛ́ɛnri lóʔo. Koro ga pye pe gi tama bàā fɛ̀ɛgí mii na làlee myɛ ni pe a kwɔ́ɔ lè sìi na tári na, pé wɔ́ɔ ra be jáabèle tama di na.›

¹¹ A yele nùuni yaà n sáà yére nyanbelegi tìgimɛ ni. A naà cò nyanbelegi na fwɔɔ n sáà nan nyɛ̀ʔɛni nínge na, yébilimɛ, ní fàfaanya, ní fàfaanwɔʔɔ ni.

¹² A Yawe joo ní yele ní náagi nínge ni. Yele n syɛ́ɛnri joomɔ lóʔo kàjáa yele ga yɛɛcɔɔlɔ nyaa í. Yákpolo yagana li da ni lúro.

¹³ Wi n wi joogaanni tɛ̀ɛn yele na níì gi joo n gbàn níì jo yele í li foro, li lè wi kajoodɛɛngèle kɛɛ, a wi ge sɛ́bɛ kàdɛnɛyɛ kàlagorigēle siin na.

¹⁴ Lǎli bee ni a Yawe gi joo n gbàn mii ma níì jo mii í yele tama làlwaw kèlē, ní kajoodɛɛngèle na, koro ga pye táree ni yele syée sa jée lè bi di syɔɔ taa, yele í sa ra táanri ge na yaà.

Yaa còʔoró yasunyi na

¹⁵ «Amɛɛ gi nyɛ lè cángee na Yawe joo ní yele ní náagi nínge ni lè Horebi ma, yele ga yɛɛcɔɔlɔ nyaa í, ki n yɛlɛ yaa yeyɛɛ kɔ̀rɔsíi gbanʔama,

¹⁶ jàngó yele a kɔ́ yatanga sámaga yaʔa yeyɛɛ ma bi yeyɛɛ gálagi í, gee ki a pye lè yarigaa niwirige í, nàɔn wàlá cɔlɔɔ niwirige í.

¹⁷ Wàlá yaweegaa niwirige í, dee di nyɛ lè tári na. Wàlá féjɛɛnri di yìrigí ǹjogi ni lè, koro kàa niwirige í.

¹⁸ Yáriri di fulolo tári na lè yele a kɔ́ koro kàa niwirige sámaga í, wàlá fábèle be nyɛ lè lǒgi ni, tári táàma, poro wàa niwirige í.

¹⁹ Mi wɔ́ɔ maa miyɛɛ kɔ̀rɔsíi, koro ga pye mɔ ga mɔ nyapiigèle yìrige n le nyɛ̀ʔɛni ni, níì cángi, ní yégi, ní ŋɔripiigèle nyaa, ti lè nyɛ̀ʔɛni yárira myɛw, mɔ a kɔ́ miyɛɛ yaʔa di kpɔ̀ʔɔrɔ láaw í mɔ taa mɔ í da kpùmɔnɔ́ di yɛʔɛ̀ ma í. Yawe mɔ Kolocɔlɔw n dee bee kaan nyɛ̀ʔɛni láara syɛɛnfeleye myɛ bìnɛw ma.

²⁰ Yele si na, Yawe n yele cò n yirige tunmɔrɔ fúruw naagbanga ni gi lè Ezyipiti, jàngó yele í pye woro má kɔrigɔ àmɛɛ yele nyɛ lè níjanʔa.

²¹ Yawe fúngi si n tanʔa mii kurugo gbanʔama yele kéeli na, a wi kàli níì jo mii a Zyuridɛnw jeli í, mii a jée tácǎnri ni í, dee Yawe mɔ Kolocɔlɔw kaan mɔ ma lè kɔrigɔ.

²² Koro na mii a tɔ̀nɔ́ kùu tári naa ni, mii a Zyuridɛnw jeli í, yele si a wi jeli bi tácǎnri bee syɔɔ taa.

²³ Ki si n yɛlɛ yaa yeyɛɛ kɔ̀rɔsíi koro ga pye joogaanni Yawe yele Kolocɔlɔw kpéʔele ní yele ní lè, yele a kɔ́ fɛ̀ʔɛ li na, si yatanga tan, gee gi yarigaa wíri lè bi yaʔa yeyɛɛ ma í. Ncan Yawe mɔ Kolocɔlɔw n gi joo n gbàn níì jo mɔ a kɔ́ gee bee kpéʔele í.

²⁴ Níì cán Yawe mɔ Kolocɔlɔw i nyɛ naà, gee gi sórigolo kpéʔele lè, yejaʔa Kolocɔlɔɔ wii.

²⁵ Lǎli ni mɔ ga baa pìibēle ní pìinyanbiiye taa lè, á yele tɛ́ɛn n mɔn tári bee ni, yele ga yeyɛɛ gálagi, níì yariyaa tan, yee yi yariyaa wíri lè, n kapeele pye Yawe mɔ Kolocɔlɔw yɛ́ʔɛ ma, n wi fúngi tanʔa gbanʔama,

²⁶ mii n nyɛ̀ʔɛni ní tári láa níjanʔa di pye séera yele kánmi na, yele a kárima kùu bi kwɔ́ɔ tári ni, dee ni yele a Zyuridɛnw jeli bi jée lè bi di taa di pye yele wóro, yele a cannɛʔɛyɛ kwɔ́ɔ di ni í. Níì cán yele a tɔ̀nɔ́ kwɔ́ɔ péw bi yiri di ni.

²⁷ Yawe a yele cariga bi lége syɛɛnfeleyi nínge ni. Syɛɛnfeleyee nínge ni Yawe a yele kɔ́ri lége lè, yele a ní kòro saʔa yi níngi ni í.

²⁸ Bi yele yaʔa yaà beè, yele a ra báara kolocɔlɔbèle pèle ma, pe lè syɔɔn kɔ́lɔ yakpéʔeleye, pe lè tíiri, ní kàdɛnɛri wòolo, bele be lè pe a gbǎn yarigaa nyaa í, pe wɔ́ɔ o lúro í, pe wɔ́ɔ o líi í, pe o nùngo taagi í.

²⁹ Bi wɔ́ɔ mɔ yaʔa yaà beè, mɔ a ra Yawe mɔ Kolocɔlɔw caa. Mɔ ga ni wi caa ní mɔ zɔnw myɛ, ní mɔ fúngi myɛ ní, mɔ a wi nyaa.

³⁰ Bi mɔ yaʔa mɔ wɔʔɔgi ni, kérigèle bee myɛ a mɔ taa. Kàjáa canzanyi ni mɔ a lúru pan Yawe mɔ Kolocɔlɔw ma, mɔ a ba ra lúro wi ma.

³¹ Níì cán Yawe mɔ Kolocɔlɔw i nyɛ nyinidaara Kolocɔlɔɔ, wi a mɔ cée í, wi a mɔ kálagi í, wi a fɛ̀ʔɛ joogaanni na wi kpéʔele lè ní kàliga ní mɔ tóolɛɛbèle ma í.

Kacǎnyee Isirayɛli ye taa lè

³² «Ki n yɛlɛ mi yíbege kpéʔele canzɔ̀lɔgwɔɔyi kéele na, yee yi sɔ̀lɔ sáni mɔ í pye beè lè, nlaa Kolocɔlɔɔ syɔɔn sámaga tári na lè, bi séli nyɛ̀ʔɛni láʔalee na bi sa nan lee na, a kakpɔɔgi naa felege kɔ́ɔ̀ kpéʔele lé? A gi felege kɔ́ɔ̀ lóʔo lé?

³³ A syɛɛnfelegaa kɔ́ɔ̀ Kolocɔlɔɔ yákpoli lóʔo lé a wi i nyuu naà nínge ni àmɛɛ mɔ li lóʔo lè níì kòro sìi na?

³⁴ A kolocɔlɔwaa caa kɔ́ɔ̀ gi pye lé n wéle bi pan ba syɛɛnfelegaa láa bi yirige kàa ni bi yaʔa wiyɛɛ ma kagbangēle, ní fɛ̀ɛbēle, ní kakpoloyo, ní kapɛɛnnɛ, ní sée kɔ́lɔ, ní kɔ̂zánʔaga, ní fyáakpɔɔrɔ kele báriga ni n yɛlɛ ní gee myɛ ní Yawe yele Kolocɔlɔw kpéʔele yele kéeli na lè Ezyipiti ni yele nyɛ́nɛ na?

³⁵ Kérigèle bee n tɛ̀ɛn mɔ na koro ga pye mɔ í gi cán Yawe wi nyɛ Kolocɔlɔw, wàa nikwɔɔ ní o yaà ní woro ní í.

³⁶ N wi yaʔa nyɛ̀ʔɛni na, wi n wi yákpoli yaʔa a mɔ li lóʔo koro ga pye bi mɔ tama. Wi n wi naakpɔɔgi yaʔa a mɔ gi nyaa naa tári na. Mɔ n wi syɛ́ɛnri lóʔo náagi nínge ni.

³⁷ Mɔ tóolɛɛbèle kéele n wi dɛ́nɛ, a wi be yòdaʔayi nyɛ́nɛ n wòlo be kàdoʔo ma, koro na wi tiimaw mɔ yirige Ezyipiti ni ní wi séekpɔɔw ní.

³⁸ Syɛɛnfeleyee yi kpólo n sɔ̀lɔ mɔ na lè a yi fǎngi wɔ́ɔ̀ nɛʔɛ n sɔ̀lɔ mɔ wógi na, wi n yee bee nɛnɛ n yirige yaà mɔ yɛ́ʔɛ ma, níì mɔ lége yi tári ni, bi di kaan mɔ ma di pye mɔ kɔ́rigɔ, àmɛɛ gi nyɛ lè níjanʔa.

³⁹ Koro na gi cán níjanʔa, mí gi cò mɔ fúngi ni, mi cán Yawe wi nyɛ Kolocɔlɔɔ, nyɛ̀ʔɛni na, ǹjogi ni, ní tári na naa táàma. Wàa ní o yaà ní woro ní í.

⁴⁰ Wi làlwaw kèlē, ní wi kajoodɛɛngèle mii nyuu mɔ ma lè gele níjanʔa, ge kɔn koro ga pye mɔ ní mɔ yodaʔayi í fundaanra taa, mɔ siiw canya si nɛʔɛ tásaligi na, gee Yawe mɔ Kolocɔlɔw kaan mɔ ma lè gi pye mɔ wóʔo làla o làla.»

Kàsuro-jée-kèyaa Zyuridɛn jeligɔgee na

⁴¹ Lǎli bee ni a Mowizi kèye taanri yaʔa kɔlɔ̀ na Zyuridɛn canʔafolomɔ ma,

⁴² yi pye kàsuro-jée-kèye, syɛɛnkpóō kéele na, wee wi fòʔo n wi syɛɛnnyɛnnɛ kpóo lè, bi gi taa wi kéeli da sélì wi bɛɛn í, wi gbǎn fàn bi kári kěyi bee kàa ma, bi kòro sìi na.

⁴³ Yoro yi nyɛ yee naa: Wurubɛn ye ma, Besɛɛri wi nyɛ lè fìími tára ni, dǎndamagi tɛɛfiige na. Gadi ye ma, Aramɔti wi lè Galaadi ni, Manase ye ma, Golan wi lè Basyan ni.

MOWIZI JOOZIIN WOLI

⁴⁴ Làlwaw naa Mowizi tɛ́ʔɛ n kaan Isirayɛli ye ma.

⁴⁵ Kajoogèle, ní làlwa kérigèle, ní tundunri naa Mowizi joo Isirayɛli ye ma pe yirili kàdoʔo ma Ezyipiti ni.

⁴⁶ Koro n pye Zyuridɛn canʔafolomɔ ma, jǐnlɔgi ni, Bɛti-Peyɔɔri zǐnmi na, Amɔri ye fànʔafɔw Sihɔn tári ni, woro wee wi da pye lè wodɛ́ɛɔn ní Hɛsyibɔn ni, woro wee Mowizi ní Isirayɛli ye baa jáa lè pe yirili kàdoʔo ma Ezyipiti ni.

⁴⁷ A be wi tári syɔɔ n taa n wɔ́ɔ̀ Basyan fànʔafɔw Ogi wóri syɔɔ. Amɔri ye fànʔafɔbèle bee siin maa pye Zyuridɛn canʔafolomɔ ma.

⁴⁸ N séli Aroyɛɛri na, ki lè Arinɔn lòcoologi nyɔ́ɔ na fwɔɔ n sáà nan Siyɔn nyanbelegi na, ki lè Hɛrimɔn.

⁴⁹ Ní Araba tɛ́ɛgi myɛ Zyuridɛn canʔafolomɔ ma, níì kári n sáà láʔa Araba Sólomi Lɔ́ʔɔ na, Pisiga nyanbelegi tìgimɛ ni.