Làlwaw Kaanziin 31 - Cebaara Bible 2010

MOWIZI WOSIIW NI WI KUUW Zyozuwe télegeli kéele Mowizi sìndɛɛgi ni

¹ A Mowizi kári n sáà syɛ́ɛnri naa joo Isirayɛli ye myɛ ma níì jo:

² «Mii sìíw yɛ̀ʔɛlɛ i nyɛ níjanʔa togoye kɔrɔni. Mii a ní gbǎn pye yele nyúngi na í. Yawe n gi joo mii ma níì jo: ‹Mɔ a tée Zyuridɛnw naa jeli í.›

³ Yawe mɔ Kolocɔlɔw tiimaa wi a kíni mɔ yɛ́ɛgi na, woro wi a syɛɛnfeleyi bee kálagi bi yirige yaà mɔ yɛ́ʔɛ ma, mɔ si yi tɛ́ɛgi taa, Zyozuwe wi a kíni mɔ yɛ́ɛgi na àmɛɛ Yawe gi joo lè.

⁴ Gee Yawe kpéʔele lè Amɔri ye fànʔafɔbèle na, pe lè Sihɔn, ní Ogi, ní be tári na n be kálagi lè, koro félegi wi a kpéʔele syɛɛnfeleyi bee na.

⁵ Yawe a be le yele kɔ́yi ni, yele a gi kpéʔele be na bi yɛlɛ ní kajoodɛɛngèle myɛ ní mii joo yele ma lè.

⁶ Ye nìrimɛ le, yé lòmaana le! Yele a kɔ́ ra fɛ̀ɛgí sáā cɛ̀lɛ́ pe yɛʔɛ̀ ma í. Níì cán Yawe mɔ Kolocɔlɔw tiimaa i táanri ní mɔ ní. Wi a tée mɔ yaʔa í, wi a mɔ cée í.»

⁷ Koro kàdoʔo ma a Mowizi Zyozuwe yeri níì gi joo wi ma Isirayɛli ye myɛ nyɛ́nɛ na níì jo: «Nìrimɛ le, mí lòmaana le. Níì cán mɔ wi a jée ní syɛ́ɛnbèle naa ní tári ni, dee kéele na Kolocɔlɔɔ kàli be toolɛɛbèle ma níì jo woro a di kaan be ma lè, mɔ wi a di lɛɛ be na di pye be kɔrigɔ.

⁸ Yawe tiimaa wi táanri mɔ yɛ́ɛgi na, woro wi a pye ní mɔ ní, wi a tée mɔ yaʔa í, wi a mɔ cée í. Mɔ a kɔ́ ra fɛ̀ɛgí í, zɔ̀nviige a kɔ́ ra mɔ kɔɔn í.»

Làlwaw wéle-mí-joolo yɛʔɛlɛ kɔrɔsiin o kɔrɔsiin wóli na

⁹ A Mowizi làlwaw bee sɛ́bɛ, níì wi kaan sáriga-wòlobèle ma pe lè Levii jáabèle, poro bele be pye lè Yawe joogaanni kásu tugofɔɔlɔ, ní wɔ́ɔ̀ wi kaan Isirayɛli wólɛɛbèle myɛ ma.

¹⁰ A Mowizi syɛ́ɛnri naa joo n gbàn be ma níì jo: «Yɛ̀ʔɛlɛ kɔrɔsiin o yɛ̀ʔɛlɛ kɔrɔsiin ga kwɔ́ɔ, ki ga pye fwɔ́ɔgèle yaʔala yɛ́ɛlɛ na, Kpáagèle Láara Tɛ́ɛnnɛ fɛ́tii làla ni,

¹¹ lǎli ni Isirayɛli ye myɛw ga pan lè n baa yére Yawe mɔ Kolocɔlɔw yɛ́ʔɛ ma, tɛ́ɛgee ni wi ga nyɛ́nɛ n wòlo lè, mɔ a làlwaw bee syɛ́ɛnrɛ wéle joo Isirayɛli ye myɛ yɛ́ʔɛ ma pe di lóʔo.

¹² Mɔ a syɛ́ɛnbèle kpóʔoro, nǎnbèle, ní cébèle, ní pìíbèle, ní nibɔnw wi baa tɛ́ɛn ní mɔ ní mɔ tɛ́ɛgi ni lè, koro ga pye pe di lóʔo si tamana taa bàā fɛ̀ɛgí Yawe mɔ Kolocɔlɔw na, si làlwaw naa syɛ́ɛnrɛ myɛ cò sáā di kpéʔele.

¹³ Pe pìíbèle bele be lè pe da làlwaw naa cán í, poro a wi syɛ́ɛnri lóʔo, si tamana taa bàā fɛ̀ɛgí Yawe yele Kolocɔlɔw na lǎlee myɛ ni yele a kwɔ́ɔ lè tári ni, dee yele a Zyuridɛnw jeli bi sa syɔɔ taa lè.»

Isirayɛli ye a ba kàdoʔo wáa Kolocɔlɔɔ ma

¹⁴ A Yawe gi joo Mowizi ma níì wi pye: «Wéle, mɔ cânguugi gi nùuni gee, Zyozuwe yeri ye ba yére syɛ́ɛnmi tɛɛfaraga fànikpaʔa ni, mii a ba mii tundunri joo wi ma.» A Mowizi ní Zyozuwe kári n sáà yére Syɛ́ɛnmi Tɛɛfaraga fànikpaʔa ni.

¹⁵ A Yawe wiyɛɛ dɛ̀ɛn fànikpaagi ni fàfaantɔnɔgɔ ni. Fàfaantɔnɔgi maa baa yére fànikpaagi kpaaweele na.

¹⁶ A Yawe Mowizi pye: «Wéle, mɔ wi a kùu wee, táree ni syɛ́ɛnbèle naa a jée lè, pe a yìri bàā kanɔnʔɔri kpéʔele ní kolocɔlɔ-nibɔnbèle ní. Pe a mii cée si wɔ́ɔ mii joogaanni kálagi, lee mii kpéʔele ní be ní lè.

¹⁷ Cángi bee na mii fundanʔari a cò naà be kánmi na, mii a be cée, si mii yɛ́ɛgi làriga be na. Pe a be káa. Wɔʔɔyɔ saʔa ní kálagila saʔa a nan be na. Pe a ra gi nyuu cángi bee na si jo: ‹Amɛɛ kapeeyi naa wolo taa lè, gee bee ga taa ncan wolo Kolocɔlɔw o nyɛ wolo níngi ni í ì?›

¹⁸ Mii si na, mii a tɔ̀nɔ́ mii yɛ́ɛgi làriga cángi bee na, kapeeyi myɛ kéele na pe a kpéʔele lè, pe wàli-mí-kárili kéele na kolocɔlɔbèle pèle nikwɔɔlɔ ma.

¹⁹ Tɔ́ɔliw ni ye ŋúnugi naa sɛ́bɛ, mí Isirayɛli ye tama gi na. Ki le be nyɔ́ɔyi ni, koro ga pye ŋúnugi naa í pye séera mii ma Isirayɛli ye kánmi na.

²⁰ Níì cán mii a be lége tári ni, dee kéele na mii kàli be toolɛɛbèle ma níì jo mii a di kaan be ma lè, táraa dii, dee di nyìn nɔ́nɔw ní sárigi na ni fóo lè. Pe a ra líi bàā tíngi bi kpólo pòlogo, koro kàdoʔo ma pe a wàli bi fala kolocɔlɔbèle pèle nikwɔɔlɔ ma bi sa ra be kpɔ̀ʔɔrɔ́, sáā mii faari, si mii joogaanni kálagi.

²¹ Lǎli ni kapeeye saʔa, ní wɔʔɔyɔ saʔa ga nan be na lè, ŋúnugi naa a pye séera be kánmi na, níì cán ki a fɛ̀ʔɛ be yòdaʔayi ni í. Ncan gee gi nyɛ be fúnyi ni lè, mii n gi cán n kwɔ́ɔ níjanʔa sáni mii í be lége lè tári ni, dee kéele na mii kàli be ma lè.»

²² A Mowizi ŋúnugi naa sɛ́bɛ cángi bee na níì Isirayɛli ye tama gi na.

²³ A Yawe syɛ́ɛnri naa joo n gbàn Nun jáaw Zyozuwe ma níì jo: «Nìrimɛ le mí lòmaana le, níì cán táree kéele na mii kàli Isirayɛli ye ma níì jo mii a di kaan be ma lè, mɔ wi a be lége di ni. Mii tiimaa si a pye ní mɔ ní.»

²⁴ Lǎli ni Mowizi làlwaw naa syɛ́ɛnrɛ sɛ́bɛ n foro lè sɛ́bɛ ni, fwɔɔ n baa nan di kwɔ́ɔmi na,

²⁵ a wi syɛ́ɛnri naa joo n gbàn Levii ye ma, poro bele be Yawe joogaanni kásu tugu lè, níì jo:

²⁶ «Ye sɛ́bɛw naa láa wi lè làlwaw wóo, ye wi tɛ́ʔɛ Yawe yele Kolocɔlɔw joogaanna kásu lɛ̀ʔɛlɛ ni, wi a pye yaà beè séera yele kánmi na.

²⁷ Níì cán mii n mɔ céemi kéele ní mɔ sinloʔomi kéele cán. Kapye n mii yaʔa naa woweeo ní ní yele ní, yele i sìnloʔomi kpéʔele ní Yawe ní, mii ga kùu, koro wóʔo a náa tóro ì?

²⁸ Ye yele syɛɛnfeleyi wólɛɛbéle myɛ, ní yele kùndigibèle kpóʔoro naa mii yɛ́ʔɛ ma, mii a ba syɛ́ɛnri naa joo pe nyɛnɛ̀ na pe di lóʔo. Mii a nyɛ̀ʔɛni ní tári yeri di pye séera be kánmi na.

²⁹ Níì cán mii n gi cán mii kùúw kàdoʔo ma yele a yeyɛɛ gálagi péw, si wàlí yiri kólogi ni mii tɛ̀ɛn yele na lè. Wɔʔɔgi a nan yele na cányee ni yi maa lè, lǎli ni yele ga ba ni gi kpéʔele, gee gi pee Yawe nyɛ́nɛ na lè fwɔɔ n wi fúngi tanʔa ní yele kɔ́yi kapyegèlē ní.»

Mowizi ŋúnugi

³⁰ A Mowizi ŋúnugi naa syɛ́ɛnrɛ joo fwɔɔ n sáà nan di kwɔ́ɔmi na jàngó Isirayɛli syɛɛnkpoʔolomi myɛ í di lóʔo.