Làlwaw Kaanziin 34 - Cebaara Bible 2010

Mowizi kùúw kéele

¹ A Mowizi yìri Mowabi tɛɛfiiyi ni n lúgu Nebo nyanbelegi na, Pisiga ǹjogi ni, ki nyɛ lè Zyeriko zǐnmi na. A Yawe tári myɛ tɛ̀ɛn wi na n séli Galaadi na fwɔɔ n sáà nan Dan na,

² ní Nɛfitalii myɛw, ní Efirayimi, ní Manase tári, ní Zyuda tári myɛw fwɔɔ n sáà nan canʔajeemɛ Sólomi Lɔ̀ʔɔ na,

³ ní wòrogulo kàbangi, ní Zyuridɛn tɛ́nɛmi, ní Zyeriko jǐnlɔgi ki lè sɛʔɛtiiri kàʔa fwɔɔ n sáà nan Sowari na.

⁴ A Yawe wi pye: «Tári dii dee bee, dee nyɔɔfaliga mii kpéʔele ní kàliga ní lè Abirahami, ní Izaaki, ní Zyakɔbi ma níì jo: ‹Mii a di kaan mɔ yodaʔayi ma.› Mii n gi yaʔa mɔ í di nyaa ní mɔ nyapiigèle ní, kàjáa mɔ a jée di ni í.»

⁵ Mowizi wi lè Yawe falipyew, a wi kùu yaà beè Mowabi tári ni n yɛlɛ ní gi ní àmɛɛ Yawe da gi joo n gbàn lè.

⁶ A Yawe wi tɔ́n jǐnlɔgi ni, Mowabi tári ni, Bɛti-Peyɔɔri zǐnmi na. Syɔɔn faala ga wi nyángi tɛ́ʔɛ cán í fwɔɔ n baa nan níjanʔa na.

⁷ Mowizi maa taa yɛ̀ʔɛlɛ togoye kɔrɔni lǎli ni wi kùu lè, wi nyapiigèle fànʔa da kwɔ́ɔ í, yafyɛn ga wɔ́ɔ̀ yiri wi céri fànʔa ni í.

⁸ A Isirayɛli ye Mowizi kùúgi nyɛnigɛ kpéʔele Mowabi tɛɛfiiyi na canya toko ní kpɔrigɔ fúngo ni, á Mowizi kùúgi nyɛnigɛ ní kùu káyaagi bee canya náà kwɔ́ɔ.

⁹ Zyozuwe wi lè Nun jáaw, woro maa nyìn sícilimɛ pìle na, níì cán Mowizi maa wi kɔ́yi taʔa wi na. A Isirayɛli ye i lúro wi ma, ní i gi kpéʔele n yɛlɛ ní syɛ́ɛnri ní Yawe da joo n gbàn Mowizi ma lè.

¹⁰ Mowizi kanyaajoo-félege ga níì yìri Isirayɛli ni í, wee Yawe cán a be yɛ́ɛyi sɔʔɔ yiyɛɛ ni lè í.

¹¹ Wi n fàli fɛ̀ɛ́bèle, ní kakpoloyi myɛ báriga ni, yee Yawe wi tun a wi sáà kpéʔele Ezyipiti tári ni lè, Faraɔnw kánma na, ní wi syɛɛnkpolobèle myɛ kánma na, ní wi tári myɛ kánma na lè,

¹² ní fyáakpɔɔri kèlē Mowizi kpéʔele lè ní sée kɔ́lɔ ní Isirayɛli ye myɛ nyɛ́nɛ na.