Làlwaw Kaanziin 32 - Cebaara Bible 2010

¹ Nyɛ̀ʔɛgèle, ye líiyi cáan, mii si joo. Tári, mii nyɔ́ɔgi syɛ́ɛnrɛ lóʔo.

² Ki n yɛlɛ mii tamani í da tíri àmɛɛ zàʔá nyɛ lè, mii nyɔɔsyɛɛnri í da ŋuu àmɛɛ káfyaan nyɛ lè, àmɛɛ zěyɔri-yɔrigɔ tuun nyàápungo na lè, àmɛɛ lɔ̀ʔɔ ŋuu nyàā na lè.

³ Níì cán mii a ra Yawe mɛ́ɛgi kéele jáari, yaa kpɔ́ʔɔri taari wolo Kolocɔlɔw na.

⁴ Woro wi nyɛ Fálagi. Wi fáliw n nyɔɔ n foro, wi kóloyi myɛ n sín. Woro wi nyɛ Kolocɔlɔw wi nyɛ lè tágala syɔ́ɔn, woro wi sín, ní i nyɛ kányɛɛgi fɔ́lɔ.

⁵ Pe n peyɛɛ gálagi wi kàbangi na. Fɛ̀ɛrɛ n be taa, pe ní o nyɛ wi pìibēle í, lǎli naa syɛ̀ɛnnɛ be nyɛ lè námarafɔbèle, ní kakolobyebèle.

⁶ Yawe na lé yele jo bi gi taʔa, mɔ syɛɛnfele-nilabalaga, ki lè sícilimɛ fun? Woro ban wi nyɛ mɔ Tóow ní mɔ Faanfɔw ì? Ba woro ban wi mɔ kpéʔele níì fànʔa le mɔ ni ì?

⁷ Sɔ̀ngi mi taa booma cányi kéele na. Sɔ̀ngi yìrigēle saʔa yɛʔɛlɛ kéele na. Mɔ tóow yíbe, wi a gi joo tɛ̀ɛn mɔ na. Mɔ wolɛɛbèle yíbe, pe a gi joo mɔ ma.

⁸ Wee wi nyɛ Pe Myɛ Nyúngo na lè, lǎli ni wi kɔrigɔ kaan syɛɛnfeleyi ma lè, lǎli ni wi Adami pìíbèle wàli n láʔa peyɛɛ na lè. Wi n syɛɛnfeleyi láʔagoloyo wòlo, n yɛlɛ ní Isirayɛli pìíbèle nyɔ́ɔ ní.

⁹ Níì cán Yawe lɛɛli li nyɛ wi syɛ́ɛnbèle. Zyakɔbi wi nyɛ wi kɔ́rigi lɛɛlɛ.

¹⁰ Wi n sáà wi nyaa fìimɛ tára tátɛɛgaa ni, sìnbirigi yaweere supiire nínge ni, tɛɛwaʔa ni. A wi wi màʔa n kpàra, ní i wi gbóo. Wi maa ni wi kɔ̀rɔsíi àmɛɛ wi nyapiisyɔɔnw nyɛ lè.

¹¹ Amɛɛ nyɔɔ̀ wi zyàári caragi ní i nyaari ni máari wi pìíbèle ǹjoʔo ni lè. ní i wi fókaanyi sánʔana ni be lée lè, ni be lée wi fókaansiiri na lè.

¹² Yawe nibin wi da ni wi yɛ́ɛgi kínigi, kolocɔlɔɔ-nibɔnwaa da pye yaà ní wi ní í.

¹³ Wi maa ni wi lúrugu tári dǎndama-tɔ́nɔyɔ na, ní i wi kaangi wi i líi séyi yafálara na. Wi maa ni fálagi sárigā kaangi wi ma lìile, ní gbèrifɔnw kàdɛnɛgɛ sìnmɛ,

¹⁴ ní nǐyi nɔ́nɔ-tanʔaga, ní yaweeyiligèle nɔ́nɔ, ní bàpiigèle sìnmɛ, n fàra Basyan tári bàpɔɔlɔ, ní sikepɔbèle wómɔ na, ní bilecǎnw. Mɔ maa ni ɛrɛzɛnw sìsyaan gbo, wi lè dùvɛɛntelew.

¹⁵ Yesyurun n sìnmɛ le, a wi jáma. Mɔ n baa sìnmɛ le níì kpɔ́ʔɔ n pòlogo, a wi Kolocɔlɔɔ yaʔa wi lè wi Faanfɔw. Wi n wi syɔ́ɔli Fálaga faʔa.

¹⁶ Pe i kolocɔlɔ-nibɔnbèle téeri ni yejaʔa yìrigí wi ma. Pe i wi fúngi taanri gbanʔama ní yanɔnʔɔri kpéʔelele ní.

¹⁷ Pe i sárigaw wóo màdebèle ma pe lè pe o nyɛ Kolocɔlɔɔ í. Ní kolocɔlɔbèle pèle ma, bele be lè pe ga be cán í. Wovɔnbèle be pan lè, ki ga mɔn í, pe lè yele tóolɛɛbèle da ni be córo í.

¹⁸ Mɔ n Fálagi yaʔa, gee gi mɔ see lè. Mɔ n fɛ̀ʔɛ Kolocɔlɔɔ na, woro wee wi mɔ see lè.

¹⁹ Yawe n gee bee nyaa, a gi pye wi ma kanibɛɛnnɛ, níì cán wi nànbiigèle, ní wi calipiigèle maa ni wi fúngi taanri gbanʔama.

²⁰ A wi jo: «Mii a mii yɛ́ɛgi làriga be na, si gi wéle, gee ki a ba pye lè be nyɛ̀ʔɛnaw. Níì cán yìrilaa syɛ̀ɛnnɛ bɛɛ, bele be kolo lè. Jaafɔɔlɔ bɛɛ, bele be lè pe o nyɛ tágala syɛɛnnɛ í.

²¹ Yárigee gi lè ki o nyɛ Kolocɔlɔɔ í, pe n gee bee kéele tɛ́ʔɛ n yejaʔa yìrige mii ma. Pe n mii fúngi tanʔa gbanʔama ní be gbanzan yasunyi ní. Mii si na, mii a gbanzan syɛɛnfelegaa kéele tɛ́ʔɛ bi nyabɛɛnnɛ wáa be na. Mii a syɛɛnfele-nilabalaga kéele tɛ́ʔɛ bi be fúnyi tanʔa gbanʔama.

²² Níì cán mii fundanʔari n cò naà, ki i sóori fwɔɔ n sáà jée kúbèle tɛɛkòrogo fúngo ni. Ki i tári ní di yafálari líile ni syée. Ki i có nyanbeleyi kàpɔɔnbēle na.

²³ Mii a wɔʔɔyi tɔ́n be na. Mii a mii ŋáayi kwɔ́ɔ be na.

²⁴ Kateegi a be fǎngi kwɔ́ɔ. Nyínmi, ní káfalagi yáama a be bárigaw kwɔ́ɔ. Mii a be kaan yacoyi gànʔana ma, ní yafulolori sɔ́ɔnrɔ ma.

²⁵ Kàfugi na, ŋɔséew a ra be bɔ̀nɔ́ pìíbèle ni, fyáari si pye yaà be na fungo ma. Nigɔcaribèle ní pìcaabèle a pínɛ da kálagi, n fàra pìíwee na wi ŋɔri lè, ní ǹjoofiire nànlɛɛɔ.

²⁶ Mii maa ni caa bi jo: ‹Mii a be fɛɛ láʔa yaà bi be kwɔ́ɔ yirige syɛ́ɛnbèle nínge ni, syɔɔn a ní kɔ́ sɔ̀ngí taa be kéeli na í.›

²⁷ Mii si maa ni sɔ̀ngí faʔari kéele na nigoow a ra wáa mii na lè. Níì cán pe kàsiitun-nyɛ́nbèle a kɔ́ ra peyɛɛ váana, sáā gi nyuu si jo: ‹Wolo kɔ́yi sée báriga ni wo gi taa, Yawe ban wi gee naa myɛ kpéʔele í.›

²⁸ Níì cán syɛɛnfelegaa gii, gee ki gi láliiw téeri ni kiyɛɛ pùuní lè. Sícilimɛ o nyɛ be ni í.

²⁹ Pe ga maa pye sícilibēle, gee pe a dée cán wàli lè, koro gi nyɛ, pe mǎà dée pe nyɛ̀ʔɛnaw kéele cán.

³⁰ Kanmìí na syɔɔn nibin a dée gbǎn be saala kagunɔ kɔ́ri láa da nɛnɛ, syɛ̀ɛnnɛ siin si gbǎn be selebingèle kagunɔ taa paa fé, kapye be Fálagi da be pára í, kapye Yawe da be le be kɔ́yi ni í?

³¹ Níì cán pe fálagi o nyɛ àmɛɛ wolo Fálagi nyɛ lè í. Wolo nigoobèle i nyɛ gi séerabéle.

³² Pe ɛrɛzɛn tírigi i nyɛ Sodɔmi ɛrɛzɛn tírigi félege, ní Gomɔri tɛɛ̀falagi wógaa. Pe ɛrɛzɛnw i nyɛ pɔ́sɔni ɛrɛzɛn, pe ɛrɛzɛn jɔnjɔnyi n soro.

³³ Pe dùvɛɛnw i nyɛ wàbiya sɔ́ɔnrɔ, màátɔnbēle pɔ́sɔnipeeo wii.

³⁴ Gee bee o nyɛ wolarigaga ní mii taana ì, á fɛ̀ɛ́w taʔa gi na mii lɔ́ri tɛɛkɔnyɔ ni ì?

³⁵ Pe tɔ́lɔyi ga wàli n yiri kólogi ni lǎli ni lè, mii wi nyɛ kapeeli gɔ̀lɔ́-wòloo, ní sàraw kaanfɔlɔ. Níì cán pe wɔʔɔli canʔa n nùuni pe kwɔ́ɔganmi i fùurí ni maa.»

³⁶ Yawe a wi syɛ́ɛnbèle kútii joo, kàjáa wi a nyinimɛ taa wi falipyebèle na, lǎli ni wi ga gi nyaa a be fǎngi kwɔ́ɔ lè, syɔɔn faala ní o yaà, wee be cò lè wàlá wee be yaʔa lè í.

³⁷ Lǎli bee ni wi a jo: «Sán be kolocɔlɔbèle nyɛ, fálagee ki da pye lè pe tɛɛfan-mí-làragi,

³⁸ kolocɔlɔbèle bee pe da ni be sárigaw kaasìnmɛ líi lè, ní i be sáriga-yólogow dùvɛɛn gbo lè? Bele bee n yɛlɛ pe yìri bi yele dɛ̀ɛmɛ, pe n yɛlɛ bi sínɛ yele tɔ́n.

³⁹ Koro na tɔ́ɔliw ni ye wéle, mii wi nyɛ Kolocɔlɔɔ, mii nibin pée, kolocɔlɔwaa nikwɔɔ ní o beè n fàra mii na í. Mii wi kpóoli kpéʔele, ní wɔ́ɔ i sìíw kaangi. Mii wi kpàlili kpéʔele, ní wɔ́ɔ i pɔʔɔli kpéʔele. Syɔɔn faala a gbǎn yarigaa yirige mii kɔ́gi ni í.

⁴⁰ Níì cán mii n mii kɔ́gi yìrige n wáa nyɛ̀ʔɛni ma, ní i gi nyuu níì jo: ‹Mii i nyɛ sìi na bi kòro beè làla o làla.

⁴¹ Mii ŋɔséew wi daragi lè, mii ga wi nyɔ́ɔgi wòlo lǎlee ni lè, mii kɔ́gi ga kútiisinw cò, mii a mii gɔ̀lɔ́w wòlo mii kàsiitun-nyɛ́nbèle na, si wɔ́ɔ ki sìndɛɛgi lúrugo mii parafɔbèle ma.

⁴² Mii a mii ŋáayi kaan yi gbaa sìsyaanw na, yi yɛ́ɛyi í da wóo, mii ŋɔséew sáā céri káa, n fàra wogbalibèle sìsyaan, ní wojobèle sìsyaan, ní nigoow kùndigibéle nyúnyo na.› »

⁴³ Syɛɛnfeleyi, yaa wi syɛ́ɛnbèle sòoló. Níì cán Yawe i wi falipyebèle sìsyaan wolo gɔlɔ́ wóo. Wi i gɔ̀lɔ́w wóo wi kàsiitun-nyɛ́nbèle na. Ní i wi tári, ní wi syɛ́ɛnbèle kapeegéle kusulugo fáli kpéʔele.

⁴⁴ A Mowizi pan n baa ŋúnugi bee syɛ́ɛnrɛ myɛ joo n le syɛ́ɛnbèle líiweegéle ni, woro ní Zyozuwe wi lè Nun jáaw.

⁴⁵ Lǎli ni Mowizi kwɔ́ɔ syɛ́ɛnri bee myɛ joolo na Isirayɛli ye myɛ ma lè,

⁴⁶ a wi be pye: «Ye syɛ́ɛnri naa myɛ sámaga ye cò, mii n di joo di pye séera níjanʔa yele kánmi na. Yele n yɛlɛ bi di joo gbàn yele pìíbèle ma pe di cò, sáā làlwaw naa kèlē myɛ kpéʔele.

⁴⁷ Níì cán ti o nyɛ kanyɔɔnɔ fun syɛ́ɛnrɛ yele ma í, yele sìíw wii, toro bárigaw ni yele a yele sìíw canya nɛʔɛ tári ni, dee ni yele a Zyuridɛnw jeli bi jée lè bi di syɔɔ taa.»

Mowizi kùúw kéele n joo n tɛ̀ɛn

⁴⁸ Cángi bee tiimaa na, a Yawe gi joo Mowizi ma níì jo:

⁴⁹ «Lúgu Abarimi nyanbelegi naa na, Nebo nyanbelegi ǹjoʔo ni, Mowabi tári ni, Zyeriko zǐnmi na, mi Kanaan tári wéle, dee mii a kaan Isirayɛli ye ma lè di pye be worò.

⁵⁰ Nyanbelegi na mɔ a lúgu lè, mɔ a kùu yaà bi kári mɔ wóbèle kurugo àmɛɛ mɔ yɛʔɛfɔw Aarɔn kùu lè Horii nyanbelegi na n kári wi wóbèle kurugo.

⁵¹ Níì cán yele n sìnzinmɛ kéele kpéʔele mii na Isirayɛli ye níngi ni, Meriba lógi ma, Kadɛsyi ma, Sɛn fìími tára ni. Yele ga mii tɛ̀ɛn wojaɔn ní Isirayɛli ye níngi ni í.

⁵² Mɔ a tári nyaa miyɛɛ yɛ́ʔɛ ma toro dee mii a kaan Isirayɛli ye ma lè, mɔ si a tée jée di ni í.»