Làlwaw Kaanziin 30 - Cebaara Bible 2010

Isirayɛli ye a ní lúru pan Yawe ma

¹ «Lǎli ni syɛ́ɛnri bee myɛ ga baa foro mɔ na lè, ti lè dùbaw, ní dángaw kèlē mii tɛ́ʔɛ mɔ yɛ́ʔɛ ma lè, mɔ ga sɔ̀ngi n taa ge na n mɔ yaʔa syɛɛnfeleyi myɛ nínge ni, yoro yee ma Yawe mɔ Kolocɔlɔw a mɔ nɛnɛ bi tórigo lè,

² mɔ ga lúru n pan Yawe mɔ Kolocɔlɔw ma, mɔ ga ni lúro wi ma ní mɔ zɔnw myɛ, ní mɔ fúngi myɛ ní, gee bee n jo mɔ ní mɔ jáabèle, n yɛlɛ ní gee myɛ ní mii nyuu ni gbàngí mɔ ma lè níjanʔa,

³ lǎli bee ni Yawe a nyinimɛ taa mɔ na si ní mɔ wóbèle lúrugo be pan, poro bele pe a cò bi kári lè. Syɛɛnfeleyee nínge ni wi a yele cariga bi tórigo lè, wi a ní yele yirige yaà, yee bee myɛ nínge ni bi kpóʔoro.

⁴ Alí pe ga kári ní yele ní n sáà nan nyɛ̀ʔɛni láʔala na, Yawe yele Kolocɔlɔw a yele kpóʔoro bi yirige yaà beè bi pan ní yele ní.

⁵ Táree mɔ tóolɛɛbèle da taa lè, Yawe mɔ Kolocɔlɔw a lúru pan ní mɔ ní di ma, mɔ a ní ba di taa di pye mɔ wóro. Wi a kacànna kpéʔele yele na, si yele yaʔa yele í nɛʔɛ bi sɔ̀lɔ yele tóolɛɛbèle na.

⁶ Yawe mɔ Kolocɔlɔw a mɔ ní mɔ yodaʔayi kɛ́nɛ fúnyi ni, koro ga pye Yawe mɔ Kolocɔlɔw kéele í mɔ dɛ́nɛ ní mɔ zɔnw myɛ, ní mɔ fúngi myɛ ní, jàngó mɔ í kòro sìi na.

⁷ Yawe mɔ Kolocɔlɔw a dángaw bee kèlē myɛ lúrugo cáan mɔ nigoobèle na, poro bele be mɔ para lè, ní i mɔ wɔʔɔ.

⁸ Mɔ si na, mɔ a lúru pan, mɔ a ba ra lúro Yawe ma. Kajoodɛɛngèle mii nyuu mɔ ma lè níjanʔa, mɔ a ba ra ke myɛ kpéʔele.

⁹ Yawe mɔ Kolocɔlɔw a mɔ kɔ́yi fáli báriga bi mɔ tín yacanri na, wi a mɔ láagi pìibēle, ní mɔ yaweeri pìibēle, ní mɔ tásaligi yasanra pye di nɛʔɛ. Níì cán ki a ní pye Yawe fúngi kanidaanna bi ní kacànna pye mɔ na àmɛɛ ki da wi dɛ́nɛ bi kacànna pye mɔ tóolɛɛbèle na lè,

¹⁰ mɔ ga tɛ́nɛ̀ fɔ̀lɔ ni Yawe mɔ Kolocɔlɔw jóomɔ lúro, níì kajoodɛɛngèle naa, ní kajoogèle naa sámaga n cò, gele ge sɛ́bɛ lè làlwaw naa sɛ́bɛ ni, ní wɔ́ɔ̀ lúru n kàri Yawe mɔ Kolocɔlɔw ma ní mɔ zɔnw myɛ, ní mɔ fúngi myɛ ní.

Kolocɔlɔɔ syɛ́ɛnri n nùuni mɔ na

¹¹ «Tundunri naa mii nyuu mɔ ma lè níjanʔa, ti ga gbàn n sɔ̀lɔ mɔ fangi kánma na í wàlá n léeli mɔ na í.

¹² Ti o nyɛ nyɛ̀ʔɛni ni í jàngó mɔ í kɔ́ jo: ‹Wìí syɔ́ɔn wi a lúgu wolo ma nyɛ̀ʔɛni na bi sa di syɔɔ bi ba joo wolo ma jàngó wolo í da di kpéʔele?›

¹³ Ti wɔ́ɔ o nyɛ sólomi lɔ̀ʔɔ jeligɔgee na í jàngó mɔ í kɔ́ jo: ‹Wìí syɔ́ɔn wi a sólomi lɔ̀ʔɔ jeli wolo ma, bi sa di syɔɔ ba joo wolo ma jàngó wolo í da di kpéʔele?›

¹⁴ Níì cán syɛ́ɛnri i nyɛ mɔ taana, ti i nyɛ mɔ nyɔ́ɔgi ni, ní mɔ zɔnw na, jàngó mɔ í ra táanri di na.

Sìíw nyɛ́nɛ mi wòlo

¹⁵ «Wéle, mii n sìíw ní kacǎnni tɛ́ʔɛ mɔ yɛ́ʔɛ ma níjanʔa, ní wɔ́ɔ̀ kùúw ní kapeegi tɛ́ʔɛ mɔ yɛ́ʔɛ ma.

¹⁶ Níì cán mii n gi joo n gbàn mɔ ma níjanʔa níì jo mɔ í Yawe mɔ Kolocɔlɔw kéele yaʔa li mɔ dɛ́nɛ, máā wi kóloyi táanri, mi wi kajoodɛɛngèle, ní wi làlwaw kèlē, ní wi tundunri sámaga mi cò, koro ga pye mɔ í kòro sìi na, yele sáā nɛʔɛgi, Yawe mɔ Kolocɔlɔw si dùbaw taʔa mɔ na tári ni, dee ni mɔ a sa jée lè bi di syɔɔ taa.

¹⁷ Kàjáa mɔ fúngi ga wàli n láʔa, kapye mɔ ga fɔ̀lɔ ni lúro í, pe ga mɔ lɛ́ɛlɛ a mɔ sa ni tuun kolocɔlɔbèle pèle nikwɔɔlɔ yɛ́ʔɛ ma ní i be kpɔ̀ʔɔrɔ́,

¹⁸ mii a gi joo tɛ̀ɛn yele na níjanʔa si yele pye yele a tɔ̀nɔ́ kálagi péw. Táree má yele a Zyuridɛnw jeli bi kári lè bi sa di syɔɔ taa, yele a cannɛʔɛyɛ kwɔ́ɔ di ni í.

¹⁹ Mii i nyɛ̀ʔɛni ní tári yiri níjanʔa di pye séera yele kánmi na, ncan mii n sìíw ní kùúw, ní dùbaw ní dángaw tɛ́ʔɛ mɔ yɛ́ʔɛ ma, ki si n yɛlɛ mi sìíw nyɛ́nɛ mi wòlo, koro ga pye mɔ í kòro sìi na, mɔ ní mɔ yodaʔayi ní,

²⁰ mí Yawe mɔ Kolocɔlɔw kéele yaʔa li mɔ dɛ́nɛ máā lúro wi ma, mí tan wi na. Níì cán woro wi nyɛ mɔ siiw, wi a mɔ cányi nɛʔɛ, koro ga pye mɔ í tɛ́ɛn tári ni, dee kéele na Yawe kàli mɔ tofɔlɛɛyi Abirahami, ní Izaaki, ní Zyakɔbi ma lè, níì jo woro a di kaan be ma.»