Làlwaw Kaanziin 29 - Cebaara Bible 2010

Gee Kolocɔlɔɔ kpéʔele Isirayɛli ye ma lè

¹ A Mowizi Isirayɛli ye myɛw yeri ní baa be pye: «Yele n gi nyaa, gee myɛ Yawe kpéʔele yele nyɛ́nɛ na lè Ezyipiti tári ni, Faraɔnw, ní wi syɛɛnkpolobèle myɛ, ní wi tári myɛ na lè,

² gee bee n jo wɔʔɔgboloyi mɔ nyapiigèle nyaa lè, yi le fɛ̀ɛ́bèle bee, ní kakpolo-kpèleyi bee.

³ Kàjáa àlí fwɔɔ n baa nan níjanʔa na Yawe ga kɔ́ɔ̀ keele cánna fúnyo kaan yele ma í, wàlá nyapiigèlē, gele ní yele a ra nyaagi lè í, wàlá líiweegéle, gele ní yele a ra lúro lè í.

⁴ Mii n yele yɛ́ɛgi kíni fìími tára ni yɛ̀ʔɛlɛ togoye siin fúngo ni. Yele búroyi ga lɛɛ n sulugu n láʔa yele na í, taʔalayi yi nyɛ yele tɔ́lɔyi na lè, yi ga kálagi í.

⁵ Yele ga búru lìi í, yele ga dùvɛɛn wàlá sinmaa gbaa í, jàngó yele í gi cán bi cán mii wi nyɛ Yawe yele Kolocɔlɔw.

⁶ Yele baa nan tɛ́ɛgi naa na lè, Sihɔn wi lè Hɛsyibɔn fànʔafɔw, ní Ogi wi lè Basyan fànʔafɔw, a poro yiri n wolo fàra bi kapɛɛnni kpúmɔn ní wolo ní, a wolo be jáa.

⁷ A wolo be tári syɔɔ be ma níì di kaan Wurubɛn ye, ní Gadi ye, ní Manase syɛɛnfelegi tíla ma pe kɔrigɔ.

⁸ Koro na ye joogaanni naa syɛ́ɛnrɛ kɔn yáā táanri di na, koro ga pye yele kapyegèle myɛ í da nyɔɔgi.

Bi Kolocɔlɔɔ joogaanni kéele sámaga cò

⁹ «Yele myɛ ye nyɛ bele woyérebéle ní Yawe yele Kolocɔlɔw yɛ́ʔɛ ma níjanʔa, yele syɛɛnfeleyi kùndigibéle, ní yele wolɛɛbèle, ní yele sùlasiibèle kàfɔɔlɔ, yele Isirayɛli nǎnbèle myɛw,

¹⁰ ní yele pìíbèle, ní yele cébèle, ní nibɔnbèle be nyɛ yele tɛɛkòrogi ni lè, n séli mɔ kajecaaw na fwɔɔ n sáà nan mɔ lokoow na.

¹¹ Mɔ a jée Yawe mɔ Kolocɔlɔw joogaanna ni, lee Yawe mɔ Kolocɔlɔw kpéʔele ní mɔ ní lè níjanʔa ní kàliga ní,

¹² koro ga pye bi mɔ télege níjanʔa mɔ í pye woro syɛɛnfelege, woro tiimaa si pye mɔ Kolocɔlɔw àmɛɛ wi gi joo mɔ ma lè, ní àmɛɛ wi da kéeli bee joo ní kàliga ní mɔ tofɔlɛɛyi ma lè yi lè Abirahami, ní Izaaki, ní Zyakɔbi.

¹³ Yele yagwɔɔlɔ ní ban mii joogaanni naa kpéʔele ní kàligi ni í.

¹⁴ Kàjáa bele be naa lè wo níngi ni woyérebéle ní níjanʔa Yawe wolo Kolocɔlɔw yɛ́ʔɛ ma, ní bele be lè pe o naa woyérebéle ní í, li n wɔ́ɔ̀ kpéʔele ní bele bee ní.

¹⁵ Yele tiimaa n gi cán kánmee na wolo sáà tɛ́ɛn Ezyipiti tári ni lè, ní syɛɛnfeleyee nínge ni wolo sɔ̀lɔ lè n yi tári foro, yele n wɔ́ɔ̀ sɔ̀lɔganmi bee cán.

¹⁶ Yele n be yanɔnʔɔri nyaa n fàra be yasunyi na yi lè tíiri, ní kàdɛnɛri, ní wálifiiw, ní tɛ́ɛw wóyo, yoro yee yi nyɛ be ma lè.

¹⁷ Nànwaa wàlá cewaa wàlá tùlugaa wóo wàlá syɛɛnfelegaa ga yɛlɛ bi nyaa yele níngi ni, gee fúngo ki a wàli bi láʔa lè níjanʔa Yawe wolo Kolocɔlɔw na, si sa ra báara syɛɛnfeleyi bee kolocɔlɔbèlē ma í. Nìnge ga yɛlɛ gi nyaa yele níngi ni í, gee ni pɔ́sɔni, ní kòbi nyɛ lè í.

¹⁸ Syɛ́ɛnbèle ga kàligi bee syɛ́ɛnrɛ lóʔo n kwɔ́ɔ, syɔɔnwaa ga yɛlɛ bi wiyɛɛ gbɔ́ʔɔ wi fúngi ni í, si jo: ‹Mii a pye yɛɛ̀nyinge na, àlí mii ga ni táanri mii fúngi sɔ̀ngurɔ na,› si singbaadinri fàra lògbaalaagi na.

¹⁹ Yawe a fɔ̀lɔ bi wi kùsulugi syɔɔ í. Kàjáa Yawe fundanʔari ní wi yejaagi a cò nǎnw bee kánma na. Dánga kérigèle ge sɛ́bɛ sɛ́bɛw naa ni lè, gele bee myɛ a nan wi na. Yawe a wi mɛ́ɛgi kurugo yirige yaà nyɛ̀ʔɛni láara ni.

²⁰ Yawe a wi wàli bi yirige Isirayɛli syɛɛnfeleyi myɛ ni bi kaan wɔʔɔli ma bi yɛlɛ ní joogaanni dánga syɛ́ɛnrɛ myɛ ní di sɛ́bɛ lè làlwa-sɛ́bɛw naa ni.

Yawe a wi syɛɛngbanri foro

²¹ «Yìrigèle syɛ̀ɛnnɛ be maa lè, gee bee n jo yele pìíbèle pe a yìri yele kàdoʔo ma lè, ní nibɔnw wi a yìri táleelire ma lè, poro a ba tári bee wɔʔɔgɔ kele ní yáami nyaa, toro dee Yawe a tɛ́ʔɛ bi di kpúmɔn lè.

²² Pe a gi nyaa tári myɛ i nyɛ dìrigí, ní solomɔ, ní naà tɛ́ʔɛ, lùguro ní yasanra a pye yaà í, nyàā faala a ní da fíin yaà í. Ti a pye àmɛɛ Sodɔmi, ní Gomɔri, ní Adima, ní Seboyimi kěyi pye lè, yee Yawe da kálagi lè wi fundanʔari, ní wi fundanʔagbɔɔri báriga ni.

²³ Syɛɛnfeleyi myɛ a ra gi nyuu si jo: ‹Nyàʔá na Yawe tári naa cò còganmi naa na? Nyàʔá gi nyɛ fundanʔagbɔɔri naa gbànma nyúngo?›

²⁴ Pe a ra gi nyuu si jo: ‹Gee bee n pye níì cán joogaanni Yawe be tofɔlɛɛyi Kolocɔlɔɔ kpéʔele be ma lè, lǎli ni wi be yirige Ezyipiti tári ni lè, pe n lee bee yaʔa,

²⁵ ní àmɛɛ pe da ni syée n sa ni kolocɔlɔbèle pèle nikwɔɔlɔ kpɔ̀ʔɔrɔ́, ní i kpùmɔnɔ́ pe yɛʔɛ̀ ma lè, kolocɔlɔbèle be lè pe da be cán í, wi si da wɔ́ɔ̀ be kaan be ma pe lɛɛlɛ í.

²⁶ Gee bee na Yawe fundanʔari cò naà tári naa kánma na, dánga kérigèle myɛ ge sɛ́bɛ lè sɛ́bɛw naa ni, a wi gele bee cáan di na.

²⁷ A Yawe be kíle n kɔ́n n yirige be tári ni ní fundanʔara, ní funyìrire, ní fundanʔagbɔɔrɔ ní n wáa táraa nikwɔɔ ni àmɛɛ wo gi nyaa lè níjanʔa.›

²⁸ Kalaragèle i nyɛ Yawe wolo Kolocɔlɔw wòʔolo, kérigèle ge tɛ̀ɛn lè, koro si i nyɛ wolo ní wolo jáabèle wòʔolo làla o làla kwɔ́ɔmɔ fun, jàngó gee myɛ làlwaw naa joo lè wolo í da koro kpéʔele.