Làlwaw Kaanziin 3 - Cebaara Bible 2010

Ogi fǎngi syɔɔlɔ kéele

¹ «A wolo kolo n fala bi lúgu kári Basyan kólogi ni. A Basyan fànʔafɔw Ogi yiri ni wolo fàrá, woro ní wi syɛ́ɛnbèle myɛ ní, bi ba kapɛɛnnɛ kpúmɔn ní wolo ní, Edireyi ni.

² A Yawe mii pye: ‹Mɔ a kɔ́ ra fɛ̀ɛgí wi na í. Níì cán mii n wi le mɔ kɔ́yi ni, woro ní wi syɛ́ɛnbèle myɛ, ní wi tári ní. Mɔ a wi pye àmɛɛ mɔ Amɔri ye fànʔafɔw Sihɔn pye lè, woro wee wi pye lè wodɛ́ɛɔn ní Hɛsyibɔn ni.›

³ A Yawe wolo Kolocɔlɔw ní wɔ́ɔ̀ Basyan fànʔafɔw Ogi, ní wi syɛ́ɛnbèle myɛ le wolo kɔ́yi ni. A wolo wi jáa, wolo ga wi syɔɔnwaa nibin yaʔa a wi syɔɔ í.

⁴ A wolo wi kěyi myɛ syɔɔ n taa lǎli bee ni, kàʔa nibin ga kòro yi ni, gee gi lè wolo ga gi syɔɔ n taa í, Arigɔbi tɛ́nɛmi myɛ kèye togoye taanri yi lè Ogi fǎngi tɛ́nɛmɛ myɛ, Basyan ni.

⁵ Tòdɔnɔyɔ, ní kɔ̀riyɔ, ní yasɔʔɔyɔ maa pye kěyi bee myɛ na. Tòbēle fun keyaa saʔa n wɔ́ɔ̀ pye yaà.

⁶ A wolo be kálagi n kwɔ́ɔ péw àmɛɛ wolo gi kpéʔele Hɛsyibɔn fànʔafɔw Sihɔn na lè. Wolo n kěyi syɛ̀ɛnnɛ myɛ kálagi n kwɔ́ɔ péw, nǎnbèle, ní cébèle, ní pìíbèle.

⁷ Kàjáa wolo n yaweeri myɛ, ní kěyi yárira koli n kòro ní di ní.

Galaadi tári lɛɛlɛ kéele

⁸ «Kánmi bee na wolo Zyuridɛn canʔafolomɔ tári nɛnɛ n syɔɔ lǎli bee ni Amɔri ye fànʔafɔbèle siin ma n séli Arinɔn lòcoologi na níì kári fwɔɔ n sáà nan Hɛrimɔn nyanbelegi na.

⁹ Siidɔn ye i Hɛrimɔn yiri Siriyɔn, Amɔri ye si i gi yiri Seniiri.

¹⁰ A wolo dǎndamagi tɛɛfiige kèye myɛ syɔɔ n taa, ní Galaadi myɛw, n fàra Basyan myɛw na, n kári fwɔɔ n sáà nan Salika ní Edireyi na, yi lè Ogi fǎngi kèyaa, Basyan ni.

¹¹ Basyan fànʔafɔw Ogi nibin wi da baa kòro Erefa ye ni. Wi yasinɛgi maa pye tunmɔrɔ wóʔo. Koro gi yaà gee Arabati ni, ki lè Amɔn ye kèkpɔɔgi. Ki tɔnɔganmi maa pye mɛ́tiribéle sicɛrɛ ki kpɔ́ʔɔganmi si i nyɛ mɛ́tiribéle siin félege.

¹² A wolo tári bee syɔɔ n taa lǎli bee ni n séli yaà Aroyɛɛri na wi nyɛ lè Arinɔn lòcoologi nyɔ́ɔ na, ní Galaadi nyanbeleyi kúlo tára tíla, ní di kěyi ní. A mii tɛ́ɛgi bee kaan Wurubɛn ye ní Gadi ye ma.

¹³ Galaadi tásanri di kòro lè, n fàra Basyan myɛw na, ti lè Ogi fǎngi tɛ́nɛmɛ, a mii dee bee kaan Manase syɛɛnfelegi tíla ma. Gee bee n jo Arigɔbi tári myɛ, ní Basyan myɛw. Koro pe da ni yiri Erefa ye tári.

¹⁴ A Manase jáaw Yayiiri Arigɔbi tári myɛ syɔɔ fwɔɔ n sáà nan Gesyuri ye, ní Maaka ye tári láʔagologo na. A wi wiyɛɛ mɛ́ɛgi taʔa Basyan vǒyi na, ni yi yiri Yayiiri vǒyi, fwɔɔ n baa nan níjanʔa na.

¹⁵ A mii Galaadi kaan Makiiri ma.

¹⁶ A mii táraa kaan Wurubɛn ye ní Gadi ye ma n séli Galaadi na n kári fwɔɔ n sáà nan Arinɔn lòcoologi na, a gi níngi tɛ́ʔɛ pye láʔagologi, ní níì kári fwɔɔ n sáà nan Yabɔki lòcoologi na, ki lè Amɔn ye láʔagologi.

¹⁷ A mii wɔ́ɔ tɛɛfiigi kaan be ma gi tɛɛ̀laʔali li pye Zyuridɛn, n séli Kinerɛti na níì kári fwɔɔ n sáà nan tɛɛfiigi Solomɔ Lɔ̀ʔɔ na, ki lè Solonɛʔɛmi Lɔ́ʔɔ Cábikpɔʔɔ, Pisiga nyanbelegi tìgimɛ ni, canʔafolomɔ ma.

¹⁸ Lǎli bee ni a mii tundunri naa joo n gbàn yele ma níì jo: ‹Yawe yele Kolocɔlɔw n tári naa kaan yele ma, jàngó di pye yele wóro. Yele bele myɛ ye nyɛ lè kapɛɛnkpumɔn-nǎnbèle yele a yele kapɛɛnkpumɔn-yáriri láa bi kíni yele senyɛnbèle Isirayɛli ye yɛ́ɛgi na bi Zyuridɛnw jeli.

¹⁹ Yele cébèle ní yele pìíbèle, ní yele yaweeri yagana a kòro naa kěyi ni, yee mii kaan yele ma lè. Mii n gi cán yaweenɛʔɛrɛ i nyɛ yele ma.

²⁰ Yele a kòro yaà fwɔɔ bi taa Yawe i ba ŋɔ́ndaala kaan yele senyɛnbèle ma wɔ́ɔgēle àmɛɛ wi li kaan yele ma lè, táree Yawe yele Kolocɔlɔw a kaan be ma lè Zyuridɛn jeligi na. Koro kàdoʔo ma, yele myɛ nibin nibin si naa lúru pan yele tɛ́ɛyi ma, yee mii kaan yele ma lè.›

²¹ Lǎli bee ni a mii gi joo n gbàn Zyozuwe ma níì jo: ‹Gee Yawe yele Kolocɔlɔw kpéʔele fànʔafɔbèle naa siin na lè, mɔ nyapiigèle n ki myɛ nyaa. Kánmi bee na Yawe a wɔ́ɔ gi kpéʔele fǎnyi myɛ na, yee má mɔ a jeli bi kári lè.

²² Yele a kɔ́ ra fɛ̀ɛgí be na í níì cán Yawe yele Kolocɔlɔw tiimaa i kapɛɛnni kpúmɔn ni kaangi yele ma.›

Mowizi a jée Kanaan ni í

²³ «Lǎli bee ni a mii Yawe nyɛ́ɛri gbanʔama níì jo:

²⁴ ‹Kàfɔw Yawe, mɔ n séli ni mɔ kpɔ́ʔɔganmi, ní mɔ séekpɔɔw kɔ́lɔ tèé mɔ falipyew na. Níì cán kolocɔlɔwìí wi yaà nyɛ̀ʔɛni na, wàlá naa tári na bi gbǎn mɔ kapyegèle, ní mɔ kakpolo-kpèleyi félege kpéʔele?

²⁵ Mii i mɔ nyɛ́ɛri, mii i caa bi jeli kári sa tácǎnri bee nyaa, ti lè Zyuridɛn jeligɔgee na, nyanbeleye kúlo tácǎnri bee, ní Liban.›

²⁶ Kàjáa Yawe fúngi maa tanʔa mii kurugo gbanʔama yele kéeli na. Wi ga lóʔo mii ma í. A Yawe mii pye: ‹Ki n yɛlɛ nya, mɔ a ní kɔ́ joo ní mii ní kéeli bee na í.

²⁷ Lúgu Pisiga nyanbelegi ǹjoʔo ni, mí mɔ nyapiigèle le canʔajeemɛ, ní solomɔkulo, ní wòrogulo, ní canʔafolomɔ kabangi ni mi sámaga mi wéle. Níì cán mɔ a Zyuridɛnw naa jeli í.

²⁸ Mɔ tundunri joo mi gbàn Zyozuwe ma mi nìrimɛ le wi ni, mi fànʔa le wi ni. Níì cán woro wi a kíni syɛ́ɛnbèle naa yɛ́ʔɛ na bi Zyuridɛnw jeli. Táree mɔ a nyaa lè, woro wi a sa di kaan be ma di pye pe worò.›

²⁹ A wolo tɛ́ɛn n kòro jǐnlɔgi ni, Bɛti-Peyɔɔri zǐnmi na.